Julio

Jesús wen tsiʼ laji bajcheʼ yubil miʼ yubin i Tat yicʼot chuqui miʼ ñaʼtan, i tsaʼ tsictiyi ti chuqui tsiʼ yʌlʌ yicʼot ti chuqui tsiʼ mele, cheʼ bajcheʼ jiñi i milagro tac (Juan 14:9). ¿Chuqui mi laj cʌn tiʼ milagro tac Jesús? Jesús yicʼot i Tat miʼ wen cʼuxbiñonla. Cheʼ bʌ tsajñi wʌʼ ti lum, Jesús tsiʼ pʌsʌ bajcheʼ cʼamel miʼ cʼuxbin jiñi quixtañujob cheʼ bʌ tsiʼ cʼʌñʌ i pʼʌtʌlel chaʼan miʼ lajmesʌbeñob i wocol. Chaʼtiquil xpotsʼob tsiʼ cʼajtibeyob chaʼan miʼ coltañob (Mat. 20:​30-34). Jiñi relato miʼ yʌl chaʼan Jesús «tsaʼ wen ñijcʌyi i pusicʼal», i tsiʼ cʼoqʼuesayob. Jiñi tʼan griego muʼ bʌ i chaʼlentel ti traducir bajcheʼ «tsaʼ wen ñijcʌyi i pusicʼal», yom i yʌl chaʼan tsaʼto i yubi tiʼ bʌcʼtal bajcheʼ cʼamel i cʼuxel. Jesús tsiʼ pʌsʌ bajcheʼ cʼamel miʼ cʼuxbin lac piʼʌlob cheʼ bʌ tsiʼ pʼuntayob, i jiñʌch tsiʼ ñijca chaʼan miʼ weʼsan jiñi wiʼñaloʼ bʌ yicʼot chaʼan miʼ tsʼʌcan juntiquil leproso (Mat. 15:32; Mar. 1:41). Jin chaʼan, miʼ mejlel lac ñop chaʼan Jehová, jiñi Dios «ñuc bʌ i pʼuntaya», yicʼot i Yalobil miʼ wen cʼuxbiñonla, i cʼux miʼ yubiñob cheʼ bʌ mi lac ñusan wocol (Luc. 1:78; 1 Ped. 5:7). Yomob i jisan pejtelel jiñi lac wocol. w23.04 3 párr. 4, 5

Añʌch chuqui yom mi lac mel chaʼan maʼañic miʼ yochel ti lac ñaʼtʌbal jiñi an tac bʌ tiʼ pañimil Satanás come miʼ ticʼlañonla. Chaʼan mi laj cʌntan lac ñaʼtʌbal i cojach mi lac ñaʼtan chuqui tac wem bʌ, yom mi lac pejcan yicʼot mi lac tsajin jiñi Biblia, mi lac majlel ti tempa bʌ yicʼot mi lac chaʼlen subtʼan. Jehová miʼ yʌcʼ i tʼan chaʼan maʼañic mi caj i yʌcʼ chaʼan mi lac ñusan jumpʼejl wocol maʼañix bʌ miʼ mejlel laj cuch (1 Cor. 10:​12, 13). Chaʼan chʌn xucʼul mi la cajñel ti ili cojix tac bʌ qʼuin wen wocol jax bʌ, yom mi lac wen chaʼlen oración. Jehová yom chaʼan mi lac jamben lac pusicʼal (Sal. 62:8). Aqʼuen i ñuclel yicʼot aqʼuen wocolix i yʌlʌ chaʼan pejtelel muʼ bʌ i mel. Cʼajtiben a chʼejlel chaʼan maʼ chaʼlen subtʼan, chaʼan maʼ lʌtʼ jiñi wocol tac yicʼot chaʼan maʼañic maʼ yajlel ti mulil. Mach a wʌcʼ chaʼan an chuqui o an majqui miʼ mʌctañet chaʼan maʼ bej melben oración Jehová. w23.05 7 párr. 17, 18

¿Chucoch mi la cajñel ti tempa bʌ? Come la com la cʌqʼuen i ñuclel Jehová (Sal. 26:12; 111:1). Cheʼ jaʼel, yaʼ ti tempa bʌ mi lac tijicñesʌben lac bʌ lac pusicʼal (1 Tes. 5:11). Cheʼ bʌ mi la cʌcʼ laj comentario, mi lac mel ili chaʼchajp. Pero tajol an chuqui tac miʼ mʌctañonla: Mi lac wen chaʼlen bʌqʼuen o mi lac wen letsan laj cʼʌb pero maʼañic mi la cʌqʼuentel jiñi comentario la com bʌ la cʌcʼ. Jiñi apóstol Pablo tsiʼ yʌlʌ chaʼan ñucʌch i cʼʌjñibal mi «lac tijicñesʌben lac bʌ lac pusicʼal». Mi mucʼʌch lac chʌn ñaʼtan chaʼan miʼ mejlel lac tijicñesʌben i pusicʼal yambʌlob cheʼ bʌ mi la cʌcʼ jumpʼejl comentario, maʼañic mi caj lac wen chaʼlen bʌqʼuen cheʼ bʌ mi lac letsan laj cʼʌb. I mi maʼañic miʼ mejlel la cʌcʼ laj comentario cheʼ bajcheʼ mi lac mulan, tijicña mi caj la cubin cheʼ bʌ mi laj qʼuel chaʼan jiñi yambʌlob mucʼʌch i melob (1 Ped. 3:8). w23.04 20 párr. 1-3

¡Tsaʼ ajqʼui jiñi tʼan! Jiñi judíojob tsaʼ bʌ ajñiyob 70 jab ti Babilonia muqʼuix i chaʼ mejlelob ti sujtel majlel tiʼ lumal, ti Israel (Esd. 1:​2-4). Cojach Jehová tsaʼ mejli i mel iliyi. Jiñi babiloniojob mach ñʌmʌlic i colob jiñi cʌchʌloʼ bʌ i chaʼan (Is. 14:​4, 17). Pero Babilonia tsaʼ jisʌnti, i jiñi tsijiʼ bʌ yumʌl tsiʼ yʌlʌ chaʼan jiñi judíojob muqʼuix i mejlelob ti loqʼuel ti jiñi país. Jin chaʼan, pejtelel jiñi judíojob, ñumento jiñi i joloʼ bʌ familia, yomʌch miʼ chʼʌmob jumpʼejl ñuc bʌ decisión: Mi caj i loqʼuelob ti Babilonia o mi caj i cʌytʌlob. Tajol an wocolʌch bʌ tsiʼ yubiyob chaʼan miʼ ñaʼtañob chuqui mi caj i melob. An wen ñoxobix bʌ chaʼan miʼ chaʼleñob xʌmbal ti jiñi ñajt bʌ bij yicʼot bʌbʌqʼuen bʌ. Cheʼ jaʼel, cabʌl judíojob jin jach i cʌñʌyob Babilonia come yaʼ tsaʼ coliyob. Tiʼ tojlelob, Israel jiñi jach i tejclum i ñojteʼelob. Cheʼ jaʼel, an judíojob tsaʼ bʌ sujtiyob ti rico ti Babilonia. Jin chaʼan, tajol wocolʌch tsiʼ yubiyob chaʼan miʼ cʌyob jiñi wen tac bʌ i yotot yicʼot i choñoñelob, i miʼ majlelob ti chumtʌl baqui mach i cʌñʌyobic. w23.05 14 párr. 1, 2

Jiñi i Tʼan Dios miʼ yʌl chaʼan yom mi laj cuch wocol, mi lac pʌs pʼuntaya yicʼot cʼuxbiya. Lucas 21:19 miʼ yʌl: «Cheʼ mi laʼ cuch cʼʌlʌl tiʼ yujtibal, mi caj laʼ taj laʼ cuxtʌlel». Colosenses 3:12 miʼ yʌl: «Pʌsʌla jiñi ñuc bʌ pʼuntaya». I ti 1 Tesalonicenses 4:​9, 10 miʼ yʌl: «Dios jiñʌch woli bʌ i pʌsbeñetla laʼ cʼuxbin laʼ bʌ. […] Pero mic subeñet lojon hermanojob, chaʼan muʼto laʼ ñumen pʌs». Jiñi xñoptʼañob tsaʼ bʌ tsʼijbubentiyob iliyi wolix i pʌsob ili uxpʼejl melbalʌl, pero yomixto miʼ ñumen pʌsob. Jiñʌch yom bʌ mi lac mel jaʼel. ¿Chuqui mi caj i coltañet? Qʼuele chuqui tsiʼ meleyob jiñi xñoptʼañob ti wajali i bajcheʼ miʼ mejlel a lajiñob chaʼan cheʼ bajcheʼ jiñi chajpʌbilet chaʼan jiñi ñuc bʌ wocol. Mi cheʼʌch maʼ mel mi caj i chajpañet chaʼan miʼ mejlel a cuch jiñi ñuc bʌ wocol. w23.07 3, 4 párr. 4, 8

Ili bij miʼ coltañonla lac chʼujutesan Jehová ti ili ora i chaʼan ti talto bʌ qʼuin mi lac taj jiñi bendición tac muʼ bʌ caj i chʼʌm tilel jiñi i Yumʌntel. Jin chaʼan, yom mi lac chʌn ajñel ti jiñi bij mach yʌlʌyic mi jiñi lac pijtaya jiñʌch chaʼan mi caj lac majlel ti panchan o mi yaʼ ochemonla ti jiñi yambʌ tiñʌmeʼ tac (Juan 10:16). Cʼʌlʌl ti 1919, cabʌl lac piʼʌlob tsaʼix i techeyob xʌmbal ti jiñi chʼujul bʌ bij come tsaʼix loqʼuiyob ti jiñi Ñuc bʌ Babilonia, yom bʌ i yʌl pejtelel jiñi mach bʌ i sujmic ñopbalʌl. Jehová tsaʼʌch i colta jiñi judíojob chaʼan maʼañic chuqui miʼ mʌctañob ti jiñi bij (Is. 57:14). Cheʼ bʌ anto yom miʼ cʼotel 1919, Jehová tsiʼ teche i cʼʌn xucʼul bʌ wiñicob chaʼan miʼ jam tilel jiñi «Chʼujul bʌ bij» chaʼan jiñi lac piʼʌlob miʼ mejlelob ti loqʼuel ti jiñi Ñuc bʌ Babilonia yicʼot chaʼan miʼ chʼujutesañob cheʼ bajcheʼ miʼ mulan. w23.05 16 párr. 8, 9

Jehová yom chaʼan mi lac melben i yeʼtel ti lac tijicñʌyel yicʼot tiʼ pejtelel lac pusicʼal (2 Cor. 9:7). Jin chaʼan, ¿chucoch yomʌch mi lac chaʼlen wersa chaʼan mi lac taj jumpʼejl meta anquese mach la comic? Laʼ lac ñaʼtan tiʼ tojlel jiñi apóstol Pablo. Tsiʼ yʌlʌ: «Mic jatsʼ c bʌcʼtal i mic sujtesan ti xyaj eʼtel» (1 Cor. 9:​25-27). Pablo tsiʼ wersa xiqʼui i bʌ chaʼan miʼ mel jiñi yom bʌ Jehová anquese an i tajol mach yomic i mel. ¿Tijicña ba tsiʼ yubi i bʌ Jehová chaʼan bajcheʼ Pablo woliʼ melben i yeʼtel? Cheʼʌchi. I tsiʼ yʌqʼue i majtan chaʼan jiñi eʼtel tsaʼ bʌ i mele (2 Tim. 4:​7, 8). Jehová miʼ yubin i tijicñʌyel jaʼel cheʼ bʌ miʼ qʼuel chaʼan mi lac chaʼlen wersa lac taj jumpʼejl meta, cheʼto jaʼel cheʼ bʌ maʼañic chuqui la com. Mi lac mel come mi laj cʼuxbin anquese mach tiʼ pejtelelic ora mi lac mulan jiñi tsaʼ bʌ lac ñaʼta lac mel. Jehová tsiʼ yʌqʼue i bendición Pablo yicʼot mi caj i yʌqʼueñonla jaʼel mi mucʼʌch lac chaʼlen wersa (Sal. 126:5). I muqʼuix caj lac mulan cheʼ bʌ mi laj qʼuel chaʼan Jehová miʼ yʌqʼueñonla i bendición. w23.05 28, 29 párr. 9, 10

Jiñi apóstol Pablo tsiʼ yʌlʌ chaʼan jiñi muʼ bʌ caj i jisʌntelob tiʼ qʼuiñilel Jehová, lajal bajcheʼ wʌyʌlob come cheʼ bʌ wʌyʌlonla maʼañic mi la cubin miʼ ñumel jiñi hora miʼ muqʼuicto la cubin chuqui miʼ yujtel ti lac joytʌlel, i jin chaʼan maʼañic chuqui mi lac mel. Cheʼʌch miʼ yujtel jaʼel tiʼ tojlel jiñi la c piʼʌlob ili ora, lajal bajcheʼ wʌyʌlob come maʼañic miʼ ñaʼtañob chaʼan chumuloñixla ti cojix bʌ qʼuin i chaʼan wen lʌcʼʌlix jiñi ñuc bʌ wocol (Rom. 11:8; 2 Ped. 3:​3, 4). Pero joñonla la cujil chaʼan wen ñuc i cʼʌjñibal cheʼ chʌn cañal lac wut. (1 Tes. 5:6). Jin chaʼan, mach yom miʼ lac bʌcʼñan i yom chaʼan cʼajal la co. ¿Chucoch? Come mach wocolic chaʼan mi lac tech la cotsan lac bʌ ti política o ti chuqui tac woliʼ yujtel wʌʼ ti pañimil. I muʼto caj i ñumen tsʌtsʼan iliyi come woliʼ ñumen lʌcʼtiyel majlel jiñi i qʼuiñilel Jehová. Pero mach yomic mi lac wen pensarin come Jehová mi caj i coltañonla yicʼot jiñi chʼujul bʌ i yespíritu chaʼan wen muʼ bʌ lac yajcan lac mel (Luc. 12:​11, 12). w23.06 10 párr. 6, 7

¿Chuqui jiñi ñaxam bʌ miʼ tilel ti a jol cheʼ bʌ maʼ wubin i cʼabaʼ Sansón? ¿Chaʼan ba juntiquil pʼʌtʌl bʌ wiñic? I sujmʌch, pero cheʼ jaʼel ili wiñic tsaʼʌch i taja i sajtemal i tsiʼ ñusa wocol. Anquese cheʼ bajcheʼ jiñi, Jehová tsiʼ chʼʌmʌ ti ñuc jiñi i ñopoñel i tsiʼ yʌcʼʌ chaʼan miʼ tsʼijbuntel yaʼ ti Biblia chaʼan an chuqui mi laj cʌn. Jehová tsiʼ cʼʌñʌ Sansón chaʼan miʼ coltan i tejclum, i cheʼ bʌ añix ora tsaʼ chʌmi, tsiʼ cʼʌñʌ jiñi apóstol Pablo chaʼan miʼ tsʼijbun tiʼ tojlel bajcheʼ juntiquil tsaʼ bʌ i pʌsʌ i ñopoñel (Heb. 11:​32-34). Sansón tiʼ sʌcla i coltaya Jehová tiʼ pejtelel ora, jinto cheʼ wen wocol woli i ñusan. Jiñi tsaʼ bʌ i ñusa miʼ wen coltañonla i miʼ mejlel laj cʌn tiʼ tojlel. w23.09 2 párr. 1, 2

Muʼ bʌ caj i coltañonla laj cuch wocol jiñʌch cheʼ mi lac chʌcʌ pejcan Jehová ti oración (1 Tes. 5:17). Tajol ili ora maʼañic woli lac ñusan jumpʼejl tsʌts bʌ wocol pero miʼ mejlel lac pejcan Jehová cheʼ baʼ ora mach tijicñayic mi la cubin o cheʼ bʌ wen woliyonla ti pensar. Mi ili ora mucʼʌch a cʼajtiben i coltaya Jehová mach yʌlʌyic chuqui woli a ñusan, yom i yʌl chaʼan cheʼʌch mi caj a mel cheʼ miʼ ñumen tsʌtsʼan jiñi wocol. Ti jumpʼejl a pusicʼal mi caj a ñop chaʼan Jehová yujil bajcheʼ mi caj i coltañet yicʼot jala mi caj i mel (Sal. 27:​1, 3). Cheʼ mi laj cuch jiñi wocol tac ili ora mi caj i coltañonla chaʼan mi laj cuch ti jiñi ñuc bʌ wocol (Rom. 5:3). ¿Bajcheʼ la cujil chaʼan cheʼʌchi? Cabʌl hermanojob miʼ yʌlob chaʼan cheʼ miʼ cuchob jumpʼejl wocol miʼ pʼʌtʼesañob, come miʼ qʼuelob bajcheʼ miʼ coltʌntelob ti Jehová. Ili miʼ yʌqʼueñob i ñumen ñop chaʼan Jehová mucʼʌch caj i coltañob cheʼ bʌ miʼ ñusañob yambʌ wocol, i mucʼʌch i cuchob (Sant. 1:​2-4). w23.07 3, 4 párr. 7, 8

Jehová mach tsʌtsic miʼ mel i bʌ come an i pecʼlel yicʼot yujil pʼuntaya. Laʼ laj qʼuel jumpʼejl ejemplo bajcheʼ tsiʼ pʌsʌ i pecʼlel. Cheʼ bʌ tsiʼ yʌlʌ chaʼan mi caj i jisan Sodoma, tsiʼ ñaxan choco ti subentel Lot chaʼan miʼ putsʼelob majlel yaʼ ti wits tac. Pero maʼañic tsiʼ jacʼʌ, i tsiʼ cʼajti majlel ti Zóar. ¿Chuqui tsiʼ yʌlʌ Jehová? ¿Tsaʼ ba i wersa xiqʼui majlel yaʼ baqui tsaʼix i ñaxan alʌ? Maʼañic. Tsiʼ mele cheʼ bajcheʼ tsiʼ cʼajti Lot, anquese lon ñaʼtʌbilix i chaʼan chaʼan mi caj i jisan jaʼel ili tejclum (Gn. 19:​18-22). Jehová tsiʼ pʌsʌ i pʼuntaya jaʼel cheʼ bʌ tsiʼ yʌlʌ chaʼan mi caj i jisʌntel Nínive, tsiʼ choco majlel Jonás chaʼan miʼ subeñob jiñi chumuloʼ bʌ yaʼi chaʼan mi caj i jisʌntelob. Pero jiñi ninivitajob tsaʼʌch i chaʼ ñaʼtayob i bʌ, jin chaʼan Jehová maʼañix tsiʼ jisa jiñi tejclum (Jon. 3:​1, 10; 4:​10, 11). w23.07 21 párr. 5

¿Chuqui mi laj cʌn tiʼ tojlel Jehoás? Chaʼan mach mejlic lac bʌcʼñan Jehová chaʼan jach cheʼ woliʼ melob lac familia o yambʌ hermanojob, o chaʼan jach an laj coltʌntel. Jiñʌch tsaʼ bʌ ujti tiʼ tojlel Jehoás, cojach tsiʼ bʌcʼña Jehová cheʼ bʌ cuxulto Jehoiadá. Lajal bajcheʼ juntejc teʼ mach bʌ tamic i wiʼ am bʌ i xojñiʼteʼlel chaʼan maʼañic miʼ yajlel. Chaʼan pʼʌtʌlonla yom mi lac pejcan lac Biblia, mi la cʌqʼuen i yorajlel chaʼan mi lac wen ñaʼtan muʼ bʌ lac pejcan yicʼot mi lac chʌn chaʼlen oración, cheʼ bajcheʼ jiñi mi caj lac ñumen cʼuxbin Jehová yicʼot mi caj lac ñumen qʼuel ti ñuc (Jer. 17:​7, 8; Col. 2:​6, 7). Jehová maʼañic miʼ cʼajtibeñonla mach bʌ mejlic lac mel. Yom bʌ ti lac tojlel jiñʌch muʼ bʌ i yʌl Eclesiastés 12:13: «Bʌcʼñan Dios, jacʼben i mandar, come jiñʌch muʼ bʌ i wersa cʼajtibeñet». Mi mucʼʌch lac bʌcʼñan Jehová mi caj i mejlel lac ñusan baqui jach bʌ wocol i xucʼul mi caj la cajñel. Maʼañic chuqui mi caj i ñajtʼesañonla ti Jehová. w23.06 19 párr. 17-19

Ti Apocalipsis 21:5a, miʼ yʌl: «Jiñi yaʼ bʌ buchul ti trono tsiʼ yʌlʌ». Ili tʼan tac wen ñucʌch i cʼʌjñibal, ¿chucoch? Come yaʼ ti libro chaʼan Apocalipsis cojach uxyajl miʼ tilel baqui jin Jehová muʼ bʌ i chaʼlen tʼan, ili jiñʌch jumpʼejl. Mach juntiquilic ángel jiñi woli bʌ ti tʼan, mi jiñic Jesús. Jin chaʼan miʼ mejlel lac ñop chaʼan i sujmʌch chuqui miʼ yʌl, come Jehová jiñʌch «jiñi Dios mach bʌ añic miʼ mejlel ti lot» (Tito 1:2). Jiñi yambʌ tʼan jiñʌch: «¡Qʼuele!». Ili tʼan am bʌ ti griego miʼ wen tilel ti Apocalipsis. ¿I chuqui jiñi muʼ bʌ i bej ajlel? Jehová miʼ yʌl: «Woli c tsijibtesan pejtelel chuqui an». Anquese woli bʌ i yʌl Jehová ti talto bʌ qʼuin miʼ cajel, yujil chaʼan mucʼʌch caj i tsʼʌctesan. Jin chaʼan cheʼ bʌ miʼ yʌl, lajal bajcheʼ wolix i mel (Is. 46:10). w23.11 3, 4 párr. 7, 8

Jiñi apóstol Pedro tsiʼ chaʼle wersa i mʌlben jiñi i cʼunlel. Laʼ laj qʼuel chaʼpʼej uxp’ejl ejemplo. Cheʼ bʌ Jesús tsiʼ yʌlʌ chaʼan mi caj i ñusan wocol yicʼot mi caj i tsʌnsʌntel chaʼan miʼ tsʼʌctiyel jiñi profecía, Pedro tsiʼ ñopo i ticʼ (Mar. 8:​31-33). Cheʼ jaʼel, jiñi apóstolob tsiʼ cajatayob majqui jiñi ñumen ñuc bʌ, i mach junsujtelic jach tsaʼ ujti (Mar. 9:​33, 34). Ti jiñi acʼʌlel cheʼ bʌ mi caj i chʌmel Jesús, Pedro tiʼ tsepbe i chiquin juntiquil wiñic (Juan 18:10). Ti jin jach bʌ acʼʌlel uxyajl tsiʼ yʌlʌ chaʼan mach i cʌñʌyic Jesús (Mar. 14:​66-72). Tiʼ caj pejtelel iliyi, tsiʼ wen ubi i chʼijyemlel i tsiʼ yucʼta i bʌ. Jesús maʼañic tsiʼ cʌyʌ Pedro cheʼ bʌ wen chʼijyem. Cheʼ bʌ tsaʼ chaʼ chʼojyi, tiʼ sube Pedro chaʼan miʼ cʌntʌben i tiñʌmeʼ, i Pedro ti orajach tsiʼ jacʼʌ, cheʼ bajcheʼ jiñi tsiʼ pʌsʌ chaʼan mucʼʌch i wen cʼuxbin Jesús (Juan 21:​15-17). Tiʼ qʼuiñilel Pentecostés, Pedro yaʼʌch an ti Jerusalén i jiñʌch jaʼel jiñi ñaxam bʌ tsaʼ yajcʌnti chaʼan miʼ majlel ti panchan. w23.09 22 párr. 6, 7

Jiñi apóstol Pedro tiʼ sube jiñi yambʌ xñoptʼañob ancianojoʼ bʌ jaʼel: «Cʌntʌbenla jiñi i tiñʌmeʼ tac Dios» (1 Ped. 5:​1-4). La cujil chaʼan jiñi ancianojob miʼ cʼuxbiñob jiñi hermanojob i yomob i cʌntañob. Pero tajol miʼ ñaʼtañob chaʼan maʼañic miʼ mejlel i tsʼʌctesañob i yeʼtel come cabʌl chuqui miʼ melob yicʼot miʼ lujbʼañob. Mi cheʼ maʼ wubin a bʌ bajcheʼ jiñi, ¿chuqui miʼ mejlel a mel? Suben Jehová bajcheʼ maʼ wubin a bʌ. Pedro tsiʼ yʌlʌ: «Mi an muʼ bʌ i coltan yambʌlob, laʼ i mel bajcheʼ juntiquil cʌyʌl bʌ ti jiñi pʼʌtʌlel muʼ bʌ i yʌcʼ Dios» (1 Ped. 4:11). Tajol jiñi hermanojob woliʼ ñusañob wocol tac maʼañic bʌ mi caj i mejlel ti tojʼesʌntel ili ora. Pero cʼajtesan, Jesucristo, jiñi ñumen ñuc bʌ xcʌnta tiñʌmeʼ, ñumen cabʌlto chuqui miʼ mejlel i mel tiʼ tojlelob ili ora yicʼot ti talto bʌ qʼuin. Yom bʌ Jehová tiʼ tojlel jiñi ancianojob jiñʌch chaʼan miʼ cʼuxbiñob jiñi hermanojob, miʼ cʌntañob yicʼot chaʼan miʼ pʌsbeñob wem bʌ ejemplo. w23.09 29, 30 párr. 13, 14

Mach yomic mi laj cʼʌn i ñaʼtʌbal ili pañimil. Jiñi lac piʼʌlob miʼ yʌlob chaʼan miʼ mejlel lac mel chuqui jach la com, mi cheʼ tsaʼ caji lac ñaʼtan jaʼel mi caj lac ñusan ti pʼis jiñi i mandar tac Jehová (1 Cor. 3:19). Jiñʌch tsaʼ bʌ ujti ti Pérgamo yicʼot Tiatira. An xñoptʼañob lajalix bʌ tsaʼ caji i ñaʼtañob bajcheʼ jiñi lac piʼʌlob muʼ bʌ i chʼujutesañob melbil tac jach bʌ Dios yicʼot muʼ bʌ i melob tsʼiʼlel. Jin chaʼan, Jesús tsiʼ tiqʼui jiñi congregación tac come mach lecojix woliʼ qʼuelob jiñi tsʼiʼlel (Apoc. 2:​14, 20). Cheʼʌch woliʼ yujtel ili ora, tajol jiñi lac familia o laj cʌñʌyoʼ bʌ miʼ subeñoñobla chaʼan maʼañic i wocolel cheʼ mi lac mel chuqui jach la com anquese mi lac ñusʌben ti pʼis i mandar tac Jehová, come miʼ ñaʼtañob chaʼan maʼañix i cʼʌjñibal muʼ bʌ i yʌl jiñi Biblia. An i tajol mi la cʌqʼuentel instrucción tac mach bʌ wen tsiquilic mi la cubin i la comto chaʼan mi lac ñumen tsictesʌbentel. Pero jiñi Biblia miʼ yʌl chaʼan cojach yom mi lac mel jiñi tsʼijbubil bʌ (1 Cor. 4:6). w23.07 16 párr. 10, 11

María, i mamá Jesús, yomʌch an i chʼejlel jaʼel chaʼan miʼ tsʼʌctesan jiñi eʼtel tsaʼ bʌ aqʼuenti, mi caj i yʌcʼ ti pañimil jiñi muʼ bʌ caj i sujtel ti Mesías. Tajol tsaʼʌch i wen chaʼle pensar cheʼ bʌ tsiʼ yubi chaʼan embarazada mi caj i cʌytʌl cheʼ bʌ maxto ñujpuñemic i maʼañic piʼlebil i chaʼan juntiquil wiñic. Cheʼ jaʼel, yom miʼ suben José pejtelel iliyi come jin mi caj i ñujpuñel yicʼot, jin chaʼan yomʌch an i chʼejlel (Luc. 1:​26-33). ¿Bajcheʼ tsiʼ taja i chʼejlel? Tsiʼ cʼajtibe i coltaya jiñi yambʌyob. Tsiʼ cʼajtibe jiñi ángel Gabriel chaʼan miʼ ñumen tsictesʌben jiñi eʼtel yom bʌ miʼ mel (Luc. 1:34). Cheʼ jaʼel tsaʼ majli ti Judá chaʼan miʼ julaʼtan Elisabet, i yaʼi Elisabet tsiʼ yʌlʌ jumpʼejl profecía tiʼ tojlel jiñi alʌl cʌntʌbil i bʌ i chaʼan María (Luc. 1:​39-45). Jin chaʼan, María tsiʼ yʌlʌ chaʼan Jehová «tsiʼ pʌsʌ i pʼʌtʌlel tiʼ cʼʌb» (Luc. 1:​46-51). Cheʼ bajcheʼ jiñi, Jehová tsiʼ cʼʌñʌ jiñi ángel Gabriel yicʼot Elisabet chaʼan miʼ pʼʌtʼesan María. w23.10 14, 15 párr. 10-12

Jehová tsiʼ yajca 144 mil xñoptʼañob muʼ bʌ caj i majlelob ti panchan i mi caj i melob i yeʼtel bajcheʼ sacerdote. Ili xñoptʼañob wen lʌcʼʌl añob yicʼot Jehová (Apoc. 14:1). Cheʼ bʌ wʌʼto añob ti pañimil, Dios miʼ yajcañob tiʼ chʼujul bʌ i yespíritu i lajal bajcheʼ i yalobilobix. Jin chaʼan, jiñi Chʼujul bʌ ajñibʌl am bʌ yaʼ ti tabernáculo yom i yʌl bajcheʼqui Jehová wen lʌcʼʌl an yicʼot jiñi 144 mil (Rom. 8:​15-17). Jiñi Wen chʼujul bʌ ajñibʌl am bʌ yaʼ ti tabernáculo jiñʌch jiñi panchan, baqui chumul Jehová. Jiñi «cortina» muʼ bʌ i tʼox jiñi Chʼujul bʌ ajñibʌl yicʼot jiñi Wen chʼujul bʌ ajñibʌl jiñʌch i bʌcʼtal Jesús. Jiñi i bʌcʼtal tsiʼ mʌcta chaʼan maʼañic miʼ yʌcʼ ti ochel yaʼ ti panchan chaʼan miʼ mel i yeʼtel bajcheʼ jiñi ñumen ñuc bʌ sacerdote yaʼ ti chʼujul bʌ templo. Cheʼ bʌ tsaʼix i yʌcʼʌ i cuxtʌlel, Jesús tsiʼ jamʌ jiñi bij chaʼan tiʼ pejtelel jiñi xñoptʼañob yajcʌbiloʼ bʌ miʼ mejlelob ti ochel yaʼ ti panchan. Pero chaʼan miʼ melob iliyi yom miʼ cʌyob i bʌcʼtal (Heb. 10:​19, 20; 1 Cor. 15:50). w23.10 28 párr. 13

Gedeón maʼañic tsaʼ michʼa cheʼ bʌ jiñi wiñicob ti Efraín tsiʼ yʌlʌyob mach bʌ weñic tiʼ tojlel. Tsiʼ pʌsʌ i pecʼlel yicʼot tsiʼ ñʌchʼtayob, i wen jach tsiʼ pejcayob chaʼan miʼ yutsʼesañob (Jue. 8:​1-3). Jiñi ancianojob añoʼ bʌ i ñaʼtʌbal cheʼob bajcheʼ Gedeón. Cheʼ bʌ an majqui miʼ subeñob chaʼan mach weñic bajcheʼ tsiʼ meleyob jumpʼejl eʼtel, miʼ wen ñʌchʼtañob yicʼot wen jach bajcheʼ miʼ jacʼob (Sant. 3:13). Cheʼ bajcheʼ jiñi miʼ chaʼleñob coltaya chaʼan an ñʌchʼtʌlel ti congregación. Gedeón tsiʼ yʌqʼue i ñuclel Jehová cheʼ bʌ tsaʼ qʼuejli ti ñuc chaʼan tsiʼ mʌlbe jiñi madianitajob (Jue. 8:​22, 23). Jiñi ancianojob miʼ mejlel i lajiñob Gedeón cheʼ bʌ miʼ yʌqʼueñob i ñuclel Jehová cheʼ bʌ an chuqui wem bʌ miʼ melob (1 Cor. 4:​6, 7). Jumpʼejl ejemplo, mi juntiquil anciano miʼ subentel chaʼan wen utsʼatax bajcheʼ miʼ chaʼlen cʌntesa, miʼ mejlel i yʌl chaʼan pejtelel tsaʼ bʌ i yʌlʌ loqʼuemʌch tiʼ Tʼan Dios i chaʼan jiñʌch jiñi organización muʼ bʌ i cʌntesañonla. Jiñi ancianojob yomʌch miʼ cʼajtibeñob i bʌ mi jiñi i cʌntesa woliʼ yʌqʼuen i ñuclel Jehová o woliʼ sʌclañob chaʼan miʼ qʼuejlelob ti ñuc. w23.06 4 párr. 7, 8

Mi maʼañic miʼ jajqʼuel la coración, miʼ mejlel laj cʼajtiben lac bʌ. «¿Weñʌch ba jiñi woli bʌ j cʼajtin?». Lʌcʼʌ tiʼ pejtelel ora mi lac ñaʼtan chaʼan la cujil chuqui jiñi ñumen wem bʌ chaʼañonla, pero ti wiʼil tajol miʼ chaʼ ticʼlañonla. Tajol tsaʼ lac sube Jehová chaʼan an bajcheʼ la com chaʼan miʼ tojʼesan jumpʼejl wocol, pero anto ñumen wem bʌ muʼ bʌ i mejlel i mel. Cheʼ jaʼel, tajol jiñi tsaʼ bʌ laj cʼajti maʼañic miʼ taj i bʌ yicʼot chuqui yom bʌ i mel Jehová (1 Juan 5:14). Jumpʼejl ejemplo, laʼ lac ñaʼtan tiʼ tojlel jiñi tatʌlob muʼ bʌ i cʼajtibeñob Jehová chaʼan maʼañic miʼ yʌcʼ chaʼan jiñi i yalobil miʼ tʌtsʼ i bʌ tiʼ sujmlel. Weñʌch yilal chuqui tsiʼ cʼajtiyob. Pero tiʼ sujm, Jehová maʼañic miʼ xicʼonla chaʼan mi lac melben i yeʼtel. Yom chaʼan ti bajñel lac pusicʼal miʼ loqʼuel chaʼan mi lac chʼujutesan (Dt. 10:​12, 13; 30:​19, 20). Jin chaʼan, ¿chuqui miʼ mejlel i cʼajtiñob ili tatʌlob? Miʼ mejlel i subeñob Jehová chaʼan laʼ mejlic i coltañob i yalobil chaʼan miʼ cʼuxbin Jehová i miʼ mulan sujtel tiʼ yamigo (Pr. 22:6; Efes. 6:4). w23.11 21 párr. 5; 23 párr. 12

¿Chucoch ñuc i cʼʌjñibal cheʼ mi lac ñuqʼuesʌben i pusicʼal yambʌlob? Jumpʼejl libro miʼ yʌl chaʼan jiñi tʼan tsaʼ bʌ i cʼʌñʌ jiñi apóstol Pablo yom i yʌl chaʼan yaʼ waʼal la quicʼot jiñi woli bʌ i ñusan wocol chaʼan mi lac ñuqʼuesʌben i pusicʼal. Cheʼ bʌ mi lac ñuqʼuesʌben i pusicʼal juntiquil la quermañu, woli laj coltan chaʼan miʼ chʌn chaʼlen xʌmbal ti jiñi bij chaʼan bʌ laj cuxtʌlel. Jin chaʼan, cheʼ bʌ yaʼañonla la quicʼot jiñi hermanojob cheʼ bʌ miʼ ñusañob wocol woli lac subeñob chaʼan mi laj cʼuxbiñob (2 Cor. 7:​6, 7, 13). Chaʼan miʼ mejlel lac ñuqʼuesʌben i pusicʼal yambʌlob yom la cujil pʼuntaya. ¿Chucoch? Come jiñʌch muʼ bʌ i ñijcañonla chaʼan mi laj coltan jiñi woli bʌ i ñusan wocol yicʼot chaʼan mi lac ñuqʼuesʌben i pusicʼal. Cheʼʌch miʼ yujtel tiʼ tojlel Jehová jaʼel. Jin chaʼan, Pablo tsiʼ yʌlʌ chaʼan Jehová «jiñʌch jiñi Tatʌl am bʌ i chaʼan jiñi ñuc bʌ pʼuntaya yicʼot jiñʌch jiñi Dios muʼ bʌ i ñuqʼuesʌben i pusicʼal lac piʼʌlob» (2 Cor. 1:3). w23.11 9, 10 párr. 8-10

Pablo tsiʼ yʌlʌ chaʼan pejtelel jiñi xñoptʼañob mi caj i ñusan wocol tac. Laʼ lac ñaʼtan tsaʼ bʌ i sube jiñi xñoptʼañob ti Tesalónica: «Cheʼ bʌ yaʼto añon lon quicʼotetla, tsaʼʌch c subeyetla chaʼan mi caj lac ñusan wocol tac, i cheʼ bajcheʼ laʼ wujil, cheʼʌch ujtem» (1 Tes. 3:4). I cheʼ jaʼel tiʼ sube jiñi añoʼ bʌ ti Corinto: «Com lojon chaʼan laʼ wujil chuqui ti wocol tac tsaʼ lon c ñusa [ . . . ] i tsaʼto lon c ñaʼta mi cuxulixto mi caj lon j cʌytʌl o maʼañic» (2 Cor. 1:8; 11:​23-27). I cheʼʌch miʼ yujtel ili ora, la cujil chaʼan mi caj lac ñusan wocol tac (2 Tim. 3:12). ¿Am ba a ñusa wocol cʼʌlʌl bajcheʼ tsaʼ sujtiyet ti xcʌntʼan? Tajol jiñi a wamigojob o jiñi a familia miʼ melbeñetob mach bʌ weñic. ¿Am baʼ taja wocol ti a weʼtel tiʼ caj maʼañic tsaʼ jacʼʌ a mel mach bʌ weñic? (Heb. 13:18). ¿Woli baʼ taj a contrajintel tiʼ tojlel jiñi añoʼ bʌ i yeʼtel come woli a sub jiñi wen tʼan? Mach yʌlʌyic baqui tac bʌ wocol mi lac ñusan, Pablo miʼ yʌl chaʼan yom tijicñayonla. w23.12 10, 11 párr. 9, 10

Jacob tsiʼ ñusa cabʌl wocol. Chaʼtiquil i yalobil i cʼabaʼ Simeón yicʼot Leví tsiʼ meleyob mach bʌ weñic tiʼ wut i familia yicʼot tiʼ wut Jehová. Cheʼ jaʼel, jiñi i yijñam i cʼabaʼ Raquel tsaʼ chʌmi cheʼ bʌ tsiʼ yila pañimil jiñi yambʌ i yalobil. I Jacob tsaʼ majli ti chumtʌl ti Egipto cheʼ bʌ wen ñoxix tiʼ caj jiñi wiʼñal tsaʼ bʌ ñumi (Gn. 35:​16-19; 37:28; 45:​9-11, 28). Jacob maʼañic tsiʼ cʌyʌ i ñop Jehová yicʼot jiñi albil tac bʌ i chaʼan anquese tsiʼ ñusa cabʌl wocol. I Jehová tsiʼ pʌsbe chaʼan tijicñayʌch yicʼot. Jumpʼejl ejemplo, Jacob cabʌlʌch chuqui an i chaʼan tsaʼ tempʌyi come Jehová tsiʼ colta. Miʼ mejlel la cʌl chaʼan tijicña tsiʼ yubi cheʼ bʌ tsiʼ chaʼ qʼuele José, chʌmeñix bʌ tsiʼ lon ñaʼta. Tsaʼ bʌ i colta Jacob chaʼan miʼ mejlel i cuch pejtelel jiñi wocol jiñʌch cheʼ wen lʌcʼʌl an yicʼot Jehová (Gn. 30:43; 32:​9, 10; 46:​28-30). Joñonla jaʼel miʼ mejlel lac lʌtʼ baqui jach bʌ wocol mi wen lʌcʼʌlʌch añonla la quicʼot Jehová. w23.04 15 párr. 6, 7

Ti Salmo 23, David tsiʼ yʌlʌ chaʼan miʼ wen ñop chaʼan Jehová miʼ cʼuxbin yicʼot chaʼan woliʼ wen cʌntan. Yaʼi tsiʼ yʌlʌ chaʼan Jehová jiñʌch jiñi xcʌnta tʌñʌmeʼ yicʼot chaʼan i yamigojʌch. David yujil chaʼan Jehová woliʼ cʌntan, i jin chaʼan tiʼ sʌcla i coltʌntel. Yujil chaʼan jiñi i cʼuxbiya Jehová mi caj i yajñel yicʼot tiʼ pejtelel ora. Laʼ laj qʼuel chucoch David tsiʼ wen ñopo ti Dios. David tsiʼ yubi chaʼan Jehová tsaʼʌch i wen cʌnta come tiʼ pejtelel ora tsiʼ yʌqʼue chuqui i cʼʌjñibal i chaʼan. Cheʼ jaʼel, yujil chaʼan i yamigojʌch i chaʼan utsʼat miʼ qʼuel. Jin chaʼan wen yujil chaʼan Jehová mi caj i chʼʌm tiʼ wenta chaʼan mi caj i yʌqʼuen chuqui i cʼʌjñibal i chaʼan, mach yʌlʌyic chuqui miʼ yujtel. Tsiʼ ñopo chaʼan jiñi i cʼuxbiya Jehová ñumen ñucto bajcheʼ jiñi i wocol tac, i jiñi tsiʼ yʌqʼue i tijicñʌyel (Sal. 16:11). w24.01 28 párr. 12, 13

Cʼʌlʌl bajcheʼ tsaʼ ujti jiñi Segunda Guerra Mundial cʼʌlʌl ili ora, jiñi i testigojob Jehová an mejlemob ti subtʼan ti cabʌl tejclum. Jin chaʼan, yonlel lac piʼʌlob an i cʌñʌyob Jehová i woliʼ sujbel jiñi wen tʼan tiʼ pejtelel pañimil. Ili ora, jiñi añoʼ bʌ ti jiñi Junmojt muʼ bʌ i pʌsob bij miʼ chʌn sʌclañob i coltaya Cristo. Miʼ chaʼleñob wersa chaʼan pejtelel chuqui miʼ yʌlob cheʼʌch bajcheʼ miʼ mulan Jehová yicʼot Jesús. I miʼ cʼʌñob jiñi superintendentejob chaʼan circuito yicʼot jiñi ancianojob chaʼan miʼ subeñob jiñi congregación tac jiñi yom bʌ miʼ mejlel. La cujil chaʼan pejtelel jiñi ancianojob waʼchocobiloʼ bʌ añob ti «ñoj bʌ i cʼʌb» Jesús (Apoc. 2:1). An i tajol mi caj i tajob i sajtemal come xmulilob, cheʼʌch bajcheʼ tsaʼ ujti tiʼ tojlel Moisés, Josué yicʼot jiñi apóstolob (Nm. 20:12; Jos. 9:​14, 15; Rom. 3:23). Pero la cujil chaʼan Jesús woliʼ tojʼesan jiñi xucʼul bʌ xyaj eʼtel yicʼot jiñi ancianojob, i mi caj i bej mel. Jin chaʼan, miʼ mejlel lac ñop chaʼan Jesús woliʼ tojʼesañonla majlel tiʼ tojlel ili hermanojob. w24.02 23, 24 párr. 13, 14

Cheʼ ti jumpʼejl lac pusicʼal mi lac suben yañoʼ bʌ chaʼan bʌ Jehová woli la cʌqʼuen i ñuclel jaʼel. Cheʼ mi lac chaʼlen subtʼan la com chaʼan jiñi lac piʼʌlob miʼ cʼotel i wen cʼuxbiñob Jehová cheʼ bajcheʼ joñonla (Sant. 4:8). Jin chaʼan mi lac mulan lac pʌsbeñob jiñi utsʼatax bʌ i melbal tac, bajcheʼ i cʼuxbiya, cheʼ toj chuqui tac miʼ mel, chaʼan wen an i ñaʼtʌbal yicʼot i pʼʌtʌlel. Yambʌ bajcheʼ mi la cʌqʼuen i ñuclel Jehová jiñʌch cheʼ mi lac chaʼlen wersa lac lajin i melbal. Cheʼ bʌ mi lac mel tajol an muʼ bʌ caj i taj i qʼueloñobla bajcheʼ yilalonla i miʼ cʼajtibeñob i bʌ chucoch cheʼ yilalonla bajcheʼ jiñi (Mat. 5:​14-16). Tajol ti jumpʼejl bʌ qʼuin miʼ mejlel lac tsictesʌbeñob. Ti wiʼil, an lac piʼʌlob muʼ bʌ i mulañob i lʌcʼtesañob i bʌ ti Jehová. Cheʼ mi lac mel bajcheʼ iliyi mi la cʌqʼuen i ñuclel Jehová yicʼot mi lac tijicñesʌben i pusicʼal (1 Tim. 2:​3, 4). w24.02 10 párr. 7

Chaʼan juntiquil chʼiton miʼ taj i ñaʼtʌbal an tacʌch yom bʌ miʼ cʌn i mel. Mi mucʼʌch a mel mi caj i coltañet cheʼ bʌ maʼ taj a weʼtel yaʼ ti congregación, chaʼan maʼ taj chuqui i cʼʌjñibal a chaʼan yicʼot i chaʼan bʌ a familia, i chaʼan wen maʼ wajñel yicʼot yambʌlob. Jumpʼejl ejemplo, cʌñʌ tsʼijb yicʼot pejca jun. Jiñi Biblia miʼ yʌl chaʼan jiñi wiñic muʼ bʌ i pejcan i Tʼan Dios ti jujumpʼejl qʼuin yicʼot miʼ wen ñaʼtan chuqui miʼ yʌl, tijicña yicʼot wen miʼ loqʼuel chuqui miʼ mel (Sal. 1:​1-3). Cheʼ bajcheʼ jiñi, miʼ cʌn chuqui miʼ ñaʼtan Jehová, miʼ chʼʌmben i sujm i wen chuqui miʼ ñaʼtan (Pr. 1:​3, 4). Jiñi hermanojob yom miʼ chaʼleñob cʌntesa yicʼot miʼ yʌcʼob ticʼojel tac yaʼ ti congregación. Jin chaʼan mi a wujil tsʼijb yicʼot i pejcʌntel jun, mi caj i mejlel a chajpan a discurso yicʼot mi caj a wʌcʼ wen tac bʌ comentario muʼ bʌ i pʼʌtʼesan i ñopoñel yambʌlob. Cheʼ jaʼel, mi caj a tsʼijbun jiñi ñuc tac bʌ i cʼʌjñibal muʼ bʌ caj i coltañet chaʼan maʼ pʼʌtʼesan a ñopoñel yicʼot maʼ coltan yambʌlob. w23.12 26, 27 párr. 9-11

Cheʼ bʌ mucʼonla ti bʌqʼuen, laʼ lac ñaʼtan chuqui mi caj i mel Jehová ti talto bʌ qʼuin cheʼ bʌ tsaʼix jisʌnti Satanás. Ti jiñi uxpʼejl bʌ qʼuin colem tempa bʌ cheʼ ti 2014 tsaʼ ñusʌnti jumpʼejl demostración baqui juntiquil hermano tsiʼ taja ti tʼan yicʼot i familia muʼ bʌ i yʌl 2 Timoteo 3:​1-5, tsiʼ yʌlʌyob chuqui miʼ yʌl ili texto, pero cheʼ jiñic woliʼ taj ti tʼan ili texto bajcheʼ yilal mi caj lac chumtʌl yaʼ ti Paraíso, miʼ yʌl bajcheʼ iliyi: «Yaʼ ti tsijiʼ bʌ pañimil wen tijicña miʼ cajel. Jiñi lac piʼʌlob mi caj i cʼuxbiñob i bʌ, mi caj i cʼuxbiñob i sujmlel, añob i pecʼlel, mi caj i qʼuelob ti ñuc Dios, mi caj i jacʼbeñob i tʼan i tat i ñaʼ, mi caj i yʌcʼob wocolix i yʌlʌ, mi caj i pʌsob i xucʼtʌlel, mi caj i cʼuxbiñob jiñi añoʼ bʌ tiʼ familia, mi caj i mulañob i sʌclan ñʌchʼtʌlel, mi caj i yʌlob chuqui wem bʌ tiʼ tojlel yambʌlob, mi caj i ticʼob i bʌ, utsob, mi caj i cʼuxbiñob chuqui wen, mi caj i melob chuqui wen tiʼ tojlel i yamigojob, mach ñumen ñuquic mi caj i yubiñob i bʌ, mi caj i cʼuxbiñob Dios i mach jiñic chuqui bajñel yomob, mi caj i pʌsob chaʼan tiʼ sujm miʼ chʼujutesañob Dios. Chʌn lʌcʼʌl yom maʼ wajñel tiʼ tojlel jiñi cheʼoʼ bʌ bajcheʼ iliyi». ¿Ñʌmʌl ba la cʌl la quicʼot lac familia yicʼot jiñi hermanojob bajcheʼ yilal mi caj lac chumtʌl yaʼ ti Paraíso? w24.01 6 párr. 13, 14

Utsʼatax cheʼ la cujil chaʼan Jehová «tijicña miʼ qʼuel i chaʼañoʼ bʌ» (Sal. 149:4). Pero tajol an muʼ bʌ i yubiñob i chʼijyemlel i miʼ ñaʼtañob: «Jehová utsʼatʌch miʼ qʼuel jiñi i tejclum, pero ¿mach cujilic mi utsʼatʌch miʼ qʼuelon jaʼel?». Ti wajali an i wiñicob Jehová tsaʼ bʌ i ñaʼtayob jaʼel chaʼan Jehová mach utsʼatic miʼ qʼuelob (1 S. 1:​6-10; Job 29:​1, 2, 4; Sal. 51:11). Jiñi Biblia wen tsiquil miʼ pʌs chaʼan anquese xmulilonla Jehová utsʼat miʼ mejlel i qʼuelonla. ¿Bajcheʼ? Jiñʌch cheʼ mi lac ñop Jesucristo yicʼot mi lac chʼʌmjaʼ (Juan 3:16). Cheʼ bajcheʼ jiñi mi lac pʌs chaʼan tsaʼix laj cʌyʌ pejtelel mach bʌ weñic yicʼot chaʼan mi caj lac mel chuqui yom Jehová (Hech. 2:38; 3:19). Cheʼ mi lac mel iliyi Jehová tijicña miʼ yubin come miʼ qʼuel chaʼan la com sujtel tiʼ yamigo. I cheʼ mucʼʌch lac chaʼlen wersa lac tsʼʌctesan lac tʼan tsaʼ bʌ la cʌqʼue, utsʼat miʼ qʼuelonla i miʼ chʌn ajñel bajcheʼ la camigo (Sal. 25:14). w24.03 26 párr. 1, 2

Miʼ mejlel lac mel tsaʼ bʌ i meleyob jiñi xcʌntʼañob i mi lac bej chaʼlen subtʼan anquese jiñi añoʼ bʌ i yeʼtel miʼ ñop i mʌctañonla. Mi lac ñop chaʼan Jehová mucʼʌch caj i coltañonla lac tsʼʌctesan la queʼtel i miʼ mejlel laj cʼajtiben lac chʼejlel yicʼot lac ñaʼtʌbal. Laʼ laj cʼajtiben i coltaya Jehová chaʼan mi lac lʌtʼ jiñi wocol tac. Cabʌlonla woli lac ñusan wocol tiʼ caj an majqui tsaʼ chʌmi lac chaʼan, jiñi ticʼlʌntel, cʼamʌjel tac, mach weñic mi la cubin lac bʌ o an wocol ti lac familia. I ñumen wocolto an lac ñusa tiʼ caj jiñi pandemia yicʼot guerra tac. Jin chaʼan, laj suben Jehová chuqui an ti a pusicʼal, cheʼ bajcheʼ maʼ mel a wicʼot juntiquil wem bʌ a wamigo. Miʼ mejlel a ñop chaʼan Jehová mi caj i coltañet (Sal. 37:​3, 5). Cheʼ bʌ maʼañic mi laj cʌy lac mel oración miʼ coltañonla chaʼan mi lac lʌtʼ wocol tac (Rom. 12:12). Jehová yujil pejtelel chuqui miʼ ñusan i wiñicob yicʼot «miʼ yubibeñob i tʼan cheʼ miʼ pejcañob» (Sal. 145:​18, 19). w23.05 5, 6 párr. 12-15

Cheʼ bʌ an chuqui woli lac ñaʼtan lac mel yom mi lac ñaxan qʼuel chuqui miʼ ñaʼtan Jehová i mi lac chʼʌm ti ñuc (Efes. 5:17). Cheʼ bʌ mi lac sʌclan principio tac am bʌ ti Biblia muʼ bʌ i coltañonla lac ñaʼtan mi weñʌch chuqui la com lac mel, tiʼ sujm, la com laj qʼuel chuqui miʼ ñaʼtan Jehová, i mi mucʼʌch lac chʼʌm ti ñuc wen chuqui mi caj lac mel. Satanás miʼ mulan chaʼan yaʼ jach mi lac ñusan qʼuin tiʼ melol chuqui tac am bʌ wʌʼ ti pañimil (1 Juan 5:19). Mach wis wocolic chaʼan yaʼ jach mi la cʌcʼ lac pusicʼal tiʼ sʌclʌntel taqʼuin, ti escuela o ti la queʼtel, i mach jiñic tiʼ melol i yeʼtel Jehová. Mi cheʼ mi la cujtel bajcheʼ jiñi, woli i pʌs chaʼan cheʼix woli lac ñaʼtan bajcheʼ lac piʼʌlob ti ili pañimil. Mach yomic i yʌl chaʼan mach wentaquic iliyi, pero mach jiñic ñaxam bʌ yom mi la cʌcʼ ti laj cuxtʌlel. w24.03 24 párr. 16, 17