Adzodada le Mawusubɔsubɔ ƒe Ŋkɔ Me
NE ADZODADA siwo ƒe nya míegblɔ vaseɖe fifia na nètsi yaa hewɔ nublanui na wò la, ke menye wò ɖeɖekoe wòwɔ na alea o. Gake adzodada aɖewo ƒomevi li siwo gavɔ̃ɖi wu kura—esi wowɔna le mawusubɔsubɔ ƒe ŋkɔ me. Esiwo bɔ wu dometɔ ɖeka ku ɖe dzixɔse si nye be luʋɔ nɔa agbe le ku megbe eye be agbagbeawo ate ŋu akpe ɖe kukuawo ŋu la ŋuti. Woble anukwaretɔ miliɔn geɖe le xexeame godoo woxɔe se be ne yewoxe ga gbogbowo la, yewoate ŋu akpe ɖe yewoƒe lɔlɔ̃tɔ siwo ku ŋu alo alé avu wo.
Blemamebeble sia ƒomevi yeye aɖe to le dukɔ aɖewo me egbea. Le kpɔɖeŋu me, nyitsɔ laa le Japan la, wolé Buddhatɔwo ƒe ŋutsu kple nyɔnu nunɔla siwo gblɔna be gbɔgbɔmeŋusẽ le yewo si la be woda adzo yen miliɔn alafa geɖe le woƒe hameviwo si. Amesiwo wolé la do boblo be yewodaa dɔ eye be woate ŋu abia aɖaŋuɖoɖo yewo. Amesiwo va wo gbɔ dometɔ aɖewoe nye nyɔnu aƒedzikpɔla ene siwo wogblɔ na be wo vi siwo ku ƒe gbɔgbɔ le fu ɖem na wo. Mainichi Daily News gblɔ be: “Wobia tso nyɔnuawo si be woaxe yen miliɔn 10 [United States ga $80,000] ne woawɔ kusɔleme na wo.” Nyɔnuawo dometɔ ɖeka si xɔ ƒe 64 xlẽ ga si wu yen miliɔn 6.65 (anye $53,000) kɔ ɖe asi me na wo. Nyɔnua yi nya bia ge nunɔlaawo tso via ƒe lãmesẽ ŋu. The Daily Yomiuri gblɔ be: “Wobe wogblɔ na nyɔnua be dzɔgbevɔ̃e aɖe le dzɔdzɔ ge ɖe edzi negbe ɖe wòwɔ sɔleme tɔxɛ aɖe na tɔgbuiawo ƒe luʋɔ tsɔ nyã gbɔgbɔwo dzoe hafi.”
Sidzedze vavãtɔ si tso Biblia me akpe ɖe amesiawo siwo mele vɔ̃ aɖeke susum o ŋu be womagada adzo wo o hafi. Egblɔe kɔte be menye nu makumakue luʋɔ nye o. (Xezekiel 18:4) Nyagblɔla 9:5 gblɔ be ame kukuwo “menya naneke o.” Eyata ame kukuwo mate ŋu agblẽ nu le agbagbeawo ŋu o. Eye agbagbeawo hã mate ŋu akpe ɖe ame kukuwo ŋu o.
Mawusubɔsubɔ me Adzodamɔnu Vovovowo
Ame aɖewo ŋutɔ ƒe ŋukeklẽ tae wogena ɖe subɔsubɔhawo ƒe adzodalawo ƒe mɔ̃ me ɖo. Ŋutsu aɖe si di be yeadzi yeƒe ga ɖe edzi la tsɔ $100,000 na atsu kple asi aɖe si le Australia, amesiwo gblɔna be ŋusẽ si de ŋgɔ wu dzɔdzɔmetɔ le yewo si be yewoayra ɖe ga dzi wòadzi ɖe edzi. Wogblɔ nɛ be wòatsɔ gaa ade aɖaka aɖe me atsɔ na yewo ne “yewoakɔ eŋuti.” Ŋutsua kple srɔ̃a tsɔ aɖakaa yi xɔ evelia me be yewoayra ɖe edzi. Esi wotrɔ gbɔ la, wogbugbɔ aɖakaa nɛ hede se nɛ be megaʋu aɖakaa kpɔ gbeɖegbeɖe o vaseɖe esime míaɖo ƒe 2000 me hafi. Ke ne eʋui ɖe? Wogblɔ nɛ be “akunya si le eme la me agblẽ, eye eƒe ŋku agbã, eƒe ta abebe, alé kansa, eye lãmetutudɔ awui.” Le kwasiɖa eve megbe la, nyaa me megava nɔ kɔkɔm na ŋutsua o eye wòʋu aɖakaa. Ðeko wòke nu ɖe te! Pepa siwo wovuvu ʋayaʋaya sɔŋ koe yɔe. Nyadzɔdzɔgbalẽ si gblɔ nudzɔdzɔa gblɔ be egblɔ be ye ŋutɔe wɔe, eye nukutɔe hã la, “eƒe ta va nɔ bebem.”
Subɔsubɔhawo ƒe adzodada va trɔ bubui kura le Italy: Adzodala siwo wɔ wo ɖokui abe Katolikotɔ akuakuawo ene da adzo nunɔla aɖewo. Adzodalaawo zã alesi Katolikotɔwo xea fe wowɔa ku Misawo na ame kuku aɖewo la tsɔ ble woe. Aleke wowɔ ble wo? Katolikotɔwo ƒe magazine Famiglia Cristiana ɖe eme be ameblelaawo tsɔ gaxɔgbalẽvi si menye akuakua o xe ku Misa siwo wowɔ na wo eye ga si le wo dzi la sɔ gbɔ wu esi wobia be woaxɔ. Woble nunɔla aɖe si wote ŋu flu bɔbɔe la be wòatsɔ ga susɔea na yewo le ga ŋutɔŋutɔ me. Adzodalaawo xɔ ga ŋutɔŋutɔ la, eye nunɔla la xɔ gaxɔgbalẽvi si gadzraɖoƒea gbe xɔxɔ le esi woƒe ga aɖeke mele afima o ta!
Le United States ɖeɖe dzaa la, vivimeha siwo le hamevi yeyewo dim be yewoawɔ ga le wo ŋu la dzea ame tsitsiwo dzi le go sia go me be woadzɔ nu na yewo. Woŋlɔ ɖe Modern Maturity magazine me be: “Aye vevi si vivimehawo zãna le dukɔa me godoo ye nye be wodoa alakpaŋugbe gãwo: Wonɔa gatɔwo yome. Ne eka wo si vɔ la, wodoa nusianu ƒomevi ŋugbe na wo tso lãmesẽ dzi va ɖo dunyahehe ƒe tɔtrɔ dzi yi ɖe dziƒofiaɖuƒe dzi.” Wogblɔ be ame aɖe si kpena ɖe amewo ŋu be vivimehawo ƒe tamebubu megakpɔ ŋusẽ ɖe woƒe nuwɔnawo dzi o gblɔ be: “Ame tsitsiawo zua ɖuɖu na vivimehawo.”
Ga home si wodaa adzoe la te ŋu sɔa gbɔ ŋutɔ. New York senyala aɖe si kpɔ vivimehawo ƒe nya geɖe gbɔ gblɔ be: “Menya ame geɖe siwo wɔ wo ɖokui ame dahewoe. Wonye ame ƒomevi vovovowo tso amesiwo si wobia tsoe be woana dɔlar akpe alafawo dzi va ɖo amesiwo si naneke mele o negbe Tsitsime Kpekpeɖeŋuga si wonaa wo ƒe gaxɔgbalẽviwo ko la dzi.” Egblɔ kpee be: “Egblẽa nu ale gbegbe—le ameawo ŋutɔ ŋu kple le woƒe ƒomewo ŋu.”
Eyata kpɔ nyuie! adzodalawo ƒe ŋku biã. Xɔdzadzraɖo ƒe amefufluwo, telefon dzi ameflunudzadzrawo, kple subɔsubɔhawo ƒe adzodadawo nye woƒe ameflunuwɔwɔwo ƒe kpɔɖeŋu ʋee aɖewo ko. Manya wɔ be míayɔ woƒe ayemɔwo katã o, elabena wole yeyewo toto vɛ dzi ɣesiaɣi. Gake ɖikekemanɔmee la, nusi míegblɔ ɖe afisia la ana nànɔ ŋudzɔ, eye ɖewohĩ ema koe nye wò takpɔnu nyuitɔ kekeake. (Kpɔ aɖaka si nye “Alesi Nàwɔ Womada Adzo Wò O.”) Blema lododo sia si le Biblia me sɔ ɖe enu ta be: “Amebebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.”—Lododowo 14:15.
[Nɔnɔmetata si le axa 26]
Ame miliɔn geɖe xɔe se be ne yewoxe fe la, yewoate ŋu akpe ɖe lɔlɔ̃tɔ siwo ku ŋu alo alé avu wo