Efesotɔwo
5 Eya ta mizu Mawu srɔ̃lawo+ abe via lɔlɔ̃awo ene, 2 eye miyi edzi miazɔ le lɔlɔ̃ me,+ abe ale si ko Kristo la hã lɔ̃ mí,*+ eye wòtsɔ eɖokui na ɖe mía* ta wònye nunana kple vɔsa si le ʋeʋẽm lilili na Mawu la ene.+
3 Migana woayɔ gbɔdɔdɔ manɔsenu* kple makɔmakɔnyenye aɖeke ƒomevi alo ŋukeklẽ ŋkɔ gɔ̃ hã le mia dome o,+ abe ale si ko wòdze ame kɔkɔewo ene;+ 4 kple ŋukpenanuwɔwɔ kple bometsinyagbɔgblɔ kple fefenya madzeto,+ siwo mesɔ o, ke akpedada boŋ.+ 5 Elabena miawo ŋutɔwo mienya nyuie be, domenyinyi aɖeke meli na ame si ƒoa eɖokui ɖe gbɔdɔdɔ manɔsenu*+ me alo ame makɔmakɔ alo ŋuklẽla+—si sɔ kple trɔ̃subɔla—le Kristo la kple Mawu ƒe Fiaɖuƒe la me o.+
6 Migana ame aɖeke natsɔ nya ƒuƒluwo able mi o, elabena nu siawo tae Mawu ƒe dziku gbɔna vi sẽtowo dzi ɖo. 7 Eya ta migade ha kpli wo o; 8 elabena tsã la, mienye viviti, ke azɔ miezu kekeli+ le Aƒetɔ la me.+ Miyi edzi mianɔ zɔzɔm abe kekeliviwo ene, 9 elabena kekeli la ƒe kutsetsee nye nyuiwɔwɔ kple dzɔdzɔenyenye kpakple nyateƒe ɖe sia ɖe ƒomevi.+ 10 Midze agbagba ɖe sia ɖe be nu siwo miewɔna la nadze Aƒetɔ la ŋu;+ 11 eye midzudzɔ gomekpɔkpɔ le viviti+ me dɔ matsekuwo me; ke miʋu go wo boŋ. 12 Elabena enye ŋukpe be woaƒo nu le nu siwo wowɔna le ɣaɣlaƒe la ŋu gɔ̃ hã. 13 Ke nu sia nu si dzena wokpɔna* la kekelie na, elabena nu sia nu si dze ƒãa la, enye kekeli. 14 Esia tae wogblɔ be: “Oo, wò ame si le alɔ̃ dɔm, nyɔ, eye nàfɔ tso ame kukuwo dome,+ eye Kristo la aklẽ ɖe dziwò.”+
15 Eya ta mikpɔ nyuie be ale si miezɔna la naganye abe numanyalawo ene o, ke boŋ abe nunyalawo ene, 16 eye miwɔ miaƒe ɣeyiɣi ŋu dɔ le mɔ nyuitɔ nu,*+ elabena ŋkekeawo nye vɔ̃. 17 Le esia ta miganɔ nu wɔm abe bometsilawo ene o, ke boŋ miyi edzi miakpɔ nu si nye Yehowa* ƒe lɔlɔ̃nu adze sii.+ 18 Eye migamu aha,+ si me nu baɖabaɖa wɔwɔ le la o, ke boŋ mina gbɔgbɔ la nayɔ mi fũu. 19 Mitsɔ psalmowo, Mawu kafukafu nyawo kple gbɔgbɔmehawo ƒo nu na mia nɔewo,* midzi ha,+ eye miƒo ha+ le miaƒe dziwo me na Yehowa,*+ 20 eye minɔ akpe dam+ na mía Mawu kple Fofo la le nuwo katã ŋuti ɣesiaɣi le mía Aƒetɔ Yesu Kristo ƒe ŋkɔ me.+
21 Mibɔbɔ mia ɖokui na mia nɔewo+ le Kristo vɔvɔ̃ me. 22 Srɔ̃nyɔnuwo nabɔbɔ wo ɖokuiwo na wo srɔ̃wo,+ abe ale si woabɔbɔ na Aƒetɔ la ene, 23 elabena ŋutsue nye ta na srɔ̃a,+ abe ale si Kristo la hã nye ta na hame la ene,+ eye eyae nye ŋutilã sia ɖela. 24 Le nyateƒe me la, ale si hame la bɔbɔa eɖokui na Kristo la, srɔ̃nyɔnuwo hã nabɔbɔ wo ɖokuiwo na wo srɔ̃wo nenema ke le nuwo katã me. 25 Srɔ̃ŋutsuwo, miyi edzi mialɔ̃ mia srɔ̃wo+ abe ale si ko Kristo la hã lɔ̃ hame la, eye wòtsɔ eɖokui na ɖe eta ene,+ 26 ale be wòakɔ eŋuti, aklɔ eŋu kple tsi wòadza to Mawu ƒe nya la me,+ 27 be wòatsɔ hame la aɖo eya ŋutɔ ŋkume le eƒe atsyɔ̃ɖoɖo me, eye ɖiƒoƒo alo ayiléle alo nu siawo tɔgbi aɖeke manɔ eŋu o,+ ke boŋ wòanɔ kɔkɔe, eye mokaka aɖeke naganɔ eŋu o.+
28 Nenema kee wòle be srɔ̃ŋutsuwo nalɔ̃ wo srɔ̃wo abe woawo ŋutɔwo ƒe ŋutilã ene. Ŋutsu si lɔ̃a srɔ̃a la lɔ̃a eɖokui, 29 elabena ame aɖeke melé fu eya ŋutɔ ƒe ŋutilã kpɔ o, ke boŋ enyinɛ, eye wòléa be nɛ nyuie, abe ale si ko Kristo la hã wɔna na hame la ene, 30 elabena ŋutinuwo míenye na eƒe ŋutilã.+ 31 “Esia tae ŋutsu agblẽ fofoa kple dadaa ɖi, eye wòaku ɖe srɔ̃a ŋu, eye wo ame evea woazu ŋutilã ɖeka.”+ 32 Nya ɣaɣla kɔkɔe+ sia lolo. Ke Kristo kple hame la ŋue mele nu ƒom le.+ 33 Gake srɔ̃ŋutsu ɖe sia ɖe nalɔ̃ srɔ̃a+ abe ale si wòlɔ̃a eɖokui ene; ke srɔ̃nyɔnu hã nade bubu deto srɔ̃a ŋu.+