Nịm Mme Utịtmbuba eke Spirit
1 Nso ifet ke edidi ntem nditoro Jehovah ke nsinsi nsinsi! Man ikeme ndisịm utịtmbuba oro, nnyịn imekeme ndinịm mme utịtmbuba eke spirit oro ikemede ndisọp nsịm inyụn̄ inam n̄kpọ ibịne mmọ. Emi ayanam nnyịn ida odudu nnyịn inam n̄kpọ ye eti ibuot. (1 Cor. 9:26) Mme utịtmbuba ewe ke afo edikeme ndisịm?
2 Ukpepn̄kpọ Bible: Nte afo emesitịm idem ọnọ mme mbono esop kiet kiet? Edieke edide ntre, nte afo emesisio ini enịm ọnọ edinam ndụn̄ọde ye editie n̄kere ke ini afo ekpepde n̄kpọ? Ke uwụtn̄kpọ, ke ini etịmde idem ọnọ Ukpepn̄kpọ Enyọn̄-Ukpeme eke urua ke urua ye Ukpepn̄kpọ N̄wed Esop, nte afo n̄kukụre esidụri udịm ke mme ibọrọ mîdịghe nte afo emesise mme itie N̄wed Abasi oro ẹsiakde ẹsịn onyụn̄ ekere aban̄a mme ntak oro ẹnọde ke mme n̄kpọ oro ẹnamde an̄wan̄a? Nte afo emekeme ndinam edi utịtmbuba fo ndinam ndụn̄ọde ke ibat ibat akpan n̄kpọ ke edikot Bible oro ẹnọde ke Ufọkn̄wed Utom Ukara Abasi eke urua kiet kiet? Utọ edidụn̄ọde n̄kpọ eke spirit oro oyom ini ye ukeme, edi enye akama ediwak nti utịp.—N̄ke 2:4, 5.
3 Mme Mbono Esop: Utịtmbuba efen edi edidụk ofụri mbono esop ition kpukpru ini. Ndibabak nsịm do man abuana ye ekemmọ mme andinịm ke akpanikọ onyụn̄ abuana ke ikwọ ye akam ediberede an̄wam ndifori idaha esop. Nnyịn n̄ko imekeme ndidomo ndinọ ibọrọ ke mme mbono esop kiet kiet nnyụn̄ nnam n̄kpọ ndifori mme ibọrọ nnyịn. Ndusụk afo emekeme ndiwụt nte itie N̄wed Abasi enyenede ebuana ye se ẹnemede m̀mê ndiwụt nte ẹkemede ndida se ẹkpepde nnam n̄kpọ ke uwem ofụri usen.—Heb. 10:24, 25.
4 Utom An̄wautom: Utom ukwọrọikọ nnyịn esinen̄ede enyene n̄kọri ke ini nnyịn inịmde mme utịtmbuba. Nte afo emenyene ọkpọkpọ utịtmbuba kaban̄a ibat hour oro afo odiomide ndibiat ke utom ukwọrọikọ ke ọfiọn̄ kiet kiet? Ndusụk owo ẹkụt nte oro enyenede ufọn. Mîdịghe nte afo emekeme ndinam n̄kọri ke ndusụk ikpehe utom ukwọrọikọ fo, utọ nte ndida Bible nnam n̄kpọ ke utom eke ufọk ke ufọk, ndinam mme mfiakn̄ka efen efen oro ẹnyenede ufọn, ndidomo nditọn̄ọ ukpepn̄kpọ Bible, m̀mê ndikpep owo n̄kpọ uforo uforo?
5 Mme ete ye eka, nte mbufo ke ẹsịn udọn̄ ẹnọ nditọ mbufo ndinịm mme utịtmbuba ke utom Jehovah? Ẹn̄wam mmọ ẹkụt nte ke ndinam utom nte asiakusụn̄, isụn̄utom, m̀mê nte andibuana ke ubon Bethel edi eti usụn̄ ndiwụt nte esịtekọm oro mmọ ẹnyenede ẹnọ Jehovah okponde.—Eccl. 12:1.
6 Nte nnyịn idụn̄ọrede mme edinam nnyịn, inịmde mme utịtmbuba eke spirit, inyụn̄ inamde n̄kpọ ndisịm mmọ, nnyịn iyenyene akwa idatesịt ke utom nnyịn inyụn̄ idi n̄kpọ ndọn̄esịt inọ mmọ efen.—Rome 1:12.