Kpekpewo Dede Ɣesiaɣi—Ele Vevie na Míaƒe Tenɔnɔ Sesĩe
1 Apostolo Paulo ƒoe ɖe mía nu be míayi edzi “[anɔ] blibo le xɔse me.” (Tito 1:9, 13) Míebua nya nyuiwo ŋu le hame kpekpewo me eye wofiaa alesi míado gbɔgbɔmeʋawɔnu bliboe bene míate ŋu “anɔ te ɖe Abosam ƒe aɖaŋu vɔ̃wo nu” la mí.—Ef. 6:11; Fil. 4:8.
2 Kpekpewo Naa Nusiwo Míehiã la Mí: Hame ƒe kpekpewo dede ɣesiaɣi le vevie na míaƒe tenɔnɔ sesĩe. (Kor. I, 16:13) Míedoa gbe ɖa le kpekpewo me daa akpe na Mawu hekafunɛ, eye míeɖea kuku nɛ biaa hamea ƒe nuhiahiãwo hãe. (Fil. 4:6, 7) Gomekpɔkpɔ le Fiaɖuƒehawo dzidzi me dea dzo mía me eye wòkpena ɖe mía ŋu míegblɔa míaƒe susuwo kple seselelãmewo esi míele Yehowa subɔm. (Ef. 5:19, 20) Hadede kple mía nɔewo le Fiaɖuƒe Akpata me do ŋgɔ na kpekpeawo kple emegbe dea dzi ƒo na mí, etua mí ɖo, eye wòdea dzo mía me.—Tes. I, 5:11.
3 April si va yi ƒe nuƒo tɔxɛ si nye “Alakpasubɔsubɔhawo ƒe Nuwuwu Ðo Vɔ” na alesi wòhiã kpata be woaɖe afɔ kaba ado le Babilon Gã me la wɔ dɔ ɖe nyateƒea lɔ̃lawo ƒe susu dzi vevie. (Nyaɖ. 18:4) Aleke gbegbe wòʋã mí enye si esi míesrɔ̃ Gbetakpɔxɔ ƒe nusɔsrɔ̃nyati etɔ̃ le June kple July me ku ɖe kekelia ƒe keklẽ si na ame dzɔdzɔewo ƒe mɔ dzi kɔ ŋu! (Lod. 4:18) Bu nusiwo ato mía ŋu ne ɖe míede kpekpe mawo o ŋu kpɔ.
4 Le míaƒe “Mawu Kafula Kpɔdzidzɔwo” Nutome Gã Takpekpe si gbɔna me la, woate gbe ɖe hehenana si ado míaƒe subɔsubɔdɔ ɖe ŋgɔ dzi. Abe alesi Ðoɖo Hena Míaƒe Subɔsubɔdɔa Nu Wuwu gblɔ le axa 72 ene la, Teokrasi Subɔsubɔ Sukua nye ɖoɖo si wowɔ be woanɔ hehe nam hame bliboa katã. Fifia sukua ƒe akpa aɖe kpena ɖe mía ŋu be míanya habɔbɔa ƒe egbegbe ŋutinya to Proclaimers-gbalẽa zazã me. Mele be míaɖe mɔ hehenana sia nato mía ŋu o.
5 Míaƒe Subɔsubɔkpekpea dzraa mí ɖo be míawɔ subɔsubɔdɔa nyuie wu. Kpekpe si míewɔ si me wona mɔfiamewo mí le alesi míakpɔ gome le Fiaɖuƒe Ŋuti Nyanyui 34 lia mamã na ame geɖe me la ɖe esia fia. Yehowa ƒe yayra ɖe dɔ sia dzi gba go abe alesi wòdze le emetsonu ɖedzesiawo me le xexeame katãe ene. (Tsɔe sɔ kple Korintotɔwo II, 9:6, 7.) Amesiwo de kpekpeawo ɣesiaɣi la xɔ dzideƒo eye wòna wokpe asi ɖe agbalẽa mamã ŋu.
6 Le Hame ƒe Agbalẽ me Nusɔsrɔ̃ me la, nusiwo srɔ̃m míele tso Mawu ƒe Nya la me le Nyaɖeɖefia Taƒoƒo ƒe agbalẽa me la na alesi ɣeyiɣia bia nuwɔwɔ kpatae la nu gasẽ ɖe edzi le mía me. Esi nuwo le dzɔdzɔm kabakaba le xexeame la, ehiã be míase Nyaɖeɖefia ƒe nyagblɔɖi detoawo me vava gɔme.
7 Kpekpe Dede Ɣesiaɣi Nenɔ Vevie Na Wò: Le dukɔ geɖe siwo me dodokpɔwo le mía nɔviwo dzi vam me la, wogakpɔa alesi wòhiã vevie be woakpe ta ɖekae kwasiɖa ɖesiaɖe dzea sii kokoko. Le kpɔɖeŋu me, le Burundi, Rwanda, Liberia, kple Bosnia kpakple Herzegovina la, ame yeye geɖe le kpekpewo vam ale gbegbe be woƒe xexlẽme wu gbeƒãɖelawo ƒe xexlẽme zi gbɔ zi eve alo zi etɔ̃ gɔ̃ hã. Yehowa toa esia me kpena ɖe nɔviawo ŋu be woanɔ te sesĩe le gbɔgbɔ ɖeka me.—Fil. 1:27; Heb. 10:23-25.
8 Ele be amesi medea kpekpewo ɣesiaɣi o la nawɔ afɔɖeɖewo fifia be wòaɖɔ nɔnɔme sia ɖo. (Nyagb. 4:9-12) Bene míanɔ te sesĩe la, ehiã be míaɖo dze kple ame bibiwo, esiae míekpɔna le kpekpewo dede ɣesiaɣi me.—Rom. 1:11.