Dzeɖoɖo Xɔlɔ̃wɔwɔtɔe Ate Ŋu Ade Dzi Gbɔ Na Amewo
1 Woate ŋu aɖe dzeɖoɖo gɔme be enye “susuwo lélekpɔ le nuƒoƒo me.” Ðewohĩ nya siwo ka ame bubuwo tsɔtsɔ dze dzeɖoɖo gɔme xɔlɔ̃wɔwɔtɔe anyɔ woƒe ɖetsɔleme eye ate ŋu akpe ɖe mía ŋu míatsɔ Fiaɖuƒegbedasia aɖo woƒe dzi gbɔe. Nuteƒekpɔkpɔ ɖee fia be dzeɖoɖo kple amewo faa xɔlɔ̃wɔwɔtɔe wɔa dɔ sã wu be woagblɔ mawunya na wo.
2 Alesi Woadze Dzeɖoɖo Gɔme Xɔlɔ̃wɔwɔtɔe: Be míate ŋu aɖo dze kple ame bubuwo mefia be míadi nya alo mawunyakpukpui wɔdɔɖeamedzi aɖewo koŋ agblɔ o. Nusi wòbia koe nye be míana ame kemea naɖo dze kple mí. Le kpɔɖeŋu me, ne míele dze ɖom xɔlɔ̃wɔwɔtɔe kple amesi ɖe xɔliƒo kple mí la, mesesẽna kpaɖii o ke míeƒoa nu faa. Míebua nya siwo míagagblɔ ŋu o, gake míeɖea dzi ɖi sea susu siwo dom wòle ɖa. Ne míetsɔ ɖe le nya siwo gblɔm wòle me anukwaretɔe la, ate ŋu ade dzi ƒo nɛ be wòayi dzeɖoɖoa dzi kple mí. Nusia tututue wòle be míawɔ ne míele ɖase ɖim na ame bubuwo.
3 Míate ŋu atsɔ nyatiwo abe hlɔ̃dodo, sɔhɛwo ƒe kuxiwo, nutoa me nudzɔdzɔwo, xexeame ƒe nɔnɔmewo, alo yame ƒe nɔnɔme ene gɔ̃ hã adze dzeɖoɖo gɔme xɔlɔ̃wɔwɔtɔe. Nya siwo kpɔa ŋusẽ ɖe amewo ƒe agbenɔnɔ dzi tẽ nyɔa woƒe ɖetsɔleme vevie. Ne míedze dzeɖoɖo gɔme ko la, míate ŋu atsɔ Fiaɖuƒegbedasia anɔ eme dem vivivi.
4 Dziɖeɖeɖi aɖo dze mefia be dzadzraɖo do ŋgɔ mehiã o. Ehiã. Gake mehiã be míadi nya sesẽ aɖewo alo alé mawunya aɖe ɖe susu me agblɔ, si awɔe be dzeɖoɖoa me mabɔbɔ alo masɔ ɖe nɔnɔmeawo ŋu o. (Tsɔe sɔ kple Korintotɔwo I, 9:20-23.) Mɔ nyui aɖe si nu míadzra ɖo le enye be míatia Ŋɔŋlɔawo me nyati ɖeka alo eve kple susu be míatu dzeɖoɖoa ɖe wo dzi. Reasoning-gbalẽa me nyatiwo me dzodzro akpe ɖe mía ŋu le esia me.
5 Nɔnɔme Vevi Siwo Nyo na Xɔlɔ̃wɔwɔ ƒe Dzeɖoɖo: Ele be míatsɔ vividoɖeameŋu kple anukwareɖiɖi aɖo dze kple ame bubuwo. Alɔgbɔnukoko kple nukomoɖoɖo wɔnɛ be míeɖea nɔnɔme siawo fiana. Mía sie gbedasi nyuitɔ kekeake le le xexeame; enya sena na dzianukwaretɔwo ŋutɔ. Ne wokpɔe be didi vevie si le mía me be míagblɔ nyanyui aɖe na yewo tae míetsɔ ɖe le eme na yewo la, aʋã wo be woaɖo to.—Kor. II, 2:17.
6 Ele be dzeɖoɖo kple amewo navivi. Eyata ele be míafa tu ahadze aɖaŋu le Fiaɖuƒegbedasia gbɔgblɔ me. (Gal. 5:22; Kol. 4:6) Dze agbagba nàƒã susu nyui aɖe ɖe amea me hafi adzo. Esia awɔe be ne míete ŋu ɖo eƒe dzi gbɔ zi gbãtɔ o hã la, ɖewohĩ axɔ nya la nyuie wu ne Ðasefo aɖe gaɖo dze kplii.
7 Menye mawunya sesẽ aɖe gbɔgblɔ nyuie ye na wodzea dzeɖoɖo gɔme xɔlɔ̃wɔwɔtɔe o. Nusi wònye koe nye be míanyɔ ame aɖe ƒe ɖetsɔleme ɖe nya si ŋu wòtsi dzi ɖo me. Ne míedzra ɖo do ŋgɔ ko la, míate ŋu aɖo dze kple amewo xɔlɔ̃wɔwɔtɔe. Mina míadze agbagba aɖo amesiwo míedoa goe ƒe dzi gbɔ to nya nyuitɔ kekeake si li, si nye Fiaɖuƒeyayra mavɔwo gbɔgblɔ na wo me.—Pet. II, 3:13.