Hna Aijijëne Me Hnëkëne Ijije Troa Inine La Itre Xan
1 Ngöne la kola acili Mose troa ukeineqe i Iehova, hnei angeice hna mekune laka, thaa ijiji angeice kö troa qeje maca i Akötreise koi Farao. (Eso. 4:10; 6:12) Hnei Ieremia fe hna amamane laka, pëkö mejiune i angeice troa xome la hnëqa ne perofeta i Iehova, angeice a qaja koi Akötresie ka hape, thatreine kö angeice troa ewekë. (Iere. 1:6) Ngacama hna pë mejiune me trengecatre ne la itre perofeta cili ngöne la xötrei, ngo kola mama hnyawa thupene laka, thaa hnei angeice kö hna xoue troa anyipici Iehova. Nyine anyipicine hi lai, laka, hna aijijë angatre kowe la huliwa hnei Akötresie.
2 Loi e tro fe së a hane olene koi Iehova laka, enehila, hna hamë së la itre hne së hna ajane troa kuca cememine la mejiune la huliwa ne cainöje së. (2 Kor. 3:4, 5; 2 Tim. 3:l7) Tune la ketre ka atreine kuca hnyawa la itre loto, laka, tru la itre zuti i angeic, easë fe, hna hnëkë së hnyawa matre atreine së troa kuca la hnëqa hna athipe koi së. Ngöne la treu Januare, easë a troa tro fë la itre boroshüre ka 32 lao götran, hna umëne pala kö ngöne la ekalesia. Ngacama hna kapa hë ekö la itre zuti cili matre troa huliwane ngöne la ua, ngo ka nyipi ewekë pala hi la itre topik ne Tusi hmitrötre e hnine itre ej; nge celë fe itre boroshüre lai a ka troa xatuane la itre atr troa atre la nyipici. Hane cahu itre aqane nyiqaane ithahnata hna mekune troa hamën, thenge la boroshüre hna troa tro fë.
3 Atreine hi tro la topike göi ini a ahlëne la ajane la itre atr kowe la wesiula i Akötresie. Maine tro epuni a nyiqane qaja ka hape:
◼ “Tru catre la itre ewekë hna kuca enehila matre troa sisitria catre pala hi la ini. Tuneka la mekune i epun, nemene la pengöne ini hna troa xome hnene la ketre atr, matre hetrenyi la ketre madrine ka tru, nge hetre thangane ka loi thatraqane la mel? [Nue pi troa sa.] Ijije troa kapa la itre manathithi ka epine palua, hnene la itre ka thele la atrehmekune i Akötresie. [E la Ite Edomë 9:10, 11.] Ame la boroshüre celë [hamene jë la taane la boroshüre hnei epuni hna tro fë] hna nyitrepene eje hnei Tusi Hmitrötr. Eje a amamane la sipu atrehmekun, göi troa mele epine palua.” Amamane ju la ketre ceitune hnine la boroshür. Hamëne jë la boroshüre koi 50 F nge isa pui ju göi troa iwai hmaca.
4 Ame la epuni a bëeke hmaca troa wange lo atr ka drei epuni e qaja la enyipiewekëne la ini i Tusi Hmitrötr, hape jë:
◼ “Ame lo traqa hnapane ni, hnei nyiso hna ithahnatane hnei Tusi Hmitrötr, trepene la ini ka aijijë së troa mele epine palua. Eje hi laka, loi e tro së a catre inine la itre hne së hna ajane troa atre qa ngöne la itre xötr. [E jë la Ite Edomë 2:1-5.] Alanyimu la itre atr ka öhnyi ejolene la troa trotrohnine la itre xaa hnepe mekune e hnine la Tusi Hmitrötr. Eni a ajane troa pane amamane nyimenyimëne la ketre aqane kuca hna majemin, troa xatuane la itre atr troa atre pala hi la itre trepene ini qa hnine la Tusi Hmitrötr.” Xome jë lo boroshüre hnei epuni hna tro fë, thele jë la ketre götrane ka ijije matre hmaloi troa amacane nyimenyimëne la aqane troa inine la Tusi Hmitrötr. Maine kola ajane hnene la atr troa sisedrëne pala hi la etid, qaja ju ka hape, tro hë epuni a bëeke fë la itusi nyine ini ngön, ene La Connaissance qui mène à la vie éternelle.
5 Nyimutre la itre atr ka sesëkötre ngazo hnene la aqane akötrëne la itre nekönatre ngöne la fen. Ma ijije hi tro epuni a xatuane la atr troa atre la aqane wange i Akötresie la akötre cili, qaja jë ka hape:
◼ “Ma hane fe hë epuni öhne jëne la itre rapore ka hnyipixe la aqane akötre la mele ne la itre nekönatre ngöne la fene hnengödrai, laka, kola mecijin, me wezipo, nge thaa hna thupë angatre hnyawa kö. Pine nemene matre, thatreine kö apatrene la itre jole cili hnene la itre organizasio atrekë hnëqane lai? [Nue pi troa sa.] Ame la nyipi aja i Akötresie ke, ene la troa mele ka loi la itre atr. Hanawange la hna thingehnaeane hnei Nyidrë jëne la Tusi Hmitrötr, thatraqane la itre nekönatre me itre ka tru. [E jë la Hna Amamane 21:4.] Kola hamëne hnene la boroshüre celë [qaja jë la taan] la nyimu pengöne ne la fene hna troa axulune hnei Akötresie, a thaa tro hmaca kö a hetrenyi la akötre e hnin.” Maine ijij, fe jë kowe la iatre ka amamane la paradraiso, nge ithahnatane jë ej. Hamëne ju la boroshür, nge isa pui ju göi iwai hmaca.
6 Maine hnei puni hna ithahnatane e cili lo, la aqane akötre ne la itre nekönatr, ame la epuni a troa iwai hmaca, sisedrëne ju la porotrike me hape:
◼ “Ame lo traqa hnapane ni, hnei epuni hna hane qaja amamane la hace i epuni ngöne la aqane ngazo la mele ne la itre nekönatr; angatre a akötre pine laka, kola isalapa la itre fami, kola jiin, tru la hna tithe hnei mec, me hna angazon. Nyine madrine pe la kola e hnine la Tusi Hmitrötre laka, pë hmaca kö troa akötrëne la itre nekönatre me itre ka tru hnene la itre mec, me akötr, maine hnei mec. Kola qeje pengöne jëne la hna perofetane hnei Isaia, la ketre mele ka sisitria ka troa traqa kowe la fen.” E jë nge ithahnatane ju la Isaia 65:20-25. Thele jëne jë troa inine la Tusi Hmitrötre jëne la itusi Connaissance.
7 Pine laka, hna majemine hnene la itre ka hmi troa thith, nyiqaane jë la porotrike hune la mekune cili, me qaja ka hape:
◼ “Ngöne la itre xaa ijine la mel, alanyimu hë the së la itre ka canga easenyi Akötresie jëne la thith, matre tro Nyidrë a xatua së troa cile kowe itre jole ka tru. Nge nyimutre la itre ka mekune laka, thaa hna kapa kö la itre thithi angatr. Kola mama fe lai ngöne lo kola thithi e nyipine la ka alanyimu hnene la itre hene hmi, angatre a aja tingetinge ngo thaa hna drei angatre kö. Eahuni a qaja lai pine laka, kolo pala hi a akötrëne la itre atr hnene la itre isi me iakötrë. Hapeu, Akötresieti kö a drenge hnyawa la itre thith? Maine eje hi, pine nemene matre nyimutre kö la itre thithi hna thaa hane kö kapa? [Nue pi troa sa.] Kola qeje pengöne ngöne Salamo 145:18 la ewekë nyine troa kuca, maine easë a ajane troa kapa la itre thithi së. [E jë la xötr.] Ame la ketre nyine troa kuca, ke, loi e qa kuhu hni la itre thithi së koi Akötresie, nge tro fe a ihmeku memine la nyipici ka eje hnine la Wesi ula, ene la Tusi Hmitrötr.” Amamane jë la boroshüre hnei epuni hna troa tro fë, nge ithahnatane jë la enyipiewekëne la thith.
8 Maine kola mekune troa sisedrëne lo porotrike hnapan, göi thith, tupathe jë la aqane tro fë celë:
◼ “Atraqatre la madrinenge ngöne lo nyiso a ithahnatane e cili lo la topike ngöne la thith. Thaa tro kö a jole koi epuni troa kapa la itre mekune i Iesu ngöne la nyine troa sipone matre hetre jëne ixatua ka tru.” E jë la Mataio 6:9, 10, nge qaja atrune jë la itre götrane ka tru hna amamane hnyawa hnei Iesu ngöne la tulu ne thith i nyidrë. Amamane jë la mekene 16, “Comment vous approcher de Dieu,” hnine la itusi Connaissance, nge hnyingë angeice ju ka hape ijije kö troa amacane la aqane troa etide jëne lai itus.
9 Ame ngöne la kola troa ihamënekeune memine la itre xane la atrehmekune qa thei Akötresie, atreine hi tro së a hnyinge ka hape, “Drei la ka ijije kowe la nöjei ewekë celë?” Kola sa hnei Tusi Hmitrötre ka hape: “Eahuni hi la.”—2 Kor. 2:16, 17.