Ðe Wowɔea?

Atiglinyi Ƒe Ðɔ

● Numekulawo le mɔ (robɔt) aɖe si ƒe alɔ ate ŋu awɔ nu vovovowo bɔbɔe wu la wɔm. Mɔɖaŋudɔwɔƒe si le mɔ sia wɔm ƒe amegã gblɔ be alɔ yeye sia “de ŋgɔ sãsãsã wu robɔt siwo tea ŋu wɔa nu le wo ɖokui si la dometɔ ɖe sia ɖe si li fifia.” Afi kae wokpɔ aɖaŋu ma gbegbe tsoe hena mɔ sia wɔwɔ? Amegã la gblɔ be “ale si atiglinyi ƒe ɖɔ wɔa nui” gbɔe yewokpɔ aɖaŋu sia tsoe.

Bu eŋu kpɔ: Wogblɔ le atiglinyi ƒe ɖɔ, si ƒe kpekpeme ade kilogram 140 sɔŋ la, ŋu be “enye ŋutinu siwo dzena le gota la dometɔ si tea ŋu wɔa nu vovovowo eye viɖe le eŋu wu ɖe sia ɖe le anyigba dzi.” Atiglinyi ƒe ɖɔ sia si tea ŋu wɔa nu geɖe la, nye ŋɔti, tsinonu, alɔ, alo asi nɛ. Atiglinyi gbɔna toa eme, etsɔe ʋẽa nu sena, etsɔe noa tsi, etsɔe léa nu, alo xlɔ̃na sesĩe to eme gɔ̃ hã!

Mevɔ o. Lãmeka siwo ade 40,000 ye le atiglinyi ƒe ɖɔ bliboa me si wɔe be wòtea ŋu trona yia go sia go me. Atiglinyi ate ŋu azã eƒe ɖɔa atsɔ tsɔ gaku sue le anyigba. Eye atiglinyi agate ŋu azã eƒe ɖɔa atsɔ kɔ agba siwo ƒe kpekpeme ade kilogram 270 gɔ̃ hã!

Numekulawo ka ɖe edzi be ale si atiglinyi ƒe ɖɔ wɔa dɔ vovovowo bɔbɔe la sɔsrɔ̃ ate ŋu akpe ɖe yewo ŋu be yewoawɔ robɔt deŋgɔ siwo woate ŋu azã le aƒe me kple dɔwɔƒewo. Mɔɖaŋudɔwɔƒe si ŋu míeƒo nu tsoe va yi la teƒenɔla aɖe gblɔ be: “Míewɔ robɔt yeye aɖe si naa kpekpeɖeŋu si to vovo kura na esiwo li egbea, eye esia wɔe be amegbetɔwo kple mɔwo va le dɔ wɔm aduadu nyuie afɔku aɖeke manɔmee zi gbãtɔ le ŋutinya me.”

Nu kae nèsusu? Nɔnɔmetɔtrɔ dzie atiglinyi ƒe ɖɔ to va dzɔa? Alo ɖe wowɔe?—g12-E 04.