“Xexemenuɖoanyi Yeye” la—Dze Egɔme le Gɔmeɖoanyi Malike Dzi

ETSO NYƆ! ƑE NUŊLƆLA SI LE GERMANIA GBƆ

ESI ƒe 1991 dze egɔme la, amewo nɔ mɔ kpɔm na nu nyuiwo. Dukɔwo Dome Nyaʋiʋlia tɔ te. Enye nyateƒe be Iraq ƒe Kuwait dzi dzedze le August si do ŋgɔ me ƒe kuxia nɔ anyi ya. Gake Dukɔ Ƒoƒuawo ƒe Habɔbɔ ɖe eƒe ŋusẽ fia heɖe gbe na Iraq be wòadzo le afima hafi January 15 nava yi. Woƒo Dukɔ Ƒoƒuawo ƒe asrafoha si me nɔlawo tso dukɔ 28 me nu ƒu kpata ɖe dɔ sia ŋu eye woho be yewoazi Iraq dzi abɔbɔe ɖe anyi. Amewo nɔ mɔ kpɔm vevie be afɔ sesẽ si xexemedukɔwo ɖe la fia azã yeye aɖe ƒe gɔmedzedze.

George Bush si nye United States dukplɔla ɣemaɣi la, ƒo nu tso “alesi wòanya wɔ na mía ŋutɔwo kple dzidzime siwo ava be míaɖo xexemenuɖoanyi yeye, xexe si me se ƒe dziɖuɖu akplɔ dukɔwo dome nuwɔnawo le, ke menye hoʋiʋli dzodzro o la anyi” ŋu.

Iraq hã gbe January 15 ƒe ɣeyiɣi ɖoɖia, eye asrafoawo nɔ yameʋu me ho aʋa heda bɔmb geɖe ɖe Iraq-srafowo dome. Xexemedukɔwo ɖo tame kplikpaa vavã. Ɣleti etɔ̃ kloe le esia megbe, le April 11 dzi la, Dukɔ Ƒoƒuawo gblɔ be Ƒukɔmeʋa la ke. Edze abe xexemenuɖoanyi yeye si me ŋutifafa le, esi me ganyawo kple dunyahenyawo atsɔ afɔ le nyuie, si ŋugbe wodo la nɔ nu ŋutɔŋutɔ zum ene.

Aʋawɔwɔ Li Ke Nublanuitɔe

Le ƒe 1991 ƒe domedome la, dukɔ eve siwo nye Slovenia kple Croatia gblɔ be yewoxɔ ɖokuisinɔnɔ tso Yugoslavia si nɔ anyi ɣemaɣi la gbɔ, si he dukɔmeviʋawɔwɔ si na woɖo dukɔ vovovo geɖe anyi mlɔeba la vɛ. Ƒe ɖeka kloe megbe la, Fransetɔ dunyaheheŋutinunyala Pierre Hassner gblɔ be: “George Bush ƒe xexemenuɖoanyi yeye la nu yi le Sarajevo, abe alesi wòdzɔ ɖe Europa dzi do ŋgɔ na ƒe 1914 ene.” Gake edze abe ɖe ŋutifafa gbɔna ene esime wowɔ takpekpewo le Dayton, Ohio, U.S.A., le November 1995 me, eye wode asi ŋutifafa ƒe nubabla aɖe te le Paris le December 14 dzi. Esi ƒe 1995 nɔ enu wum la, mɔkpɔkpɔ yeye gasu amewo si be ɖewohĩ menye ɖe xexemenuɖoanyi yeyea me gblẽ keŋkeŋ hafi o.

Dukɔ siwo nɔ Soviet Dukɔwo ƒe Habɔbɔ me, si me nuwo katã nye Dziɖuɖua tɔ la nɔ mamãm tso wo nɔewo gbɔ. Lithuania, Estonia, kple Latvia ye xɔ ɖokuisinɔnɔ gbã le ƒe 1991 me, eye dukɔ bubuwo kplɔ wo ɖo kabakaba. Woɖo Dukɔ Nɔɖokuisiwo ƒe Nubabla aɖe si me mesẽ o anyi le December me, togbɔ be tsã Soviet Union dukɔawo dometɔ aɖewo gbe emenɔnɔ hã. Emegbe le December 25 dzi la, Gorbachev ɖe asi le Soviet-dukplɔlanyenye ŋu.

Gake dukɔ ɖekaɖeka mawo gɔ̃ hã dome va nɔ mamãm. Le kpɔɖeŋu me, Chechnya si nye Moslemtɔwo nɔƒe le Russia-nuto si nye Caucasus ƒe dziehe la nɔ ʋiʋlim be yewoaxɔ ɖokuisinɔnɔ. Agbagba si wodze be yewoanɔ yewo ɖokui si le ƒe 1994 ƒe nuwuwu na Russia-srafowo ho ɖe wo ŋu kple ŋkubiã. Togbɔ be ame siwo ade 30,000 ƒe agbe tsi eme tso esime kuxiawo dze egɔme le ƒe 1990 ƒeawo ƒe gɔmedzedze hã la, aʋa la yi edzi va ɖo ƒe sia me.

Va ɖo October 1995 me la, aʋawɔwɔ 27 vaseɖe 46—le alesi wobu woe nu—nɔ edzi yim le xexeame katã.

Woɖu Agba Vɔ

Le ƒe 1990-awo ƒe gɔmedzedze la, menye dunyahehe gome koe wòdze le be xexemenuɖoanyi yeyea meli ke o ke edze le ganyawo gome hã.

Le ƒe 1991 me la, Nicaragua ɖe eƒe ga ƒe asixɔxɔ dzi kpɔtɔ, gake ɣemaɣi gɔ̃ hã la, United States dɔlar ɖeka nu koe ga kordoba miliɔn 25 de. Le ɣeyiɣi ma me la, nuwo ƒe asi yi dzi zi 850 le alafa me le Zaire, si na afimanɔlawo ƒe agbenɔnɔ zu esi sesẽ wu le xexeame katã la dometɔ ɖeka. Russia hã ƒe ganyawo ɖo xaxa me. Nuwo xɔ asi zi 2,200 le alafa me le ƒe ɖeka me le ƒe 1992 me, si na ga zu nu maɖinu kloe. Togbɔ be nuwo va ka ɖe eme emegbe hã la, gakuxiwo mevɔ le ƒe 1995 me kura o.

Ƒe alafa sia me ganyafɔku gãtɔ kekeake dzɔ le ƒe 1991 me esime Credit & Commerce International Gadzraɖoƒea gbã, le ametafatafa kple hlɔ̃nuwɔwɔwo ta. Dukɔ 62 me tɔ siwo dzraa ga ɖo ɖe afima la ɖu agba si de United States dɔlar biliɔn nanewo.

Menye dukɔ siwo ƒe ganyawo menyo o koe meli ke o; ga si Germania-dukɔ sesẽ la gblẽ ɖe ɖekawɔwɔ ŋu na nu te ɖe edzi ŋutɔ. Dɔmakpɔwɔe dzi ɖe edzi esi dɔwɔlawo bia be woana mɔkeɣi si didi wu yewo eye woakpɔ yewoƒe lãmesẽ dzi nyuie wu. Dɔmemayimayi kple dedienɔnɔ ƒe ɖoɖo ŋudɔwɔwɔ le mɔ gbegblẽ nu na ganyawo le sesẽm ɖe edzi.

Le United States la, afɔku gã siwo dzɔ kplɔ wo nɔewo ɖo gblẽ nu le nugblẽfexehawo ŋu, amesiwo wòsesẽ na be woaxe nugblẽfe siwo amewo bia. Eye le ƒe 1993 me la, agbalẽ si nye Bankruptcy 1995: The Coming Collapse of America and How to Stop It xlɔ̃ nu le afɔku siwo le fe si dukɔa nyi ƒe dzi yiyi kple gaŋutiɖoɖo si me agbaɖuɖu le ŋu. Womeka ɖe Britania-nugblẽfexeha si nye Lloyd si le London ƒe dedienɔnɔ si le abe Gibraltar ƒe Kpe Gbadza ene la gɔ̃ hã dzi o. Esi nubunamewo ɖe to ɖee la, ena wòbu nusi ame aɖeke mabu ɖe eŋu o la ŋu—eyae nye agba si wòate ŋu aɖu.

Mawusubɔsubɔ, Ðe Wòate Ŋu Ana Nuwo Nali Kea?

Germaniatɔwo ƒe gbesiagbenyadzɔdzɔgbalẽ Frankfurter Allgemeine Zeitung gblɔ le ƒe 1991 me be: “Xexeme ŋuti nukpɔsusu siwo le Amerikatɔwo si tso blema ke si tso mawusubɔsubɔ me eye wotea gbe ɖe edzi le Kristotɔwo ƒe nyagbɔgblɔwo me la mee xexemenuɖoanyi yeye ŋuti mɔkpɔkpɔ sia tso.”

Ame aɖe abu be ɖe wòle be mawusubɔsubɔ ƒe nɔnɔme sia nana xexemenuɖoanyi yeyea nali ke wu hafi. Gake le nyateƒe me la, subɔsubɔhawo ƒe malɔ̃malɔ̃ ɖe nya dzi kple mamã ye na kemalimali keke ta. Dziɖuɖu geɖe siwo kple Moslem-blemakɔnuyomenɔlawo dome mevivi o dometɔ eve koe Algeria kple Egipte nye tsã. Ŋɔdzidoname ƒe fievododo siwo te subɔsubɔhawo ƒlɔ dzo ɖo gblẽ nu le dukɔ eveawo siaa me. Ŋkeke asieke ƒe ʋunyaʋunya si kɔmamãwo wɔ le Bombay le ƒe 1993 me si me ame siwo wu 550 tsi la hã le subɔsubɔhawo ƒe agbodzedzewo me le India.

Subɔsubɔhawo ƒe ɖekamawɔmawɔ do kplamatse xexemesubɔsubɔhawo katã ƒe nuwɔwɔ aduadu le ƒe 1994 me esime Anglikan-ha la ɖo nyɔnu 32 nunɔlawoe. Papa John Paul II gblɔ be esia nye “kplamatsedonu gã aɖe na Katoliko-ha kple Anglikan-ha ƒe ɖekawɔwɔ ake ƒe mɔkpɔkpɔ ɖesiaɖe.”

Le April 19, 1993 dzi la, masɔmasɔ si ɖo United States dziɖuɖua kple mawusubɔsubɔ ƒe vivimeha si woyɔ be Branch Davidians dome—si na vivimeha la ɖe wo ɖokui ɖe aga xoxo hele woƒe nɔƒe le Waco, Texas, kple dziɖuɖumega ene siwo wowu—na vivimeha la me tɔ 75 ya teti ku. Ƒe eve megbe la, wowɔ numekuku le alesi wòate ŋu anɔ eme be bɔmb si ŋɔdzidonamelawo da tsɔ wu ame 168 le dukɔa ƒe dziɖuɖudɔwɔƒegã le Oklahoma City la nye Waco dzi dzedzea ƒe wɔɖenui la ŋu.

Wodo voɖi na xexeame le ƒe 1995 ƒe gɔmedzedze esi wose be ŋɔdzidonamela aɖe da aɖiya ɖe Tokyo-tomemɔ la dzi. Ame ewo ku, eye ame akpe geɖe dze dɔ ɖe enu. Ŋɔdzi lé xexeame wu gɔ̃ hã esi wogblɔ be nyaɖeɖefia ƒe kɔmamã si woyɔ be Aum Shinrikyo, alo Aum Nyateƒe Vevitɔ ye wɔe.

Ƒezã Ðedzesi Gbɔlowo

Le ƒe 1492 me la, Columbus va do ɖe Ɣetoɖoƒenutowo me. Nyaʋiʋli aɖe nɔ nudzɔdzɔ sia ƒe ƒezã 500 lia ƒe azãɖuɖu ŋu le ƒe 1992 me. Amerika Indiatɔwo ƒe dzidzimevi siwo ade miliɔn 40 dze agbo ɖe nya si fia be Europatɔ aɖee “fɔ” anyigba siwo dzi yewo tɔgbuiwo nɔ hedzi ɖo xoxoxo hafi wova dzi eyama gɔ̃ hã la ta. Ame aɖewo yɔa nufɔla la be “amesi to ametafatafa kple amedziɖuɖu vɛ.” Eye le nyateƒe me la, Columbus ƒe Ɣetoɖoƒenutome yiyi nye afɔku na afimatɔwo wu be wòanye yayra na wo. Amesiwo woyɔ be Kristotɔ duxɔlawo la xɔ woƒe anyigba, fianyenye, bubu, kple woƒe agbe le wo si.

Le September 1995 me la, Israel dze ɣleti 16 ƒe azãɖuɖu aɖe gɔme be woatsɔ aɖu Fia Dawid ƒe Yerusalem dzi ɖuɖu ƒe ƒezã 3,000 lia. Gake ƒezã la dze egɔme le afɔku me esime ame aɖe da tu Sewɔtakpekpe ƒe Tatɔ Yitzhak Rabin wòku le November 4 dzi esime wòƒo nu le ŋutifafa ƒe ɖoɖowɔƒea aɖe vɔ megbe. Esia na Titinaɣedzeƒe ƒe ŋutifafaɖoɖowo do viviti, eye eɖee fia be menye Yudatɔwo kple Palestinatɔwo dome koe mawusubɔsubɔ me masɔmasɔwo le o ke ele Yudatɔ ŋutɔwo gɔ̃ hã dome.

Woɖu ƒezã 50 lia geɖe tso ƒe 1991 vaseɖe ƒe 1995 me siwo ku ɖe Xexemeʋa II ŋu—Pearl Melidzeƒea dzi dzedze si he United States de aʋa la me; Dukɔ Wɔɖekawo ƒe Europa dzi dzedze; ablɔɖe nana amewo le Nazi-fuwɔamesaɖawo me; Dukɔ Wɔɖekawo ƒe aʋadziɖuɖu le Europa; kple atɔmik bɔmb gbãtɔ dada ɖe Japan. Esi ʋukɔkɔɖi kple vevesese yɔ nudzɔdzɔ siawo me ta la, ame aɖewo bia nenye be wodze nyateƒe be woaɖu woƒe azã hã.

Esia he nudzɔdzɔ ɖedzesi bubu aɖe ƒe ƒezãɖuɖu vɛ, si nye Dukɔ Ƒoƒuawo ƒe habɔbɔa ɖoɖo anyi le October 1945 me. Amewo kpɔ mɔ vevie ɣemaɣi be woke ɖe nusi dzi woato akpɔ ŋutifafa le xexeame la ŋu mlɔeba.

Dukɔ Ƒoƒuawo kpɔ dzidzedze le nu geɖe me, abe alesi eƒe agbalẽŋlɔlagã Boutros Boutros-Ghali gblɔ tsɔ de edzi nyitsɔ laa ene. Gake mete ŋu ɖo nusita woɖoe anyi la gbɔ o, si nye be “wòana ŋutifafa kple dedienɔnɔ nanɔ dukɔwo dome.” Zi geɖe la, eƒe asrafowo dzea agbagba be yewoalé ŋutifafa ɖe te le teƒe siwo ŋutifafa aɖeke meli woalé ɖe te o. Vaseɖe ƒe 1995 me la, mete ŋu do ŋusẽ xexemenuɖoanyi yeye malike la o.

Teokrasi Vavãtɔ Kpɔ Dzidzedze, Esi Xexemenuɖoanyi Yeye la Do Kpo Nu!

Esi ame aɖewo kpɔ be dunyahehe, ganyawo, kple mawusubɔsubɔ ƒe kemalimali gblẽ yewoƒe mɔkpɔkpɔ na xexemenuɖoanyi yeye me ta la, wova le nu ƒom tso xexeme ƒe tɔtɔ yeye ŋu. Yehowa Ðasefowo kpɔe le esia hã me be Mawu ƒe xexeme yeye koe ate ŋu ali ke le amegbetɔwo dome.

Le dukɔ aɖewo me la, Dukɔwo Dome Nyaʋiʋli si wu enu la na ablɔɖe geɖe wu Yehowa Ðasefowo, eye ena wote ŋu wɔ dukɔwo dome takpekpe ɖedzesiwo le Budapest, Kiev, Moscow, Prague, St. Petersburg, Warsaw, kple teƒe bubuwo. Esiawo do ŋusẽ Yehowa Ðasefowo ƒe xexeme katã ƒe hamewo ƒe ɖoɖoa eye ena gbeƒãɖeɖedɔa le ŋgɔ yim kabakaba wu. Eyata mewɔ nuku o be Ðasefo siwo le nuto siawo dometɔ ɖeka ko me ƒe xexlẽme dzi ɖe edzi tso ame 49,171 le ƒe 1991 me va ɖo ame 153,361 le 1995 me. Le ƒe ene mawo ke me la, Ðasefo siwo le xexeame katã ƒe xexlẽme dzi ɖe edzi tso ame 4,278,820 va ɖo ame 5,199,895. Teokrasi vavã la le dzidzedze kpɔm fifia wu ɣeyiɣi ɖesiaɖe!

Ẽ, fifia ame miliɔn geɖe tu woƒe etsɔmemɔkpɔkpɔ ɖe “dziƒo yeye kple anyigba yeye” siwo me “dzɔdzɔenyenye anɔ” siwo ƒe ŋugbe Yehowa Mawu do la dzi. (Petro II, 3:10, 13) Aleke gbegbe nunya le esia me enye si tsɔ wu be míakpɔ amegbetɔ ƒe xexemenuɖoanyi yeye si dze egɔme le kemalimali me eye woaʋuʋui aɖee ɖa kpuie la si nu!—Daniel 2:44.