Amewo ƒe Kluviwoe Wonye loo alo Mawu Subɔlawoe?

“LE NANEWO me la, Yehowa Ðasefowo dze na kafukafu.” Aleae Germanygbe me gbalẽ si nye Seher, Grübler, Enthusiastenr, (Ŋutegakpɔlawo, Ŋugbledelawo, Veviedonulawo) gblɔ. Togbɔ be emenya aɖewo tsi tre ɖe Ðasefoawo ŋu hã, elɔ̃ ɖe edzi be: “Le nu geɖe me la, wonɔa agbe si ŋu kpɔtsɔtsɔ mele o, abe amesiwo ƒe gakpɔkpɔ le vedomesi ene. Wonye kutrikulawo kple fɔléɖenuŋulawo le woƒe dɔwɔƒewo, wonye dukɔmevi dzeakɔanyiwo eye woɖia anukware le adzɔxexe me. Womedia kesinɔnu kutɔkutɔe o. . . . Alesi woléa be na wo ɖokui le takpekpewo me dze kafukafu. Woƒe ɖokuitsɔtsɔsavɔgbɔgbɔ sɔ kple subɔsubɔha bubu ɖesiaɖe tɔ; le subɔsubɔdɔ gome ya la, wole ŋgɔ na bubuawo katã. Gake nusi na wole ŋgɔ na míaƒe ŋkekea me Kristo-sɔlemeha kple ƒuƒoƒo bubu ɖesiaɖee nye tameɖoɖo kplikpaa maʋamaʋã si wo dome ame akpa gãtɔ tsɔ ɖea gbeƒã woƒe nufiafiae le nɔnɔme ɖesiaɖe kple le afɔku ɖesiaɖe me.”a

Togbɔ be wogblɔ nya nyui siawo le wo ŋu hã la, ame aɖewo dzea agbagba be yewoagblɔ nya si to vovo kura tso Yehowa Ðasefowo ŋu. Ðasefowo le dukɔ akpa gãtɔ me le xexeame godoo wɔ woƒe subɔsubɔdɔa ƒe geɖe le gaglãgbe amewo ƒe fuɖename manɔmee. Ame miliɔn geɖe nya wo, wodea bubu wo ŋu, eye wolɔ̃ ɖe edzi be gome le wo si be woawɔ woƒe subɔsubɔdɔa. Ke nukatae ɖikeke le amesiwo ƒomevi Yehowa Ðasefowo nye ŋu?

Ðewohĩ susu siwo tae ɖikekea li dometɔ ɖekae nye be le ŋkeke siawo me la, subɔsubɔha aɖewo va ƒo wo ɖokui ɖe ɖeviwo gbɔ dɔdɔ, ameɖokuiwuwu le ƒuƒoƒo me, kple ŋɔdzidonamelawo ƒe amedzidzedze me. Ele eme be nutovowɔwɔ siawo le afisiafi, menye amesiwo lɔ̃a mawusubɔsubɔ dome koe wòle o. Le esia ta ame geɖewo va le ɖi kem le subɔsubɔhawo ŋu, ame aɖewo gɔ̃ hã léa fu wo.

Afɔku Siwo Le Amewo Yomenɔnɔ Me

Woɖe “kɔmamã” gɔme be enye “ƒuƒoƒo aɖe si ƒe nufiafia to vovo kura alo nɔa ŋgɔnɔla aɖe yome.” Nenema ke “vivimeha” me tɔwo hã “kuna ɖe ame, dzixɔse, alo nane ŋu goŋgoŋ eye wotsɔa wo ɖokui naa wo.” Le nyateƒe me la, afɔku li be subɔsubɔha ɖesiaɖe si emenɔlawo lé ɖe amegbetɔ siwo nye ŋgɔnɔlawo kple woƒe nukpɔsusuwo ŋu goŋgoŋ la nate ŋu azu amewo ƒe kluviwo. Ŋgɔnɔlawo yomenɔnɔ nenema ate ŋu ade seselelãme masɔmasɔ ame me eye wòana woagblẽ ame ƒe gbɔgbɔmenyonyo katã ɖe wo si me. Ne wonyi ame le kɔmamã me tso ɖevime la, enu gasẽna wu.

Amesiwo tsi dzi ɖe nu mawo ŋu le subɔsubɔha aɖe ŋu la hiã nyatakaka siwo ŋu kakaɖedzi le. Woagblɔ na ame aɖewo be Yehowa Ðasefowo nye subɔsubɔha aɖe si wɔa eƒe hameviwo kluviwoe, woƒe amegãwo zia wo dzi, woxea mɔ na woƒe ablɔɖe dzodzro, eye wònaa woƒe nuwɔna toa vo na ame bubuwo tɔ.

Yehowa Ðasefowo nya be nutsotso mawo menye nyateƒe o. Eyata wole kpewòm be wò ŋutɔ nàku nya sia me. Ne èlé ŋku ɖe eŋu nyuie vɔ la, wò ŋutɔ nàƒo nya ta na ɖokuiwò. Mawu subɔlawoe Ðasefoawo nye abe alesi wogblɔnɛ ene loo alo amewo ƒe kluviwoe wonye nyateƒea? Afikae wokpɔa ŋusẽdodo tsonɛ? Nyati eve siwo le axa 12-23 aɖo nyabiabia siawo ŋu eme nakɔ nyuie.

[Etenuŋɔŋlɔ]