“Woatsɔ Woƒe Yiwo Atu Kodziwoe”—Ɣekaɣi?

KPEMEME nyanyɛ aɖe si le Dukɔ Ƒoƒuawo ƒe dɔwɔƒe le New York City la nye ŋutsu aɖe si le yi aɖe tum be wòazu kodzi. Wotui ɖe Biblia me nyagblɔɖi siwo le Yesaya ta 2, kpukpui 4, kple Mixa ta 4, kpukpui 3, dzi. Aleke nya siawo ava emee eye ɣekaɣie woava eme?

Woɖo tanya na nyatakaka aɖe si dze le The New York Times me nyitsɔ laa be “Aʋawɔnuwo Dzadzra le Xexeame Katã Yi Dzi Ðo Dɔlar Biliɔn 30”! Le ƒe 1999 me la, amekawoe nye aʋawɔnu vovovo siawo dzrala siwo xɔ nɔƒe gbãtɔ? United States ye xɔ nɔƒe gbãtɔ, ekpɔ dɔlar biliɔn 11.8. Russia kplɔe ɖo, ekpɔ ga si susɔ vie wòade ema ƒe afã. Gake ga si Russia kpɔ la de esi wòkpɔ le ƒe si do ŋgɔ me ƒe teƒe eve kloe. Eyome Germany, China, France, Britain, kple Italy kplɔ wo ɖo. Nyatakaka ma ke yi edzi be: “Abe alesi wònɔ tsã ene la, dukɔ madeŋgɔwoe wodzra aʋawɔnuawo ƒe akpa eve le etɔ̃ me na.”

Le xexemeʋa eve kple aʋa gã geɖe siwo dzɔ le ƒe alafa 20 lia me, siwo me wowu ame miliɔn alafa geɖe le eye ame geɖe xɔ abi megbe la, ame aɖe abia be, “Ɣekaɣie dukɔwo asrɔ̃ ŋutifafa ɖe aʋawɔwɔ teƒe?” Biblia ɖee fia be “ŋkeke mlɔeawo” mee tɔtrɔ ɖe ŋutifafa ŋu sia ava le. (Yesaya 2:2) Le nyateƒe me la, nyagblɔɖi sia le eme vam xoxo, esi Yehowa Ðasefo siwo ade miliɔn ade ɖe mɔ be ‘Yehowa nafia nu’ yewo ta. Esia wɔe be ‘woƒe ŋutifafa sɔ gbɔ.’—Yesaya 54:13.

Eteƒe madidi o Yehowa ahe aʋawɔnuwo katã kple aʋawɔwɔwo kpakple amesiwo doa wo ɖe ŋgɔ la ava nuwuwui, elabena ‘atsrɔ̃ amesiwo gblẽa anyigba la.’ Ne àdi be yeanya nu geɖe tso tɔtrɔ wɔnuku sia ŋu la, taflatse ke te ɖe Yehowa Ðasefo siwo le wò nutoa me ŋu faa alo ŋlɔ agbalẽ ɖo ɖe adrɛs si sɔ le axa 5 lia.—Nyaɖeɖefia 11:18.