“Dou Veilomani Sara”

“Dou veilomani sara e na veilomani ni veitacini.”​—ROMA 12:10.

1, 2. Na veiwekani cava e rau marautaka e dua na daukaulotu kei na yapositolo o Paula vata kei ira na tacidrau vakayalo?

ENA 43 na yabaki ni nona veiqaravi vakadaukaulotu ena Tokalau kei Esia, e kilai o Don ena nona dau kauaitaki ira e vakavulica. Ni sa davo bibi koto, sa ra qai gole yani e so e a vakavulica ena iVolatabu, era biubiu sara mai vakayawa mera lai kaya vua, “Kamsahamnida, kamsahamnida!”​​—⁠“Vinaka vakalevu, vinaka vakalevu!” ena vosa vakorea. A tarai ira na nona dau loloma o Don.

² Na ivakaraitaki oqo e sega ni yaco duadua ga vei Don. Ena imatai ni senitiuri, na yapositolo o Paula e dau kauaitaki ira vakalevu e qarava. A solia sara ga nona bula ena vukudra. E dina ni kaukaua nona vakabauta, e dau yalomalua qai dau veinanumi “me vaka na dau meimei ni sa susugi ira na luvena.” A vola ina ivavakoso mai Cesalonaika: “Ni keitou sa yalololoma sara vei kemudou, keitou sa vinakata me solia vei kemudou nai tukutuku-vinaka ni Kalou, ia ka sega ni koya walega, a neitou bula talega, ni keitou sa lomani kemudou vakalevu.” (1 Cesalonaika 2:​7, 8) E muri, ni kaya o Paula vei ira na tacina vakayalo mai Efeso nira na sega ni raici koya tale, “a ra sa tagi sara kecega, ka mokoti Paula, ka reguci koya.” (Cakacaka 20:​25, 37) Laurai e ke ni nona veiwekani o Paula kei ira na tacina vakayalo e sega ni baleta wale ga nira vakabauta vata. Era dau veilomani dina.

Na Veilomani kei na Loloma

3. E tukuni ena iVolatabu na vosa veilomani kei na loloma, erau veisemati vakacava?

³ Ena iVolatabu, na veilomani, veikauaitaki, kei na veinanumi era veisemati kei na itovo uasivi duadua vakarisito​​—⁠na loloma. (1 Cesalonaika 2:8; 2 Pita 1:​7, VV) Me vaka na dui mata ni daimani totoka, na itovo vakalou kece oqo era veitokoni vata me basika kina na itovo e vinaka sara. Era veivolekati kina na lotu Vakarisito ra qai voleka tale ga vua na Tamadra vakalomalagi. Rauta me uqeti ira na tacina vakayalo na yapositolo o Paula: “Me kakua ni vakailasu na loloma. . . . Dou veilomani sara e na veilomani ni veitacini.”​​—⁠Roma 12:​9, 10.

4. Na cava na ibalebale ni vosa “veilomani”?

⁴ Na vosa vakirisi e vakayagataka o Paula me “veilomani” e wasei vakarua, e dua e kena ibalebale veitokani kei na dua tale na veiwekani. E kaya e dua na dauvakadidike ena iVolatabu, ni kena ibalebale oqo vei ira na lotu Vakarisito “mera vakatakilakilataki ena veikauaitaki e laurai ena vuvale dau loloma, veivolekati, ratou qai veitokoni.” E vakabeka oya na nomu raici ira na tacimu kei na ganemu vakarisito? E dodonu me vakilai ena ivavakoso vakarisito na veilomani vakaveitokani. (Kalatia 6:​10) Sa rauta me kaya na Roma 12:10 ena New Testament in Modern English, e vola o J. B. Phillips: “Meda veilomani me vaka na veitacini.” Na Jerusalem Bible tale ga e kaya: “Dau veilomani me vaka nodra veilomani na veitacini.” Io, na nodra veilomani na lotu Vakarisito me kua ni yavutaki ena vakasama ni dodonu ga me vakayacori se me dua na itavi. “E na loloma tawa lasu,” meda “lomani ira kina na veiwekani . . . e na yalosavasava kei na lomakatakata.”​​—⁠1 Pita 1:​22.

“Vakatavulici Mai Vua na Kalou Mo Dou Veilomani”

5, 6. (a) E vakayagataka vakacava o Jiova na soqo ni veimatanitu me vakavulici ira kina nona tamata ena veilomani vakarisito? (b) E qaqaco vakacava na kedra ivau na veitacini ni toso na gauna?

⁵ E dina ni sa batabata mai na “nodra loloma na lewe vuqa” ena vuravura oqo, ia sa vakavulici ira tiko na nona tamata o Jiova mera “veilomani.” (Maciu 24:12; 1 Cesalonaika 4:⁠9) Na soqo ni veimatanitu ni iVakadinadina i Jiova, e dua na sala vinaka e veivakavulici kina. Ena soqo vaka oqo, era veisotari na mataveitacini mai na veivanua yawa, qai levu era bole mera vakaicilitaki ira na gole mai vanuatani. Ena dua na soqo ni tikina wale tiko ga oqo, e so era lako mai na vanua e sega ni nodra itovo vakavanua mera vakaraitaka votu na lomadra. “Nira se qai yaco mai na mataveitacini oqo, era dau taqaya qai mamadua,” e kaya e dua na lotu Vakarisito a veivuke ena veivakaicilitaki. “Ia ena ono ga na siga e muri nira sa vakarau biubiu, era veimokomoko qai veitagicaki kei ira na itaukeinivale. Sa ra mai marautaka na ivakaraitaki ni loloma vakarisito era na sega ni guilecava rawa.” Na noda kauaitaki ira na tacida, se mani vakacava na nodra isususu, ena vinaka kina na nodra veimaliwai na vulagi kei ira na itaukei.​​—⁠Roma 12:⁠13.

⁶ E veivakauqeti dina na veika e yaco ena soqo vaka oqori, ia era veivolekati sara na lotu Vakarisito nira veiqaravi vata ena loma ni dua na gauna. Na noda kilai ira vinaka na tacida, sa na qai rawa nida kila tale ga nodra itovo vinaka​​—⁠nodra dau dina, nuitaki, yalodina, yalololoma, lomasoli, veikauaitaki, veinanumi, kei na nodra lomasavu. (Same 15:​3-5; Vosa Vakaibalebale 19:22) E kaya o Mark, a veiqaravi tu vakadaukaulotu ena Tokalau kei Aferika, “Na cakacaka vata kei ira na tacida e semai kina na ivau ena sega ni tagutuvi rawa.”

7. Na cava e gadrevi vei keda me rawa nida marautaka kina na loloma vakarisito ena ivavakoso?

⁷ Me rawati qai taqomaki tiko ga na ivau vaka oqo ena ivavakoso, e dodonu mera veivolekati na lewena. Na noda sega ni dau calata na soqoni vakarisito, eda na vaqaqacotaka kina na keda ivau kei ira na vo ni mataveitacini. Na noda tiko rawa kei na noda vakaitavi ni bera na soqoni, gauna e caka tiko kina, kei na gauna e cava kina, eda sa veivakatakatai tiko kina meda “dauloloma kai valavala vinaka.” (Iperiu 10:​24, 25) E kaya e dua na qase ni ivavakoso mai Mereke: “Au se nanuma vinaka tu ga niu se gone, ni dau dua tale ga vei ira na iotioti ni vuvale me biuta na Kingdom Hall na neitou vuvale, keitou dau marautaka ena kena levu keitou rawata na veimaliwai e veitaraicake.”

Gadrevi Beka Mo “Dolava Vakalevu” na Lomamu?

8. (a) Na cava a vakaibalebaletaka o Paula ni uqeti ira mai Korinica mera “dolava vakalevu” na lomadra? (b) Na cava e rawa nida cakava me vakalevutaki kina na veilomani ena ivavakoso?

⁸ Me rawa nida veilomani vakalevu, ena gadrevi meda “dolava vakalevu” na lomada. A vola na yapositolo o Paula ina ivavakoso mai Korinica: “Keitou sa dolava tale ga na yalo i keitou vei kemuni. Keitou sa sega ni sogota na yalo i keitou vei kemuni.” A uqeti ira o Paula mera “dolava vakalevu” na lomadra. (2 Korinica 6:​11-13, VV) E rawa tale beka ga mo “dolava vakalevu” se vakarabailevutaka nomu dau lomani ira e so tale? Mo kua ni waraka sara mera torovi iko mai. Ena nona ivola vei ira mai Roma, e sema vata o Paula nona ivakasala kei na bibi ni veilomani: “Dou veiuasiviti e na veivakarokorokotaki.” (Roma 12:10) Dua na sala mo dokai ira tale kina e so, oya ena nomu vakaliuliu mo kidavaki ira ena soqoni. O rawa tale ga ni sureti ira mera tomani iko ena cakacaka vakaitalatala se na kena vakarautaki na ka e vulici ena soqoni. Na noda cakava oqo ena vakalevutaka na noda veilomani.

9. Na cava era cakava e so mera veivolekati kina kei na tacidra vakarisito? (Okata e so tale na ivakaraitaki ena ivavakoso.)

⁹ E rawa nira “dolava vakalevu” na lomadra na vuvale kei ira tale e so ena ivavakoso, ena nodra sikovi ira e so, se mera vakayagataka vata e dua na kakana lailai ga, kei na nodra vakaitavi vata ena ka ni veivakamarautaki e veiganiti. (Luke 10:42; 14:​12-​14) E dau tuvanaka vagauna o Hakop na vakatakakana kei ira e so. E kaya: “Era dau tiko kina na gone kei ira na qase, vaka kina o ira na itubutubu ledua. Era lesu kece ena mamarau, ra qai veivolekati cake sara.” Nida lotu Vakarisito, meda kua wale ga ni saga meda veitacini vakayalo ia meda veitokani dina.​​—⁠3 Joni 14.

10. Na cava e rawa nida cakava ke dredre noda veimaliwai?

¹⁰ Ia ena so na gauna, na ivalavala ca ena rawa ni vakadredretaka noda veitokani kei na noda veilomani. Na cava e rawa nida cakava? Kena imatai, e rawa nida masulaka meda veiyaloni kei ira na tacida. E loma ni Kalou mera veilomani na nona tamata, ena sauma gona kina na masu vaka oqori e vu mai lomada. (1 Joni 4:​20, 21; 5:​14, 15) Meda cakacakataka tale ga na ka eda masulaka. O Ric, e ivakatawa dauveilakoyaki mai na Tokalau kei Esia, e nanuma lesu e dua na tacida tagane e dau dredre me torovi ni dau veivakacudrui nona itovo. “Ena noqu sega ni via levea na tacida oqo, au mani nakita me keirau veikilai mada,” e kaya o Ric. “Au qai kila ni dau kaukaua sara toka nona veivakavulici na tama i koya na tacida oqo. Me tekivu mai oya, sa dua na ka noqu dau qoroi koya na tacida oqo, niu kila na nona sasaga me vorata na ivakarau ni bula e susu mai kina kei na veisau sa cakava rawa. Yaco sara me keirau veitokani dredre.”​​—⁠1 Pita 4:⁠8.

Dau Vakaraitaka na Lomamu!

11. (a) Na cava e gadrevi meda veilomani kina vakalevu ena ivavakoso? (b) Na cava e rawa ni veivakaleqai kina vakayalo na noda dau tawasei keda mai vei ira tale e so?

¹¹ Nikua ena nodra bula e levu, era sega ni bau saga mera veitokani kei na dua tale. Sa bau ka rarawataki dina! E sega ni dodonu me vaka oqo vei ira na lotu Vakarisito ena ivavakoso. E sega ni veilomani dina vakaveitacini na noda vosa vinaka wale ga se noda veirokovi; se vakaraitaka e matanalevu noda marautaka vakalevu e dua. Kena veibasai, meda dolava na lomada me vaka a vakayacora o Paula vei ira mai Korinica, da qai vakaraitaka vei ira na tacida vakayalo nida kauaitaki ira dina. E dina ni tamata kece e sega nira dau vinakata mera veimaliwai se dau vosa, ia e rawa ni veivakaleqai ke da dau galugalu tu ga da qai tawasei keda mai vei ira tale e so. Na ivakasala ena iVolatabu e kaya: “Ni sa tawasei koya tani na tamata, sa qara na ka e domona, a sa veivorati kei na vuku kece.”​​—⁠Vosa Vakaibalebale 18:⁠1.

12. Na cava e yaga kina me vinaka nodra veivosaki na veitokani ena ivavakoso?

¹² Na veivosaki vakadodonu e yaga sara ni rawati kina na veitokani dina. (Joni 15:15) Eda gadreva kece na itokani e rawa nida talaucaka vei ira na lomada kei na noda nanuma. Na levu tale ga ni noda veikilai kei ira tale e so ena vakarawarawataka tale ga noda vakacegui ira. Nida kauaitaka vaka oqo na veika era vinakata e so tale, eda sa veilomani tiko kina, eda na vakadinata tale ga na vosa i Jisu: “A ka ni veivakalougatataki vakalevu me soli ka, ka vakalailai ga me taura na ka.”​​—⁠Cakacaka 20:35; Filipai 2:​1-4.

13. Na cava e rawa nida cakava meda vakaraitaka kina nida lomani ira dina na tacida?

¹³ Me rawa ni vakilai na yaga ni noda veilomani, meda vakaraitaka votu. (Vosa Vakaibalebale 27:⁠5) Ena laurai e matada na noda loloma dina, e rawa sara ga ni vakauqeti ira e so tale. E kaya e dua na vosa vakaibalebale ena iVolatabu: “A rarama ni mata sa marau kina na loma ni tamata.” (Vosa Vakaibalebale 15:30) Na ivalavala e yalomatuataki ena vakauqeta tale ga na veilomani. E dina ni sega ni dua e rawa ni volia na veilomani dina, ia na iloloma e soli mai vu ni lomada e rawa ni yaga sara. Ke dua mada ga na card, ivola, kei na ‘vosa taudonu’​​—⁠na ka kece oqo e rawa ni ivakaraitaki ni veilomani. (Vosa Vakaibalebale 25:11; 27:⁠9) Nida sa tekivu veitokani kei ira tale e so, meda taqomaka dei ena noda dau veilomani. Vakauasivi ena gauna ni leqa, eda na via vukei ira sara ga noda itokani. E kaya na iVolatabu: “Sa loloma tiko e na veigauna kece na wekana na tamata, ka sa vaka na tacina e na gauna ni rarawa.”​​—⁠Vosa Vakaibalebale 17:⁠17.

14. Na cava e rawa nida cakava ke dua eda sega ni veitokani vinaka sara?

¹⁴ Ena yasana kadua, e sega ni rawa nida volekati ira kece na tacida ena ivavakoso. Ena tiko beka ga o ira eda veivolekati sara. Koya gona ke dua drau sega ni veitokani vinaka sara me vaka o vinakata, kua ni totolo nomu tukuna ni dua na ka e leqa tiko vua se vei iko. Kua tale ga ni suguraka mo drau veitokani voleka. Ke drau sa bau veikilai toka, ena vukea oqo me tadola tiko ga kina na sala ni nomudrau veitokani ena gauna mai muri.

“Au sa Dauvinakati Iko Vakalevu”

15. E cakayaco vakacava vei ira tale e so na veivakacaucautaki, ia vakacava ke sega ni dau yaco oqori?

¹⁵ Sa na dua na ka mada ga nona marau o Jisu ena gauna e papitaiso kina, ni rogoca na domo mai lomalagi: “Au sa dauvinakati iko vakalevu”! (Marika 1:​11) Na nona veivakadonui oqo na Kalou e rairai vakadeitaka sara ga nona vakabauta o Jisu ni lomani koya dina o Tamana. (Joni 5:​20) Ka ni rarawa, ni so era sega ni dau rogoca na vosa ni veivakacaucautaki vaka oqo vei ira era doka ra qai lomana. E kaya o Ann: “Levu na gone vakataki au e duidui neimami vakabauta vei ira na vo ni neimami vuvale. Keimami dau vakalewai ga vakalevu. E dau vakararawataki keimami sara ga.” Ia nira yaco mera lewe ni ivavakoso, era vakila na veilomani ena vuvale vakayalo e dau veitokoni qai veikauaitaki ​​—⁠na tamadra kei na tinadra, na tacidra kei na ganedra ena vakabauta.​​—⁠Marika 10:​29, 30; Kalatia 6:​10.

16. Na cava e sega ni vinaka kina na nodra sega ni vakacaucautaki e so tale?

¹⁶ Ena so na vanua, e dau vakavudua nodra vakacaucautaki ira na itabagone o ira na itubutubu, o ira na qase, kei ira na qasenivuli ena nodra nanuma nira na vakawelewele kina se ra dokadoka. Na vakasama vaka oqo e rawa ni tara tale ga na vuvale vakarisito kei na ivavakoso. Oqo na ka e rawa nira kaya na qase cake ena nodra vakavinavinakataka na itavi se so tale na ka: “Totoka sara oya, ia e rawa ni vinaka cake!” Se ena dua tale na kena itautau era na vakaraitaka beka nodra sega ni taleitaka na ka e cakava e dua na gone. Era vakabauta e levu ni kena vakayacori oqo sa uqeti ira sara tiko ga na gone mera solia nodra vinaka kece. Ia e vakawasoma me veibasai na ka e sotavi kina, ni rawa nira tuvakasuka na gone se nanuma nira sega ni yacova na ivakatagedegede e vinakati.

17. Na cava meda qara kina na sala meda vakacaucautaki ira kina e so tale?

¹⁷ Ia me kua ni tauci na veivakacaucautaki me rawa kina ni qai sala muria na veivakasalataki. Na veivakacaucautaki dina e vakalevutaka na veilomani ena vuvale kei na ivavakoso, qai uqeti ira na itabagone mera qara ivakasala vei ira na tacida tagane kei na yalewa era matua cake. Me kua gona ni vakatau ena noda itovo vakavanua noda kauaitaki ira e so tale, ia meda “vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.” Meda veivakacaucautaki me vakataki Jiova.​​—⁠Efeso 4:​24.

18. (a) Ra itabagone, mo ni raica vakacava na nodra ivakasala na qase cake? (b) Na cava na vuna era qarauna kina na qase na ivakarau ni nodra veivakasalataki?

¹⁸ Ena yasana kadua, mo ni kua ni nanuma na itabagone ni nodra veivakadodonutaki se ivakasala na qase cake e vakaraitaka na nodra cati kemuni. (Dauvunau 7:⁠9) Kena veibasai! De dua e uqeti ira na nodra kauai kei na nodra loloma dina. Ke sega, na cava ga era kauai kina mera vosa vei kemuni me baleta na ituvaki e sotavi? Na nodra kila na qase cake, vakauasivi o ira na qase ni ivavakoso na kena cakayaco na vosa, era dau tikica vakalevu kina na gauna mera vakasamataka ra qai masulaka na veika mera kaya ni bera nira veivakasalataki, baleta ni nodra inaki mera caka vinaka.​​—⁠1 Pita 5:⁠5.

“Sa Yalovinaka Sara” o Jiova

19. Na cava mera qara kina na veivukei i Jiova o ira e vakararawataki na lomadra?

¹⁹ Nira dau sotava e so na veika rarawataki ena vuku ni nodra dauveikauaitaki, era sa nanuma kina e so mera sa kua tale ni vakaraitaka na loloma vaka oqori baleta ni na kuria ga na nodra rarawa. Ena gadrevi vei ira na yaloqaqa kei na vakabauta kaukaua me rawa nira dolava tale kina na lomadra vei ira tale e so. Ia mera kua ni guilecava ni o Jiova e ‘sega ni yawa vei keda yadua.’ E sureti keda meda toro voleka vua. (Cakacaka 17:27; Jemesa 4:⁠8) E kila tale ga na mosi ni lomada, qai yalataka ni na tokoni keda qai vukei keda. E vakadeitaka vei keda na daunisame o Tevita: “Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.”​​—⁠Same 34:⁠18.

20, 21. (a) Eda kila vakacava ni rawa nida veivolekati kei Jiova? (b) Na cava e gadrevi meda veivolekati kina kei Jiova?

²⁰ Na veiwekani yaga duadua e rawa nida bucina oya na noda veitokani vakavoleka kei Jiova. Ia e rawa beka nida veivolekati kei koya? Io. E tukuna na iVolatabu na nodra veivolekati kei na Tamada vakalomalagi na tagane kei na yalewa yalododonu. Na veika era kaya e maroroi tu meda nuidei kina ni rawa tale ga nida toro voleka vei Jiova.​​—⁠Same 23, 34, 139; Joni 16:27; Roma 15:⁠4.

²¹ O keda kece e rawa nida sauva na ka e gadreva o Jiova meda veivolekati kina kei koya. “I Jiova, o cei ena tiko e na nomuni vale?” a taroga o Tevita. “O koya sa lako vakadodonu, ka kitaka nai valavala dodonu, ka vosa dina tiko mai na vu ni yalona.” (Same 15:​1, 2; 25:14) Na noda sotava na ka vinaka, na noda tuberi kei na noda taqomaki ena noda qarava na Kalou e vakadeitaka ni “sa yalovinaka sara” o Jiova qai “dauloloma.”​​—⁠Jemesa 5:​11.

22. Na veiwekani cava e vinakata o Jiova mera marautaka na nona tamata?

²² Sa dua na ka marautaki ni vinakata o Jiova me veiwekani vakavoleka kei ira na tamata ivalavala ca! Sega beka ni dodonu meda dau veilomani tale ga? Ena veivuke i Jiova, e rawa vei keda kece meda vakaraitaka da qai marautaka na veilomani e ivakatakilakila ni mataveitacini vakarisito. Ena veiliutaki ni Matanitu ni Kalou, o ira kece na bula e vuravura era na dau veilomani me tawamudu.

Vakamacalataka Mada

• Na ituvaki cava me laurai ena ivavakoso vakarisito?

• E rawa vakacava vei keda yadua meda vakalevutaka noda dau veilomani ena ivavakoso?

• Ena uqeta vakacava na veilomani vakarisito na veivakacaucautaki dina?

• E tokoni keda vakacava na nona dau loloma o Jiova?

[iYaloyalo ena tabana e 15]

Era sega ni raica na lotu Vakarisito na veilomani me vaka e dua ga na itavi

[iYaloyalo ena tabana e 17]

O rawa beka ni “dolava vakalevu” na lomamu mo dau veilomani?

[iYaloyalo ena tabana e 18]

O dau vakalelewa se dau veivakacaucautaki?