Biabia Aɖe Si Tɔtɔa Ame Geɖe

SUSU vovovowoe le amewo si le agbe kple ku ŋu. Ame aɖewo xɔe se be yewoayi edzi anɔ agbe le ku megbe, ɖewohĩ le nɔnɔme bubu aɖe me alo le teƒe bubu. Ame bubuwo susu be woagbugbɔ yewo adzi eye yewoaganɔ agbe. Ame bubu aɖewo hã bui be kue nye amegbetɔwo ƒe nuwuƒe.

Ðewohĩ afi si nètso alo afi si nènɔ tsi na be dzixɔse aɖe le asiwò le nya sia ŋu. Esi wònye be susu vovovowoe le amewo si le nu si dzɔna le ku megbe ŋu ta la, ɖe ame aɖe alo teƒe aɖe li si míate ŋu atrɔ ɖo akpɔ biabia sia si tɔtɔa ame la ƒe ŋuɖoɖo vavãtɔa?

Ƒe alafa gbogbo aɖewoe nye esia si subɔsubɔhakplɔlawo fiaa nu be amegbetɔwo ƒe luʋɔ mekuna o. Ame siwo le subɔsubɔha gã vovovowo me—Kristotɔwo, Hindutɔwo, Yudatɔwo kple Moslemtɔwo kpakple ame bubuwo xɔe se be luʋɔ mekuna o, ke boŋ eyia edzi nɔa agbe le ku megbe le gbɔgbɔmenutowo me. Buddhatɔwo ya xɔe se be to gbugbɔgadzi siwo xexlẽme meli na o dzi la, ŋusẽ si le amea me la ate ŋu aɖo dzidzɔteƒe si woyɔna be Nirvana.

Nufiafia siawo na ame akpa gãtɔ siwo le xexea me xɔe se be ku ʋua mɔ na agbenɔnɔ le xexe bubu aɖe me. Le ame geɖe gome la, ku wɔa akpa vevi aɖe le agbe me, eye wosusu be Mawu ƒe lɔlɔ̃nue wònye be amewo nanɔ kukum. Gake nu kae Biblia gblɔ tso nya sia ŋu? Míeɖe kuku xlẽ nyati si kplɔ esia ɖo. Ŋuɖoɖoa awɔ nuku na wò.