Na Cau e Vakamarautaka na Kalou

OQO e sega soti ni italanoa vinaka. A taura vakaukaua o Ranadi Acalaia na veiliutaki vakatui e Juta ni lawaki qai laba. Nona nanuma cala nira sa mate kece na kawa vakatui sa qai buli koya ga me Ranadi. Ia e dua tale na marama, o Raluve Jiosepa, e dau lomani Jiova qai taleitaka nona Lawa, ena yalodoudou e vunitaka kina e dua na gone e kawa vakatui, o Joasi. A vunitaki Joasi tiko ena valenisoro me yabaki ono o Jiosepa kei na watina o Jioiata, na Bete Levu.—⁠2 Tui 11:1-3.

Na gauna sa yabaki vitu kina o Joasi, sa tu vakarau na Bete Levu o Jioiata, me vakayacora na ka e sa vakasamataka voli mai, oya me vakasivoi koya na Ranadi oqo ni a taura vakatawadodonu na veiliutaki vakatui. Sa qai vakaraitaka na gone a vunia tiko, mani bulia sara me tui dina ni matanitu oya. O ira na ivakatawa ni tui era kauti koya laivi vakaukaua na Ranadi ca o Acalaia ena taudaku ni valenisoro, ra qai vakamatea, ra lomavakacegu ra reki tale ga kina na tamata. Ena vuku ni ka erau cakava o Jioiata kei Jiosepa erau vukea sara ga vakalevu na kena vakalesui na sokalou dina i Juta. Koya e bibi sara oya ni rau vukea me tomani tiko ga na iyatukawa vakatui i Tevita, ena basika kina na Mesaia.—⁠2 Tui 11:4-21.

E tiko tale ga na ka me cakava na tui vou oqo me vakamarautaka kina na Kalou. Sa gadrevi sara tu ga vakalevu me vakavinakataki na vale i Jiova. Na nona kocokoco o Acalaia me veiliutaki taudua e sega wale ga ni vakavuna me sega ni qaravi vinaka na valenisoro, ia e vakavuna tale ga na kena butakoci. E gu gona na loma i Joasi me vakavinakataka qai vakaduria tale na valenisoro oya. Sega ni bera sa vakarota me soqoni na ilavo e gadrevi me vakavinakataki kina na vale i Jiova. E kaya: “Nai lavo kecega ni veika sa vakacabori ka sa kau mai ki na vale i Jiova, io nai lavo ni tamata yadua sa wili, nai lavo sa lewai e na vuku ni yalona na tamata yadua, kei nai lavo kecega sa lomadra na tamata yadua me ra kauta ki na vale i Jiova, me ra dui taura ko ira na bete maivei ira na wekana: ia me ra vakavinakataka na veitiki ni vale kecega era sa kunea ni sa kabasu.”—⁠2 Tui 12:4, 5.

Era lomasoli na lewenivanua ena cau. Ia, o ira na bete e sega ni lomadra taucoko na cakava nodra cakacaka me vakavinakataki kina na valenisoro. Mani nanuma kina na Tui me sa na qarava sara ga o koya, a qai vakarota me biu na cau kece ena dua na kena kato e vakarautaki. E lesi Jioiata me raica, qai tukuni ena kena itukutuku: “A sa kauta e dua na kato ko Jioiata na bete, ka vakacicilataka e dua na tikina e na kenai sogo, ka viritura voleka ki nai cabocabo-ni-soro, e na nodrai matau na tamata ni ra sa curu ki na vale i Jiova: ka sa viritaka kina ko ira na bete era vakatawa na katuba nai lavo kecega sa kau ki na vale i Jiova. Ia ni rau sa raica na nona vu-ni-vola na tui, kei koya na bete levu, ni sa levu nai lavo e na kato, erau sa lako cake ka tagana, ka wilika nai lavo sa kune e na vale i Jiova. Ia ni sa wili nai lavo, erau sa solia vei ira era sa kitaka na cakacaka, ko ira sa lesi me lewa na vale i Jiova: a ra sa saumi ira kina na matai ni kau kei ira na matai ni vatu, era sa kitaka tiko na vale i Jiova, vei ira talega na dauviri bai, kei ira na dauta vatu, ka me voli kina na kau kei na vatu sa ta oti, me vakavinakataka na veitiki ni vale i Jiova sa kabasu, ka me voli talega kina na ka kecega sa yaga me vakavinakataki kina na vale.”—⁠2 Tui 12:9-12.

Era duavata kece kina na lewenivanua. Sa vakavinakataki na vale i Jiova me rawa ni tomani tale kina na sokalou ena ivalavala e rakorako. E vakayagataki gona vakavinaka na cau kece. E raica sara ga o Tui Joasi me caka vaka kina!

Nikua, e raica tale ga na isoqosoqo rairai i Jiova me vakayagataki vakavinaka na cau kece me vakatetei kina nona sokaloutaki o Jiova, e tautauvata sara ga na ka era cakava na lotu Vakarisito dina kei ira na Isireli makawa​—ni vu sara ga mai lomadra nodra cau. De dua o a cau ena kena vakatetei na itukutuku ni Matanitu ni Kalou ena yabaki vakacakacaka sa oti. Da raica mada oqo e so na sala e sa vakayagataki tiko kina na nonumi cau.

iVOLA E TABAKI

Era taba na ivola oqo me caka kina na vuli iVolatabu, me veisoliyaki tale ga e vuravura raraba:

• iVola: 47,490,247

• iVola Lalai: 6,834,740

• Brochure: 167,854,462

• iVolanivula: 5,405,955

• iVoladraudrau: 1,179,266,348

• iVolacebaceba: 440,995,740

• Vidio: 3,168,611

E tabaki na ivola mai Aferika, ena Vualiku, Loma, kei Sauca Amerika, Esia, Urope, kei na so na yanuyanu ena Pasifika—⁠e 19 taucoko na vanua.

“Na yacaqu o Katelyn May. Au yabaki walu. Oqo e $28, au vinakata mo ni taura me veivuke ena saumi ni misini ni tabaivola. Tacimuni gone, Katelyn.”

“Keitou veivosakitaka vakavuvale na misini ni tabaivola vovou. E rua na luve i keirau, e dua e yabaki 11 dua tale e yabaki 9, rau nanuma me rau cautaka na nodrau ilavo e dau maroroi tu. Keirau marau ni solia yani na nodrau cau vata kei na neirau tale ga.”

TARAVALE

Oqo e so na vale era tara me tokoni kina na nodra cakacaka na iVakadinadinai Jiova:

• Kingdom Hall ena vanua dravudravua: 2,180

• Assembly Hall: 15

• Valenitabana: 10

• Bolecakacaka raraba (international volunteers) era veiqaravi

vakatabakidua: 2,342

“Na muanimacawa oqo e se qai imatai ni gauna me keimami soqoni kina ena neimami Kingdom Hall vou. Dua na ka na neimami marau ni sa dua na vanua vinaka me keimami vakacaucautaka kina na Tamada, o Jiova na Kalou. Keimami vakavinavinaka vei Jiova, vei kemuni tale ga, ni oni kauaitaka na neimami gagadre ena nomuni tara e levu tale na Kingdom Hall. E vakasakiti dina na neimami Kingdom Hall ena vanua keimami tiko kina.”—⁠Chile.

“Era vakavinavinaka vakalevu na mataveitacini ena veivuke e solia na isoqosoqo i Jiova. Keimami se dau veitalanoataka tu ga oqo na gauna keimami a marautaka vata kei ira na lewe ni timi ni taravale.”—⁠Moldova.

“Keirau se qai marautaka ga kei watiqu na ivakananumi ni ika35 ni yabaki ni neirau vakamau. Keirau a vakasamataka tiko na ka me keirau dui volia me baleta na siga oqori, keirau mani nanuma me keirau solia lesu vei Jiova kei na nona isoqosoqo e dua na ka, ni a vukei keirau me keirau marautaka na neirau bula vakawati. Keirau na marautaka ke vakayagataki na ilavo sa vakacurumi tiko yani oqori ena tara ni Kingdom Hall ena dua vei ira na vanua dravudravua.”

“Au se qai taura wale ga oqo e dua na noqu ivotavota ilavo, ia me vaka ni sega soti ni levu na ka au ‘gadreva’ se meu ‘vinakata,’ au marautaka na vakauta yani na ilavo oqori me vukea na tara ni Kingdom HalI era gadrevi sara tu ga ena levu na vanua.”

VEIVUKE NI YACO NA LEQA TUBUKOSO

Ena iotioti ni veisiga eda sa bula donuya tu oqo, e dau yaco vakidacala na leqa tubukoso. E levu gona na iVakadinadina i Jiova era dau cau vakalevu mera vukei kina na tacidra ena vanua e yaco kina na vakacaca. Me nanumi tiko ni cau me baleta na leqa tubukoso e raici me vaka e tiki ni cakacaka e vakayacori e vuravura raraba. Oqo e so na vanua era veivuke kina na iVakadinadina i Jiova vei ira na vakaleqai:

• Aferika

• Esia

• Yasaysa vaka Caribbean

• Yatuyanuyanu ena Pasifika

“Keirau via vakavinavinaka yani kei watiqu ena nomuni vakauta mai e so na iyaya ni vakacoko ni oti na cagilaba. Bau rawa kina ni vakavoui na delavuvu ni neirau vale a vakacacani. Keirau vakavinavinakataka vakalevu na totolo ni nomuni veivuke.”

“Na yacaqu o Connor, au yabaki 11. Gauna au raica kina na vakacaca a yaco ena ualoka, au via veivuke sara ga. Au nuitaka nira na vukei na mataveitacini ena noqu cau oqo.

DAUVEIQARAVI VAKATABAKIDUA

E so na lotu Vakarisito era veiqaravi vakatabakidua ena cakacaka vakaitalatala se ra cakacaka e Peceli. So vei ira na bole mera cakacaka vakatabakidua era vukei sara ga ena cau. E so vei ira oqo:

• Daukaulotu: 2,635

• iVakatawa dauveilakoyaki: 5,325

• Cakacaka e Peceli: 20,092

“Niu se sega ni rawa ni veiqaravi e Peceli ena gauna oqo [gonetagane yabaki lima], au via vakauta yani na cau oqo ena levu ni noqu loloma. Au na lako i Peceli niu sa qase meu lai cakacaka kina vakaukau.”

Vakatetei na Vakavulici ni iVolatabu

E lesi ira nona imuri o Jisu Karisito mera ‘qisi ira mera tisaipeli na lewe ni veivanua kece ga.’ (Maciu 28:19, VV) Era talairawarawa na iVakadinadina i Jiova ina nona vosa oqori, ra qai ogaoga ena cakacaka vakavunau kei na veivakavulici ena iVolatabu ena 235 na vanua. Era tabaka ra qai veisoliyaka na ivola vakaivolatabu ena 413 na vosa.

Ia, na cau uasivi duadua e rawa ni solia e dua na lotu Vakarisito, oya na nona gauna me vukei ira kina e levu tale mera kila na Kalou kei na Nona inaki. Era vakayagataka vakalevu na iVakadinadina i Jiova na nodra gauna kei na nodra kaukaua mera vukei kina e so tale. Era lomasoli tale ga na cautaka na ilavo, qai vakayagataki na nodra cau kece, ena sala cava ga era cau kina, me vukei na kena vakatakilai na yaca i Jiova kei na nona inaki e vuravura raraba. Me vakalougatataka mada ga o Jiova na sasaga oqo mera vukei kina e so tale mera vulica e levu na ka me baleti koya. (Vosa Vakaibalebale 19:17) E vinakata dina o Jiova na soli ka vaka oqori!—⁠Iperiu 13:15, 16.

[Kato ena tabana e 28-30]

Sala Era Bolea Kina E So Mera Soli Ka

CAU INA CAKACAKA E VURAVURA RARABA

Levu era vakatikitikitaka e dua na iwase ni ilavo mera biuta ina katonicau e vakatokai “iSolisoli ena Cakacaka e Vuravura Raraba​​—⁠Maciu 24:14.”

Era dau vakauta e veivula na ilavo oqo na ivavakoso yadua ina valenivolavola ni iVakadinadina i Jiova ena nodra dui vanua. Na ilavo e cautaki e rawa ni vakau sara ga vakadodonu ina Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, se ina valenivolavola ni tabana ni iVakadinadina i Jiova ena nomu vanua. Na jeke e vakau ina itikotiko e volai toka e cake me volai kina na “Watch Tower.” E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.

CAU E TIKO NA KENA VEIDINADINATI

E rawa ni cautaki na ilavo ina Watch Tower ena dua na veidinadinati me vakayagataki e vuravura raraba, ia ena suka tale vua e cau ke mani gadreva. Me baleta e so tale na ivakamacala, yalovinaka qai veitaratara kei na Treasurer’s Office ena itikotiko e volai toka ena imawi.

SOLI KA E LALAWATAKI

Me ikuri ni kena cautaki vakadodonu na ilavo kei na cau ni veidinadinati, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:

Inisua: E rawa ni volai vua na Watch Tower Society na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni dau tauri tu ga vakawawa ena vuku ni Watch Tower Society, se me qai soli me taukena na Watch Tower Society ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa me dau soli na stock kei na bond ina Watch Tower Society me dua na cau taucoko.

Qele kei na Vale: E rawa me soli vakadua na qele se na vale se, e rawa tale ga me caka e dua na veiyalayalati me se tei tawana tiko mada ga na qele se vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.

Will kei na Trust: E rawa ni soli na iyau se na ilavo ina Watch Tower Society ena kena tabaki e dua na will, se na rawa ni vagolei ina Watch Tower Society na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi na kena vagolei na trust ina dua na isoqosoqo vakalotu.

Na cau vaka oqo era vakatokai mera “soli ka e lalawataki,” e kena ibalebale ni soli ka vaka oqo e dodonu me lalawa sara ga kina vakavinaka o koya e via soli ka. Me vukei ira na via soli ka ina cakacaka ni iVakadinadina i Jiova e vuravura raraba ena sala vaka oqo, sa vakarautaki kina e dua na ivola lailai vakavalagi kei na kena vakasipeni e vakatokai na Charitable Planning to Benefit Kingdom Service Worldwide. E volai na ivola oqo me baleta e so na sala ni soli ka vakailoloma ena gauna sara ga oqo, se me qai soli ena gauna sa mate kina e dua. Nira wilika na ivola lailai oqo ra qai veitaratara kei na nodra dui daunivakasala ni lawa se ivakacavacava, era le levu era sa veivukei ena nodra cakacaka vakalotu kei na nodra veivukei na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E rawa ni kerei na ivola lailai oqo ina Charitable Planning Office.

Ena so tale na ivakamacala, e rawa ni o veitaratara kei na Charitable Planning Office, e rawa ni o volavola ina itikotiko se qiri ina talevoni e toka oqo e ra, se veitaratara kei na valenivolavola ni iVakadinadina i Jiova ena nomu vanua.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[iTaba ni Credit Line ena tabana e 27]

Faithful video: Stalin: U.S. Army photo