“Un̄wana Ama Edi ke Ererimbot”
“Emi edi ikpe oro, ete, un̄wana ama edi ke ererimbot, edi owo ẹmama ekịm ẹkan un̄wana.”—JOHN 3:19.
1. Ntak emi kpukpru owo ẹkpenyenede ndikere mban̄a ikpe Abasi?
N̄WAKN̄KAN owo mfịn ifịnake idem ọkpọsọn̄ iban̄a ikpe Abasi. Ndusụk owo ẹda nte ke Abasi eyekpe ikpe mmimọ nte ọfọnde edieke mmimọ ikade ufọkederi kpukpru ini mînyụn̄ inamke mme mbọhọidụn̄ mmimọ idiọkn̄kpọ. Ye ediwak owo, mme ukpepn̄kpọ Christendom ẹban̄ade hell ikan̄, ye purgatory amabiat ofụri ekikere aban̄ade ikpe Abasi efep. Edi unana udọn̄ ye mme nsu Christendom nditara nsuana ikemeke ndikpụhọde akpanikọ oro nte ke Abasi eyekpe ikpe kpukpru owo ke akpatre. (Rome 14:12; 2 Timothy 4:1; Ediyarade 20:13) Ndien ekese n̄kpọ ẹdikọn̄ọ ke ikpe emi. Mbon oro ẹtebede ikpe ẹyebọ enọ Abasi edide nsinsi uwem, ke adan̄aemi mbon oro owo mîtebeke ikpe ẹdibọde ọyọhọ n̄kpọ eyenutom idiọkn̄kpọ: kpa n̄kpa.—Rome 6:23.
2. Nso idi isọn̄ inọ ikpe Abasi?
2 Ntre, mme ata Christian ẹkere ẹban̄a ikpe Abasi, ndien mmọ ke esịt akpanikọ ẹyom ndinem enye esịt. Didie ke mmọ ẹkeme ndinam emi? Ke John 3:19, Jesus ọmọnọ nnyịn ukpọhọde. Enye ọdọhọ ete: “Emi edi ikpe oro, ete, un̄wana ama edi ke ererimbot, edi owo ẹmama ekịm ẹkan un̄wana; koro utom mmọ ọdiọkde.” Ih, ikpe Abasi edikọn̄ọ ke m̀mê nnyịn imama un̄wana utu ke ekịm.
“Abasi Edi Un̄wana”
3. Nso idi ekịm, ndien nso idi un̄wana?
3 Ke usụn̄ifiọk eke spirit, ekịm enyene n̄kpọ ndinam ye unana ifiọk ye unana idotenyịn oro ẹdude ke ikpehe ukara Satan—okposụkedi Satan esiwakde ndinịm idem nte “angel un̄wana.” (2 Corinth 4:4; 11:14; Ephesus 6:12) Ke n̄kan̄ eken, un̄wana enyene n̄kpọ ndinam ye ifiọk ye edinam an̄wan̄a oro otode Jehovah Abasi. Paul ama etịn̄ n̄kpọ aban̄a un̄wana ke ini enye ekewetde ete: “Sia edide Abasi, emi ọkọnọde uyo ete, Yak un̄wana ayama ke ekịm, akayama nnyịn ke esịt, man Enye an̄wan̄ade owo enyịn ndifiọk ubọn̄ Abasi ke iso Jesus Christ.” (2 Corinth 4:6) Ẹtịm ẹdiọn̄ọ un̄wana eke spirit ketket ye Jehovah Abasi tutu apostle John ekewet ete: “Abasi edi un̄wana.”—1 John 1:5; Ediyarade 22:5.
4. (a) Didie ke Jehovah anam un̄wana odu? (b) Ke ewe usụn̄ ke nnyịn ikeme ndiwụt ima oro nnyịn imade un̄wana?
4 Jehovah amanam un̄wana odu ebe ke ikọ esie, emi odude mfịn ifụre ifụre ke uduot oro ẹwetde-wet ke Edisana Bible. (Psalm 119:105; 2 Peter 1:19) Ntre, andiwet psalm ke akpanikọ eketịn̄ aban̄a ima emi enye amade un̄wana oro ke ini enye ekewetde ete: “Mmama ido fo didie! Enye ke ntie n̄kere ofụri usen. Ukpọn̄ mi ekpeme ikọ ntiense fo; nnyụn̄ mma mmọ etieti.” (Psalm 119:97, 167) Nte afo amama un̄wana oro nte andiwet psalm nte an̄wan̄ade akamade? Nte afo emesikot Ikọ Abasi kpukpru ini, etie ekere enye, onyụn̄ odomo ọkpọsọn̄ ndida se enye etịn̄de nsịn ke edinam? (Psalm 1:1-3) Ke edide ntre, afo oyom ndibọ Jehovah utebe ikpe.
“Ndi Un̄wana Ererimbot”
5. Un̄wana Abasi owụhọ ke anie?
5 Ọnọ-uwem un̄wana otode Jehovah owụhọ ke owo oro, Jesus Christ. Ke ntọn̄ọikọ Gospel John, nnyịn ikot ite: “Uwem odu [Jesus] ke idem; uwem oro onyụn̄ edi un̄wana owo. Ndien un̄wana oro ayama ke ekịm; ekịm inyụn̄ ikanke enye.” (John 1:4, 5) Ke akpanikọ Jesus enyene utọ n̄kpet n̄kpet ebuana oro ye un̄wana tutu eyedi se ẹkotde enye “ata un̄wana emi anamde enyịn an̄wan̄a kpukpru owo.” (John 1:9) Jesus ke idemesie ọkọdọhọ ete: “Adan̄a ini nte ndodu ke ererimbot, ndi un̄wana ererimbot.”—John 9:5.
6. Nso ke ana owo anam man enyene utebe ikpe emi osụn̄ọde ke nsinsi uwem?
6 Ke ntre, mmọ oro ẹmade un̄wana oro ẹma Jesus ẹnyụn̄ ẹbuọt idem ke enye. Owo ikemeke ndinyene utebe ikpe ke Jesus mîbuanake. Ih, edi n̄kukụre ke ndise enye nte usụn̄ oro Abasi emekde kaban̄a edinyan̄a ke nnyịn ikeme ndinyene utebe ikpe. Jesus ama ọdọhọ ete: “Owo eke ọbuọtde idem ye Eyen enyene nsinsi uwem; edi owo eke mîbuọtke idem ye Eyen idikwe uwem, edi iyatesịt Abasi osụk ọkọbọ enye.” (John 3:36) Nte ededi, ndibuọt idem ye Jesus ọwọrọ nso?
7. Mbuọtidem ke Jesus abuana mbuọtidem ke anie n̄ko?
7 Akpa, Jesus ke idemesie ọkọdọhọ ete: “Owo eke ọbuọtde idem ye Ami ibuọtke idem ye Ami, edi ọbuọt ye Enyeemi ọkọdọn̄de Mi: ndien owo eke okụtde Mi okụt Enyeemi ọkọdọn̄de Mi. Mmedi nte un̄wana ke ererimbot, man owo ekededi eke ọbuọtde idem ye Ami okusụk odu ke ekịm.” (John 12:44-46) Mbon oro ẹmade Jesus ẹnyụn̄ ẹbuọtde idem ye enye ana ẹnyene n̄ko ntotụn̄ọ ima ye mbuọtidem ke Abasi ye Ete Jesus, kpa Jehovah. (Matthew 22:37; John 20:17) Owo ekededi oro adade enyịn̄ Jesus ke utuakibuot mmọ ẹdi ẹkpụde ndinọ Jehovah akakan ukpono iwụtke ata ima inọ un̄wana oro.—Psalm 22:27; Rome 14:7, 8; Philippi 2:10, 11.
“Akpan Asan̄autom” Abasi
8. Didie ke un̄wana Abasi okowụhọ ke Jesus idem mbemiso enye edide edimana nte owo?
8 Ndikọn̄ mbuọtidem ke Jesus n̄ko ọwọrọ ndinyịme udeme esie ke mme uduak Jehovah ọyọhọ ọyọhọ. Ẹma ẹwụt nte udeme esie edide akpan n̄kpọ ke ini angel akasiande John ete: “Ikọ ntiense Jesus edi spirit prọfesi.” (Ediyarade 19:10; Utom 10:43; 2 Corinth 1:20) Ọtọn̄ọde ke ata akpa prọfesi ke Eden, kpukpru prọfesi ẹtode Abasi ke akpatre ẹkenyene n̄kpọ ndinam ye Jesus ye idaha esie ndiyọhọ mme uduak Abasi. Ke ukem usụn̄ oro, Paul ama asian mme Christian ke Galatia ete ke Ibet ediomi ekedi “andikpeme . . . adade nnyịn ọsọk Christ.” (Galatia 3:24) Ẹkenọ Ibet ediomi eset oro nditịm idụt oro idem nnọ edidi Jesus nte Messiah. Ntre idem mbemiso enye akamanade nte owo, un̄wana otode Jehovah okowụhọ ke Jesus.
9. Nso ke ndima un̄wana abuana ọtọn̄ọde ke 33 C.E.?
9 Ke 29 C.E., Jesus ama ọnọ idemesie ndina baptism ndien ẹma ẹyet enye aran ke edisana spirit, ke ntre akabarede edi Messiah oro ẹken̄wọn̄ọde. Ke 33 C.E, enye ama akpa nte mfọnmma owo, ẹma ẹnam enye eset, ọdọk ke heaven, ndien do ama ọnọ ufọn uwem esie ke ibuot idiọkn̄kpọ nnyịn. (Mme Hebrew 9:11-14, 24) Udịm udịm n̄kpọntịbe ẹmi ẹma ẹnịm ntọn̄ọ edinam oro Abasi anamde ye mme owo idiọn̄ọ. Jesus kemi ekedi “Ọbọn̄ uwem,” ‘Ọbọn̄ edinyan̄a,’ “Anditọn̄ọ mbuọtidem nnyịn ye Andinam enye ọfọn ama.” (Utom 3:15; Mme Hebrew 2:10; 12:2; Rome 3:23, 24) Ọtọn̄ọde ke 33 C.E. kaiso, mme ama un̄wana oro ẹma ẹdiọn̄ọ, ẹnyụn̄ ẹnyịme, ete ke ẹsiode Jesus ẹfep “edinyan̄a . . . itoho ke baba owo kiet efen: koro enyịn̄ baba kiet efen inyụn̄ idụhe eke ẹnọde ke otu owo ke idak ikpaenyọn̄, eke ẹnyenede ndida nnyan̄a nnyịn.”—Utom 4:12.
10. Ntak emi edide akpan n̄kpọ ntre ndikpan̄ utọn̄ nnọ mme ikọ Jesus nnyụn̄ nnam mmọ?
10 Ndikọn̄ mbuọtidem ke Jesus ọwọrọ n̄ko ndinyịme enye nte “Ikọ,” ye “Utịbe Ọnọitem.” (John 1:1; Isaiah 9:6, NW) Se Jesus esitịn̄de esiwụt akpanikọ Abasi kpukpru ini. (John 8:28; Ediyarade 1:1, 2) Ndikpan̄ utọn̄ nnọ enye edi n̄kpọ n̄kpa ye uwem. Jesus ama asian mme Jew eke eyo esie ete: “Owo eke okopde uyo Mi, onyụn̄ ọbuọtde idem ye Enyeemi ọkọdọn̄de Mi, enyene nsinsi uwem, inyụn̄ idụkke ke ikpe, edi ama oto ke n̄kpa ebe odụk ke uwem.” (John 5:24) Ke akpa isua ikie C.E., ẹma ẹnyan̄a mbon oro ẹkenamde ikọ Jesus, yak idọhọ, ẹsio ke ekịm ererimbot Satan ẹsịn ke uwem. Ẹma ẹbat mmọ ke edinen ye idotenyịn ndidi mme ada udeme ye enye ke Obio Ubọn̄ esie eke heaven. (Ephesus 1:1; 2:1, 4-7) Mfịn, ndinam mme ikọ Jesus eberede usụn̄ ọnọ ediwak owo ndidi se ẹdade nte ndinen owo ye ekikere ndibọhọ Armageddon nnyụn̄ nnyene mfọnmma uwem eke owo ke obufa ererimbot.—Ediyarade 21:1-4; men James 2:21, 25 domo.
“Ibuot Kpukpru N̄kpọ”
11. Nso akwa odudu ke ẹkenọ Jesus ke 33 C.E.?
11 Ke enye ama ekeset, Jesus ama ayarade ikpehe un̄wana efen ọnọ mme anditiene enye. Enye ọkọdọhọ ete: “Ẹnọ Mi Ofụri odudu ke heaven ye ke isọn̄.” (Matthew 28:18) Ẹma ẹmenede Jesus ke ntre ẹnịm ke akakan itie ke esop ofụri ekondo Jehovah. Paul ọnọ n̄kaiso mbụk ke ini enye ọdọhọde ete: “[Abasi akanam Jesus] eset ke n̄kpa, onyụn̄ [anam] Enye etie ke ubọk nnasia Esie ke mme itie heaven, okon̄ akan kpukpru mme andikara ye mme enyene nsọn̄uyo ye mme enyene-odudu ye mme enyene ubọn̄, ye kpukpru enyịn̄ eke edisasiak, idịghe ke eyo emi ikpọn̄, edi ke eyo eke edidide n̄ko; okonyụn̄ ada kpukpru n̄kpọ adak Enye ke ukot; onyụn̄ ọnọ Enye ete edi Ibuot kpukpru n̄kpọ, ọnọ ufọn ufọk Abasi, emi edide Idemesie.” (Ephesus 1:20-23; Philippi 2:9-11) Ọtọn̄ọde ke 33 C.E., ndima un̄wana oro emesịne ndifiọk n̄kokon̄ itie Jesus.
12. Nso ke mme Christian oro ẹyetde aran ye inemesịt ẹkenyịme toto ke editọn̄ọ, ndien didie ke mmọ ẹkenanam emi ẹwụt ke ata ata usụn̄?
12 Ke akpatre, ofụri ubonowo enyene ndifiọk akwa odudu Jesus. (Matthew 24:30; Ediyarade 1:7) Mme ama un̄wana, nte ededi, ẹmefiọk unen esie ye idatesịt toto ke editọn̄ọ. Mbon oro ẹyetde aran ke esop Christian ẹnyịme Jesus nte “edi[de] Ibuot ọnọ idem, emi edide ufọk Abasi.” (Colossae 1:18; Ephesus 5:23) Ke ini mmọ ẹkabarede ẹdi ubak idem oro, ‘ẹsio mmọ ke odudu ekịm, ẹsịn ke Obio Ubọn̄ Eyen Ima Abasi.’ (Colossae 1:13) Toto ke ini oro, mmọ ke esịt akpanikọ ẹtiene ndausụn̄ Jesus ke kpukpru ikpehe uwem mmọ, ndien ke ini nnyịn mmọ ẹmekpep “mme erọn̄ enwen” ndinam ukem oro. (John 10:16) Ndidiọn̄ọ itieibuot Jesus edi akpan n̄kpọ ẹyomde man ẹbọ utebe ikpe.
13. Ini ewe ke Jesus ọkọtọn̄ọ ndida odudu Obio Ubọn̄ nnam n̄kpọ, ndien nso iketiene mi ke isọn̄?
13 Ke edidọk esie n̄ka heaven ke 33 C.E., Jesus ke ndondo oro ikọtọn̄ọke ndida odudu esie nnam n̄kpọ ke ọyọhọ udomo. Okposụkedi edide Ibuot esop Christian, enye ama etie ebet nnennen ini edisịm man owụt ọyọhọ odudu ke idem ubonowo ke ofuri ofuri. (Psalm 110:1; Utom 2:33-35) Ini oro ekedi ke 1914, ke ini ẹkedoride Jesus ke ebekpo nte Edidem Obio Ubọn̄ Abasi ndien “ukperedem ini” eke ererimbot emi ọtọn̄ọde (2 Timothy 3:1) Toto ke 1919, editan̄ nsụhọ mbon oro ẹyetde aran mbok amasan̄a ekpere utịt esie. Ọtọn̄ọde ke 1935 akpan akpan, Jesus ke abahade ubonowo esịn ke “erọn̄,” ẹmi ẹdidade “ubọn̄ emi ẹkenịmde ẹnọ [mmọ]” inyene, ye “ebot,” ẹmi “[ẹdidahade] ẹkedụk ke nsinsi ufen [“edisịbe mfep,” NW].”—Matthew 25:31-34, 41, 46.
14. Didie ke akwa otuowo ẹwụt ima oro mmọ ẹnyene ẹnọ un̄wana, ndien emi edisụn̄ọ ke nso ọnọ mmọ?
14 Ye inemesịt, erọn̄ ẹmewak ke mme ukperedem usen ẹmi. Akwa otuowo mmọ ẹdide ke ediwak miliọn ẹmebiọn̄ọde ke ererimbot “ẹtode ke kpukpru obio ye esien ye idụt ye usem.” Ukem nte nsan̄a mmọ, kpa mbon oro ẹyetde aran, mbonmbiet erọn̄ ẹmi ẹma un̄wana emi. Mmọ ẹma “[ẹyet] ofọn̄idem mmọ ẹnam afia ke iyịp Eyenerọn̄,” ndien mmọ ẹfiori ke ọkpọsọn̄ uyo ete: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.” Ke ntak emi, akwa otuowo oro nte otu ẹyebọ utebe ikpe. Mme andibuana ke enye “[ẹto] ke akwa ukụt ẹwọn̄ọ,” ẹbọhọde nsobo mbon oro ẹmade ekịm ke Armageddon.—Ediyarade 7:9, 10, 14.
“Nditọ Un̄wana”
15. Ke ewe usụn̄ ke mme edinam nnyịn ẹwụt nsụkibuot nnọ Edidem oro, Jesus Christ?
15 Nte ededi, didie ke mme ama un̄wana ke usụn̄ oro ẹnamde-ẹnam ẹwụt, ẹdide mbon oro ẹyetde aran m̀mê mme erọn̄ en̄wen, ẹsụk idem ẹnọ Jesus nte kiet oro Abasi odoride ke ebekpo nte Edidem ye udiana Ebiereikpe? Usụn̄ kiet edi ke ndidomo ndidi orụk mbon oro Jesus onyịmede. Ke adan̄aemi okodude ke isọn̄ Jesus ama owụt esịtekọm aban̄a mme utọ edu nte esịt akpanikọ, ima ofụri esịt, ye ifiopesịt kaban̄a akpanikọ, ndien enye ke idemesie ama owụt mme edu ẹmi. (Mark 12:28-34, 41-44; Luke 10:17, 21) Edieke ọdọn̄de nnyịn ndinyene utebe ikpe, ana nnyịn ikọri mme uto edu oro.
16. Ntak edide akpan n̄kpọ ndifọrọde utom ekịm nduọk-ọ?
16 Emi edi akpanikọ akpan akpan sia ekịm ererimbot Satan otịmde-tịm okịm akan nte utịt asan̄ade ekpere. (Ediyarade 16:10) Mme ikọ oro Paul ekewetde ọnọ ẹsọk mbon Rome ke ntre ẹtịm ẹdot: “Okoneyo ọnyọn̄ ebe efep, uwemeyo ke ekpere; yak nnyịn ifọrọde ndien utom ekịm, inyụn̄ isịne n̄kpọekọn̄ un̄wana. Yak nnyịn isan̄a ukpono ukpono, nte owo asan̄ade ke uwemeyo; ikûsan̄a ke otịme otịme ido ye mbun̄wọn̄i, ikûsan̄a ke use ye mbubiam ido, ikûsan̄a ke utọk ye ufụp.” (Rome 13:12, 13) Ke adan̄aemi nsinsi uwem edide ẹnọ otode Abasi, nte mbuọtidem ye ima oro nnyịn inyenede inọ un̄wana oro edide akpanikọ ẹyarade ẹto mme edinam nnyịn. (James 2:26) Ntre, ubiereikpe oro nnyịn ibọde ke akamba udomo edikọn̄ọ ke adan̄a nte nnyịn inamde nti utom inyụn̄ ikpọn̄de ndiọi utom.
17. ‘Ndimen Ọbọn̄ Jesus Christ nsịne’ ọwọrọ nso?
17 Ke ama ọkọnọ item esie ke N̄wed Mbon Rome 13:12, 13 okụre, apostle Paul eberi ke ndidọhọ: “Ẹmen Ọbọn̄ Jesus Christ ẹsịne, ẹkûnyụn̄ ẹben̄e n̄kpọ ẹnịm ẹnọ idiọk udọn̄ obụkidem.” (Rome 13:14) Ọwọrọ nso ‘ndimen Obọn̄ Jesus Christ nsịne’? Enye ọwọrọ ke mme Christian ẹkpenyene nditiene Jesus ketket, ẹsịnede ke idemmọ, yak idọhọ, uwụtn̄kpọ ye edu esie, ẹdomode ndinyene edu ebietde eke Christ. Peter ọkọdọhọ ete, “Ẹkekot mbufo ẹte ẹdinam oro; koro Christ ke Idemesie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat imọ.”—1 Peter 2:21.
18. Nso ikpọ ukpụhọde ke ẹkeme ndiyom edieke nnyịn iyomde ndibọ utebe ikpe?
18 Ediwak ini emi esisịne edinam ikpọ ukpụhọde ke uwem Christian. Paul ọkọdọhọ ete, “Koro mbufo ẹkedi ekịm totoko, edi ẹmewọrọ ẹdi un̄wana ke Ọbọn̄ kemi: ẹsan̄a nte nditọ un̄wana koro mfri eke otode un̄wana esịne ke kpukpru nti ido ye edinen ido ye akpanikọ.” (Ephesus 5:8, 9) Owo ekededi oro anamde utom ekịm idịghe ama un̄wana idinyụn̄ ibọhọ utebe ikpe ibọhọke mmọ ẹnam ukpụhọde.
“Mbufo Ẹdi Un̄wana Ererimbot”
19. Ke ewe nsio nsio usụn̄ ke Christian ekeme ndinam uyama un̄wana oro afiak ayama?
19 Ke akpatre, ndima un̄wana ọwọrọ ndinam uyama un̄wana oro afiak ayama man mmọ en̄wen ẹkeme ndikụt enye nnyụn̄ nsan̄a n̄kpere enye. “Mbufo ẹdi un̄wana ererimbot,” ntre ke Jesus ọkọdọhọ. Ndien enye ama adian do ete: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:14, 16) Nti utom Christian ẹsịne ediwụt kpukpru orụk eti ido ye edinen ido ye akpanikọ, sia utọ eti edu oro ọnọde okopodudu ikọ ntiense aban̄a akpanikọ. (Galatia 6:10; 1 Peter 3:1) Mmọ akpan akpan ẹsịne editịn̄ nnọ mmọ en̄wen mban̄a akpanikọ. Mfịn, emi ọwọrọ ndibuana ke ubịnikọt ofụri ererimbot eke edikwọrọ “gospel Ubọn̄ Abasi . . . nte ntiense [nnọ] kpukpru mme idụt.” Enye ọwọrọ, n̄ko, ndifiak mbịne mbon oro ẹkewụtde udọn̄ ye ime, ndikpep Bible ye mmọ, nnyụn̄ n̄n̄wam mmọ, n̄ko, ndinam mme utom oro ẹnyenede un̄wana.—Matthew 24:14; 28:19, 20.
20. (a) Didie ke un̄wana oro ayama mfịn? (b) Mme uwak edidiọn̄ ewe ke mbon oro ẹnyịmede un̄wana oro ẹdara?
20 Ke usen nnyịn, ye un̄wam ifịk ifịk utom ukwọrọikọ eke mme anam-akpanikọ Christian, ẹmekop eti mbụk ke se iwakde ikan idụt 200, ndien un̄wana oro ke ayama akan nte akanam edide. Jesus ọkọdọhọ ete: “Ami ndi un̄wana ererimbot; owo eke etienede Mi idisan̄ake ke ekịm, edi eyenyene un̄wana uwem.” (John 8:12) Nso n̄kpọ idara ke edi ntem ndibuana ke edisu un̄wọn̄ọ emi! Uwem nnyịn ẹtịm ẹnyene ekese se ẹwọrọde kemi nnyịn mîkopke mmemidem ke ekịm ererimbot Satan mi. Ndien idotenyịn nnyịn ke akpanikọ edi utịbe nte nnyịn isakde iso ise utebe ikpe otode Ebiereikpe oro Jehovah emekde. (2 Timothy 4:8) Nso n̄kpọ mmọn̄eyet ke ekpedi ntem edieke, ke ima ikedidu ke un̄wana, nnyịn ifiọrọ ifiak inyọn̄ ekịm inyụn̄ ikọbọ ubiomikpe! Ke ibuotikọ oro etienede, nnyịn iyeneme nte nnyịn ikemede ndisọn̄ọ ndu ke mbuọtidem.
Nte Afo Emekeme Ndinam An̄wan̄a?
◻ Nso idi isọn̄ inọ ikpe Abasi?
◻ Nso akpan udeme ke Jesus enyene ke se iban̄ade mme uduak Abasi?
◻ Didie ke nnyịn inanam iwụt nte ke nnyịn imosụk ibuot inọ Jesus nte enyeemi Jehovah odoride ke ebekpo nte Edidem?
◻ Didie ke nnyịn ikeme ndiwụt idem nnyịn nte “nditọ un̄wana”?
◻ Ke ekịm ererimbot emi, ke ewe usụn̄ ke un̄wana ayama akan nte akanam edide?
[Ndise ke page 10]
Ke akpatre, ofụri ubonowo eyedifiọk akwa odudu Jesus
[Ndise ke page 12]
Nnyịn iwụt ke imama un̄wana ke ini nnyịn inamde enye afiak ayama ọnọ mbon en̄wen