Laʼ lac sʌclan jiñi tejclum muʼ bʌ caj i yajñel tiʼ pejtelel ora

1. ¿Chuqui mi caj i chaʼlen Jerusalén tsiʼ wʌn alʌ Jesús?

CHEʼ bʌ tsʼitaʼ jax yom chaʼan miʼ chʌmel Jesús, tiʼ sube jumpʼejl profecía jiñi xcʌntʼañob i chaʼan. Jiñi profecía tsaʼ tsʼʌctiyi cheʼ ti ñaxam bʌ siglo cheʼ bʌ tsaʼ jisʌnti Jerusalén yicʼot jiñi templo. Jesús tiʼ subeyob chaʼan ti jumpʼejl bʌ qʼuin mi caj i qʼuelob chaʼan «Jerusalén joyol ti soldadojob» (Luc. 21:20). Tiʼ subeyob chaʼan ti ora yom miʼ putsʼelob loqʼuelob cheʼ bʌ miʼ qʼuelob ti ujtel jiñi. Jiñi tsaʼ bʌ i yʌlʌ Jesús tsaʼ tsʼʌctiyi cheʼ bʌ jiñi romanojob tsiʼ joyoyob Jerusalén (Luc. 21:​21, 22).

2. ¿Chuqui tiʼ sube Pablo jiñi xcʌntʼañob añoʼ bʌ ti Judea yicʼot ti Jerusalén?

² Pablo tiʼ tsʼijbube majlel jumpʼejl carta jiñi xñoptʼañob añoʼ bʌ ti Jerusalén yicʼot ti Judea cheʼ bʌ maʼañix jaypʼejl jab yom chaʼan miʼ cʼotelob jiñi romanojob. Jiñʌch jiñi carta chaʼan Hebreos. Yaʼi tsiʼ yʌqʼueyob ticʼojel tac muʼ bʌ caj i coltañob chaʼan miʼ chajpañob i bʌ, come Jerusalén mi caj i jisʌntel. I mi mach yomobic chʌmel mach yomic miʼ pensariñob i cʌy i yotot yicʼot pejtelel chuqui añob i chaʼan. Pablo tsiʼ yʌlʌ tiʼ tojlel Jerusalén: «Wʌʼi maʼañic lac chaʼan jumpʼejl tejclum chaʼan bʌ tiʼ pejtelel ora, woli lac chaʼlen wersa lac sʌclan jiñi muʼ bʌ caj i tilel» (Heb. 13:14).

3. ¿Baqui bʌ «jiñi tejclum» muʼ bʌ caj i tilel, i chucoch mi lac sʌclan?

³ Jiñi xñoptʼañob añoʼ bʌ ti Judea yicʼot ti Jerusalén tajol tsaʼ wajlentiyob tiʼ caj tsaʼ putsʼiyob loqʼuel, pero jiñi tsiʼ coltayob chaʼan maʼañic miʼ chʌmelob. Cheʼʌch miʼ yujtel jaʼel ili ora, mi lac wajlentel come maʼañic mi laj cʌlʌx sʌclan taqʼuin yicʼot maʼañic mi lac pijtan chaʼan jiñi wiñicob miʼ tojʼesañob jiñi wocol tac. ¿Chucoch? Come la cujil chaʼan ili jontol bʌ pañimil (mulawil) mi cajel i jisʌntel, i joñonla woli (choncol) lac sʌclan «jiñi tejclum tsʌtsʌch bʌ baqui chucul», «jiñi muʼ bʌ caj i tilel», jiñi tejclum jiñʌch jiñi i Yumʌntel Dios (Heb. 11:10; Mat. 6:33). Ti ili estudio mi cajel laj qʼuel ticʼojel tac tsaʼ bʌ i tsʼijbube majlel Pablo jiñi xñoptʼañob hebreojoʼ bʌ. Mi caj laj qʼuel bajcheʼ tsiʼ colta jiñi xñoptʼañob ti ñaxam bʌ siglo chaʼan miʼ bej sʌclañob «jiñi [tejclum] muʼ bʌ caj i tilel», bajcheʼ tsiʼ chajpayob chaʼan baʼ ora miʼ jisʌntel Jerusalén yicʼot chuqui miʼ mejlel laj cʌn ili ora.

LAʼ LAC ÑOP CHAʼAN JEHOVÁ MAʼAÑIC MI CAJ I CɅYONLA

4. ¿Chucoch jiñi xñoptʼañob tsiʼ wen qʼueleyob ti ñuc Jerusalén?

⁴ Jiñi xñoptʼañob tsiʼ wen qʼueleyob ti ñuc Jerusalén come yaʼʌch baqui tsaʼ mejli jiñi ñaxam bʌ congregación cheʼ ti jabil 33. Cheʼ jaʼel, yaʼʌch an jiñi junmojt muʼ bʌ i pʌsob bij. I cabʌl xñoptʼañob yaʼañob i yotot yaʼi yicʼot cabʌl chuqui añob i chaʼan. Pero Jesús tiʼ subeyob chaʼan yom miʼ loqʼuelob ti Jerusalén yicʼot ti Judea (Mat. 24:16).

5. ¿Chuqui tiʼ sube Pablo jiñi xñoptʼañob chaʼan miʼ chajpañob i bʌ?

⁵ Pablo yom chaʼan jiñi xñoptʼañob chajpʌbilob chaʼan miʼ loqʼuelob ti Jerusalén. Jin chaʼan tiʼ subeyob bajcheʼ yilal miʼ qʼuel Jehová jiñi tejclum. Tsiʼ cʼajtesʌbeyob chaʼan Jehová mach weñix miʼ qʼuel jiñi templo, jiñi sacerdotejob yicʼot chaʼan maʼañix miʼ chʼʌm jiñi majtañʌl tac muʼ bʌ i yʌjqʼuel yaʼi (Heb. 8:13). Cheʼ jaʼel, jiñi lac piʼʌlob mach cʼʌñʌlix miʼ majlelob ti Jerusalén chaʼan miʼ chʼujutesañob Jehová. I mi caj i jisʌntel jiñi tejclum yicʼot jiñi templo come lʌcʼʌ tiʼ pejtelel yaʼ bʌ chumulob yaʼi tiʼ tsʼaʼleyob jiñi Mesías (Luc. 13:​34, 35).

6. ¿Chucoch wen ñucʌch i cʼʌjñibal tsaʼ bʌ i yʌlʌ Pablo ti Hebreos 13:​5, 6?

⁶ Jerusalén jumpʼejlʌch colem tejclum cheʼ bʌ Pablo tiʼ tsʼijbube majlel jiñi hebreojob. Juntiquil wiñic romano bʌ i cʼabaʼ Plinio tiʼ tsʼijbu chaʼan ti jimbʌ ora Jerusalén jiñʌch jiñi tejclum ñumen cʌmbil bʌ. I mucʼʌch i wen ochel taqʼuin yaʼ ti tejclum come ti jujumpʼejl jab cabʌl judíojob miʼ cʼotelob yaʼi chaʼan miʼ ñusañob jiñi qʼuiñijel tac muʼ bʌ i mejlel. Miʼ mejlel la cʌl chaʼan iliyi mucʼʌch i coltan jaʼel jiñi hermanojob chaʼan miʼ tajob taqʼuin i wen miʼ chumtʌlob. Tajol jin chaʼan Pablo tiʼ subeyob: «Mach laʼ cʼuxbin taqʼuin, i yom tijicñayetla yicʼot jiñi am bʌ laʼ chaʼan». Cheʼ jiñi tsiʼ cʼajtesʌbeyob albil bʌ i chaʼan Jehová tiʼ Tʼan: «Maʼañic baʼ ora mi caj j cʌyet i maʼañic baʼ ora mi caj j cʌy j coltañet» (pejcan Hebreos 13:​5, 6; Dt. 31:6; Sal. 118:6). Wen ñucʌch i cʼʌjñibal tsaʼ bʌ cʼajtesʌbentiyob jiñi xñoptʼañob añoʼ bʌ ti Jerusalén yicʼot ti Judea come ti wiʼil mi caj i cʌyob i yotot, i yeʼtel (troñel) yicʼot pejtelel chuqui añob i chaʼan. Mi caj i majlel i techob chumtʌl ti yambʌ tejclum i wocolʌch mi caj i ñusañob.

7. ¿Chucoch yomʌch mi lac pʌs bajcheʼ cʼamel mi lac ñop tiʼ tojlel Jehová cʼʌlʌl ili ora?

⁷ ¿Chuqui mi laj cʌn? Chaʼan yomʌch chʌn yʌxʌl la co yicʼot chajpʌbilonla jaʼel cheʼ bajcheʼ tsiʼ meleyob jiñi xñoptʼañob ti wajali (Luc. 21:​34-36). ¿Chucoch? Come woli (yʌquel) i lʌcʼtiyel tilel jiñi ñuc bʌ wocol i mi caj i jilel ili jontol bʌ pañimil (Mat. 24:21). Ti jimbʌ ora, tajol yom mi laj cʌy chuqui tac an lac chaʼan jaʼel, i mi lac ñop chaʼan Jehová maʼañic baʼ ora mi caj i cʌyonla. Pero cʼʌlʌl ili ora, muqʼuix i mejlel lac pʌs majlel bajcheʼ cʼamel mi lac ñop tiʼ tojlel Jehová. Laʼ laj cʼajtiben lac bʌ: «Jiñi muʼ tac bʌ c mel (chaʼlen) yicʼot jiñi c meta tac, ¿muʼ ba i pʌs chaʼan mucʼʌch c ñop chaʼan Jehová mi caj i cʌntañon cheʼ bajcheʼ albil i chaʼan, i chaʼan mach yaʼ jach cʌyʌlon ti taqʼuin?» (1 Tim. 6:17). Tsaʼ bʌ ujti tiʼ tojlel jiñi xñoptʼañob ti wajali miʼ mejlel i coltañonla chaʼan xucʼul mi la cajñel cheʼ bʌ miʼ tilel jiñi ñuc bʌ wocol. Pero la cujil chaʼan jiñi wocol muʼ bʌ caj i tilel ñumen tsʌtsto miʼ cajel, maʼañic baʼ ujtem bajcheʼ jiñi. Jin chaʼan, ¿bajcheʼ mi caj lac ñaʼtan chuqui yom mi lac mel cheʼ bʌ miʼ tejchel?

LAʼ LAC JACʼBEÑOB I TʼAN JIÑI WAʼCHOBILOʼ BɅ I CHAʼAN JEHOVÁ

8. ¿Chuqui tiʼ sube Jesús jiñi xñoptʼañob chaʼan miʼ melob?

⁸ Cheʼ bʌ Pablo maxto jali i choco majlel i carta, jiñi romanojob tsaʼ cʼoti i joyob Jerusalén. Ti jimbʌ ora, jiñi xñoptʼañob tsiʼ ñaʼtayob chaʼan i yorajlelix chaʼan miʼ putsʼelob loqʼuel yaʼ ti tejclum come mi caj i jisʌntel (Mat. 24:3; Luc. 21:​20, 24). ¿I baqui mi caj i putsʼelob majlel? Jesús tsaʼ jach i yʌlʌ: «Jiñi añoʼ bʌ ti Judea, laʼ putsʼicob majlel ti wits» (Luc. 21:21). Pero cabʌl wits yaʼi, ¿baqui bʌ wits yom miʼ majlelob?

9. ¿Chucoch jiñi xñoptʼañob tajol tsaʼ caji i cʼajtibeñob i bʌ baqui bʌ wits yom miʼ putsʼelob majlel? (Qʼuele jaʼel jiñi mapa).

⁹ Cabʌlʌch baqui miʼ mejlelob ti putsʼel majlel yilal jiñi xñoptʼañob: Yaʼan jiñi wits tac am bʌ ti Samaria, Galilea, jiñi wits Hermón, ti Líbano yicʼot jiñi an tac bʌ tiʼ junwejlel jiñi Jordán jaʼ (qʼuele jiñi mapa). An tejclum tac wen chan bʌ baqui an, i poj segurojʌch yilal. Jumpʼejl jiñʌch Gamala, jumpʼejl tejclum wen chan bʌ baqui an i maʼañic majqui miʼ mejlel ti cʼotel yilal. Tajol an judíojob tsaʼ bʌ i ñaʼtayob chaʼan wen cheʼ yaʼ miʼ putsʼelob majlel yaʼi. Pero jiñi romanojob tsaʼ cʼotiyob ti Gamala i tiʼ jisayob.a

10, 11. a) ¿Majqui tajol tsiʼ cʼʌñʌ Jehová chaʼan jiñi xñoptʼañob miʼ ñaʼtañob baqui yom miʼ majlelob? (Hebreos 13:​7, 17). b) ¿Chuqui tsaʼ ujti tiʼ tojlel jiñi tsaʼʌch bʌ i jacʼʌyob? (Qʼuele jaʼel jiñi dibujo).

¹⁰ Jehová tajol tsiʼ cʼʌñʌ jiñi waʼchocobiloʼ bʌ ti congregación chaʼan miʼ subeñob jiñi xñoptʼañob baqui yom miʼ putsʼelob majlel. Ti wiʼil, juntiquil wiñic i cʼabaʼ Eusebio tiʼ tsʼijbu chaʼan cheʼ bʌ maxto tejchi jiñi guerra, Dios tsiʼ yʌqʼue i ñaʼtan jiñi xñoptʼañob ti Jerusalén chaʼan yom miʼ loqʼuelob yaʼ ti tejclum i miʼ majlelob ti chumtʌl ti Pella, jumpʼejl tejclum am bʌ ti Perea (Historia eclesiástica, tomo I, traducción de una «revelación a los notables de aquel lugar». George Grayling). Pella o Pela yaʼʌch ñumen wen chaʼan miʼ majlelob yilal. Junchajp come mach wen ñajtic cʌylem ti Jerusalén i mach wen wocolic mi caj i yubiñob chaʼan miʼ xʌñob majlel. Cheʼ jaʼel, lʌcʼʌ tiʼ pejtelel yaʼ bʌ chumulob yaʼi mach judíojobic yicʼot maʼañic woliʼ contrajiñob jiñi romanojob (qʼuele jiñi mapa).

¹¹ Pablo tiʼ tsʼijbube majlel jiñi xñoptʼañob: «Yom mi laʼ jacʼben i tʼan [ . . . ] jiñi muʼ bʌ i tojʼesañetla majlel» (pejcan Hebreos 13:​7, 17). Tsaʼ bʌ i jacʼʌyob ili ticʼojel tsaʼʌch putsʼiyob majlel ti wits i maʼañic chuqui tsiʼ chaʼleyob. Jehová maʼañic tsiʼ cʌyʌ jiñi tsaʼ bʌ i pijtayob jiñi i Yumʌntel Dios, «jiñi tejclum tsʌtsʌch bʌ baqui chucul» (Heb. 11:10).

12, 13. ¿Bajcheʼ an i colta i tejclum Jehová chaʼan miʼ ñaʼtan chuqui yom miʼ mel cheʼ bʌ an wocol?

¹² ¿Chuqui mi laj cʌn? Jehová miʼ cʼʌn jiñi waʼchocobiloʼ bʌ chaʼan miʼ subeñonla chuqui yom mi lac mel. Ti Biblia an cabʌl relato muʼ bʌ i pʌs chaʼan Jehová tsiʼ cʼʌñʌ jiñi i wiñicob chaʼan miʼ cʌntʌbeñob i tejclum cheʼ bʌ añob ti wocol (Dt. 31:23; Sal. 77:20). I cheʼʌch woliʼ bej mel ili ora, miʼ cʼʌn jiñi waʼchocobiloʼ bʌ i chaʼan.

¹³ Laʼ cu lac ñaʼtan, cheʼ bʌ tsaʼ tejchi jiñi COVID-19, jiñi waʼchocobiloʼ bʌ tiʼ yorganización Jehová tsiʼ yʌlʌyob chuqui tac yom mi lac mel. Jiñi ancianojob tsaʼ subentiyob bajcheʼ miʼ mejlel i coltañob jiñi hermanojob chaʼan maʼañic miʼ cʌyob tempa bʌ i miʼ bej chʼujutesañob Jehová. Cheʼ bʌ maxto wen jalic i tejchel jiñi pandemia, tsaʼ mejli jumpʼejl asamblea regional ñumen bʌ ti 500 tʼan tsaʼ loqʼui ti internet, ti televisión yicʼot ti radio. Anquese an jiñi pandemia, Jehová maʼañic tsiʼ cʌyʌ i bej cʌntesañonla i jiñi tsiʼ coltayonla chaʼan chʌn temel mi la cajñel, i cheʼʌch mi caj i bej meleʼ. Miʼ mejlel lac ñop chaʼan Jehová mi caj i bej coltan jiñi waʼchocobiloʼ bʌ i chaʼan chaʼan miʼ ñaʼtañob chuqui yom mi lac mel. Pero ¿chuqui yambʌ yom mi lac mel chaʼan chajpʌbilonla i mi lac ñaʼtan chuqui yom mi lac mel cheʼ tiʼ yorajlel jiñi ñuc bʌ wocol?

LAʼ LAC PɅS LAJ CʼUXBIYA YICʼOT LA CUTSLEL

14. Cheʼ bajcheʼ miʼ yʌl Hebreos 13:​1-3, ¿chuqui yom bʌ miʼ ñumen pʌsbeñob i bʌ jiñi xñoptʼañob cheʼ bʌ lʌcʼʌlix mi caj i jisʌntel Jerusalén?

¹⁴ Cheʼ bʌ miʼ tejchel jiñi ñuc bʌ wocol yomto mi caj lac ñumen pʌsben lac bʌ cʼuxbiya. Cheʼʌch yom mi lac mel cheʼ bajcheʼ tsiʼ meleyob jiñi xñoptʼañob ti wajali ti Jerusalén yicʼot ti Judea, tsiʼ wen pʌsbeyob i bʌ cʼuxbiya (Heb. 10:​32-34). Pero cheʼ bʌ lʌcʼʌlix chaʼan miʼ jisʌntel Jerusalén, tsaʼto i ñumen pʌsbeyob i bʌ jiñi cʼuxbiya yicʼot i yutslel (pejcan Hebreos 13:​1-3). I cheʼʌch yom mi caj lac mel jaʼel cheʼ tiʼ yorajlel jiñi ñuc bʌ wocol.

15. ¿Chucoch wen ñucʌch i cʼʌjñibal miʼ pʌsbeñob i bʌ cʼuxbiya yicʼot i yutslel jiñi hermanojob hebreojoʼ bʌ?

¹⁵ Ti ñaxan jiñi romanojob tsiʼ joyoyob Jerusalén i tsaʼ jach chaʼ sujtiyob majlel. Ti jimbʌ ora jiñi xñoptʼañob tsaʼ putsʼiyob loqʼuel, pero mach cabʌlic chuqui tsiʼ chʼʌmʌyob majlel (Mat. 24:​17, 18). Jin chaʼan, miʼ mejlel la cʌl chaʼan tsaʼʌch i comol coltayob i bʌ cheʼ bʌ woliyob ti xʌmbal yaʼ ti wits yicʼot cheʼ bʌ tsaʼ cʼotiyob ti Pela. Tsiʼ pʌsbeyob i bʌ bajcheʼ cʼamel miʼ cʼuxbiñob i bʌ cheʼ bʌ jiñi hermanojob i cʼʌjñibal i chaʼañob chuqui miʼ cʼuxob, i pislel yicʼot baqui miʼ chumtʌlob (Tito 3:14).

16. ¿Bajcheʼ miʼ mejlel lac pʌsbeñob cʼuxbiya jiñi hermanojob? (Qʼuele jaʼel jiñi foto).

¹⁶ ¿Chuqui mi laj cʌn? Jiñi cʼuxbiya miʼ ñijcañonla chaʼan mi laj coltan jiñi hermanojob cheʼ bʌ i cʼʌjñibal i chaʼañob. Cabʌl hermanojob an i pʼʌtʼesayob yicʼot i yʌqʼueyob chuqui i cʼʌjñibal i chaʼan yambʌ hermanojob muʼ bʌ i loqʼuelob tiʼ lumal tiʼ caj jiñi guerra, butʼjaʼlel, yujquel o yan tac bʌ wocol. Juntiquil hermana tsaʼ bʌ loqʼui ti Ucrania tiʼ caj jiñi guerra tsiʼ yʌlʌ: «An lon j qʼuele bajcheʼ Jehová miʼ cʼʌn jiñi hermanojob chaʼan miʼ coltañon lojon yicʼot chaʼan mic ñaʼtan lojon chuqui yom mi lon c mel. Jiñi hermanojob ti Ucrania, ti Hungría yicʼot ila ti Alemania an i wen pʌsbeyon lojon i cʼuxbiya yicʼot an i wen coltayon lojon». Cheʼ bʌ mi lac pʌs la cutslel mi la cʌcʼ chaʼan Jehová miʼ cʼʌñonla chaʼan mi laj coltan jiñi la quermañujob (Pr. 19:17; 2 Cor. 1:​3, 4).

17. ¿Chucoch ñuc i cʼʌjñibal cheʼ ili ora mi laj cʌn lac pʌs cʼuxbiya yicʼot la cutslel?

¹⁷ Ili ora yomʌch mi laj coltan lac bʌ, pero ti talto bʌ qʼuin ñumento yom mi caj lac mel (Hab. 3:​16-18). Jin chaʼan, Jehová woliʼ wen pʌsbeñonla bajcheʼ miʼ mejlel lac pʌs laj cʼuxbiya yicʼot la cutslel come wen ñuc i cʼʌjñibal cheʼ bʌ miʼ tilel jiñi ñuc bʌ wocol.

¿CHUQUI MIʼ CAJEL TI TALTO BɅ QʼUIN?

18. ¿Bajcheʼ miʼ mejlel lac lajiñob jiñi xñoptʼañob ti wajali?

¹⁸ Jiñi xñoptʼañob tsaʼ bʌ loqʼuiyob ti Jerusalén i tsaʼ putsʼiyob majlel ti jiñi wits, maʼañic chuqui tsiʼ chaʼleyob. I sujmʌch chaʼan tsiʼ cʌyʌyob jiñi tejclum, pero Jehová maʼañic tsiʼ cʌyʌyob. ¿Bajcheʼ miʼ mejlel lac lajiñob? Joñonla jaʼel mach luʼ la cujilic chuqui miʼ caj ti ujtel ti talto bʌ qʼuin. Pero Jesús mucʼʌch i subeñonla jaʼel chaʼan yom chajpʌbilonla chaʼan mi lac jacʼ chuqui mi lac subentel (Luc. 12:40). Cheʼ jaʼel, jiñi carta tsaʼ bʌ i tsʼijbu jiñi apóstol Pablo mucʼʌch i bej coltañonla ili ora. I Jehová miʼ subeñonla jaʼel chaʼan maʼañic baqui ora mi caj i cʌyonla (Heb. 13:​5, 6). Jin chaʼan, mi la com lac taj jiñi bendición tac muʼ bʌ caj i tilel, laʼ lac chaʼlen wersa lac bej sʌclan jiñi i Yumʌntel Dios, jiñi tejclum muʼ bʌ caj i yajñel tiʼ pejtelel ora (Mat. 25:34).