Malongeso a Mukanda Wakuzachisa ha Kukunguluka cha Mwono ni Mulimo Wetu
2-8 MAIO
YIKUMA YILEMU YA MU LIJI LIA ZAMBI | 1 SAMUELE 27-29
“Malinjekela a Ndawichi Hakwasa Jita”
it-1 165
Akishe
Ha yisuho yaali muze Ndawichi te anachina Saulu, yawana uchinyino kuli Mwanangana Akishe. Ha chisuho chitangu, muze Akishe amumwene ngwe mukwa kole yo, Ndawichi yalionga ngwe kanazaluka, mba iye yamwecha hanga aye kwenyi ngwe mutu wangwaza. (1Sa 21:10-15; Sam 34:Maliji a helu; 56:Maliji a helu) Ha chisuho chamuchiali, Ndwichi kayile ni tujita 600 hamwe ni asoko jenyi, mba Akishe yamwaha Zikalage hanga atwameko. Ha mwaka umuwika ni tukweji awana muze Ndawichi apwile mu Zikalage, Akishe kapwile ni kutayiza ngwo malunga ja Ndawichi kakushiha atu a mu yihunda ya Yunda, alioze Ndawichi te kakupupa A-Ngeshure, A-Ngezere ni A-Amaleke. (1Sa 27:1-12) Ndawichi yonga kanawa Akishe, hachino, Akishe yamusa ngwe kalayi kenyi, muze A-Filistea te analilulieka hanga aye ni kwasa jita ni Mwanangana Saulu, “tupitau twa A-Filistea” yatuma kuhilwisa Ndawichi ni malunga jenyi ku Zikalage. (1Sa 28:2; 29:1-11) Muze Ndawichi apwile mwanangana iye yasa jita ni kulimika ni a Ngata, alioze kota kakashile Akishe. Iye katwamine ni mwono ndo muze Solomone aputukile kuyula.—1Mi 2:39-41; tala GATE.
(1 Samuele 27:5-7) Ndawichi yamba kuli Akishe ngwenyi, Nyi nunanguvwila vumbi, ngwehenu chihela mu limbo limwe lia mu yambu ngukatwameko, mumu kuchalitele yami kavumbi kenu kutwama mu mbala hamwe ni yenu. 6 Kashika ha tangwa lize Akishe yamwaha Zikalage. Ha chikuma chino Zikalage yapwa ya mbala ya mianangana ja A-Yunda ndo musono. 7 Kwalula matwanga ja Ndawichi mu chifuchi cha A-Filistea apwile kumi lia tukweji ni tukweji asambano.
(1 Samuele 27:8, 9) Ndawichi ni malunga jenyi ayile nikupupa A-Ngeshure, ni A-Ngezere, ni A-Amaleke, mumu chize ku shakulu, ano e akwa chifuchi; chize kuze kwakuya ku Shure ndo ku chifuchi cha Engitu. 9 Ndawichi yapupa chifuchi. Kahichikile ni mwono chipwe lunga chipwe pwo, alioze yambata mapanga, ni ngombe, ni yimbulu, ni tumelu, ni mazalo, yahiluka kuli Akishe.
Akweze—Yika Nwatamba Kulinga mba Akwenu Anujikijile?
8 Tala nawa kapinda mukwo yoze Ndawichi apalikile. Hanyima lia kumusakula hanga apwe mwanangana mu Yunda, Ndawichi kanakashimbwila miaka yinji mba aputuke kuyula. (1 Samue. 16:13; 2 Samue. 2:3, 4) Muze te anashimbwila, yika yakwashile Ndawichi kupwa chihomboloji? Shimbu anenganyane, iye yalihulikila ha yize te mahasa kulinga. Chakutalilaho, muze apwile mu njiza ya A-Filistea, Ndawichi yazachisa uhashi wacho hanga ase jita ni akwa-kole ja A-Izalele. Hakulinga chino, iye yafunga njiza ja Yunda.—1 Samue. 27:1-12.
(1 Samuele 27:10-12) Muze Akishe mamuhula ngwenyi, Waze wapupanga musono aya? Ndawichi wambile ngwenyi, Napupanga Nengeve ya A-Yunda, hanji ngwenyi, Napupanga Nengeve ya A-Jeramila, hanji ngwenyi, Napupanga Nengeve ya A-Kene. 11 Ndawichi kahichikile niumwe ni mwono chipwe lunga chipwe pwo akanehe lusango ku Ngata. Mumu kananyongo ngwenyi, Kuchina matwambulula ngwo, Ndawichi chocho akulinga. Ndako yenyi chocho yapwile shimbu lieswe atwamine mu chifuchi cha A-Filistea. 12 Akishe wafulielele Ndawichi mumu wanyongene ngwenyi, Iye hanalipwisa mukwa kole wahiana kuli atu jenyi A-Izalele kashika mapwa kavumbi kami miaka yeswe.
it-2 808 ¶5
Mahuza
Chipwe ngwe mahuza kali api kulita ni Mbimbiliya, chino kuchalumbumukine ngwo mutu katamba kulweza sango ja mwenemwene kuli waze keshi ni ulite wa kujinyingika. Yesu Kristu kambile ngwenyi: “Kanda nuhana yuma yisandu kuli tuwa, chipwe kanda numbila kakanga kenu kumeso ja ngulu kuchina hanji mamuliata ni sende jo, mba matewuluka anupapulule.” (Mat 7:6) Kashika Yesu ha yisuho yimwe, kakalwezele sango jeswe hanji kukumbulula yihula yimwe, muze apwile ni kumona ngwo chino muchihasa kuneha ponde. (Mat 15:1-6; 21:23-27; Yo 7:3-10) Kota Apalahama, Izake, Rahape ni Elisha no kakapwile ni kulweza atu waze te keshi kuwayila Yehova umwe lusango mumu lia ponde hanji kapinda.—Upu 12:10-19; kapitulu 20; 26:1-10; Yos 2:1-6; Tia 2:25; 2Mi 6:11-23.
Kuhengwola Yikuma Yilemu ya mu Mbimbiliya
(1 Samuele 28:15) Samuele yamba kuli Saulu ngwenyi, Kuchi te hiwangusakalisa nikunguvumbula? Saulu ngwenyi, Ngunapinji chikolo. A-Filistea kanase jita ni yami. Zambi hanangumbu nyima; kangukumbulwile nawa, chipwe kuli aprofeta chipwe ku yilota, kashika hinakusanyika ungulweze chize changutamba kulinga.
Shina Afu Mahasa Kukwasa Atu Waze Ali ni Mwono?
Tunyongenu ha chino. Mbimbiliya yinambe ngwo muze mutu akufwa kakuhiluka “ku mavu,” nawa “tangwa lioliene manyonga jenyi majimuka.” (Sam 146:4) Saulu ni Samuele te kananyingika ngwo Zambi keshi kuzanga atu waze akuhanjika ni akwa tufutafuta. Ha mashimbu amwe kunyima, Saulu katumine kupupa yuma yeswe ya tufutafuta mu chifuchi!—Lev 19:31.
Tunyongenu nawa hakehe. Nyi profeta washishika Samuele, ha shimbu liacho kapwile ni mwono ngwe spiritu, shina iye te mahasa kwehuka shimbi ya Zambi hanga akwase pwo wacho mukwa tufutafuta aliwane ni Saulu? Yehova kalitunyine kuhanjika ni Saulu. Shina pwo mukwa mahamba, te mahasa kushinjila Zambi Mukwa-Ndundo-Jeswe hanga ahanjike ni Saulu kupalikila muli lufundu Samuele? Ka. “Samuele” wacho hi yoze ko profeta washishika wa Zambi. Iye te kanahanjika ni spiritu mupi, umwe ndemoniu yoze waliongele kupwa ngwe Samuele.
Kutanga Mbimbiliya
(1 Samuele 27:1-12) Ndawichi yamba mu mbunge yenyi ngwenyi, Limwe tangwa mangwonwona kuli Saulu. Chuma chipema chakuhi kuli yami shina kuchinyina ku chifuchi cha A-Filistea. Ako Saulu mujimuhwa ni kungufupa mu njiza ja A-Izalele mba mungwomboka ku moko jenyi. 2 Chocho Ndawichi yakatuka ni kulakaji asambano a malunga waze endele no, yaya kuli Akishe mwana wa Maoke mwanangana wa Ngata. 3 Ndawichi yatwama ni Akishe ku Ngata, iye ni malunga jenyi mutu mweswe mu zuwo lienyi, Ndawichi ni ma pwo jenyi aali, Ahinoame Ka-Yezerele, ni Abigale Ka-Karmela yoze wapwile te pwo lia Nabale. 4 Muze Saulu hevwa ngwo Ndawichi hachinyina ku Ngata kamufupile nawa. 5 Ndawichi yamba kuli Akishe ngwenyi, Nyi nunanguvwila vumbi, ngwehenu chihela mu limbo limwe lia mu yambu ngukatwameko, mumu kuchalitele yami kavumbi kenu kutwama mu mbala hamwe ni yenu. 6 Kashika ha tangwa lize Akishe yamwaha Zikalage. Ha chikuma chino Zikalage yapwa ya mbala ya mianangana ja A-Yunda ndo musono. 7 Kwalula matwanga ja Ndawichi mu chifuchi cha A-Filistea apwile kumi lia tukweji ni tukweji asambano. 8 Ndawichi ni malunga jenyi ayile nikupupa A-Ngeshure, ni A-Ngezere, ni A-Amaleke, mumu chize ku shakulu, ano e akwa chifuchi; chize kuze kwakuya ku Shure ndo ku chifuchi cha Engitu. 9 Ndawichi yapupa chifuchi. Kahichikile ni mwono chipwe lunga chipwe pwo, alioze yambata mapanga, ni ngombe, ni yimbulu, ni tumelu, ni mazalo, yahiluka kuli Akishe. 10 Muze Akishi mamuhula ngwenyi, Waze wapupanga musono aya? Ndawichi wambile ngwenyi, Napupanga Nengeve ya A-Yunda, hanji ngwenyi, Napupanga Nengeve ya A-Jeramila, hanji ngwenyi, Napupanga Nengeve ya A-Kene. 11 Ndawichi kahichikile niumwe ni mwono chipwe lunga chipwe pwo akanehe lusango ku Ngata. Mumu kananyongo ngwenyi, Kuchina matwambulula ngwo, Ndawichi chocho akulinga. Ndako yenyi chocho yapwile shimbu lieswe atwamine mu chifuchi cha A-Filistea. 12 Akishe wafulielele Ndawichi mumu wanyongene ngwenyi, Iye hanalipwisa mukwa kole wahiana kuli atu jenyi A-Izalele kashika mapwa kavumbi kami miaka yeswe.
9-15 MAIO
YIKUMA YILEMU YA MU LIJI LIA ZAMBI | 1 SAMUELE 30-31
“Litakamise Muli Yehova Zambi Ye”
w06 1/8 28 ¶12
Vwila Woma Yehova Hanga Uwahilile!
12 Woma uze Ndawichi apwile ni kuvwila Yehova, kuwakapwile wika wa kwecha kulinga yuma yipi. Woma wacho wamukwashile nawa hanga alinge yuma kanawa ni kupwa ni mana muze te anapalika mu kapinda. Muze Ndawichi achinyine Saulu, iye ni malunga jenyi yaya mu Zikalage mu chifuchi cha A-Filistea, kalingilemo mwaka umuwika ni tukweji awana. (1Sa 27:5-7) Limwe tangwa, muze Ndawichi ni malunga jenyi te keshiko, amwe malunga A-Amaleke yeza yocha chihunda yambata funge mapwo ni ana, hamwe ni yimuna jo. Muze Ndawichi ni malunga jenyi ahilukile, hakumona yize yalingiwileko yaaputuka kukololoka ni kulila. Yinyengo yize evwile yiyevwisa uli unji malunga ja Ndawichi, yazanga kumwasa mawe. (Yis 24:10) Mumu lia woma wa Zambi, iye “walitakamishine muli Yehova Zambi yenyi.” Ni ukwaso wa Zambi, Ndawichi ni malunga jenyi yakaula A-Maleke yatambula yuma yeswe yize ayo apupile.—1Sa 30:1-20.
(1 Samuele 30:1, 2) Ha tangwa liamuchitatu muze Ndawichi ni malunga jenyi haheta ku Zikalage, kumanyi A-Amaleke hananeha jita ku Nengeve ni ku Zikalage. Hanakumbu chihunda cha Zikalage nikuchocha kahia. 2 Hanakwata mapwo ni waze eswe apwilemo, ni akepe ni anene. Kashihile niumwe; yaambata eswe; yaya kwo.
(1 Samuele 30:3-5) Mba muze Ndawichi ni malunga jenyi ejile ku chihunda achiwanyine hachocha ni kahia, ni mapwo jo ni ano, a malunga ni a mapwo, hanaambata funge. 4 Ndawichi ni atu aze endele nenyi yakololoka ni kulila ndo kapwile nawa ni tachi ja kulila. 5 Ni mapwo aali a Ndawichi hanaambata funge; Ahinoame Ka-Yezerele ni Abigale yoze wapwile pwo lia Nabale wa ku Karmela.
(1 Samuele 30:6) Ndawichi walifwichile chikolo mu mbunge mumu e atu ambile kumwasa mawe, se atu eswe evwile kupiha mu mbunge mumu hali ana jo a malunga ni a mapwo. Alioze Ndawichi walitakamishine muli Yehova Zambi yenyi.
w12 15/4 30 ¶14
Yehova Kakutufunga Hanga Atulamwine
14 Ndawichi kapalikile mu yipikalo yinji ku mwono wenyi. (1Sa 30:3-6) Maliji jenyi kanasolola ngwo Yehova te kananyingika chize iye akwivwa. (Tanga Samu 34:18; 56:8) Zambi kananyingika kanawa chize twakwivwa. Muze mbunge yetu yakumakuka hanji twakupwa ni “spiritu ya kupihilila,” iye kakukundama kuli yetu. Kunyingika chino, chakututakamisa chinji, ngwe chize chatakamishine Ndawichi, mba ambe ngwenyi: “Munguwahilila ni chiseke mu utu wa zango lie, mumu hiwamona luyinda wami; hiwanyingika lamba lia mbunge yami.” (Sam 31:7) Alioze Yehova keshi kumona wika kapinda wetu, nawa kakulinga yuma yinji. Iye kakutukwasa ha kutulembejeka ni kututakamisa. Jila yimwe akuchilingila, yili kupalikila ha kukunguluka.
Kuhengwola Yikuma Yilemu ya mu Mbimbiliya
(1 Samuele 30:23, 24) Alioze Ndawichi yamba ngwenyi, Akwetu, kunuchi kulinga chocho ni chize Yehova hanatwehe. Iye hanatufungu, hanakunjika kuli yetu tujita waze ejile kulimika ni yetu. 24 Iya manupanjika ha chikuma chino? Chihanda cha yoze masala nikufunga yuma muchipwa chimuwika ni chihanda cha yoze maya ku jita. Matambula chimuwika.
w05 15/3 24 ¶8
Yikuma Yilemu ya Mukanda Utangu wa Samuele
30:23, 24. Chiyulo chino chinakatuka ha mukanda wa Kwalula 31:27, chinasolola ngwo Yehova kakulemesa waze akusa tachi hanga akwase akwo mu chikungulwila. Kashika, cheswacho mutulinga, twatamba kuchilinga “ni mbunge yeswe, chizechene ngwe kuli Mwene [Yehova], hi kuli atu ko.”—Kol 3:23.
Kutanga Mbimbiliya
(1 Samuele 30:1-10) Ha tangwa liamuchitatu muze Ndawichi ni malunga jenyi haheta ku Zikalage, kumanyi A-Amaleke hananeha jita ku Nengeve ni ku Zikalage. Hanakumbu chihunda cha Zikalage nikuchocha kahia. 2 Hanakwata mapwo ni waze eswe apwilemo, ni akepe ni anene. Kashihile niumwe; yaambata eswe; yaya kwo. 3 Mba muze Ndawichi ni malunga jenyi ejile ku chihunda achiwanyine hachocha ni kahia, ni mapwo jo ni ano, a malunga ni a mapwo, hanaambata funge. 4 Ndawichi ni atu aze endele nenyi yakololoka ni kulila ndo kapwile nawa ni tachi ja kulila. 5 Ni mapwo aali a Ndawichi hanaambata funge; Ahinoame Ka-Yezerele ni Abigale yoze wapwile pwo lia Nabale wa ku Karmela. 6 Ndawichi walifwichile chikolo mu mbunge mumu e atu ambile kumwasa mawe, se atu eswe evwile kupiha mu mbunge mumu hali ana jo a malunga ni a mapwo. Alioze Ndawichi walitakamishine muli Yehova Zambi yenyi. 7 Ndawichi yamba kuli sasendote Abiatare mwana wa Ahimeleke ngwenyi, Ngunehene ye efode. Abiatare yaneha efode kuli Ndawichi. 8 Ndawichi yahula Yehova ngwenyi, Ngukaule mbunga yino, nyi? Munguawana, nyi? Yamukumbulula ngwenyi, Kaula, muawana pundu mba mutambula nawa yuma yeswe. 9 Chocho Ndawichi yakatuka ni kulakaji asambano a malunga waze apwile no. Ahetele ku chitwetwe cha Bezore, kuze ahichikile amwe asale kunyima. 10 Ndawichi yaya nikukaula iye ni kulakaji awana a malunga. Kulakaji aali asalile kunyima. Te hijaahwa; kahashile kuzauka chitwetwe cha Bezore.
16-22 MAIO
YIKUMA YILEMU YA MU LIJI LIA ZAMBI | 2 SAMUELE 1-3
“Yika Twalilongesa ha Mwaso ‘wa Uta’?”
w00 15/6 13 ¶9
Lemesenu Waze Ali ni Chiyulo Hali Yenu
9 Shina Ndawichi kapwile ni kulipikala chinji muze te anamumwesa lamba? Ndawichi yakololoka kuli Yehova ngwenyi: “Akwa upupilo kakufupa mwono wami.” (Sam 54:3) Yazulula mbunge yenyi kuli Yehova ni kwamba ngwenyi: “Zambi yami, ngupulule kama kuli akwa kole jami . . . Akwa ndundo kakungukungulukila kulimika ni yami. Kuchapwile ha mulonga wami, hanji ha shili yami, Yehova. Kakuzomboka nikulilulika, chitela chakuhi. Laula kama ungukwase, uchitale kama.” (Sam 59:1-4) Shina limwe tangwa hiunalivu ngwe kanakumwesa lamba kuli umwe mutu yoze uli ni chiyulo, chipwe ngwe kuwamulingile nichimwe chuma chipi? Ndawichi kakechele kusolwela vumbi Saulu. Chipwe muze Saulu afwile, shimbu Ndawichi awahilile, iye yemba mwaso wa lungungu ngwenyi: “Saulu ni Jonata aazangile, apwile apema mu mwono wo, . . . Tambu lio liahianyine lia pupa, tachi jo jahianyine ja ndumba. Mapwo A-Izalele, lililenu Saulu.” (2Sa 1:23, 24) Ndawichi kasolwele chilweza chipema ha kuvumbika Saulu kavumbi wa Yehova wa kuwayisa, chipwe ngwe kapwile ni kumumwesa lamba!
(2 Samuele 1:17, 18, 23, 24) Ndawichi yalila mbimbi hali Saulu ni mwanenyi Jonata ni maliji wano. 18 Yatuma akalongese kuli A-Yunda mwaso wa uta. Hanachisoneka mu mukanda wa Njasha. Ngwenyi, 23 Saulu ni Jonata aazangile, apwile apema mu mwono wo, ni mu kufwa kaahandunwine. Tambu lio liahianyine lia pupa, tachi jo jahianyine ja ndumba. 24 Mapwo A-Izalele, lililenu Saulu, wanujikile kanawa ni mahina a ngengu, wanuselele yuma ya oru ya uhenya ha mazalo jenu.
(2 Samuele 1:25, 26) Akwa ndundo hanalimbuka chichize he hakachi ka jita! Jonata kanapombo wa kushiha ha manangamo je. 26 Yaya Jonata, ngunalifwichi mu mbunge mumu hali yena. Wapwile mupema chikolo kuli yami. Zango lie liapwile lia kukomwesa; liahianyine zango lia mapwo.
w12 15/4 10 ¶8
Kukunjika—Chili Chilayi Chize Chaputukile ku Mashimbu Akunyima!
8 Mbimbiliya yakuhanjika hakutwala kuli tuvumbi anji ashishika. Tutalenu yilweza yaali, nawa mutumona yize mutuhasa kulilongesa ha yilweza yacho. Tuputukenu ni lunga yoze washishikile kuli Ndawichi. Jonata, mwana mutangu wa Mwanangana Saulu, iye te mwe mahinga wata mu Izalele, alioze yikulingiwa yimwe. Yehova yasakula Ndawichi hanga ahinge wata mu Izalele. Jonata yavumbika chiyulo cha Zambi. Kakevwilile Ndawichi ukwa chipwe kumumona ngwe mukwa-kole yenyi. Alioze, “mbunge ya Jonata yiyilinunga ni mbunge ya Ndawichi,” yalakenya kushishika kuli iye. Chikwo nawa, Jonata yahana kuli Ndawichi mazalo jenyi, katana, uta ni muya wenyi hanga amulemese ngwe mwanangana. (1Sa 18:1-4) Jonata yalinga yize ahashile hanga atakamise Ndawichi, chipwe ngwe kapwile ni kulimika ni tato Saulu. Jonata yamba kuli Ndawichi ngwenyi: “Yena kumukapwa mwanangana wa Izalele ni yami mungukakuhata ha kota.” (1Sa 20:30-34; 23:16, 17) Kashika, muze Jonata afwile, Ndawichi yalinyenga chinji ha kwimba mwoso wa lungungu.—2Sa 1:17, 26.
Kuhengwola Yikuma Yilemu ya mu Mbimbiliya
it-2 421 ¶2
Yaya
Liji “yaya” linatale nawa hali waze alinunga mumu lia chimwe chikuma, hanji umwe mulimo. Chakutalilaho, Hirame Mwanangana wa Teru, kasanyikine Mwanangana Solomone ngwenyi mukwetu hanji yaya, hi mumu ko lia kupwa mwanangana, alioze kota mumu lia mapaya ni yuma yikwo yize apwile ni kuneha ya mu tembele. (1Mi 9:13; 5:1-12) Ndawichi yanyingika ngwenyi, hi wika ko mandumbu a musunya akupwa ni sambukila ni kulinunga hakachi ko, ha kusoneka ngwenyi: “Talenu cho kupema, cho kuwaha, muze mandumbu matwama hamuwika ni mbunge yimuwika.” (Sam 133:1) Kashika, Ndawichi kakasanyikine Jonata ngwenyi yaya mumu ngwo kapwile usoko, alioze mumu lia zango ni usepa upema uze apwile nawo. (2Sa 1:26) Waze akulikata ni chileya hanji ni mukwa-lwelia, kakwavuluka ngwo ana-kwo ni yayo.—Yis 18:9.
(2 Samuele 1:26) Yaya Jonata, ngunalifwichi mu mbunge mumu hali yena. Wapwile mupema chikolo kuli yami. Zango lie liapwile lia kukomwesa; liahianyine zango lia mapwo.
Kutanga Mbimbiliya
(2 Samuele 3:1-16) Jita yapwile ya miaka hakachi ka munyachi wa Saulu ni munyachi wa Ndawichi. Ndawichi wayile nikuliwezela tachi, alioze munyanchi wa Saulu wayile nikukokoloka. 2 Ndawichi wasemene ana a malunga mu Heprone. Mutangu iye Amnone, mwana wa Ahinoame, wa ku Yezerele. 3 Wamuchiali Chiliabe, mwana wa Abigale, yoze wapwile pwo lia Nabale wa ku Karmela. Wamuchitatu Absalome, mwana wa Maka, iye mwana wa Talamai, mwanangana wa Ngeshure. 4 Wamuchiwana Adonija, mwana wa Hagita. Wamuchitano Shefatia, mwana wa Abitale. 5 Wamuchisambano Itarime, mwana wa Egala, pwo lia Ndawichi. Wano Ndawichi waasemenene mu Heprone. 6 Shimbu lieswe lia jita hakachi ka munyachi wa Saulu ni munyachi wa Ndawichi Abenere iye walitakamishine ku sali lia munyachi wa Saulu. 7 Saulu wapwile ni konkubina jina lienyi Rizipa mwana Aya. Isheboshete yamba kuli Abenere ngwenyi, Kuchi te hiwanjila kuli konkubina ya tata? 8 Abenere yatenuka chikolo ha maliji ja Isheboshete. Yamba ngwenyi, Te nguli kawa ka A-Yunda nyi! Ami musono ngunasolola utu ku munyachi wa tatenu Saulu, ni kuli ana-akwo, ni tusendo twenyi, ni yena chakuhanyine kuli Ndawichi, hindu musono unangusumu mulonga wa pwo. 9 Zambi chocho alinge kuli yami Abenere nikuwezaho nawa, nyi chalingilile Ndawichi chize Yehova hanalishingi nenyi, 10 kuchiza wanangana ku munyachi wa Saulu nikukolesa ngunja ya Ndawichi hali A-Izalele ni hali A-Yunda chize ku Ndane ndo ku Mbia-shipa. 11 Isheboshete kahashile kukumbulula Abenere liji likwo mumu wamuvwilile woma. 12 Abenere yatuma tunganda kuli Ndawichi kuze atwama ngwenyi, Chifuchi chino chaya? Kolesa ni yami usendo we mba kwoko liami mulipwa ni yena kuneha A-Izalele eswe kuli yena. 13 Iye yakumbulula ngwenyi, Chipema. Mungukolesa usendo ni yena, alioze chuma chimuwika chakutamba kulinga. Kuchi kumona meso jami ndo mulianga kuneha Mikale mwana Saulu, muze mukeza ni kumona yami. 14 Mba Ndawichi yatuma tunganda kuli Isheboshete mwana Saulu ngwenyi, Pe pwo liami Mikale yoze nechelele chikaho cha kulakaji lia misosha ya A-Filistea. 15 Isheboshete yatuma, yamutambula kuli lunga lienyi Paltiele mwana Laishe. 16 Alioze lunga lienyi wayile hamwe nenyi nikumulilila jila yeswe ndo ku Mbahurime. Kwenako Abenere yamwamba ngwenyi, Yako; hiluka. Iye yahiluka.
23-29 MAIO
YIKUMA YILEMU YA MU LIJI LIA ZAMBI | 2 SAMUELE 4-6
“Vwila Woma Yehova ha Kwehuka Yuma Yize Muyimuvwisa Yinyengo”
w05 15/5 17 ¶8
Yikuma Yilemu ya Mukanda Wamuchiali wa Samuele
6:1-7. Chipwe ngwe Ndawichi kapwile ni nyonga lipema, nihindu kehukile shimbi ya Zambi ha kumbachila mushete mu temba, kashika chino yichineha kufwa. (Kut 25:13, 14; Kwa 4:15, 19; 7:7-9) Yize yalingiwile kuli Uza muze akwachile ku mushete, nawa yinasolola ngwo nyonga lipema kulishi kwalumuna yize Zambi akutwita.
(2 Samuele 6:2, 3) Ndawichi yakatuka, yaya ni atu eswe waze apwile no ku Mbale-Yunda akasake mushete wa Zambi uze uli ni jina lia Yehova-wa-Tujita wakutwama hali akerupimi. 3 Yambata mushete wa Zambi ha temba liaha nikuuchiza ku zuwo lia Abinadambe lili ha mulundu. Uza ni Ahio ana ja Abinadambe endesele temba liaha.
(2 Samuele 6:6) Ha kuheta ku chizungwilo cha Nakone, Uza wazozele kwoko lienyi ku mushete wa Zambi nikuukwata, mumu te ngombe kanatalinga.
w05 1/2 27 ¶20
Yehova Kakulinga Yuma ya Ululi Mashimbu Eswe
20 Kanda tuvulama ngwetu, Uza neye te kananyingika ngwenyi katambile kukwata mushete wacho. Mushete wapwile ni kumanyinako Yehova. Shimbi te yakwamba ngwo, mutu yoze keshi ni utayizo katambile kuukwata, yoze mehuka shimbi yacho te mafwa. (Kwa 4:18-20; 7:89) Kashika, te katamba kulemesa mutapu wa kumbachilamo Mushete wacho usandu. Chinasoloka ngwe Uza kapwile Ka-Levi (chipwe ngwe hi sasendote ko), nihindu te kananyingika yize shimbi yakwamba hakutwala ku Mushete. Chikwo nawa, mushete wacho kautwalile ku zuwo lia tato hanga aufunge. (1Sa 6:20–7:1) Wanungine ku zuwo lio miaka 70, ndo haze Ndawichi akwachile chiyulo cha kuuchizako. Kashika, mutuhasa kwamba ngwetu, chize ha wanuke wenyi, Uza kota te kananyingika shimbi hakutwala ku Mushete.
(2 Samuele 6:7) Mba utenu wa Yehova yiukasumukina hali Uza. Zambi yamulamba mumu ha kusa kwoko lienyi ku mushete. Yafwilako; kwekulumbu lia mushete wa Zambi.
w05 1/2 27 ¶21
Yehova Kakulinga Yuma Ya Ululi Mashimbu Eswe
21 Ngwe chize twamona, Yehova mahasa kunyingika yize yili ku mbunge ya mutu. Liji lienyi linasolola ngwo, Uza kasele “kwoko lienyi ku mushete,” kota Yehova kamwene yitanga ya kuzo muli lunga yono yize keshi kuyisolola mu Mbimbiliya. Shina Uza kapwile lunga mukwa-kuzo, te kakuzanga kulinga yuma yize keshi ni ulite wa kuyilinga? (Yis 11:2) Shina kumbata mushete ha mbunga uze aswekele ha miaka yinji ku zuwo lia tato, chamuhele masambisambi? (Yis 8:13) Shina ufulielo wenyi wapwile ukehe chinji ha kunyonga ngwenyi, Yehova keshi ni ndundo ja kukinda mushete wenyi uze te Wamumanyinako uhone kuholoka? Chuma cheswacho chalingiwileko, nihindu mutuhasa kupwa ni shindakenyo ngwetu, Yehova kakulinga yuma ya ululi. Iye kota kamwene yize yili mu mbunge ya Uza, kashika utenu Wenyi wakasumukinyine kawashi-washi hali Uza.—Yis 21:2.
Kuhengwola Yikuma Yilemu ya mu Mbimbiliya
w96 1/4 29 ¶1
Nunga ni Kumbila Chiteli che Hali Yehova
Amu Ndawichi te mwanangana, iye kapwile ni mulonga wa kufwa cha Uza. Yuma yize Ndawichi alingile yinasolola ngwo chipwe mutu yoze uli ni usepa upema ni Yehova ha mashimbu amwe mahasa kulinga upi. Chitangu, Ndawichi yevwa uli. Chamuchiali, yevwa woma. (2Sa 6:8, 9) Usepa wenyi ni Yehova yiupwa mu cheseko chinene. Ha mashimbu jacho iye kota kehukile kumbila chiteli chenyi hali Yehova, ha kwecha kukaula shimbi Jenyi. Shina yino yakulingiwa kuli yetu ha mashimbu amwe? Shina twakuliongela Yehova muze twakupwa ni kapinda ha kwehuka usongwelo wenyi?—Yis 19:3.
(2 Samuele 6:8, 9) Ndawichi aye yalifwita mu mbunge mumu Yehova halusukila hali Uza, mba jina lia kuma kuze ngwo, Pereze-Uza ndo musono. 9 Ndawichi yavwila woma Yehova tangwa lize, yamba ngwenyi, Kuchi mushete wa Yehova muuhasa kwiza kuli yami?
Kutanga Mbimbiliya
(2 Samuele 4:1-12) Ha kwivwa ngwo, Abenere hafwa mu Heprone hamu lieswe lia Isheboshete mwana Saulu yilimuhwa, ni A-Izalele eswe yalishimwoka. 2 Mwe mwana Saulu wapwile ni malunga aali, tupitau twa yizavu ya tujita. Jina lia umwe, Bana. Jina lia mukwo Rekabe. O te ana ja Rimone Ka-Mbenjamine wa ku Mberote (mumu kakwalwila Mberote kuli A-Mbenjamine. 3 Akwa Mberote yachinyina ku Ngitaime, yatwamako ndo musono). 4 Jonata mwana Saulu wapwile ni mwana wa lunga, chitonji ku molu jenyi. Muze ku Yezerele kwejile lusango wa kufwa cha Saulu ni cha Jonata, iye te hapwa ni miaka yitano, mba ndeji yenyi yamwanda, yachina. Ha kuchina kapupushi yamuholola, iye yalumuka chitonji. Jina lienyi Mefiboshete. 5 Rekabe ni Bana, ana ja Rimone Ka-Mberote, yakatuka, yaya. Mba hachivukuminya cha tangwa yaheta ku zuwo lia Isheboshete shimbu machihwima, tangwa ha muchima. 6 Yanjila muchima lia zuwo ngwe waze anafupu kumbata tiliku. Yamutuwa jimo, mba Rekabe ni Bana yachina. 7 Yanjila mu zuwo shimbu iye unachipombo ha muhela. Yamulamba nikumushiha. Yamutapa mutwe mba yanda we mutwe, yenda ufuku weswe ndusu mu Arapa. 8 Yaneha mutwe wa Isheboshete kuli Ndawichi mu Heprone. Yamba kuli mwanangana ngwo, Wenu mutwe wa Ishiboshete mwana Saulu mukwa kole yenu, yoze wafupile kunushiha. Yehova hakalila mwene wami mwanangana hali Saulu ni ana jenyi musono. 9 Alioze Ndawichi yakumbulula Rekabe ni yayo Bana, ana ja Rimone Ka-Mberote ngwenyi, Ni mwono wa Yehova yoze wakuulile alma yami ku luyinda mweswe, 10 muze umwe wangulwezele ngwenyi, Saulu hanafu, nikunyonga ngwenyi, Lusango mupema kuli iye, namukwachile nikumushiha ku Zikalage mumu ha lusango wenyi. 11 Kuhiana chikolo muze yingulungulu hashiha mukwa ululi mu zuwo lienyi mwene ha muhela. Te chichi kufwetesa manyinga jenyi ku moko jenu ngukanunongese hashi nyi? 12 Ndawichi yatuma akweze jenyi, yaashiha, yaateta moko ni molu, nikuasukika ku chitende cha Heprone. Alioze yanda mutwe wa Isheboshete, yaufunda ku chifuka cha Abenere mu Heprone.
30 MAIO–5 JUNHO
YIKUMA YILEMU YA MU LIJI LIA ZAMBI | 2 SAMUELE 7-8
“Yehova Kalingile Usendo ni Ndawichi”
“Mungukakolesa Wanangana We”
Yehova yazanga chinji nyonga lia Ndawichi. Muze Zambi amwene ungunu wa Ndawichi, nawa kulita ni upale wenyi yalinga nenyi usendo uze wambile ngwo, ku munyachi wenyi te mukusemuka yoze mayula mu ngunja yenyi ku miaka yeswe. Natane yalweza Ndawichi chilakenyo cha Zambi ngwenyi: “Zuwo lie ni wanangana we muyikakola kumeso je ku miaka yeswe. Ngunja ye kumuyikakola ya mutolo.” (Versu 16) Iya te mapwa Swana wa usendo wacho, Yoze makayula ku miaka yeswe?—Sam 89:20, 29, 34-36.
(2 Samuele 7:11, 12) chize ku miaka yize naselele akwa kuyula helu lia atu jami A-Izalele. Mungukuhwimisa kuli akwa kole je eswe. Chikwo nawa Yehova kanambe kuli yena ngwenyi, Yami Yehova mungukakupwisa munyachi. 12 Muze matangwa je hamanunuka hiwaya tulo, hiwaya kuli tulamba twe, kulutwe mungukakolesa mukwa munyachi we yoze mukasema, mungukakolesa wanangana wenyi.
(2 Samuele 7:13, 14) Iye kumakatunga zuwo ha jina liami, mba yami kumungukakolesa ngunja ya wanangana wenyi yikapwe ya mutolo. 14 Ami kumungukapwa tato; iye kumakapwa mwanami. Nyi malinga uhenge mungumufumba ni mbwechi ya atu ni mijiji ya ana ja atu.
“Mungukakolesa Wanangana We”
Yesu Ka-Nazare kapwile wa ku munyachi wa Ndawichi. Muze mungelo ambulwile kusemuka cha Yesu, iye yamba ngwenyi: “Mwene Zambi kumakamwaha ngunja ya tato Ndawichi; iye kumakayula akwa zuwo lia Yakomba ndo ku miaka ya mutolo; wanangana wenyi kuuchi kahwa.” (Lu 1:32, 33) Kashika, usendo uze Yehova alingile ni Ndawichi wamanunukine hali Yesu Kristu. Yesu kakamusakwile kuli atu hanga ayule, alioze, kupalikila mu chimwe chilakenyo chilemu cha Zambi, chize chakumwaha ulite wa kuyula ku miaka yeswe. Kanda tuvulama ngwetu, yilakenyo ya Zambi yeswe yakumanunuka.—Iza 55:10, 11.
(2 Samuele 7:15, 16) Hindu chichi kumuchiza utu wa zango liami ngwe nauchijile kuli Saulu yoze nahumine kumeso je. 16 Zuwo lie ni wanangana we muyikakola kumeso je ku miaka yeswe. Ngunja ye kumuyikakola ya mutolo.
w14 15/10 10 ¶14
Pwako ni Ufulielo Ukolo ha Wanangana
14 Tutalenu chilakenyo chize Yehova alakenyene Mwanangana Ndawichi, wa mu Izalele ya ku shakulu, kupalikila mu usendo wa Ndawichi. (Tanga 2 Samuele 7:12, 16) Yehova kalingile usendo wacho muze Ndawichi te machiyula mu Yerusaleme, yamulakenya ngwenyi Mesaya te mapwa wa ku munyachi wenyi. (Lu 1:30-33) Ha chino, Yehova yatepulula munyachi wacho, ni kwamba ngwo swana wa Ndawichi mwe te mapwa ni ulite hanji mwenya ngunja ya Wanangana wa Mesaya. (Eze 21:25-27) Kupalikila muli Yesu, kuyula cha Ndawichi hanji ngunja yenyi, “kumuyikakola ya mutolo.” Kashika, munyachi wa Ndawichi “muukalinduluka ku miaka ya mutolo. Ngunja yenyi muyikalinduluka miaka yeswe ya lie tangwa kumeso jami.” (Sam 89:34-37) Chochene, unguvulu wa Mesaya kuuchi kapwa wa kalimbalimba, yuma yize muukalinga muyikapwa ya mutolo!
Kuhengwola Yikuma Yilemu ya mu Mbimbiliya
it-3 751 ¶1
Matangwa a Kusula
Uprofeto wa Mbalau. Muze A-Izalele te kanda achinjila mu Chifuchi cha Chilakenyo, profeta Mbalau yamba kuli Mbalake, Mwanangana wa A-Moape, ngwenyi: “Mungukulweza chize wano atu [A-Izalele] makalinga kuli atu je ha matangwa a kusula . . . Kumukukavumbuka Lutongonoshi wa kuli Yakomba, Lukanda kumakasoloka muli Izalele. Kumakalemeka ndusu mahuma ja A-Moape. Kumakanunguna ana eswe a Shete.” (Kwa 24:14-17) Umanunuko utangu wa uprofeto uno, unasolola ngwo, “Lutongonoshi” kapwile Mwanangana Ndawichi, yoze wakumbile A-Moape. (2Sa 8:2) Chinasoloka ngwe, umanunuko wa uprofeto uno unatale ha “matangwa a kusula” waze aputukile muze Ndawichi apwile mwanangana. Amu Ndawichi kapwile ni kumanyinako Yesu, ngwe Mwanangana Mesaya, uprofeto uno nawa unatale hali Yesu ha mashimbu waze iye makumba akwa-kole jenyi.—Iza 9:7; Sam 2:8, 9.
(2 Samuele 8:2) Yalamba A-Moape. Yaapombesa hashi ni kuaeseka ni muhipu. Yeseka ni muhipu kaali hanga aashihe; yeseka ni muhipu kamuwika hanga aafunge ni mwono. A-Moape yalumuka ngamba kuli Ndawichi. Yamunehena milambu.
Kutanga Mbimbiliya
(2 Samuele 7:1-17) Muze mwanangana hatwama mu zuwo lienyi, ni Yehova hanamuhwimisa kuli akwa kole jenyi eswe a kumujingilika, 2 mwanangana yamba kuli profeta Natane ngwenyi, Tala yami natwama mu zuwo lia sedru alioze mushete wa Zambi watwama mu mbalaka. 3 Natane yamba kuli mwanangana ngwenyi, Yenu nulinge yeswe yili mu mbunge yenu, mumu Yehova hwali hamuwika ni yenu. 4 Alioze ufuku uzewene liji lia Yehova yiliza kuli Natane ngwo, 5 Yako uambulwile kavumbi kami Ndawichi ngwe, Yehova kanambe ngwenyi, Te unazange kungutungila zuwo ngutwamemo, nyi? 6 Chize ku tangwa lize nachijile A-Izalele ku Engitu ndo musono kanda nguchitwama mu zuwo, alioze hinatutujoka mu mbalaka ni mu Tabernakulu. 7 Mu yifuchi yeswe napalikile ni A-Izalele eswe te nahanjikile limwe liji ni akwa kuyula aze natumine kufunga atu jami A-Izalele ngwami, Kuchi te kwangutungilile zuwo lia sedru? 8 Kashika amba kuli kavumbi kami Ndawichi ngwe, Yehova-wa-Tujita kanambe ngwenyi, Nakuchijile mu yambu kuze wakahule mapanga ukapwe mwanangana wa atu jami A-Izalele. 9 Nendele hamwe ni yena kweswe wayile. Hinasutula akwa kole je eswe ku meso je, mba mungukwaha jina lilemu ngwe majina ja e alemu a hashi. 10 Atu jami A-Izalele munguatongwela chifuchi, munguatungisako akatwame mu chihela cho. Kechi kututujoka nawa. Yingulungulu kechi kuahungumiona ngwe alingile kunyima, 11 chize ku miaka yize naselele akwa kuyula helu lia atu jami A-Izalele. Mungukuhwimisa kuli akwa kole je eswe. Chikwo nawa Yehova kanambe kuli yena ngwenyi, Yami Yehova mungukakupwisa munyachi. 12 Muze matangwa je hamanunuka hiwaya tulo, hiwaya kuli tulamba twe, kulutwe mungukakolesa mukwa munyachi we yoze mukasema, mungukakolesa wanangana wenyi. 13 Iye kumakatunga zuwo ha jina liami, mba yami kumungukakolesa ngunja ya wanangana wenyi yikapwe ya mutolo. 14 Ami kumungukapwa tato; iye kumakapwa mwanami. Nyi malinga uhenge mungumufumba ni pwechi ya atu ni mijiji ya ana ja atu. 15 Hindu chichi kumuchiza utu wa zango liami ngwe nauchijile kuli Saulu yoze nahumine kumeso je. 16 Zuwo lie ni wanangana we muyikakola kumeso je ku miaka yeswe. Ngunja ye kumuyikakola ya mutolo. 17 Natane yahanjika maliji wano eswe kuli Ndawichi nikulita ni usolwelo uno weswe.
6-12 JUNHO
YIKUMA YILEMU YA MU LIJI LIA ZAMBI | 2 SAMUELE 9-10
“Ndawichi Kasolwele Zango Liamwenemwene”
w06 15/6 14 ¶6
Yena Muhasa Kuwahilila
Ndawichi yasoneka ngwenyi: “Kawaha yoze wakunyonga yiswale.” Yanunga ngwenyi: “Yehova kumakamupulula ha tangwa lipi. Yehova mamufunga, mamwaha mwono, kumakawaha mu chifuchi.” (Sam 41:1, 2) Upeme uze Ndawichi asolwelele Mefiposhete, mwana wa sepa lienyi Jonata yoze wapwile chitonji, chili chilweza chipema chize twatamba kukaula hanga tukwase yiswale.—2Sa 9:1-13.
(2 Samuele 9:1) Ndawichi yamba ngwenyi, Hindu kwasala umwe wa ku munyachi wa Saulu hanga ngumulinge vumbi mumu hali Jonata nyi?
(2 Samuele 9:5-7) Mba mwanangana Ndawichi yatuma, yamusaka ku zuwo lia Makire mwana Amiele ku Lo-Devale. 6 Mefiposhete, mwana Jonata, mwana Saulu, yeza kuli Ndawichi, yafulamana hashi, yamuwayila. Ndawichi yamba ngwenyi, Mefiposhete. Iye yakumbulula ngwenyi, Yami kavumbi kenu. 7 Ndawichi yamba kuli iye ngwenyi, Kanda wivwa woma, mumu pundu mungukulinga vumbi mumu hali tatenu Jonata. Mungukwaha minda yeswe ya kakenu Saulu. Kumuopwa nikulila ku mesa yami matwangwa eswe.
w05 15/5 17 ¶12
Yikuma Yilemu ya Mukanda Wamuchiali wa Samuele
9:1, 6, 7. Ndawichi yanunga ni kufunga chilakenyo chenyi. Ni yetu twatamba kusa tachi hanga tumanunune yilakenyo yetu.
(2 Samuele 9:9, 10) Mba mwanangana yasanyika Ziba kavumbi ka Saulu ngwenyi, Yuma yeswe yize yapwile ya Saulu ni ya akwa munyachi wenyi eswe hinayihana kuli mwana wa mwata we. 10 Yena mukamulimina ye minda hamuwika ni ana je ni ngamba je. Munukakunga mbuto hanga mwana wa mwata we akapwe ni kulia. Alioze Mefiposhete mwana wa mwata we aye makalila ku mesa yami matangwa eswe. Ziba te kali ni kumi ni ana a malunga atano, ni makumi aali a ngamba.
w02 15/2 14 ¶10
Ayo Kapinjile ni Yipikalo Ngwe Lumbambo mu Mujimba
10 Ha yimwe miaka kunyima, Mwanangana Ndawichi, mumu lia zango lienyi hali Jonata, yasolwele upeme Mefiposhete. Ndawichi yamwaha minda yeswe ya Saulu ni kulweza Ziba kavumbi ka Saulu hanga ayifunge. Ndawichi yamba nawa kuli Mefiposhete ngwenyi: “Makalila ku mesa yami matangwa eswe.” (2Sa 9:6-10) Kwamba pundu, upeme wa Ndawichi watakamishine Mefiposhete ni kumukwasa hanga atepulule yinyengo ya utonji. Chino chili chilweza chipema! Ni yetu twatamba kusolola upeme kuli waze ali ni yipikalo yize yinapu ngwe lumbambo mu mujimba.
Kuhengwola Yikuma Yilemu ya mu Mbimbiliya
it-1 308
Wevu
Ku shakulu atu anji a ku Chivumbuko ni A-Izalele, kapwile ni kulemesa chinji wevu. Shimbi ya Zambi yize ahanyine kuli Izalele yapwile ni kukanjisa kuteta “masongo a wevu,” kambu ja mu mbalangwe hanji kuteula chihanda cha wevu. (Lev 19:27; 21:5) Kwecha kuteta kambu kapwile ni kuchimona kuli atu waze te keshi kufuliela ngwe yitanga ya akwa mangeleja.
(2 Samuele 10:4, 5) Kashika Hanune yakwata tuvumbi twa Ndawichi; yatewula chihanda cha hakachi cha wevu wo; yateta mazalo jo hakachi ndo ku matako; yaahuma. 5 Muze hambulwila Ndawichi, iye yatuma kuapatwiza mumu sonyi jinji evwile. Kashika mwanangana yamba ngwenyi, Twamenu ku Yeriku ndo wevu wenu hiwasuha, mba munwiza.
Kutanga Mbimbiliya
(2 Samuele 9:1-13) Ndawichi yamba ngwenyi, Hindu kwasala umwe wa ku munyachi wa Saulu hanga ngumulinge vumbi mumu hali Jonata nyi? 2 Kwapwile umwe kavumbi wa A-Saulu jina lienyi Ziba. Yamusanyika eze kuli Ndawichi. Mwanangana yamuhula ngwenyi, Mwe Ziba yena? Iye yakumbulula ngwenyi, Yami kavumbi kenu. 3 Mwanangana yamba ngwenyi, Kukwasalile chipwe umuwika wa kuli A-Saulu ngumulweze vumbi lia Zambi nyi? Ziba yamba kuli mwanangana ngwenyi, Kwali hindu umwe mwana wa Jonata, chitonji ku molu jenyi. 4 Mwanangana ngwenyi, Kulihi ali? Ziba yamba kuli mwanangana ngwenyi, Mu zuwo lia Makire mwana Amiele mu Lo-Devale. 5 Mba mwanangana Ndawichi yatuma, yamusaka ku zuwo lia Makire mwana Amiele ku Lo-Devale. 6 Mefiposhete, mwana Jonata, mwana Saulu, yeza kuli Ndawichi, yafulamana hashi, yamuwayila. Ndawichi yamba ngwenyi, Mefiposhete. Iye yakumbulula ngwenyi, Yami kavumbi kenu. 7 Ndawichi yamba kuli iye ngwenyi, Kanda wivwa woma, mumu pundu mungukulinga vumbi mumu hali tatenu Jonata. Mungukwaha minda yeswe ya kakenu Saulu. Kumuopwa nikulila ku mesa yami matwangwa eswe. 8 Iye yawayila nawa. Yamba ngwenyi, Ami kavumbi kenu kuchi napwa, nutale kuli umwe wapwa ngwe kawa mufu? 9 Mba mwanangana yasanyika Ziba kavumbi ka Saulu ngwenyi, Yuma yeswe yize yapwile ya Saulu ni ya akwa munyachi wenyi eswe hinayihana kuli mwana wa mwata we. 10 Yena mukamulimina ye minda hamuwika ni ana je ni ngamba je. Munukakunga mbuto hanga mwana wa mwata we akapwe ni kulia. Alioze Mefiposhete mwana wa mwata we aye makalila ku mesa yami matangwa eswe. Ziba te kali ni kumi ni ana a malunga atano, ni makumi aali a ngamba. 11 Ziba yamba kuli mwanangana ngwenyi, Yami kavumbi kenu mungulinga nikulita ni maliji eswe a mwene wami mwanangana. Alioze hakutwala kuli Mefiposhete, mwanangana ngwenyi, Aye kumakalila ku mesa yami ngwe umwe mwana wa mwanangana. 12 Mefiposhete kali ni mwana wa lunga jina lienyi Mika. Akwa zuwo lia Ziba eswe apwile ngamba ja Mefiposhete. 13 Chocho Mefiposhete watwamine mu Yerusaleme mumu walilile ku mesa ya mwanangana. Iye te chitonji ku molu jenyi eswe ni aali.
13-19 JUNHO
YIKUMA YILEMU YA MU LIJI LIA ZAMBI | 2 SAMUELE 11-12
“Kanda Wecha Usolo Upi Ukusongwele”
Muhasa Kwehuka Miheto ya Satana!
10 Mumu lia kuzo, Mwanangana Ndawichi yavulama yuma yeswe yize Yehova amuhele, upite, lufuma ni jita jize apwile ni kukumba. Ndawichi kanyingikine ngwenyi, yawana yize atambwile kuli Zambi yapwile “yinji” nawa te kakusakwilila ha yawana yacho! (Samu 40:5) Alioze ha mashimbu amwe, Ndawichi yavulama yeswe yize Yehova amuhele. Iye yecha kuwahilila ni yize apwile nayo, yazanga kupwa ni yuma yikwo. Chipwe ngwe kapwile ni mapwo anji, nihindu Ndawichi yaputuka kuzanga pwo liambala. Pwo wacho te Mbate-Shipa, mukwo-lunga Uriya Ka-Hete. Mumu lia kuzo, Ndawichi yalisumbakenya ni Mbate-Shipa, chocho Mbate-Shipa yaka ufumba. Chuma chize Ndawichi alingile chapwile chipi, alioze yalinga nawa chimwe chuma chipi chinji kuhiana—kushihisa Uriya ku jita! (2 Samue. 11:2-15) Yika Ndawichi anyongene? Shina iye kanyongene ngwenyi Yehova keshi kungumona? Chipwe ngwe, Ndawichi kanakalingila Yehova ha miaka yinji, nihindu yapwa ni kuzo, chocho chino yichimunehena lamba linji. Kulutwe, Ndawichi yasolola shili yenyi ni kulikonyeka. Iye kanakasakwilila chinji muze Yehova amukonekenene!—2 Samue. 12:7-13.
2 Samuele 11:2-4) Ha ngoloshi Ndawichi yakatuka ha muhela wenyi, yaya ni kwolola molu ha fulumba lia zuwo lia mwanangana. Ha fulumba yamona pwo umwe kanasane. Mwe pwo te mupema chikolo ku meso. 3 Ndawichi yatuma kuhula ha kutwala kuli pwo. Ngwo, Mwe Mbate-Shipa auze, mwana Eliame, pwo lia Uriya mwe Ka-Hete. 4 Ndawichi yatuma tunganda, yamusaka, mba yanjila, yapomba nenyi (mumu pwo te halipemesa ku kupiha chenyi), mba yahiluka ku zuwo lienyi.
(2 Samuele 11:5, 14, 15) Pwo yaka ufumba mba yatuma kulweza Ndawichi ngwenyi, Ufumba nguli nawo. 14 Muze hikwacha Ndawichi yasoneka mukanda kuli Joabe. Yautuma mu kwoko lia Uriya. 15 Yasoneka ha mukanda ngwenyi, Sako Uriya kulutwe mu jita yize yahiana kusasaminya. Mba munumwehuka akamulambe, akafwe.
Tuzeyelenu Kuli Yehova—Mumu Liaka Nawa Kuchi?
15 Kuchizako kupwa mwata wa usoko, Yehova kasele Ndawichi ngwe kasongo wa vungu lieswe lia Izalele. Amu te mwanangana, Ndawichi kapwile ni ndundo jinji. Ha mashimbu amwe, kakazachishile kanawa wata wenyi nawa yalinga uhenge unene. (2 Samue. 11:14, 15) Alioze Ndawichi kasolwele ngwo, kakuzeyela kuli Yehova ha kutayiza fumbo lize amuhele. Iye te kakwazulula mbunge yenyi ha kulemba kuli Yehova, nawa te kakusa tachi hanga akaule yiyulo ya Yehova. (Samu 51:1-4) Chikwo nawa, Ndawichi kapwile mukwa-kulikehesa ha kutayiza yiyulo yipema hi wika ko ya malunga, alioze ni ya mapwo. (1 Samue. 19:11, 12; 25:32, 33) Ndawichi kalilongesele ha uhenge wenyi nawa kalemesene uwayilo wa Yehova ku mwono wenyi.
(2 Samuele 12:9-12) Kuchi te hiwalelesa liji lia Yehova ukalinge chize chamupihila? Uriya Ka-Hete hiwamushihisa ni katana. Hiwatambula mukwo-pwo akapwe pwo lie. Aye hiwamushihisa ni katana ka A-Mone. 10 Kashika, katana kechi kukatuka ku zuwo lie, mumu hiwangulelesa, hiwambata pwo lia Uriya Ka-Hete. 11 Yehova kanambe ngwenyi, Mungukuvundwila yipi mwe mu zuwo lia yena mwene. Mungutambula mapwo je kumeso je nikwahana kuli akwenu, mba mapomba ni mapwo je, he ha mwalwa uno lume. 12 Mumu yena wachilingile ku tenga, alioze yami mungulinga chuma chino kumeso ja A-Izalele eswe ni ha mwalwa uno.
Echa Shimbi ni Yiyulo ya Zambi Yifumbe Shimbi ya Mbunge Ye
7 Kutwafupiwile kumona lamba ha kwehuka shimbi ja Zambi mba tunyingike upi ni upeme. Mutuhasa kulilongesa ha yilweza ya uhenge wa akwetu ku shakulu. Yilweza yacho yili mu Mbimbiliya. Yishima 1:5 unambe ngwo: “Mukwa mana nawa kumevwa mba maweza ku yinyingi yenyi.” Usongwelo uno uli wa Zambi nawa wapwa ungunu! Chakutalilaho, Ndawichi kamwene lamba linji muze ahonene kwononokena Yehova ha kulinga utanji ni Bate-shipa. (2 Samuele 12:7-14) Muze mutanga chilweza chino lihule ngwe: ‘Kuchi Ndawichi te mahasa kwehuka lamba lino? Yika te mungulinga nyi mungupwa mu cheseko cha mutapu au? Nyi mangweseka hanga ngulinge utanji, shina mungupwa ngwe Ndawichi nyi mungupwa ngwe Yosefwe?’ (Uputukilo 39:11-15) Nyi mutunyonga ha ponde yize yakwiza ha kulinga shili, mutuhasa ‘kuvwila chinji lwaji yuma yipi.’
Kuhengwola Yikuma Yilemu ya mu Mbimbiliya
it-1 667 ¶1
Ndawichi
Yehova kakashihile Ndawichi mumu kamuvwilile keke hamukunda wa usendo wa Wanangana (2Sa 7:11-16) ni mumu lia keke yize Ndawichi apwile ni kusolwela akwo (1Sa 24:4-7 tesa ni Tia 2:13), chikwo nawa, Zambi kamwene kulikonyeka cho. (Sam 51:1-4) Chipwe chocho, ayo kapalikile mu kapinda munji mumu lia shili yize alingile. Kupalikila muli profeta Natane, Yehova yamba ngwenyi: “Mungukuvundwila yipi mwe mu zuwo lia yena mwene.”—2Sa 12:1-12.
Kutanga Mbimbiliya
(2 Samuele 12:13) Ndawichi yamba kuli Natane ngwenyi, Yehova hinamuvulumuna. Natane yamba kuli Ndawichi ngwenyi, Yehova hakuchiza mulonga we. Kuchi kufwa.
(2 Samuele 11:1-15) Mba hakupalika cha mwaka, ha kakweji wa kuya mianangana ku jita Ndawichi yatuma Joabe hamuwika ni atu jenyi ni A-Izalele eswe. Yonwona A-Amone mba yaseleka Raba. Alioze Ndawichi wanamine ku Yerusaleme. 2 Ha ngoloshi Ndawichi yakatuka ha muhela wenyi, yaya ni kwolola molu ha fulumba lia zuwo lia mwanangana. Ha fulumba yamona pwo umwe kanasane. Mwe pwo te mupema chikolo ku meso. 3 Ndawichi yatuma kuhula ha kutwala kuli pwo. Ngwo, Mwe Mbate-Shipa auze, mwana Eliame, pwo lia Uriya mwe Ka-Hete. 4 Ndawichi yatuma tunganda, yamusaka, mba yanjila, yapomba nenyi (mumu pwo te halipemesa ku kupiha chenyi), mba yahiluka ku zuwo lienyi. 5 Pwo yaka ufumba mba yatuma kulweza Ndawichi ngwenyi, Ufumba nguli nawo. 6 Ndawichi aye yatuma liji kuli Joabe ngwenyi, Ungutumine Uriya Ka-Hete. Mba Joabe yatuma Uriya kuli Ndawichi. 7 Muze Uriya haheta Ndawichi yamuhula lusango wa Joabe, ni chize anatwama e atu ni chize yinapu jita. 8 Mba Ndawichi yamba kuli Uriya ngwenyi, Palumuka ku zuwo lie usane ku molu. Uriya yakatuka ku zuwo lia mwanangana, mba kwamukawile kulia cha kuli mwanangana. 9 Alioze Uriya wapombele ku chikolo cha zuwo lia mwanangana hamuwika ni tuvumbi eswe a mwene wenyi. Kayile ku zuwo lienyi. 10 Muze hachilweza Ndawichi ngwo, Uriya kayile ku zuwo lienyi, Ndawichi yamba kuli Uriya ngwenyi, Ngwami mu wenyi unakatuka. Kuchi te kwayile ku zuwo lie? 11 Uriya yamba kuli Ndawichi ngwenyi, We mushete, ni A-Izalele, ni A-Yunda, eswe mu yisakila anapombo. Ni mwene wami Joabe ni atu eswe a mwene wami mu yilombo ali mu yambu, mba yami te munguya ku zuwo liami mukulia ni kunwa ni kupomba ni pwo liami nyi? Ni mwono wenu, ni mwono wa mbunge yenu chichi kuchilinga. 12 Ndawichi yamba kuli Uriya ngwenyi, Namina kuno musono nawa, mba hamene mungukwecha ukaye. Chocho Uriya yatwama mu Yerusaleme tangwa lize, ni liamuchiali nawa. 13 Mba muze Ndawichi hamusanyika yalia, yanwa kumeso jenyi. Yamuzengewesa. Ha chingoloshi yatuhuka hanga akapombe ha muhela hamwe ni tuvumbi twa mwene wenyi, alioze kayile ku zuwo lienyi. 14 Muze hikwacha Ndawichi yasoneka mukanda kuli Joabe. Yautuma mu kwoko lia Uriya. 15 Yasoneka ha mukanda ngwenyi, Sako Uriya kulutwe mu jita yize yahiana kusasaminya. Mba munumwehuka akamulambe, akafwe.
20-26 JUNHO
YIKUMA YILEMU YA MU LIJI LIA ZAMBI | 2 SAMUELE 13-14
“Kuzo ya Amnone Yanehene Luyinda”
it-1 110
Absalome
Amnone Yamushiha. Kupema cha Tama ndumbwa-pwo wa Absalome, chatwalile Amnone ndumbwenyi ku utata, hanga amuzange chikolo. Amnone yalionga kuyiza, yawana jila yize Tama te mahasa kuhetela ku zuwo lienyi hanga amulingile kulia, mba yamukwata ku tachi ni kupomba nenyi. Hanyima lia kupomba nenyi yamuvwila kupiha chinji kuhianyine zango lize amuzangile nalio hatangu, mba yamuhanga ku meso jenyi. Tama yasonya mazalo waze te akuzala mwana wa mwanangana yoze uchili virgem, yalikwata suswa mutwe, yaliwana ni ndumbwenyi Absalome. Absalome yanyonga ni kawashi ha yize malinga ni kufungila kole Amnone, mumu havulumuna ndumbwenyi Tama ku tachi. Absalome yalweza ndumbwenyi ngwenyi, kanda upinda mu mbunge, mba yamutwala ku zuwo lienyi hanga atwameko.—2Sa 13:1-20.
(2 Samuele 13:1, 2) Kulutwe lia yino yuma Absalome mwana Ndawichi te kali ni umwe ndumbwenyi mupema chikolo, jina lienyi Tama, ni Amnone mwana Ndawichi wamuzangile. 2 Ha kulifwita mu mbunge hali ndumbwenyi Tama, Amnone wayijile. Mumu chapwile chikalu kuli Amnone kumulinga chuma chipi se iye virgem.
(2 Samuele 13:10-15) Amnone yamba kuli Tama ngwenyi, Neha kulia mu chipatulo cha muchima ngukalie ku kwoko lie. Tama yanda mbolo jize halinga, yajineha mu chipatulo cha muchima kuli ndumbwenyi Amnone. 11 Muze hajineha kuli iye akalie, yamukwata, yamba kuli iye ngwenyi, Ndumbwami, tweya upombe ni yami. 12 Iye yamukumbulula ngwenyi, Hi chocho ko ndumbwami, kanda unguvulumuna ni tachi, mumu keshi kulinga chuma chipwahaha mu Izalele. Kanda ulinga uhepuke uno. 13 Ni yami, kulihi mungutwala sonyi jami? Mba hakutwala kuli yena kumwopwa ngwe chihepuke mu Izalele. Kashika ngunaliumbu, hanjika ni mwanangana, mumu kechi kukukwika kungumbata. 14 Hindu kapanjikile liji lienyi alioze se wamuhianyine ni tachi yamukumba, yapomba nenyi. 15 Mba Amnone yamuvwila kupiha chahiana chikolo. Kupiha chize amuvwilile chahianyine zango lize amuzangile nalio hatangu. Amnone yamwamba ngwenyi, Katuka! Yako!
Pwenu Akwa-Kulihumikiza
11 Mu Mbimbiliya muli yilweza ya atu waze kakahashile kwehuka cheseko cha kulinga utanji. Nawa yinasolola yuma yipi yize yakulingiwa, nyi mutuhona uhumikizo. Nyi munupwa mu cheseko ngwe cha Kim, nyongenu hali mukweze wa chihepuke yoze uli ha Yishima kapitulu 7. Nyongenu nawa hali Amnone ni ha lamba lize liejile mumu lia yitanga yenyi. (2 Samuele 13:1, 2, 10-15, 28-32) Yisemi, munuhasa kukwasa ana jenu hanga apwe ni uhumikizo ni mana ha kushimutwina yilweza yino mu uwayilo wenu wa mu usoko.
(2 Samuele 13:28, 29) Absalome yatuma ngamba jenyi ngwenyi, Talenu kanawa muze mbunge ya Amnone muyiwaha kanawa ni vinyu, ni yami mungunwamba ngwami, Lambenu Amnone, himushihenu, kanda nwivwa woma. Ngwami, hinanwaha shimbi. Hamukenu; takamenu. 29 Ngamba ja Absalome yalinga kuli Amnone nikulita ni shimbi ya Absalome. Mba ana eswe a mwanangana yakatuka, yanyina mutu mweswe ha mula wenyi, yachina.
it-1 110 ¶3
Absalome
Kulutwe lia miaka yaali. Mashimbu akutewula mapanga yaheta, Absalome yalulieka chiwanyino ku Mbale-Hazore kuze apwile ni kwenda tando 22 mba ahete ku Yerusaleme, iye yasanyika ana eswe a mwanangana hamwe ni Ndawichi. Muze Ndawichi alitunyine kuya, Absalome yamushinjila hanga amutayize kuya ni Amnone, mwanenyi mutangu ha chihela chenyi. (Yis 10:18) Ha chiwanyino, muze te Amnone analivu “kanawa ni vinyu,” Absalome yalweza ngamba jenyi hanga amushihe. Hachino, ana akwo a Ndawichi yafuna ku Yerusaleme, alioze Absalome yaya kuli kako Ka-Seria, mu wanangana wa Ngeshure, ku chivumbuko cha kalunga-lwiji wa Ngalileya. (2Sa 13:23-38) Kashika, “katana” yoze profeta Natane aprofetesele yanjila mu “zuwo” lia Ndawichi, yanungamo ndo ku mwono weswe.—2Sa 12:10.
Kuhengwola Yikuma Yilemu ya mu Mbimbiliya
g04 12/22 8-9
Upeme Wamwenemwene
Absalome yapwa lunga mupi, chipwe ngwe chifwa chenyi chapwile chipema chinji. Mbimbiliya yinambe hakutwala kuli iye ngwo: “Mu Izalele mweswe kumwapwile nyiumwe yoze achichimiekene ha kupema chenyi shina Absalome wika. Chize ku yiliato yenyi ndo ku mbanda-mutwe kukwapwile kachipa nikamwe.” (2Sa 14:25) Alioze, kuzo ya Absalome yamutwalile hanga alimike ni tato ni kumutambula ngunja ya wanangana. Iye nawa yakwata ku tachi konkubina ja tato ni kupomba no. Chino yichineha utenu wa Zambi, nawa Absalome yafwa chipi.—2Sa 15:10-14; 16:13-22; 17:14; 18:9, 15.
Upeme wenyi wa ku meso kuwakamukwashile kwehuka kulizata, kushishika ni kumufunga ku pode. Chikwo nawa, mu Mbimbiliya muli yilweza ya atu anji apwile ni mana waze keshi kwavuluka hakutwala ku upeme wo wa ku meso. Kwamba pundu, chuma chilemu hi upeme wa ku meso ko, alioze upema wa ku mbunge.
(2 Samuele 14:25, 26) Mu Izalele mweswe kumwapwile nyiumwe yoze achichimiekene ha kupema chenyi shina Absalome wika. Chize ku yiliato yenyi ndo ku mbanda-mutwe kukwapwile kachipa nikamwe. 26 Muze alitewile, wapezalishile kambu ja ha mutwe wenyi — kulakaji aali a shekele nikulita ni pezu ya mwanangana. Walitewile miaka yeswe ha songo lia mwaka; wevwile kulema cha kambu, kashika walitewile.
Kutanga Mbimbiliya
(2 Samuele 14:8-20) Mwanangana ngwenyi, Yako ku zuwo lie. Munguyula chikuma che. 9 Pwo wa ku Tekoa yamba kuli mwanangana ngwenyi, Mwene wami mwanangana! Uhenge ukapwe hali yami ni hali munyachi wa tata, mwanangana akasambe ni ngunja yenyi. 10 Mwanangana ngwenyi, Mweswawo makwamba chimwe chuma, umunehe kuli yami mba kechi kukusunga nawa. 11 Pwo yamba ngwenyi, Ngunaliumbu kuli yenu mwanangana, iwulukenu Yehova Zambi yenu hanga mukwa kukala manyinga kanda ashiha nawa, kuchina mashiha mwanami. Iye yamba ngwenyi, Ni mwono wa Yehova, chipwe lukambu umuwika wa mwane kechi kaholoka hashi. 12 Pwo yamba ngwenyi, Tayizenu kama kavumbi kenu kuhanjika limwe liji kuli yenu mwene wami mwanangana. Iye ngwenyi, Hanjika. 13 Pwo ngwenyi, Nyi chocho, kuchi te hinwahala chuma chino cha kulimika ni atu ja Zambi? Mumu ha kuhanjika liji lino yenu mwanangana nuli ngwe umwe chivulumunyi se mwe mwanangana katumine kusaka mwanenyi yoze ahumine. 14 Mumu chatutamba kufwa. Tuli ngwe meya aze anamwangana hashi keshi kuhasa kuaanda nawa. Chipwe Zambi keshi kuchiza mwono alioze kakululika shimbi, keshi kumbila liakulu yoze hamuhuma. 15 Kashika nezanga ni kuhanjika liji lino ni mwene wami mwanangana, mumu atu hananguvwisa woma. Ami kavumbi kenu nambanga ngwami, Munguhanjika haliapwila ni mwanangana. Hanji mwanangana malinga chize yami kavumbi kenyi mungwita. 16 Mumu mwanangana kumevwa, kumakapulula kavumbi kenyi ku tachi ja yoze unafupu kutwonwona ni yami ni mwanami wa lunga hamuwika ku chihinga cha Zambi. 17 Mba yami kavumbi kenu nambanga ngwami, Liji lia mwene wami mwanangana likapwe lia kuhwimisa. Mumu mwene wami mwanangana kanapu ngwe mungelo wa Zambi kakusa chinyingi hakachi ka yipema ni yipi. Yehova Zambi yenu apwe hamwe ni yenu. 18 Mwanangana yakumbulula kuli pwo ngwenyi, Chize mungukuhula kanda unguswekelacho. Pwo ngwenyi, Mwene wami mwanangana ahanjike. 19 Mwanangana yamba ngwenyi, Ngwami, kwoko lia Joabe lili hamwe ni yena mu pande jino jeswe nyi? Pwo yakumbulula ngwenyi, Ni mwono wenu, mwene wami mwanangana, niumwe mahasa kupiasukila ku chindume hanji ku chimeso ku chimwe chuma chize mwene wami mwanangana anahanjika. Pundu kavumbi kenu Joabe iye wangutumanga, ni iye nawa wasanga maliji wano eswe mu kanwa lia yami kavumbi kenu. 20 Kavumbi kenu Joabe halinga chuma chino hanga akatewulule yuma. Mwene wami mana anji ali no nikulita ni mana a mungelo wa Zambi akanyingike yuma yeswe yili hano hashi.
27 JUNHO–3 JULHO
YIKUMA YILEMU YA MU LIJI LIA ZAMBI | 2 SAMUELE 15-17
“Absalome Yalinangamisa Mumu Lia Kuzo”
it-3 304
Tetekeli
Ku Chivumbuko chapwile chako akwa-kuzomboka kutetekela ku lutwe lia temba lia mwanangana hanga alulieke ni kwambujola kuheta cha mwanangana ni kumukwasa ha yize mafupiwa. (1Sa 8:11) Absalome ni Adonija, no kembulwile chako chino cha mianangana, hanga alifumanyise ni kulinangamisa ha kululieka 50 a malunga hanga akamutetekele.—2Sa 15:1; 1Mi 1:5; tala CORREDORES (BATEDORES).
(2 Samuele 15:1) Kulutwe lia yino yuma Absalome yalilulikila temba-lia-jita ni tuvwalu ni makumi atano a malunga hanga akamutetekele.
(2 Samuele 15:2-6) Absalome yalimeneka chimenemene, yamanyina mu jila ku unjililo mu chihunda. Muze umwe mapwa ni chikuma chatamba kachi kuneha kuli mwanangana achipatule, mba Absalome mamusanyika ngwenyi, Ku chihunda chika unakatuka? Aye makumbulula ngwenyi, Ami kavumbi kenu nguli wa ku munyachi wa nganji wa mu Izalele. 3 Absalome yamba ngwenyi, Ewa, yikuma ye yipema ya ululi, alioze kuli mwanangana niumwe kechi kukwivwa. 4 Absalome yaweza nawa ngwenyi, Nyi kachi nguli sopi mu chifuchi, kachi mutu mweswe uli ni chikuma hanji mulonga meza kuli yami, kachi mungumupatwila kanawa! 5 Chipwe umwe makundama ni kumuwayila, mazoza moko ni kumukwata, ni kumwaha mbeju. 6 Chenacho alingile Absalome kuli A-Izalele eswe waze ejile kuli mwanangana atambule upatwilo. Chocho Absalome weyile mbunge ja malunga eswe A-Izalele.
w12 15/7 13 ¶5
Wayila Zambi ya Utuswilo
5 Mu Mbimbiliya muli yilweza yinji ya atu waze apiangwile akwo ni yitanga yipi. Umwe wa kuli ayo kali Absalome, mwana wa Mwanangana Ndawichi. Absalome kapwile lunga mupema chinji. Alioze, hakupalika cha mashimbu, ngwe Satana, iye yapwa ni mbunge ya kuzo, yazanga chinji ngunja ya tato, yize te keshi ni ulite wa kupwa nayo. Yazanga chinji kutambula wanangana wa tato, kashika yalionga kupwa mukwa-kulihulumba hali A-Izalele, hakulinga chino, Absalome yasolola kuli atu ngwo wanangana wa tato kuushi kulihulumba hali ayo. Ngwe chize Ndiapu alingile mu munda wa Endene, Absalome neye yalisolola ngwe mukwa-kulinga yuma yipema, hazehene yapihisa lufuma wa tato.—2 Sam. 15:1-5.
(2 Samuele 15:10-12) Alioze Absalome yatuma ngendeshi ndusu mu minyachi yeswe ya A-Izalele ngwenyi, Muze munwivwa liji lia chitavwi mba munwamba ngwenu, Absalome iye mwanangana mu Heprone. 11 Ayile hamwe ni Absalome kulakaji aali a malunga a ku Yerusaleme. Te hanaalakenya, alioze o ayile ni kwalajala. Kanyingikine nichimwe. 12 Absalome yasaka Ahitofele Ka-Ngilo ku chihunda chinyi cha Ngilo kuze te analambwila milambu. Aye wapwile kaliamanga ka Ndawichi. Mafwefwe apwile anji mumu atu okele kuli Absalome tangwa ha tangwa.
it-2 311
Heprone
Ha kupalika cha yimwe miaka, Absalome, mwana wa Ndawichi, yahiluka ku Heprone, kuzekwene yaputuka kulilulieka hanga amone chize matambula wanangana wa tato. (2Sa 15:7-10) Kota mumu lia ulemu uze Heprone yapwile nayo ngwe mbonge yinene ya Yunda, nawa hakupwa mbonge yize asemukinyine, kashika Absalome asakwile mbonge yacho hanga ahase kulilulieka hanga atambule ngunja ya wanangana. Kulutwe, mujikulu wa Ndawichi, Mwanangana Rehoboame yatungulula Heprone. (2Sg 11:5-10) Muze Yunda ayinongesele kuli A-Babilonia ni muze funge A-Yunda afunyine, amwe yatwama mu Heprone (Kiriate-Arpa).—Neh 11:25.
Kuhengwola Yikuma Yilemu ya mu Mbimbiliya
Shina Sango Jino Jamwenemwene?
11 Ha mashimbu amwe, mutuhasa kwivwa yikola ku mbunge mumu atu kamba yimwe hali yetu yize kuyalumbunwine umwenemwene weswe. Yino ye yalingiwile kuli Mefiposhete. Mwanangana Ndawichi yahana kuli Mefiposhete minda yeswe ya kako Saulu. (2 Samuele 9:6, 7) Alioze kulutwe Ndawichi yevwa jimwe sango jipi hali Mefiposhete. Ndawichi kakahengwile hanga anyingike nyi sango jacho te jamwenemwene, alioze iye yatambula minda yeswe kuli Mefiposhete. (2 Samuele 16:1-4) Kulutwe muze Ndawichi hahanjika ni Mefiposhete, yanyingika ngwenyi kumana sango jize evwile te ja mahuza. Mba hi yafunyishina Mefiposhete yimwe minda. (2 Samuele 19:24-29) Nyi Ndawichi kasele shimbu hanga anyingike umwenemwene chakuhona kukwata chiyulo cha susumuku ha sango jize evwile, kachi Mefiposhete kakamutambwile minda yize amwehele.
Kutanga Mbimbiliya
(2 Samuele 16:4) Henaho mwanangana yamba kuli Ziba ngwenyi, Yuma yeswe yize te yapwile ya Mefiposhete hiyalumuka ya yena. Ziba ngwenyi, Ngunafulamana kuli yenu. Ngukawane vumbi kumeso ja mwene wami mwanangana.
(2 Samuele 17:17-29) Jonata ni Ahimaze yatwama hakamwihi ni Ene-Rogele. Umwe ngamba wa pwo wapwile nikuyaya nikuatwalila liji. O yaya nikwambulwila mwanangana Ndawichi kuchina maamona nikunjila mwimbo. 18 Alioze umwe mwana-lunga yaamona, yambulwila Absalome. E malunga yaya fuji eswe aali, yaheta ku zuwo lia umwe lunga mu Mbahurime yoze wapwile ni shima lisuku mu yiize yenyi. O yanjilamo. 19 Mba pwo waseleho chifuko nikwanyikinaho mbuto ya kutwa. Kachinyingikine niumwe. 20 Ngamba ja Absalome yaya kuli pwo ku zuwo, yamba ngwo, Ahimaze ni Jonata kuli ali? Pwo yamba kuli ayo ngwenyi, Hanazauka kulu kachitwetwe. Yaafupa, kaawanyine, kashika yahiluka ku Yerusaleme. 21 Muze o haya, malunga akatukile mu shima, yaya, yalweza mwanangana Ndawichi. Yamba kuli Ndawichi ngwo, Katukenu, nuzauke lwiji ni kawashi mumu chocho ni chocho Ahitofele hanaalongesa hakutwala kuli yenu. 22 Mba Ndawichi yakatuka ni atu eswe waze wapwile no, yazauka Yordau. Muze hikwacha chimene kukwasalile niumwe, chipwe umuwika yoze kanda azauka Yordau. 23 Muze Ahitofele hamona ngwe kakawile mana jenyi, yalulika chimbulu chenyi, yakatuka, yaya kwenyi ku chihunda chenyi. Yalulika zuwo lienyi, yalisukika. Chocho yafwa, yamufunda mu chifuka cha tato. 24 Ndawichi yeza ku Mahaneme. Absalome yazauka Yordau ni malunga a Izalele eswe hamwe nenyi. 25 Absalome yasela Amasa helu lia tujita mukusalakana Joabe. Amasa te mwana wa umwe lunga jina lienyi Itara Ka-Izalele yoze wanjilile kuli Abigale mwana Nahashi mwanakwo wa Zeluia naye ya Joabe. 26 A-Izalele ni Absalome asele chilombo cho ku Ngiliate. 27 Ha kuheta Ndawichi ku Mahaneme kumanyi Shobi, mwana Nahashi wa ku Raba wa kuli A-Amone, ni Makire mwana Amiele wa ku Lo-Devale ni Bazilai Ka-Ngiliate wa ku Rogelime 28 yaneha mihela, ni mambashila, ni milondo, ni tiliku, ni sevada, ni wunga, ni mbuto yumu, ni makunde, ni landa ni ya kwanyika, 29 ni wuchi, ni maji ayamwa, ni mapanga, ni keju ya ngombe, hanga Ndawichi ni atu jenyi akalie. Mumu yamba ngwo, E atu kali ni zala, kanahongo ni pwila mu puya.