Hogi Ein Sgiliau yn y Weinidogaeth—Cynnig y Llyfr Beibl Ddysgu

Pam Mae’n Bwysig? Un o’n prif adnoddau a ddefnyddir yn y weinidogaeth yw’r llyfr Beibl Ddysgu. Fodd bynnag, cyn inni fedru defnyddio’r llyfr i astudio â rhywun, mae’n rhaid inni yn gyntaf roi copi iddo. Felly, dylai pob un ohonon ni wneud ymdrech i fod yn fedrus wrth gynnig y llyfr Beibl Ddysgu. (Diar. 22:29) Mae sawl opsiwn ar gael, a dylai cyhoeddwyr ddefnyddio’r hyn sy’n gweithio iddyn nhw.

Sut i Fynd Ati?

Codwch gwestiwn sy’n ennyn diddordeb er mwyn cyfeirio’r deiliad at y bennod briodol yn y llyfr. Gallech hefyd ddewis un o’r cwestiynau sydd i’w cael ar ddechrau pob pennod. Ar ôl gwrando ar ymateb y deiliad, darllenwch adnod berthnasol ac yna dangos iddo’r paragraff sy’n sôn am y pwnc a’i drafod gyda’ch gilydd yn fyr.
Opsiwn arall yw defnyddio cyflwyniad y llyfr i ddal sylw’r deiliad ac yna dangos iddo lle mae’r llyfr yn rhoi’r ateb o’r Beibl. Er enghraifft, gallech gyfeirio at drychineb sydd wedi bod ar y newyddion yn ddiweddar ac esbonio bod llawer wedi gofyn y cwestiynau a restrir ar dudalen 3. Neu gallech chi ddweud eich bod yn galw heibio i drafod y gobaith sydd gennyn ni am y dyfodol. Yna, dangoswch y lluniau ar dudalennau 4-5 a gofynnwch, “Pa un o’r addewidion hyn yr hoffech chi weld yn cael ei wireddu?” Syniad arall yw dweud eich bod chi’n picio heibio i helpu pobl i ganfod atebion i gwestiynau mawr bywyd. Yna dangoswch i’r deiliad y cwestiynau ar waelod tudalen 6, a gofyn pa un sydd o ddiddordeb iddo.
Defnyddiwch y dull uniongyrchol i ddechrau astudiaeth Feiblaidd. Gallech ddweud: “Rydyn ni’n dangos y llyfr hwn sy’n ein helpu ni i ddeall y Beibl. Ydych chi wedi ei weld o’r blaen? [Arhoswch am ymateb.] Os oes gennych chi funud neu ddau, hoffwn ddangos sut i ddefnyddio’r llyfr hwn gyda’ch Beibl eich hun.”

Rhowch Gynnig ar Hyn yn Ystod y Mis:

Neilltuwch amser yn ystod eich addoliad teuluol er mwyn ymarfer.
Tra ydych yn y weinidogaeth, trafodwch ag eraill beth rydych yn bwriadu ei ddweud. (Diar. 27:17) Newidiwch eich cyflwyniad os nad yw’n effeithiol.