LET POUR BANN EBRE

1 Lontan, Bondye ti koz plizyer fwa avek nou bann zanset atraver bann profet dan diferan fason.+ 2 Dan nou letan,* Bondye in koz avek nou atraver en Garson+ ki i’n apwente konman zeritye tou keksoz+ e atraver ki i’n fer sa lemonn.*+ 3 I reflekte laglwar Bondye+ e i resanblans egzakt personnalite Bondye.+ I gard tou keksoz an egzistans gras a son parol pwisan. Apre ki i’n pirifye nou avek nou pese,+ i ti asiz lo kote drwat sa Enn Tre O dan lesyel.+ 4 Vi ki i’n ganny en non pli enportan ki bann lanz,+ i’n vin pli siperyer ki zot.+

5 Par egzanp, avek ki lanz Bondye in deza dir: “Ou mon garson e ozordi mon’n vin ou papa”?+ Ouswa: “Mon pou vin son papa e i pou vin mon garson”?+ 6 Me konsernan sa letan ler i pou anvoy son Premye Ne+ ankor enn fwa lo later, i dir: “Ki tou bann lanz Bondye i tonm azenou devan li.”*

7 Bondye i osi dir sa lo bann lanz: “I fer son bann lanz vin bann lafors pwisan e son bann serviter*+ en laflanm dife.”+ 8 Me konsernan son Garson, i dir: “Bondye i ou tronn+ pour touzour e touzour e avek ou baton lerwa, ou pou diriz avek ladrwatir.* 9 Ou’n kontan sa ki byen e ay sa ki mal. I pour sa rezon ki Bondye, ou Bondye in devid delwil lo ou latet pour swazir ou+ e i’n donn ou plis lazwa ki lezot lerwa.”+ 10 I osi dir: “O Senyer, o konmansman ou’n fer bann fondasyon later e ou’n fer lesyel avek ou lanmen. 11 Later ek lesyel pou disparet, me ou ou pou reste. Parey en lenz, zot pou ize, 12 ou pou ploy zot parey en gran lenz e ou pou sanz zot parey dimoun i sanz lenz. Me ou ou pa pou sanze e ou lavi pa pou zanmen fini.”+

13 Me avek ki lanz, i’n deza dir: “Asiz lo mon kote drwat ziska ki mon met ou bann lennmi anba ou lipye”?*+ 14 Pa zot tou zot bann lanz* ki fer en servis sen*+ e ki’n ganny anvoye pour servi bann ki pou ganny sove?

2 I pour sa rezon ki i neseser pour nou port en pli gran latansyon ki labitid lo bann keksoz ki nou’n tande+ pour ki nou pa zanmen drive.+ 2 Mesaz ki ti ganny anonse atraver bann lanz+ ti byen etabli e sak dimoun ki ti komet en lofans e dezobeir ti ganny pini annakor avek lazistis.+ 3 Si i ti leka, ki mannyer nou pou kapab sap pinisyon si nou negliz sa mesaz sitan enportan konsernan sa ki Bondye in fer pour sov nou?+ Parski nou Senyer ki ti konmans koz lo la+ e bann ki ti tann li in konfirm sa mesaz avek nou. 4 Bondye ti osi rann temwannyaz lo la atraver bann siny, bann keksoz merveye ek mirak+ e ler i ti donn lespri sen son bann serviter dapre son lavolonte.+

5 Parski Bondye pa’n fer bann lanz diriz sa later ki pe vini,+ ki nou pe koz lo la. 6 Me en serten temwen ti ekri kekpar: “Ki imen i ete pour ki ou mazin li? Ki garson zonm i ete pour ki ou pran swen avek li?+ 7 Ou’n met li dan en pozisyon en pti pe pli ba ki bann lanz, ou’n kouronn li avek laglwar ek loner e ou’n donn li lotorite lo tou sa ki ou’n fer. 8 Ou’n soumet tou keksoz anba son lotorite.”*+ Ler Bondye in soumet tou keksoz avek li,+ napa nanryen ki i pa’n met anba son lotorite.+ Me la, nou pa ankor vwar tou keksoz ki’n ganny soumet avek li.+ 9 Zezi ti ganny mete dan en pozisyon en pti pe pli ba ki bann lanz.+ Me aprezan nou vwar Zezi ki’n ganny kouronnen avek laglwar ek loner parski i’n soufer ziska lanmor+ pour ki gras a labonte ekstraordiner* Bondye, i kapab mor pour tou dimoun.+

10 Tou keksoz i egziste par e pour Bondye. Alor pour ki bokou garson i ganny glorifye,+ i toutafe normal ki Bondye ti fer sa Enn ki’n ganny apwente pour zot ganny sove*+ vin parfe atraver soufrans.+ 11 Parski sa enn ki pe sanktifye e sa bann ki pe ganny sanktifye,+ zot tou zot annan en sel papa+ e pour sa rezon, i pa onte pour konsider zot konman son bann frer.+ 12 Parey i’n dir: “Mon pou koz lo ou non avek mon bann frer, mon pou sant kantik pour loue ou dan kongregasyon.”+ 13 I’n osi dir: “Mon pou met mon konfyans dan li”+ e “Gete! Mwan ek sa bann zanfan ki Zeova* in donn mwan.”+

14 Alor, vi ki sa bann “zanfan” i bann imen,* pareyman li osi i ti vin en imen,+ pour ki atraver son lanmor i kapab detrir sa enn ki kapab koz lanmor,+ setadir Dyab+ 15 e pour ki i kapab liber tou sa bann ki’n viv konman lesklav tou zot lavi akoz zot ti per lanmor.+ 16 Parski an realite, i pa ti vin ed bann lanz, me i ti ed desandans Abraam.+ 17 Alor, i ti bezwen vin parey son bann “frer” dan tou laspe,+ pour ki i kapab vin en granpret fidel ki annan pitye* pour lezot dan servis Bondye, pour ki i ofer son lekor konman en sakrifis rekonsilyasyon*+ pour pese lepep.+ 18 Vi ki li menm i’n soufer ler i ti pe ganny teste+ alor i kapab ed sa bann ki pe ganny teste.+

3 Alor, mon bann frer ki sen, zot ki’n ganny swazir* pour al dan lesyel,+ reflesir byen lo legzanp Zezi, sa enn ki nou aksepte konman zapot ek granpret.+ 2 I ti fidel avek sa Enn ki ti swazir li,+ zis parey Moiz osi ti fidel ler i ti servi dan lakaz Bondye.+ 3 Parski Zezi i merit ganny plis laglwar+ ki Moiz, vi ki sa enn ki konstri en lakaz i annan plis loner ki sa lakaz li menm. 4 Byensir, tou lakaz i ganny konstri par en dimoun, me sa enn ki’n konstri tou keksoz i Bondye. 5 Moiz ti en serviter fidel dan lakaz antye Bondye. Son servis ti montre bann keksoz ki Bondye ti pou koz lo la pli tar. 6 Me konman garson,+ Kris ti fidelman okip lakaz Bondye. Nou Son lakaz+ si vreman nou kontinyen koz avek lardyes* e kontinyen gard nou lespwar, ki fer nou fyer ziska lafen.

7 Alor, zis parey lespri sen in dir,+ “Ozordi, si zot ekout son lavwa, 8 pa les zot leker vin dir parey zot zanset ti fer ler zot ti fer mwan vreman ankoler e teste mwan dan dezer.+ 9 Zot ti teste mwan e met mwan o defi menm si zot ti’n vwar sa ki mon ti’n fer pour 40 an.+ 10 I pour sa rezon ki mon ti degout sa zenerasyon e dir: ‘Zot toultan swiv move dezir ki dan zot leker e zot pa’n arive konn mwan.’ 11 Alor, dan mon lakoler mon ti fer sa serman: ‘Zot pa pou antre dan mon repo.’”+

12 Mon bann frer, fer byen atansyon ki zot pa zanmen devlop en move leker ki mank lafwa par elwanny zot avek sa Bondye vivan.+ 13 Me kontinyen ankouraz kanmarad sak zour, tan ki i ankor apel “Ozordi,”+ pour ki personn parmi zot pa les son leker vin dir akoz pouvwar pese ki anbet dimoun. 14 Parski nou pou eksperyans menm keksoz ki Kris in eksperyanse si nou kontinyen gard sa konfyans ki nou ti annan depi o konmansman ziska lafen.+ 15 Parey i’n ganny dir, “Ozordi, si zot ekout son lavwa, pa les zot leker vin dir parey zot zanset ti fer ler zot ti fer mwan vreman ankoler.”+

16 Parski lekel ki ti tande e pourtan ti fer Bondye ankoler? Anfet, pa i tou sa bann ki ti kit Lezip anba gidans Moiz?+ 17 Deplis, Bondye ti degout lekel pandan 40 an?+ Pa i sa bann ki ti fer pese e mor dan dezer?+ 18 Avek lekel i ti fer serman ki zot pa ti pou antre dan son repo? Pa i sa bann ki ti dezobeisan? 19 Alor nou vwar ki zot pa ti kapab antre dan son repo akoz zot ti mank lafwa.+

4 Alor, vi ki promes pour antre dan son repo i ankor egziste, fer byen atansyon pangar serten parmi zot pa arive antre dan son repo.+ 2 Parski nou osi nou’n tann sa bon nouvel+ zis parey nou zanset. Me sa mesaz ki zot ti tande pa ti benefisye zot parski zot ti napa menm lafwa avek sa bann ki ti ekoute. 3 Parski nou ki demontre lafwa, nou antre dan son repo. Konsernan sa repo, i’n dir: “Alor, dan mon lakoler mon ti fer sa serman, ‘Zot pa pou antre dan mon repo,’”+ menm si li i ti’n fini son travay depi o konmansman lemonn.*+ 4 Parski kekpar i ti dir sa konsernan setyenm zour: “Bondye ti repoze setyenm zour apre tou son travay”+ 5 e la ankor i’n dir: “Zot pa pou antre dan mon repo.”+

6 I annan serten ki pa ankor antre dan sa repo e sa bann ki ti premye pour tann sa bon nouvel pa ti antre dan sa repo akoz zot dezobeisans.+ 7 Sanmenm rezon alor ki apre en bon pe letan, Bondye ti dir dan en psonm David, zis parey i’n ganny dir pli boner dan sa let, “Ozordi, si zot ekout son lavwa, pa les zot leker vin dir.”+ Alor, ankor enn fwa i’n fikse en zour, ki apel “Ozordi.” 8 Parski si Zozye+ ti’n anmenn zot dan en landrwa repo, Bondye pa ti pou’n koz lo en lot zour apre sa. 9 Sanmenm i reste en repo parey zour Saba pour pep Bondye.+ 10 Parski sa dimoun ki’n antre dan repo Bondye in repoze an sa ki konsern son travay, zis parey Bondye ti repoze apre son travay.+

11 Alor, annou fer tou nou posib pour antre dan sa repo, pour ki personn pa swiv menm legzanp dezobeisans ki nou bann zanset.+ 12 Parski parol Bondye i vivan e pwisan,+ i pli koupe ki en lepe ki koup de kote,+ i menm penetre e separ lekor* ek lespri,* lezo* ek lanmwel lezo e i kapab konn tou panse ek lentansyon ki dan leker. 13 Napa nanryen ki kasyet devan lizye Bondye,+ me tou keksoz i touni e o kler devan lizye sa enn ki nou bezwen rann kont avek.+

14 Alor, vi ki nou annan en granpret ki siperyer ki’n al dan lesyel, Zezi, Garson Bondye,+ annou kontinyen koz piblikman lo li avek lezot.+ 15 Akoz nou granpret pa enn ki pa kapab konpran* nou febles,+ me i enn ki’n ganny teste dan tou keksoz parey nou menm, me i pa’n fer pese.+ 16 Alor, annou vin kot tronn labonte ekstraordiner* Bondye e koz avek Bondye libreman,+ pour ki i pran pitye* e demontre labonte ekstraordiner anver nou ler nou bezwen led dan sa moman apropriye.

5 Nenport zonm ki’n ganny apwente konman granpret pour servi lepep an sa ki konsern ladorasyon Bondye,+ i ganny apwente pour ofer lofrann ek sakrifis pour pese.+ 2 I kapab azir avek konpasyon* anver bann ki pa konn sa ki byen e ki fer pese,* vi ki li osi i bezwen fer fas avek son prop febles 3 e akoz sa, i devret ofer lofrann pour son prop pese zis parey i bezwen fer pour lepep.+

4 En zonm pa kapab annan loner pour vin granpret lo li menm, me i bezwen ganny apwente par Bondye parey i ti leka pour Aaron.+ 5 Pareyman Kris pa ti glorifye son lekor+ par vin en granpret, me i ti ganny glorifye par sa Enn ki ti dir avek li: “Ou mon garson e ozordi mon’n vin ou papa.”+ 6 Parey i’n osi dir dan en lot landrwa, “Ou en pret pour touzour parey Melkisedek.”+

7 Pandan son lavi lo later, Kris ti fer bann siplikasyon ek demann, avek gran leokri ek larm.+ Sa Enn ki ti kapab sov li dan lanmor ti ekout li akoz i ti annan en gran respe* pour Bondye. 8 Menm si i ti son garson, i ti aprann lobeisans atraver bann keksoz ki i ti soufer.+ 9 Apre ki i ti’n vin parfe,*+ i ti vin responsab pour delivrans eternel tou bann ki obeir li,+ 10 parski i’n ganny swazir par Bondye konman granpret parey Melkisedek.+

11 Nou annan en kantite pour dir lo li e i difisil pour eksplike, parski zot dir konpran.* 12 Parski apre tou sa letan, zot ti’n sipoze vin bann ansenyan, me zot ankor bezwen en dimoun pour ansenny zot depi o konmansman bann keksoz elemanter+ dan parol sakre Bondye e zot in bezwen rekonmans bwar dile olye manz manze solid. 13 Parski tou sa ki kontinyen bwar dile pa konn parol ladrwatir parski i ankor en pti baba.+ 14 Me manze solid i pour bann dimoun matir ki’n aprann servi zot abilite pour zize pour zot kapab fer diferans ant sa ki byen ek sa ki mal.

6 Alor, aprezan ki nou’n fini aprann bann lansennyman de baz+ konsernan Kris, san tarde, annou fer zefor pour vin bann dimoun matir.+ I pa neseser pour remet menm fondasyon ankor setadir repantans pour bann keksoz initil ek lafwa dan Bondye, 2 lansennyman lo batenm e poz lanmen lo dimoun,+ rezireksyon+ ek zizman eternel. 3 Sanmenm sa ki nou pou fer, si Bondye i permet.

4 Me konsernan sa bann ki ti deza konn lalimyer laverite,+ ki’n ganny kado* ki sorti dan lesyel, ki’n ganny swazir gras a lespri sen, 5 ki’n vwar ki parol Bondye i vreman bon, ki’n eksperyans bann benediksyon* ki pou dan sa lemonn* ki pe vini, 6 me ki’n rezet laverite,+ i enposib pour ed zot repantir, parski zot menm zot in klout Garson Bondye ankor lo poto e zot in fer li onte devan tou dimoun.+ 7 Parski later i ganny benediksyon Bondye ler i bwar sa lapli ki tonm lo li tanzantan e apre sa i prodwir vezetasyon ki bon pour manze par bann ki’n kiltiv li. 8 Me si i prodwir bann pye pikan ek move zerb, sa later pou ganny rezete, menm modi e a lafen i pou ganny brile.

9 Me zot ki nou kontan, menm si nou bezwen koz avek zot koumsa, nou asire ki zot dan en pli bon pozisyon ki bann ki’n kit laverite e ki zot pe fer keksoz pour ganny sove. 10 Parski Bondye pa enzis pour oubliy sa ki zot in fer e lanmour ki zot in demontre pour son non+ par servi e kontinyen servi bann sen. 11 Me nou anvi ki sakenn ant zot i demontre menm devouman pour ki zot lespwar i konpletman asire+ ziska lafen+ 12 e ki zot pa vin pares,+ me ki zot swiv legzanp bann ki Bondye ti fer bann promes avek, akoz zot lafwa ek pasyans.

13 Parski ler Bondye ti fer son promes avek Abraam, i ti fer en serman par li menm+ akoz i ti napa personn ki pli gran ki li. 14 I ti dir: “Mon pou sirman beni ou e fer ou vin bokou.”+ 15 Alor, apre ki Abraam ti’n esper avek pasyans, Abraam ti resevwar sa ki Bondye ti’n promet li. 16 Parski dimoun i fer serman par en dimoun ki pli gran ki zot, sa i regle tou dispit vi ki sa serman i vin en garanti legal pour zot.+ 17 Dan sa menm fason, ler Bondye ti deside donn plis lasirans bann ki ti’n ganny sa promes+ ki son plan pa zanmen sanze, alor i ti fer en serman pour garanti sa promes. 18 Bondye ti fer sa pour ki atraver sa de keksoz* ki pa kapab sanze e ki fer li enposib pour li koz manti,+ nou ki’n rod proteksyon kot Bondye, nou kapab vreman ganny ankouraze pour met tou nou konfyans dan sa lespwar ki devan nou. 19 Sa lespwar+ i parey lank en bato dan nou lavi, enn ki sir e ferm e ki fer nou antre anndan par deryer rido,+ 20 kot en lot in antre avan nou pour prepar semen pour nou, setadir Zezi,+ ki’n vin en granpret parey Melkisedek pour touzour.+

7 Melkisedek ti lerwa Salenm e pret Bondye Tre O. I ti al zwenn Abraam ler Abraam ti pe retournen apre ki i ti’n touy bann lerwa e Melkisedek ti beni li.+ 2 Abraam ti donn* li en dizyenm tou keksoz. Premyerman, son non i vedir “Lerwa Ladrwatir” e i ti osi lerwa Salenm ki vedir “Lerwa Lape.” 3 Vi ki i napa en rikord lo lekel son papa, manman, zanset, son nesans oubyen son lanmor me i ti vin parey Garson Bondye, alor i reste pret pour touzour.+

4 Pa sa zonm ti vreman enportan si Abraam, sef fanmir,* ti donn li en dizyenm dan tou sa bann pli bon keksoz ki zot ti gannyen dan lager!+ 5 I vre ki dapre Lalwa, bann garson Levi+ ki ti ganny apwente konman pret ti ganny lord pour anmas ladim* avek lepep,+ setadir avek zot frer, menm si zot ti bann desandans Abraam. 6 Me Abraam ti donn ladim avek sa zonm ki pa sorti dan fanmir Levi e Melkisedek ti beni sa enn ki Bondye ti’n fer bann promes avek.+ 7 Napa okenn dout ki sa enn ki pli gran i beni sa enn ki pli pti. 8 Dan sa premye ka, i bann zonm ki pou mor ki ganny ladim, me dan sa lot ka, i en dimoun ki Lekritir i dir ki i kontinyen viv.+ 9 I kapab ganny dir ki menm si lepep i donn ladim avek Levi, Levi in pey ladim atraver Abraam 10 parski Levi pa ti ankor ne ler Melkisedek ti al zwenn Abraam.+

11 Alor, si i ti posib pour vin parfe gras a bann pret sorti dan tribi Levi+ (parski sa ti en laspe dan Lalwa ki ti ganny donnen avek lepep), eski i ti pou neseser pour annan en lot pret parey Melkisedek+ me ki pa parey Aaron? 12 Parski si sa laranzman pour bann pret i sanze, i neseser pour sanz Lalwa osi.+ 13 Parski sa zonm ki nou pe koz lo la i sorti dan en lot tribi, ki personn dan sa tribi pa’n deza servi kot lotel.+ 14 Parski i kler ki nou Senyer i sorti dan tribi Zida,+ pourtan Moiz pa’n zanmen dir si i ti pou annan bann pret sorti dan sa tribi.

15 Tousala in vin pli kler ankor ler i annan en lot pret+ ki parey Melkisedek.+ 16 I servi konman pret pa akoz sa tribi ki i sorti ladan parey Lalwa ti demande me akoz i’n ganny sa pwisans ki donn li lavi ki pa kapab ganny detrir.+ 17 Parski la sa ki’n ganny dir konsernan li: “Ou en pret pour touzour parey Melkisedek.”+

18 Alor, vye komannman i ganny met dekote akoz i feb e i pa efikas.+ 19 Parski Lalwa pa’n fer nanryen vin parfe,+ me sa lespwar ki pli meyer+ ki’n fer keksoz vin parfe e sa i fer nou vin pli pros avek Bondye.+ 20 Deplis, Bondye ti fer en serman ler i ti fer Zezi vin pret. 21 (Parski vreman i annan bann zonm ki’n vin pret san ki Bondye ti fer en serman, me sa enn in vin pret gras a en serman ki Bondye ti fer ler i ti dir: “Zeova* in fer serman e i pa pou sanz son nide,* ‘Ou en pret pour touzour’”).+ 22 Alor, Zezi in vin sa enn ki garanti en lalyans pli meyer.+ 23 Deplis, bokou ti vin pret parski zot ti bezwen ranplas kanmarad+ akoz zot ti mor e sa ti anpes zot kontinyen servi konman pret. 24 Me vi ki Zezi i viv pour touzour,+ i napa personn ki pou ranplas li konman pret. 25 Alor i kapab osi sov bann ki pe priy Bondye atraver li dan en fason parfe, parski i pou toultan la pour pled pour zot.+

26 Parski i byen ki nou annan en granpret ki fidel, inosan, pir,+ separe avek bann ki fer pese e ki’n ganny mete dan en pozisyon ki pli o ki lesyel.+ 27 Kontrerman avek bann granpret, i pa bezwen ofer sakrifis tou le zour,+ premyerman pour son prop pese e apre pour pese lepep+ parski i ti ofer son prop lekor konman en sakrifis enn fwa pour tou.+ 28 Parski Lalwa i apwent konman granpret bann zonm ki fer pese,+ me Bondye, ki ti fer sa serman+ apre ki Lalwa ti’n ganny donnen, in apwent en Garson ki’n vin parfe+ pour touzour.

8 Aprezan, la pwen enportan lo sa ki nou pe dir: Nou nou annan en granpret koumsa+ e i’n asiz dan kote drwat tronn Bondye dan lesyel,+ 2 i en serviter* dan landrwa sen+ e dan sa vre latant, ki’n ganny etablir par Zeova* e pa par zonm. 3 Parski tou bann granpret i ganny apwente pour ofer lofrann ek sakrifis, alor i ti neseser pour sa enn osi annan en keksoz pour ofer.+ 4 Si i ti lo later, i pa ti pou en pret,+ vi ki dapre Lalwa i deza annan bann pret ki ofer bann lofrann. 5 Sa bann zonm pe ofer servis sakre ki en model ek en reprezantasyon*+ bann keksoz ki dan lesyel,+ zis parey ler Moiz ti pe al konstri latant, Bondye ti donn li sa lord: “Fer sir ki ou fer tou keksoz parey sa model ki mon ti montre ou lo montanny.”+ 6 Me la Zezi in ganny en minister* ki pli meyer akoz i osi medyater+ en lalyans ki pli meyer+ ki’n ganny etablir legalman par bann promes ki pli meyer.+

7 Si sa premye lalyans ti san defo, i pa ti pou neseser pour annan en dezyenm lalyans.+ 8 Me i vwar defo sa pep akoz: “Zeova* in dir, ‘Letan pe vini kot mon pou fer en nouvo lalyans avek pep Izrael ek pep Zida.’ 9 Zeova* in osi dir, ‘I pa pou parey sa lalyans ki mon ti fer avek zot zanset zour ki mon ti atrap zot lanmen e tir zot dan pei Lezip,+ parski zot pa ti gard mon lalyans, alor mon ti aret pran swen avek zot.’

10 “Zeova* in dir, ‘La sa lalyans ki mon pou fer avek pep Izrael apre ki sa letan in pase. Mon pou met mon bann lalwa dan zot lespri e mon pou ekri zot dan zot leker.+ Mon pou vin zot Bondye e zot pou vin mon pep.+

11 “‘Zot pou nepli ansenny zot prosen oubyen zot frer e dir: “Ou bezwen konn Zeova!”* Parski zot tou zot pou konn mwan, depi sa ki pli pti ziska sa ki pli gran parmi zot. 12 Parski mon pou pardonn zot bann move aksyon e mon pou nepli rapel zot pese.’”+

13 Ler i ti koz lo “en nouvo lalyans,” i’n fer sa enn avan vin initil,+ deplis sa ki initil e ki pe vyeyi, i pros pour disparet.+

9 Sa vye lalyans ti annan bann lalwa pour ladorasyon* e son landrwa sen+ lo later. 2 Dan premye konpartiman latant ki ganny apele Landrwa Sen*+ ki ti ganny konstri, i ti annan sandelye,*+ latab ek dipen sakre.*+ 3 Me deryer dezyenm rido,+ i ti annan en konpartiman dan latant ki ti apel Tre Sen.+ 4 Dan Tre Sen, i ti annan en lansanswar* annor+ ek lars lalyans+ ki ti konpletman kouver avek lor.+ Dan sa lars, i ti annan lamann+ dan en resipyan annor, baton Aaron ki ti’n fleri+ ek bann plak ros+ lalyans. 5 Anler lo lars, i ti annan de seriben* glorye ki ti pe kouver kouvertir* sa lars+ avek zot lezel. Me la i pa letan pour koz lo sa bann keksoz an detay.

6 Depi ki sa bann keksoz ti’n ganny konstri dan sa fason, bann pret ti antre dan premye konpartiman latant pour ofer servis sakre regilyerman.+ 7 Me granpret ti antre tousel dan dezyenm konpartiman enn fwa par an,+ toultan avek disan+ ki i ti ofer pour son prop lekor+ e pour pese ki lepep+ ti’n komet dan linyorans. 8 Alor, lespri sen i fer kler ki personn pa ti ankor konnen ki mannyer pour antre dan landrwa sen* ler premye latant ti ankor egziste.+ 9 Sa latant i en model* bann keksoz ki pe arive dan nou letan.+ Dapre sa laranzman, lofrann ek sakrifis i ganny ofer,+ me sa bann keksoz pa kapab vreman fer en dimoun ki pe ador* Bondye annan en konsyans kler.+ 10 Sa bann keksoz i annan pour fer zis avek manze, labwason ek diferan seremoni pirifikasyon.*+ Sa bann lalwa ti annan pour fer avek lekor+ e zot ti ganny enpoze ziska letan fikse pour met tou keksoz drwat.

11 Me ler Kris ti vini konman en granpret pour anmenn bann benediksyon ki nou pe deza eksperyanse, i ti antre dan sa latant ki pli gran e pli parfe ki pa’n ganny fer par zonm, setadir ki pa lo sa later.* 12 I pa ti antre dan landrwa sen* avek disan kabri ek zenn toro, me enn fwa pour tou i ti antre dan landrwa sen* avek son prop disan+ e i’n delivre nou pour touzour.+ 13 Disan kabri ek toro+ e lasann en zenn bef* ki ti ganny fannen lo sa bann ki ti enpir ti kapab fer zot vin pir devan Bondye.+ 14 Gras a lespri sen ki eternel, Kris ti ofer son lekor san defo devan Bondye. Dan sa ka, pa disan Kris+ pou pli byen pirifye nou konsyans avek bann keksoz initil*+ pour ki nou kapab servi* sa Bondye vivan?+

15 I pour sa rezon ki Kris i medyater en nouvo lalyans+ pour ki bann ki’n ganny apele i ganny sa promes en leritaz eternel.+ Tousala in posib akoz son lanmor, pour ki bann ki ti komet bann lofans anba sa premye lalyans i ganny libere gras a en ranson.*+ 16 Ler en lalyans i ganny fer avek Bondye, sa dimoun ki fer sa lalyans i bezwen mor, 17 parski en lalyans i pa valid tan ki sa dimoun ki’n fer sa lalyans i ankor vivan. 18 Alor, sa premye lalyans osi pa ti pran lefe san ki disan ti ganny verse. 19 Parski ler Moiz ti donn tou bann komannman Lalwa avek lepep, i ti pran lizop* ek lalenn gro rouz pour fann disan bann zenn toro ek kabri ek delo lo sa liv* e lo lepep antye. 20 I ti dir: “Sa i disan lalyans ki Bondye in donn zot lord pour swiv.”+ 21 Pareyman i ti fann disan lo latant ek tou bann resipyan ki ganny servi dan ladorasyon.*+ 22 Wi, dapre Lalwa preski tou keksoz i kapab ganny pirifye avek disan+ e napa pardon pour pese si disan pa ganny verse.+

23 Alor, si i ti neseser ki sa model+ bann keksoz ki dan lesyel i ganny pirifye dan sa fason,+ alor bann keksoz ki dan lesyel i bezwen ganny pirifye par bann sakrifis ki pli meyer. 24 Parski Kris pa ti antre dan en landrwa sen* ki en kopi larealite+ e ki’n ganny fer par zonm,+ me dan lesyel menm+ pour prezant li devan* Bondye pour nou.+ 25 I pa ti pe al ofer son lekor plizyer fwa, parey granpret ti antre dan landrwa sen* avek disan ki pa ti son prop disan, lannen apre lannen.+ 26 Si non, i ti pou’n bezwen soufer plizyer fwa depi o konmansman lemonn.* Me aprezan i’n vin enn fwa pour tou dan sa letan lafen* pour elimin pese atraver sakrifis son prop lekor.+ 27 Zis parey tou dimoun i bezwen mor en fwa pour tou, me apre i pou annan en zizman, 28 pareyman Kris in ganny ofer enn fwa pour tou pour anmenn pese en kantite dimoun.+ Dezyenm fwa ki i pou vini, i pa pou vin pour retir pese me bann ki pe esper li avek enpasyans pour ganny sove pou vwar li.+

10 Vi ki Lalwa i en reprezantasyon*+ bann bon keksoz ki pe vini,+ me pa sa bann keksoz zot menm, Lalwa* ek sa bann menm sakrifis ki kontinyelman ganny ofer lannen apre lannen pa kapab fer sa bann ki ador Bondye vin parfe.+ 2 Si non, pa bann sakrifis ti pou’n aret ganny ofer? Parski enn fwa ki sa bann ki ti ofer sakrifis* ti’n ganny pirifye, zot ti pou nepli santi zot koupab akoz zot pese. 3 Plito lannen apre lannen, sa bann sakrifis i rapel zot zot pese,+ 4 parski i pa posib pour disan toro ek kabri retir pese.

5 Alor ler Kris ti vin dan lemonn, i ti dir: “‘Ou pa ti oule sakrifis ek lofrann, me ou ti prepar en lekor pour mwan. 6 Ou pa ti aksepte bann lofrann brile ek sakrifis pour pese.’+ 7 Apre mon ti dir: ‘O Bondye, la mon’n vin pour fer ou lavolonte, parey Lekritir* in dir lo mwan.’”+ 8 Apre ki i ti’n dir: “Ou pa ti oule e ou pa ti aksepte bann sakrifis ek lofrann, lofrann brile ek sakrifis pour pese.” Sa i bann sakrifis ki ti ganny ofer dapre Lalwa. 9 Alor i ti dir: “La mon’n vin pour fer ou lavolonte.”+ I’n tir sa ki premye pour etabli sa ki dezyenm. 10 An armoni avek sa “lavolonte,”+ nou’n ganny sanktifye akoz lekor Zezi Kri in ganny ofer enn fwa pour tou.+

11 Osi, zour apre zour, sak pret i al dan son plas pour fer son servis* dan tanp+ e pour ofer menm sakrifis plizyer fwa,+ ki pa zanmen kapab retir pese konpletman.+ 12 Me enn fwa pour tou, sa zonm in ofer en sakrifis pour bann pese e i’n asiz lo kote drwat Bondye.+ 13 Depi sa, i pe espere ziska ki son bann lennmi i ganny mete anba son lipye.*+ 14 Parski i par ofer en sel sakrifis ki i’n fer bann ki pe ganny sanktifye vin parfe+ enn fwa pour tou. 15 Deplis, lespri sen i osi konfirm avek nou ki sa i vre, par dir: 16 “Zeova* in dir, ‘La sa lalyans ki mon pou fer avek zot apre ki sa letan in pase. Mon pou met mon bann lalwa dan zot leker e mon pou ekri zot dan zot lespri.’”+ 17 Apre i’n dir: “Mon pou nepli rapel zot pese ek zot move aksyon.”+ 18 Si sa bann keksoz i ganny pardonnen, alor i nepli neseser pour ofer sakrifis pour pese.

19 Alor mon bann frer, nou annan konfyans* ki nou kapab antre dan landrwa sen*+ gras a disan Zezi. 20 I’n ouver pour nou en nouvo semen ki anmenn ver lavi atraver rido+ setadir son lekor. 21 Nou osi annan en pret ki siperyer ki ansarz lakaz Bondye.+ 22 Pour sa rezon, annou apros avek Bondye avek en leker senser ek en lafwa solid, akoz nou leker ek nou move konsyans in ganny pirifye*+ e nou lekor in ganny lave avek delo prop.+ 23 Annou persevere pour anons nou lespwar piblikman san ezite,+ parski sa enn ki’n fer sa promes i fidel. 24 Annou demontre en lentere senser dan lezot pour ki nou kapab ankouraz* kanmarad pour demontre lanmour e fer bann bon aksyon.+ 25 Annou pa aret rasanble ansanm,+ parey serten i annan labitid, me annou ankouraz kanmarad+ plis ankor la ki zot vwar sa zour pe aprose.+

26 Parski si nou pratik pese volonterman apre ki nou’n ganny konnesans egzakt lo laverite,+ i napa lezot sakrifis ankor pour pese.+ 27 Me, i reste zis pour esper avek lafreyer, zizman ek lakoler Bondye ki parey dife ki pou detrir bann ki opoz li.+ 28 En dimoun ki rezet Lalwa Moiz i ganny touye san okenn konpasyon si i koupab dapre temwannyaz de oubyen trwa temwen.+ 29 Pa pinisyon pou pli sever ankor pour en dimoun ki’n mepriz Garson Bondye, ki’n konsider disan lalyans+ ki’n pirifye li konman en keksoz san valer e ki’n ensilte lespri sen ki Bondye in servi pour demontre son labonte ekstraordiner?+ 30 Parski nou konn sa Enn ki’n dir: “Mwan ki revanze, mwan ki pou fer peye.” Oubyen: “Zeova* pou ziz son pep.”+ 31 I en keksoz efreyan pour tonm dan lanmen sa Bondye vivan.

32 Par kont, kontinyen rapel letan zot ti ganny lalimyer laverite+ e ler zot ti andir en kantite soufrans dan zot lalit. 33 Par ler zot ti ganny ensilte e persekite an piblik* e parfwa zot ti siport* bann ki ti eksperyans menm zafer. 34 Zot ti senpatiz avek sa bann ki dan prizon e zot pa ti perdi zot lazwa ler dimoun ti pran zot keksoz,+ parski zot konnen ki sa ki zot annan i pli meyer e pli dirab.+

35 Alor, pa aret koz avek lardyes parski zot lardyes pou ganny en gran rekonpans.+ 36 Zot bezwen landirans+ pour ki zot kapab ganny sa ki Bondye in promet zot apre ki zot in fer son lavolonte. 37 Parski dan ankor “en pti pe letan,”+ “sa enn ki pe vini pou arive e i pa pou tarde.”+ 38 “Me sa enn ki fer sa ki byen pou viv akoz son lafwa”+ e si i “retourn an aryer, mon napa okenn plezir dan li.”+ 39 Nou nou pa sa kalite dimoun ki retourn an aryer e ki pou ganny detrir,+ me nou sa kalite dimoun ki annan lafwa ki sov nou lavi.

11 Lafwa i ler nou asire ki sa ki nou pe espere pou vin vre+ e i levidans kler ki sa ki nou krwar i reel menm si nou pa vwar li. 2 Parski gras a zot lafwa, bann dimoun dan letan lontan* ti ganny en temwannyaz ki zot ti ganny laprouvasyon Bondye.

3 Akoz nou lafwa, nou konpran ki gras a parol Bondye ki lemonn* in vin an egzistans e ki sa ki nou vwar in vin an egzistans gras a bann keksoz ki nou pa vwar.

4 Akoz son lafwa, Abel ti ofer Bondye en sakrifis ki ti annan plis valer ki sakrifis Kaen.+ Gras a son lafwa, Abel ti ganny en temwannyaz ki i ti en dimoun ki fer sa ki byen, parski Bondye ti aksepte son lofrann+ e menm si Abel in mor, i ankor pe koze+ atraver son lafwa.

5 Akoz son lafwa, Bondye ti transfer Enok+ pour ki i pa soufer ler i ti mor e personn pa ti konnen kote i ti ete parski Bondye ti’n transfer li.+ Parski avan ki Bondye ti transfer li, Enok ti ganny en temwannyaz ki i ti’n vreman fer plezir Bondye. 6 Deplis, san lafwa i enposib pour vreman fer plezir Bondye, parski sa ki ador Bondye i devret krwar ki i egziste e ki i sa enn ki rekonpans sa bann ki pe vreman rod li.+

7 Akoz son lafwa, Noe+ ti annan en gran respe* pour Bondye e i ti konstri en lars+ pour sov son fanmir apre ki Bondye ti’n averti li konsernan bann keksoz ki i pa ti ankor vwar.+ Akoz son lafwa, Noe ti kondann lemonn+ e i ti ganny laprouvasyon Bondye gras a son lafwa.*

8 Akoz son lafwa, Abraam+ ti obeir e al dan en landrwa ki i ti’n ganny promet ler Bondye ti apel li. I ti ale menm si i pa ti konnen kote i ti pe ale.+ 9 Akoz son lafwa, i ti viv konman en etranze dan sa pei+ ki i ti’n ganny promet. Abraam ti viv anba latant+ avek Izaak ek Zakob, bann zeritye sa menm promes ki Bondye ti fer.+ 10 Parski i ti pe esper en lavil ki annan en fondasyon solid, en lavil ki son arsitek ek konstrikter i Bondye.+

11 Akoz son lafwa, Sara osi ti tonm ansent* gras a pwisans Bondye, menm si i ti’n desot laz ganny zanfan.+ Anfet i ti konsider sa Enn ki ti’n fer sa promes, fidel. 12 Pour sa rezon, menm si Abraam ti vye,*+ i ti ganny en kantite zanfan+ parey lakantite zetwal dan lesyel e disab o bor lanmer.+

13 Ler tou sa bann dimoun ti mor, zot lafwa ti ankor for, menm si zot pa ti’n ganny sa ki Bondye ti’n promet zot.+ Pour zot i ti konmsi zot ti’n fini vwar sa ki Bondye ti’n promet.+ Zot ti aksepte sa bann promes avek lazwa e anons piblikman ki zot ti bann etranze ek rezidan tanporer dan sa pei kot zot ti pe reste. 14 Parski sa bann ki koz dan sa fason i montre ki zot pe vreman rod en landrwa reste pour zot menm. 15 Pourtan, si zot ti’n kontinyen mazin sa landrwa ki zot ti’n kit deryer,+ zot ti pou’n kapab ganny en loportinite pour retourn laba. 16 Me zot annan sa dezir pour ganny en landrwa pli meyer, setadir, enn ki annan pour fer avek lesyel. Alor, Bondye pa onte akoz zot apel li zot Bondye,+ parski i’n prepar en lavil pour zot.+

17 Akoz son lafwa, i ti konmsi Abraam ti’n fini ofer Izaak ler i ti ganny teste.+ Abraam ki ti’n aksepte sa bann promes avek lazwa ti pare pour ofer son sel garson,+ 18 menm si i ti’n ganny dir: “Sa desandans ki ou’n ganny promet pou vin atraver Izaak.”+ 19 Me i ti rezonn dan li menm ki Bondye ti kapab resisit son garson e dan en fason senbolik, i ti reganny li.+

20 Osi akoz son lafwa, Izaak ti beni Zakob+ ek Ezai+ konsernan sa ki ti pou arive a lavenir.

21 Akoz son lafwa, ler Zakob ti pros pour mor,+ i ti beni sa de garson Zozef+ e i ti bezwen apiy lo son baton pour ador Bondye.+

22 Akoz son lafwa, ler i ti pros pour mor, Zozef ti koz lo sa letan ler bann garson Izrael ti pou sorti Lezip e i ti donn lenstriksyon* konsernan ki pour fer avek son lezo.*+

23 Akoz zot lafwa, paran Moiz ti kasyet li pour trwa mwan apre son nesans,+ parski zot ti vwar ki sa zanfan ti zoli+ e zot pa ti per pour dezobeir lord lerwa.+ 24 Akoz son lafwa, ler Moiz ti gran,+ i ti refize ganny konsidere konman garson fiy Faraon.+ 25 I ti swazir pour ganny maltrete avek pep Bondye plito ki pran plezir dan pese pour zis en serten letan. 26 Konman sa Enn ki’n ganny swazir,* i ti prefere ganny ensilte akoz pour li, sa ti annan plis valer ki bann trezor Lezip parski i ti konsantre zis lo sa rekonpans ki i ti pou gannyen. 27 Akoz son lafwa, i ti kit Lezip+ e i pa ti per lakoler lerwa,+ me i ti kontinyen reste ferm konmsi i ti pe vwar sa Enn ki envizib.+ 28 Akoz son lafwa, i ti selebre Lapak e fann disan lo lankadreman laport, pour ki lanz pa touy bann premye ne pep Bondye.+

29 Akoz zot lafwa, pep Bondye ti travers Lanmer Rouz lo later sek,+ me ler bann Ezipsyen ti esey fer parey, zot ti noye.+

30 Akoz zot lafwa, bann Izraelit ti fer letour miray Zeriko pour set zour e apre sa, sa miray ti tonbe.+ 31 Akoz son lafwa, Raab, sa prostitye pa ti ganny detrir ansanm avek bann ki ti dezobeir parski i ti byen resevwar bann espyon kot li.+

32 Ki mon kapab dir an plis ki sa? Parski letan pa pou ase si mon koz lo Gideonn,+ Barak,+ Sanmson,+ Zefta,+ David+ ensi ki Samyel+ ek lezot profet. 33 Akoz zot lafwa, zot ti defet bann rwayonm,+ etabli ladrwatir, ganny bann promes,+ ferm lagel bann lyon,+ 34 dife ti napa okenn lefe lo zot,+ zot ti sap lanmor par lepe,+ zot ti vin for ler zot ti feb,+ zot ti for dan lager,+ fer taye bann larme ki ti pe atak zot.+ 35 Fanmir bann madanm ti ganny resisite,+ me lezot dimoun ti ganny tortire ziska lanmor akoz zot pa ti fer konpromi zis pou ganny libere, pour ki zot kapab ganny en pli meyer rezireksyon. 36 Wi, lezot ti pas dan difikilte parey ganny monke, fwete e serten ti menm ganny mete dan prizon+ ek lasenn.+ 37 Zot ti ganny saboule avek ros,+ zot lafwa ti ganny teste, zot ti ganny sye an de e zot ti ganny touye avek lepe.+ Zot ti met lapo mouton ek lapo kabri+ lo zot ler zot ti dan bezwen, dan difikilte+ e ganny maltrete.+ 38 Zot ti tro bon pour sa lemonn. Zot ti ale vini dan dezer, dan bann montanny, trou ek kavern.+

39 Menm si zot tou zot ti ganny en temwannyaz ki zot ti ganny laprouvasyon Bondye akoz zot lafwa, zot pa ti ganny sa ki Bondye ti’n promet zot, 40 parski Bondye ti’n vwar davans en keksoz pli meyer pour nou,+ pour ki zot pa vin parfe san nou.

12 Alor, vi ki nou annan en sitan gran lafoul temwen* ki antour nou, annou debaras nou avek tou fardo ek pese ki kapab fasilman anpay nou.+ Avek landirans, annou tay dan sa lakours ki Bondye in met devan nou,+ 2 anmezir ki nou fikse nou regar lo Zezi, sa Enn ki gid nou lafwa* e ki fer nou lafwa vin parfe.+ Akoz sa lazwa ki i ti pou gannyen, i pa ti pran kont laont pour mor lo en poto martir* e aprezan i pe asize lo kote drwat tronn Bondye.+ 3 Alor, reflesir byen lo legzanp sa enn ki ti bezwen siport bann koze kontrer sorti kot bann dimoun+ ki ti kondann zot prop lekor par fer sa, akoz sa pou ed zot pour pa epwize e abandonnen.+

4 Dan zot lalit kont pese, zot pa’n bezwen lalit ziska lanmor. 5 Zot in konpletman oubliy konsey ki zot ti gannyen parey en papa i dir son bann garson: “Mon garson, pa bezwen konsider disiplin Zeova* konman en nanryen ditou, ni abandonnen ler i koriz ou, 6 parski Zeova* i disiplin sa bann ki i kontan, anfet, i pini* tou bann ki i konsider konman son garson.”+

7 Konsider sa ki zot pe andire konman en fason ki zot pe ganny disiplinen.* Bondye pe tret zot konman son bann zanfan.+ Parski lekel sa garson ki son papa pa disiplin li?+ 8 Me si zot pa’n ganny disiplinen, zot pa bann zanfan me zot bann zanfan ilezitim. 9 Deplis, nou papa* ti abitye disiplin nou e nou ti annan respe pour zot. Pa nou devret pare pour soumet avek nou Papa spirityel si nou oule viv?+ 10 Parski zot ti disiplin nou pour en pti pe letan dapre sa ki ti paret byen pour zot, me nou Papa ki dan lesyel i disiplin nou pour nou prop dibyen pour ki nou vin sen parey li.+ 11 I vre, ler nou ganny disiplinen nou pa zwaye me i fer fermal,* pourtan, pour sa bann ki les sa disiplin form zot, zot prodwir fri setadir lape ek ladrwatir.

12 Alor, fortifye bann ki’n bes lebra oubyen bann ki zot zenou pe tranble.+ 13 Kontinyen mars lo sa bon semen,+ pour ki sa enn ki pe bwete pa vin pli pir, me i ganny geri. 14 Kontinyen viv anpe avek tou dimoun+ e reste sen,+ si non zot pa pou kapab vwar Senyer. 15 Vey byen ki personn parmi zot pa perdi labonte ekstraordiner Bondye e ki okenn rasin anpwazonnen pa pouse parmi zot pour kree problenm e fer en kantite ganny sali par li.+ 16 Veye ki napa personn parmi zot ki pe pratik imoralite seksyel* oubyen ki pa apresye bann keksoz sakre, parey Ezai ki ti vann son drwa konman premye ne pour en repa.+ 17 Parski zot konnen ki ler i ti oule ganny beni apre, i ti ganny rezete. Menm si avek larm dan son lizye i ti fer tou pour esey sanz sa desizyon,*+ me sa ti anven.

18 Parski zot pa’n al kot en montanny ki zot kapab touse,+ ki’n pran dife,+ ki’n kouver avek bann nyaz nwanr, kot i annan fernwanr terib, tanpet,+ 19 tapaz tronpet+ ek en lavwa ki pe koze.+ Ler lepep ti tann sa lavwa, zot ti sipliye ki sa lavwa i aret koz avek zot.+ 20 Parski zot ti vreman per sa lord: “Si menm en zannimo i tous sa montanny, i devret ganny saboule avek ros.”+ 21 Osi, sa bann keksoz ki ti pe arive ti telman fer per ki Moiz ti dir: “Mon per e mon pe tranble.”+ 22 Me zot zot in al kot Montanny Siyon+ ek lavil sa Bondye vivan setadir Zerizalenm dan lesyel.+ Zot in al kot en kantite* lanz 23 in rasanble.+ Zot in al kot kongregasyon bann premye ne Bondye ki zot non in ganny ekrir dan lesyel. Zot in al devan Bondye ki Ziz tou dimoun+ e kot bann dimoun ki annan en lavi spirityel+ ki fer sa ki byen e ki’n vin parfe.+ 24 Zot in al kot Zezi, medyater+ en nouvo lalyans+ ki son disan in ganny fannen ki koz dan en pli bon fason ki disan Abel.+

25 Veye ki zot pa refize ekout* sa enn ki pe koze. Parski si sa bann ki ti refize ekout sa enn ki ti pe donn lavertisman lo later pa ti sape, pa i pou pli difisil ankor pour nou sape si nou vir ledo avek sa enn ki dan lesyel ki pe koz avek nou!+ 26 Sa letan, son lavwa ti sekwe later,+ me aprezan i’n promet sa: “Pourtan ankor enn fwa mon pou sekwe pa zis later me lesyel osi.”+ 27 Sa lekspresyon “pourtan ankor enn fwa” i montre ki bann keksoz ki ganny sekwe pou ganny tire, setadir bann keksoz ki Bondye pa’n fer,* pour ki bann keksoz ki pa’n ganny sekwe i reste. 28 Alor, vi ki nou konnen ki nou pou ganny en Rwayonm ki pa kapab ganny sekwe, annou kontinyen les Bondye demontre son labonte ekstraordiner anver nou pour ki nou kapab servi li* dan en fason ki fer li plezir avek gran respe* ek ladmirasyon. 29 Parski nou Bondye i en dife ki detrir konpletman.+

13 Kontinyen kontan kanmarad parey bann frer ek ser.+ 2 Pa oubliye demontre lospitalite,*+ parski san konnen, serten ti akey bann lanz kot zot.+ 3 Mazin bann ki dan prizon,+ konmsi zot ti dan prizon ansanm avek zot.+ Mazin osi bann ki ganny maltrete, vi ki zot menm zot ankor pe viv lo later.* 4 Maryaz i devret ganny onore par tou dimoun e zot pa devret sali lili maryaz,*+ parski Bondye pou ziz bann dimoun ki komet imoralite seksyel* ek adilter.+ 5 Montre dan zot fason viv ki zot pa kontan larzan+ e kontant zot avek sa ki zot annan.+ Parski i’n dir: “Mon pa pou zanmen kit ou e mon pa pou zanmen abandonn ou.”+ 6 Pour sa rezon, pran kouraz e dir: “Zeova* i mon led, mon pa pou per. Ki dimoun i kapab fer mwan?”+

7 Rapel sa bann ki pe diriz zot+ e ki’n anons parol Bondye avek zot. Imit zot lafwa+ anmezir ki zot vwar bon rezilta zot kondwit.

8 Yer, ozordi e pour touzour, Zezi Kri pa zanmen sanze.

9 Pa les zot ganny anbete par tou sort kalite lansennyman drol. I pli bon ki labonte ekstraordiner Bondye i fortifye zot leker olye manze,* parski bann ki donn lenportans manze pa benefisye dan okenn fason.+

10 Nou annan en lotel kot sa bann ki servi* kot sa latant ladorasyon napa drwa manz sa ki lo lotel.+ 11 Parski lekor sa bann zannimo ki zot disan i ganny anmennen par granpret dan landrwa sen* konman en lofrann pour pese i ganny brile an deor kan.+ 12 Alor, Zezi osi ti soufer an deor baro lavil+ pour ki i sanktifye lepep avek son prop disan.+ 13 Alor annou al kot li an deor kan e eksperyans menm laont ki i ti eksperyanse.+ 14 Parski la nou napa en lavil ki permanan, me nou pe esper avek enpasyans sa lavil ki pe vini.+ 15 Alor annou toultan ofer en sakrifis pour loue Bondye+ atraver Zezi setadir, koz piblikman lo son non+ avek nou labous.*+ 16 Deplis, pa oubliye fer dibyen e partaz sa ki zot annan avek lezot,+ parski Bondye i kontan bann sakrifis koumsa.+

17 Obeir sa bann ki pe diriz zot+ e soumet avek zot,+ parski zot pe vey lo zot e zot pou rann kont pour sa.+ Si zot fer sa, zot pou fer zot travay dan lazwa e non pa dan lapenn parski sa pa pou bon pour zot.

18 Kontinyen priy pour nou, parski nou annan konfyans ki nou annan en bon konsyans* e nou anvi konport nou onnetman dan tou keksoz.+ 19 Me mon sipliy zot sirtou pour priye pour ki mon retourn kot zot pli boner.

20 Ki Bondye lape ki’n resisit nou gran berze+ ek Senyer Zezi avek disan lalyans eternel, 21 i ekip zot avek tou bon keksoz pour ki zot fer son lavolonte e ki i travay dan nou, pour ki nou fer sa ki byen devan li gras a Zezi Kri. Ki Bondye i ganny glorifye pour touzour e touzour. Amenn.

22 Aprezan mon sipliy zot mon bann frer pour ekout avek pasyans sa parol lankourazman, parski mon’n ekri zot en pti let. 23 Mon anvi zot konnen ki nou frer Timote in ganny large. Si i arive byento, nou pou vin ansanm pour vwar zot.

24 Fer salanm tou bann ki pe dirize parmi zot ek tou bann sen. Sa bann ki Itali+ i fer zot salanm.

25 Ki labonte ekstraordiner i avek zot tou.