Idisan̄a Didie Inyene Emem?

AFANIKỌN̄ okpon ke ererimbot emi tutu. Ntre ana inen̄ede isịn ukeme man idu ke emem. Idem ke ima ikenyene emem ekpri, esisụk ọsọsọn̄ ndika iso ndu ke emem. Ndi enyene se Ikọ Abasi etịn̄de emi ekemede ndin̄wam nnyịn inyene ata emem oro ebịghide? Didie ke ikeme ndin̄wam mme owo ẹnyene ata emem?

NSO IDINAM INYENE ATA EMEM?

Imekeme ndinyene ata emem edieke esịt anade nnyịn sụn̄, idem mînyụn̄ inyekke nnyịn. Ana idomo ndidian idem ye mme owo nnyụn̄ ndi nti ufan. Edi ata akpan n̄kpọ emi edinamde nnyịn inyene ata emem edi ndidi ufan Jehovah. Idisan̄a didie idi ufan Jehovah?

Edieke inịmde ibet Jehovah inyụn̄ inamde item oro enye ọnọde nnyịn, oro owụt ke imọbuọt idem ye enye, ke imonyụn̄ iyom ndidu ke emem ye enye. (Jer. 17:​7, 8; Jas. 2:​22, 23) Emi ayanam Jehovah okot nnyịn adian idem, onyụn̄ anam esịt ana nnyịn sụn̄. Isaiah 32:17 ọdọhọ ke “utom ata edinen ido ayakabade edi emem; utịp ata edinen ido oyonyụn̄ edi nduọkodudu ye ifụre ke nsinsi.” Omokụt do ke iyenyene emem edieke ikopde uyo Jehovah ke ofụri esịt.​—Isa. 48:​18, 19.

Jehovah onyụn̄ ọnọ nnyịn edisana spirit esie man an̄wam nnyịn inyene ata emem.​—Utom 9:31.

SPIRIT ABASI ESIN̄WAM NNYỊN INYENE EMEM

Emem edi ọyọhọ edu ita emi apostle Paul ọkọdọhọde ke edisana spirit esinam owo enyene. (Gal. 5:​22, 23) Sia edide edisana spirit esinam owo enyene ata emem, ana iyak enye ada nnyịn usụn̄. Ẹyak ineme usụn̄ iba emi edisana spirit ekemede ndin̄wam nnyịn inyene emem.

Akpa, ndikot Ikọ Abasi kpukpru usen esin̄wam nnyịn inyene emem. (Ps. 1:​2, 3) Ke ini itiede ikere se ikotde ke Ikọ Abasi, spirit Abasi esin̄wam nnyịn ifiọk nte Jehovah adade nsio nsio n̄kpọ. Ke uwụtn̄kpọ, ke ini ikotde Bible, imesikụt n̄kpọ emi owụtde ke Jehovah edi Abasi emem, imesinyụn̄ ikụt se inamde enye enen̄ede ama emem. Imesitetịm inyene emem ke ini inamde se ikotde ke Ikọ Abasi.​—N̄ke 3:​1, 2.

Ọyọhọ iba, ana ibọn̄ akam iben̄e Jehovah ọnọ nnyịn edisana spirit esie. (Luke 11:13) Jehovah ọn̄wọn̄ọ ke edieke idọhọde enye an̄wam nnyịn, ke ‘emem Abasi emi akande kpukpru ekikere eyekpeme esịt ye ekikere nnyịn ke Christ Jesus.’ (Phil. 4:​6, 7) Edieke isiben̄ede Jehovah edisana spirit esie, enye ayanam inyene ata emem. Mbon oro ẹdide ufan esie ẹsinyene utọ emem emi.​—Rome 15:13.

Didie ke ndinam se Bible etịn̄de an̄wam ediwak owo ẹkpụhọde nte ẹkesidude uwem ẹnyụn̄ ẹdu uwem emi anamde mmọ ẹnyene ata emem, ẹnyụn̄ ẹdu ke emem ye Jehovah ye mme owo?

NTE MMỌ ẸKESAN̄ADE ẸNYENE ATA EMEM

Ndusụk nditọete nnyịn ẹkesidi ‘mbon iyatesịt,’ edi idahaemi mmọ ẹnen̄ede ẹfọn ido, ẹme ime, ẹtie emem emem, ẹnyụn̄ ẹnen̄ede ẹfiọk nte ẹnamde n̄kpọ ye mme owo.a (N̄ke 29:22) Ẹyak ineme se ikan̄wamde nditọete iba ẹtre ndisisọp nyat esịt ẹnyụn̄ ẹdu ke emem ye mme owo.

David ekesitịn̄ ikọ usọn̄enyịn usọn̄enyịn. Mbemiso enye akayakde idemesie ọnọ Abasi, enye ekesitịn̄ ikọ ntịme ntịme ye ete ye eka esie ye nditọeka esie, inyụn̄ idụhe se owo akanamde emi ekesifọnde enye ke enyịn. Edi nte ini akakade, enye ama edikụt ke oyom imọ ikpụhọde inyụn̄ itie emem emem. Nso ikan̄wam enye okpụhọde? David ọdọhọ ete: “Mma ntọn̄ọ ndinam se n̄kekpepde ke Bible, oro ama an̄wam mi n̄kûsutịn̄ ikọ ntịme ntịme aba ye ete ye eka ye nditọeka mi.”

Iyatesịt ekedi n̄kpọ ufọk mme Rachel, ntak edi oro enye ekesisọpde ayat esịt. Enye ọdọhọ ete: “Sia iyatesịt ekedide n̄kpọ ufọk nnyịn, nsụk n̄n̄wan̄wana man n̄kûsusọp nyat esịt.” Nso in̄wam enye etie emem emem idahaemi? Enye ọdọhọ ke imesibọn̄ akam idọhọ Jehovah an̄wam imọ.

Nte David ye Rachel ẹdude uwem idahaemi owụt ke iyenyene emem edieke inamde se ikpepde ke Bible inyụn̄ iben̄ede Abasi ada spirit esie an̄wam nnyịn. Kpa ye oro afanikọn̄ okponde ntem ke ererimbot emi, imekeme ndinyene ata emem, ndien emi ayanam nnyịn idu ke emem ye mme owo ke ubon nnyịn ye ke esop. Edi Jehovah ọdọhọ nnyịn itie ke “emem ye kpukpru owo.” (Rome 12:18) Ndi owo ekeme nditie ke emem ye kpukpru owo? Nso ididi ufọn edieke isịnde ukeme man idu ke emem ye kpukpru owo?

DOMO NDIDU KE EMEM YE MME OWO

Ida ukwọrọikọ nnyịn inam mme owo ẹkop etop emem emi aban̄ade Obio Ubọn̄ Abasi. (Isa. 9:​6, 7; Matt. 24:14) Esịt enem nnyịn ke ediwak owo ẹkpan̄ utọn̄. Emi iyakke mmọ ẹnen̄ede ẹtịmede esịt m̀mê ndiyat esịt mban̄a afanikọn̄ ererimbot emi. Utu ke oro, mmọ ẹdori enyịn ke ini iso ọyọfọn, emi onyụn̄ anam mmọ ‘ẹyom emem ẹnyụn̄ ẹbịne enye.’​—Ps. 34:14.

Idịghe kpukpru owo ẹsisọp ẹnyịme ndikpan̄ utọn̄ ke ukwọrọikọ nnyịn. (John 3:19) Kpa ye oro, spirit Abasi esin̄wam nnyịn inam n̄kpọ emem emem ye ukpono ukpono ke ini ikwọrọde eti mbụk inọ mmọ. Nte Jesus ọkọdọhọde inam n̄kpọ edi oro ke ini ikwọrọde ikọ. Enye ọkọdọhọ ke Matthew 10:​11-13 ete: “Ke ini mbufo ẹdụkde ufọk, ẹkọm mbonufọk oro; ndien edieke ufọk oro odotde, yak emem emi mbufo ẹben̄ede ẹnọ enye odu ye enye; edi edieke ufọk oro mîdotke, yak emem mbufo afiak etiene mbufo.” Ndinam item Jesus emi ayan̄wam nnyịn iwọrọ inyọn̄ ke emem inyụn̄ inịm ke enyeneufọk ayakpan̄ utọn̄ ini en̄wen.

Imekeme ndidu ke emem ye mbon ukara edieke ikponode mmọ, ekpededi mbon oro mîmaha utom nnyịn. Ke uwụtn̄kpọ, asari ikayakke idụt kiet ke Africa ẹnyịme ẹbọp Ufọkmbono Obio Ubọn̄ do. Ẹma ẹdọhọ Brọda kiet emi ekesidide isụn̄utom ke idụt Africa oro aka okokụt owo oro adade ke ibuot idụt oro ke London ke England man ẹse m̀mê ẹyekeme ndikọk mfịna oro emem emem. Ẹkedọhọ Brọda emi ekeneme ye owo ukara oro aban̄a utom Mme Ntiense Jehovah ke idụt mmọ, onyụn̄ anam enye ọfiọk ke Mme Ntiense Jehovah idịghe mbon mfịna. Ndi ufọn ama odu?

Brọda oro ọdọhọ ete: “Ke ini n̄kesịmde itie udara isenowo, mma n̄kụt n̄wan emi esidarade isenowo. Nte enye ekesịnede ọfọn̄ ama anam ndiọn̄ọ ke enye oto n̄kan̄ oro ẹsisemde usem emi n̄kekpepde ini n̄kodude ke idụt mmọ. Ntre mma n̄kọm enye ke usem mmọ. Idem ama akpa enye tutu. Enye ama obụp mi m̀mê nso ida mi idi. Mma ndọhọ enye emem emem ke ndi ndikụt owo oro adade ke ibuot idụt mmọ. Enye ama okot enye ke fon. Ete oro ama ọwọrọ edikọm mi ke usem obio mmọ. Mma ntịn̄ se Mme Ntiense Jehovah ẹsinamde nnọ enye nnyụn̄ ndọhọ enye ke nnyịn isidaha utom nnyịn isịn ntịme. Enye ama enen̄ede akpan̄ utọn̄.”

Brọda nnyịn ndikeneme n̄kpọ oro ukpono ukpono ye ete oro ama anam enye etetịm ọfiọk se Mme Ntiense Jehovah ẹsinamde onyụn̄ anam enye okûnen̄ede usua utom nnyịn aba. Nte ini akakade, ukara idụt oro ẹma ẹnyịme Mme Ntiense Jehovah ẹbọp Ufọkmbono Obio Ubọn̄ ndien. Ama enem nditọete nnyịn tutu nte ẹkebierede n̄kpọ oro emem emem! Ke akpanikọ, ndikpono mme owo enyene ediwak ufọn. Ufọn kiet edi ke emi ekeme ndinam idu ke emem ye mmọ.

EMEKEME NDIDU KE EMEM KE NSINSI

Ikọt Jehovah mfịn ẹnen̄ede ẹdu ke emem ke otu idemmọ. Afo eyetiene anam emem aka iso odu ke otu ikọt Abasi edieke ayakde spirit Abasi anam fi etie emem emem. Se ifọnde ikan edi ke Jehovah ayama fi, afo oyonyụn̄ enyene ata emem ke nsinsi ke obufa ererimbot.​—2 Pet. 3:​13, 14.