Likiitú fán Óm Letipeta

A kawor chómmóng kapasen emmwen usun ei mettóch nge esap iir meinisin ra álilliséch. Áwewe chék, kopwe rongorong án ekkóch repwe peseok óm kopwe chék amwéchú óm kechiw are kosap fókkun pwáraaló meefiom. Ekkóch repwe peseok óm kopwe fen uwawu me pwáraaló unusen masouen letipom. Nge ewe Paipel a áiti ngenikich eú ekiek mi itepék me rúúepek, eú ekiek ekkewe sou káé lón ei fansoun ra pwal tipeeú ngeni.

Lón eérenien ekkóch fénú, ese pwúng án emén mwán epwe kechiw. Nge itá epwe eú minen ássáw ach sipwe kechiw, pwal mwo nge mwen mesen aramas? Ekkewe sou káé napanapen ekiekin aramas, ra pwáraatá pwe pwúkún napanapen aramas ar repwe kechiw ika ra letipeta. Me ika kopwe pwáraaló óm letipeta, iwe ló, ló, ló, neman epwe tongeni álisuk óm kosap mwéchútiw lón óm chúúpwúl, nge kopwe fen mwékút inaamwo ika ka chúen meefi riáfféú. Nge óm pwouni meefiom neman epwe fen efeiengawok, esap fen álisuk. Áitien Paipel ese tipeeú ngeni alon ekkóch mi erá pwe ese pwúng án emén mwán epwe kechiw ren an letipeta. Áwewe chék, ekieki pwóróusen Jesus. Inaamwo ika a wor an manaman le amanawasefáli ekkewe mi máló, nge a chúen kechiw mwen mesen aramas lupwen chiechian we Lasarus a máló.​—Johannes 11:33-35.

Ekkewe chón letipeta ra kan tongeni meefi song, ákkáeúin ika a weiweitá málóón attongeer we. Mi wor chómmóng popun emén mi letipeta epwe tongeni meefi song, áwewe chék ika emén mi wor ésúfélún epwe ereni och kapas ese akkomw ekieki usun me ese wor lóngólóngun. Mike, seni South Africa a apasa: “A chék 14 ieri lupwen Papa a máló. . . . Wóón ewe felin mi má, emén néúwisin lamalamen Anglican a erá pwe a lamot ngeni Kot ekkewe aramas mi múrinné ina popun a mwittir angeiir pwe repwe nóm ren.a Ei mettóch a asongaei pún a fókkun lamot ngenikem án Papa epwe nóm rem. Iei, a fen mwirin 63 ier, nge alon na a chúen ámeteki letipei.”

Nge, ifa usun ar meefi mengiringir? Ákkáeúin ika emén attongean ewe mi letipeta a má seni lón weiweitá, iwe ewe mi letipeta epwe tongeni ekkekieki, ‘Itá esap tongeni fis ei ika ua chék féri en are ei.’ Are neman ewe sáingolóón atun oua chufengen me ewe emén a má sonuk oua áninifengen. Ei mettóch epwe tongeni efisi óm kopwe meefi mengiringir.

Ika ka kan riáfféú ren óm meefi mengiringir are song, mi lamot kosap amwéchú óm kana memmeef. Nge kopwe fen fós ngeni emén chiechiom epwe aúseling ngonuk me anúkúnúkuk pwe chómmóng chón letipeta ra kan eáni ekkena esin memmeef ese pwúng. Ewe Paipel a áchemangenikich pwe “eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.”​—Än Salomon Fos 17:17.

Jiowa Kot, ewe Chón Férikich, i ewe chiechi mi múrinné seni meinisin fán iten emén mi letipeta. Uwawu masouen letipom ngeni i lón iótek pún “i a ekieki met oupwe feiöch ren.” (1 Petrus 5:7) Pwal och, i a pwonei pwe An ‘kinamwe mi tekia seni ach tongeni weweiti epwe tümwünü leluken me ekiekin’ chókkewe mi kul ngeni i. (Filipi 4:6, 7) Mut ngeni Kot an epwe álisuk óm kopwe kúna ourur seni an we Kapas ewe Paipel. Makketiw ekkewe wokisin lón Paipel mi oururuk. (Ppii ei pwóór lón ei lesen.) Ka pwal mwo nge tongeni amwéchúnnúkú ekkóch ekkena wokisin. Óm ekilonei ekkena pwóróus epwe ákkáeúin álilliséch ngonuk lepwin lupwen ka chék áláemén me a weires ngonuk óm kopwe annut.​—Aisea 57:15.

Kukkuto chék, emén mwán 40 ierin, sipwe eita ngeni Jack, pwúlúwan we a má seni ren kanser. Jack a erá pwe fán ekkóch a meefi watteen tipitipingaw. Nge a kúna álillis ren an iótek ngeni Kot. A erá: “Iteiten ai iótek ngeni Jiowa, ua meefi pwe use chék áláemén. Fán chómmóng ua nenneló lepwin me use tongeni annut sefál. Iwe ua álleani me ekilonei ekkewe pwóróus seni Paipel mi oururuei, me uwawu meefien letipei ngeni Kot lón iótek, mwirin ua meefi ewe sókkun kinamwe mi somwoló mi ekinamwei letipei me atufichiei ai upwe annut sefál.”

Emén fépwúl itan Vanessa, inan we a má seni ren an semmwen. I a pwal kúna manamanen iótek. A erá: “Lón ewe fansoun mi kon áweires ngeniei, ua chék kékkéri iten Kot we me poputá le kechiw. Jiowa a aúselinga ai kewe iótek me iteitan a aworato ewe péchékkúl mi lamot ngeniei.”

Ekkóch soufén fán iten chókkewe mi letipeta ra fénér ar repwe achocho le álisi aramas, are awora ar fansoun le álisi aramasen lón leenier. Ar féri ena a tongeni atoto ngeniir pwapwa me ekisikisaaló ar letipeta. (Föför 20:35) Chómmóng Chón Kraist mi letipeta ra kúna pwe ar álisi aramas a fókkun oururuur.​—2 Korint 1:3, 4.