Ðe Nuwo Le Gbegblẽm Ðe Edzi Le Xexea Me Wu Ale Si Wonɔa?

LE ƑE 2017 ƒe gɔmedzedze la, dzɔdzɔmeŋutinunyalawo gblɔ be nuwo agblẽ ɖe edzi kura. Le ƒe ma ƒe January me la, dzɔdzɔmeŋutinunyala aɖewo gblɔ be xexea gogo afɔku dziŋɔ aɖe si teƒe amegbetɔwo mekpɔ kpɔ o geɖe wu. Wozã Tsɔtsrɔ̃ŋkeke Ƒe Gaƒoɖokui aɖe tsɔ wɔ kpɔɖeŋu na ale si amegbetɔwo gogo xexea me katã ƒe afɔku aɖe, eye wohe gaƒoɖokuia yi ŋgɔ sekɛnd 30. Fifia esusɔ miniti eve kple afã ne zã ga 12 naƒo le Gaƒoɖokuia dzi, eye esia fia be míegogo xexea me katã ƒe afɔku dziŋɔa wu ale si wònɔ le ƒe 60 siwo va yi me!

Le ƒe 2018 me la, dzɔdzɔmeŋutinunyalawo ɖoe be yewoagalé ŋku ɖe ale si gbegbe míegogo xexea ƒe nuwuwui wu ale si míenyae la ŋu. Ðe Tsɔtsrɔ̃ŋkeke Ƒe Gaƒoɖokuia agafia be míegogo afɔku dziŋɔa kokokoa? Nu kae nèsusu? Ðe nuwo le gbegblẽm ɖe edzi le xexea mea? Ðewohĩ asesẽ na wò be nàɖo biabia sia ŋu. Numekulawo gɔ̃ hã ƒe susu mewɔ ɖeka le nya sia ƒe ŋuɖoɖo ŋu o. Menye ame sia amee xɔe se be xexea atsrɔ̃ keŋkeŋ o.

Le nyateƒe me la, ame geɖe xɔe se be nuwo anyo le etsɔme. Wogblɔna be kpeɖodzi siwo ɖee fia be amegbetɔwo kple míaƒe anyigbaa matsrɔ̃ o, eye nuwo anyo na mí la le yewo si. Ðe kakaɖedzi le nya ma ŋua? Ðe nuwo le gbegblẽm ɖe edzi le xexea me wu ale si wonɔa?