Tukuna Tiko ga na Cakacaka Veivakurabuitaki i Jiova
1. Na cakacaka veivakurabuitaki cava soti i Jiova o taleitaka?
1 E sega ni dua e rawa ni vakatauvatani kei na Kalou o Jiova! E vola kina o Tevita: “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami: e dredre me wiliki vakadodonu vei kemuni.” (Same 40:5) E okati ena cakacaka veivakurabuitaki i Jiova na buli ni vuravura, na Matanitu ni Kalou e kena Tui na Mesaia, na nona dau tokoni ira vakayalololoma na nona tamata, kei na cakacaka vakavunau e vuravura raraba. (Same 17:7, 8; 139:14; Tani. 2:44; Maciu 24:14) Na noda lomani Jiova kei na noda vakavinavinakataka na veika kece e sa cakava vei keda, e uqeti keda kina meda tukuni koya yani. (Same 145:5-7) Eda rawa ni cakava vakalevu oqo ena vula o Maji, Epereli, kei na Me.
2. Ena yaga vakacava vei keda na noda painia veivuke?
2 Painia Veivuke: E rawa beka ni dua na nomu ituvatuva mo rawata kina e 50 na aua ena cakacaka vakavunau ena dua vei iratou na tolu na vula lavotaki oqo? Ena yaga vakalevu vei iko mai na so tale na ituvatuva o dau cakava. (Efeso 5:16) E levu era raica ni vinaka cake na iwalewale ni nodra cakacaka vakavunau nira dau painia veivuke. Sa vaka me dau matau vei ira na cakacaka e veivale ra qai matau tale ga na vakayagataka na iVolatabu. Na levu ni gauna era cakacaka vakaitalatala kina, e dau totolo na nodra sikovi ira na tataleitaki, o ira tale ga na sega tu nodra vuli iVolatabu era tauyavutaka rawa e dua nira pania veivuke. E cakacaka marautaki na painia veivuke baleta ni o soli iko kina vakalevu mo vukea e so tale.—Caka. 20:35.
3. Era painia vakacava e so ena ituvaki dredre mada ga era tu kina?
3 Mo kua ni nanuma ni o na sega ni painia veivuke rawa baleta na kemu ituvaki. E dua na qase a painia veivuke ena yabaki sa oti, e rua na luvena qai cakacaka saumi. E painia rawa vakacava na tacida osooso oqo? Ni cakacaka saumi tiko, e dau lalawataka me levu cake nona aua ena muanimacawa, ia me tekivu nona vunau ena salatu ena 7:00 ena mataka ni Vakarauwai. E le vica toka ena ivavakoso oya era cakacaka ra qai painia tale ga, era dau veitokoni ra qai veivakayaloqaqataki. Ena dua tale na ivavakoso, a nakita me painia ena vula o Me e dua na tacida yalewa e sa yabaki 99 ni a sureti koya na luvena yalewa me rau painia vata. Era vukei koya tale ga e so ena ivavakoso ena nodra dau kauti koya ena dabedabe qiqi nira lako e veivale, kei na caka vuli iVolatabu. E dau vunau tale ga ena talevoni, ena salatu, qai dau volavola. E vakadeitaka na marama oqo ni sega ni rawata ena nona kaukaua, ena veivuke ga i Jiova.—Aisea 40:29-31.
4. Cava meda vakasamataka nida vakarautaka tiko e dua na noda ituvatuva ni painia veivuke?
4 Tovolea mo vola e dua na ituvatuva e ganiti iko ga. E rawa ni vukei iko na ituvatuva e tabaki koto ena ilavelave oqo. O cakacaka saumi tiko beka, se o vuli tiko? Ena rawa ni yaga vei iko na ituvatuva ena muanimacawa. Ke o tautauvimate qai sega ni rawa mo vunau vakabalavu, ena vinaka ke dua nomu ituvatuva ena nomu cakacaka ga vakalalai ena veisiga. Veitalanoataka kei ira e so tale na nomu gagadre ni via painia veivuke. Ena rawa tale ga ni uqeti ira mera cakava vaka kina.
5. Na isausau cava e rawa nira sauva na itabagone ena vula o Maji, Epereli, kei na Me?
5 Rawa Nira Vakaitavi Tale ga na iTabagone: E marautaka o Jiova nira tukuna na itabagone na nona cakacaka veivakurabuitaki. (Same 71:17; Maciu 21:16) Ke o gone, o sa papitaiso, o rawa ni painia veivuke ena sereki ni vuli. Ke sega, e rawa beka ni o saga mo vakaitavi vakalevu qai vakavinakataka na nomu cakacaka vakavunau ena vula oqo? Ke o sa dau cakacaka tiko vakavunau kei rau na nomu itubutubu, ia o se sega ni dautukutuku bera ni papitaiso, e gauna vinaka sara ga oqo mo cakava vaka kina. E sega ni kena ibalebale oqo mo sa kenadau sara ga ena sauma na taro vakaivolatabu, se tu vei iko na kila e tu vei ira na uabula era sa papitaiso. O kila na yavu ni ivakavuvuli vakaivolatabu? O dau muria na ivakavuvuli vakaivolatabu? O vinakata mo kilai ni o dua vei ira na iVakadinadina i Jiova? Tukuna vei rau na nomu itubutubu. Erau rawa ni veivosakitaka mo dou raici iratou na qase me laurai kina ke o sa rawata na veika e gadrevi.—Raica na ivola Cokonaki, tabana 98-9.
6. Eda vukei ira vakacava na vuli iVolatabu mera kacivaka tale ga na itukutuku vinaka?
6 Vukei ira Tale E so Mera Vunau: O ira na vuli iVolatabu e sa toso vinaka tiko na nodra vuli, e rawa nira mai tomani keda na dautukutuku ena vula lavotaki oqo. Ke tiko e dua na nomu vuli iVolatabu e sa toso vinaka tiko, kerea na nona veivuke na nomu ivakatawa ni vulivola se o koya na ivakatawa ni cakacaka. E rawa ni mai tomani iko ena vuli iVolatabu e dua vei rau me rau kila kina na ivakatagedegede ni kilaka i gonevuli. Ke sa rawata o gonevuli na kena ivakatagedegede qai vinakata tale ga me dua na dautukutuku bera ni papitaiso, me tuvanaka na ivakatawa ni cakacaka e rua na qase me raici koya na gonevuli. (Raica The Watchtower, 15 Noveba, 1988, tabana 17.) Ke sa vakadonui, kauti koya sara ena cakacaka vakavunau.
7. Era na vukei vakacava na dautukutuku mate kei na dautukutuku vakavudua?
7 E dodonu vei ira na ivakatawa ni vulivola mera uqeti ira na dautukutuku mate se o ira na dautukutuku vakavudua ena nodra iwasewase. Mera sureti ira sara ga mera cakacaka vata vakavunau. Ia ke sa dede tu na nona dautukutuku mate, e vinaka me raici koya e rua na qase me kilai kina se rawa ni cakava tale na cakacaka oqo se sega. (Raica na Noda Cakacaka Vakaitalatala, Noveba 2000, Kato ni Taro.) Na gugumatua ni ivavakoso ena vula lavotaki oqo e rawa ni uqeti ira na dautukutuku mate me tiki tale ni nodra bula na cakacaka vakavunau.
8, 9. Cava mera cakava na qase mera veiuqeti kina ena vula lavotaki oqo?
8 Me Vakayacori Sara ga na Vakavakarau: Mera uqeta rawa tiko na ivavakoso o ira na qase ena cakacaka vakapainia veivuke ena gauna sara ga oqo. Mo ivakaraitaki sara ga ena nomu vakamacala veiuqeti, kei na nomu ivakaraitaki vinaka. (1 Pita 5:3) Cava na iwiliwili levu duadua ni painia veivuke e sa bau yacova na ivavakoso? E rawa beka ni levu sara ena yabaki oqo? Mera qara na sala mera veiuqeti kina na ivakatawa ni vulivola kei na nodra ivukevuke ena nodra vakalevutaka kece na lewe ni wasewase na nodra cakacaka. E rawa ni tuvana na ivakatawa ni cakacaka e so tale na gauna ni cakacaka vakavunau. Tukuna rawa e liu ena ivavakoso na veika e sa tuvanaki tu. Me liutaka ga na cakacaka na tacida matua e sa lesi, me tekivu qai cava tale ga na soqoni ni cakacaka vakavunau ena gauna e tuvanaki kina. (Raica na Noda Cakacaka Vakaitalatala, Sepiteba 2001, Kato ni Taro) Me raica tale ga na ivakatawa ni cakacaka me levu na yalava, na ivoladraudrau, kei na ivola vakaivolatabu.
9 Ena yabaki sa oti, o ira na qase ena dua na ivavakoso era vakavakarau rawa ni bera na vula lavotaki ena nodra uqeti ira na ivavakoso mera painia veivuke, e so tale ga vei ira na qase era vakalewena na kena fomu. Era tuvana e so tale na soqoni ni cakacaka vakavunau—dua na cakacaka ena salatu ena 5:30 ena mataka lalai, dua tale na 3:00 ena yakavi vei ira na suka mai na vuli, kei na dua tale ena 6:00 ena yakavi vei ira na suka ena cakacaka. E tolu tale ga na gauna e tuvani kina na cakacaka vakavunau ena siga Vakarauwai. E 66 taucoko era painia veivuke ena vula o Epereli ena ivavakoso oya!
10. Sala cava e rawa nira vakalevutaka kina na nodra cakacaka vakavunau na vuvale?
10 Ena nomudou vuli tarava vakavuvale, vakacava mo dou tuvana kina na nomudou ituvatuva ena tolu na vula lavotaki oqo? Ke ra veitokoni vinaka na vuvale qai dua tale ga na nodra ituvatuva vinaka, era rawa ni painia veivuke kece na lewena se so vei ira. Ke sega ni rawa oya, tuvanaka ga mo vakalevutaka na nomu cakacaka vakavunau, se mo vunau vakalevu. Dou masulaka vata vakavuvale. Nuidei ni na vakalougatataka o Jiova na nomudou sasaga.—1 Joni 3:22.
11. (a) Na ka totoka cava e mai rawati ena mate i Karisito? (b) Gauna cava kei na vanua cava ena caka tiko kina na iVakananumi?
11 Cakacaka Veivakurabuitaki ni Kalou: Na loloma levu i Jiova oya na nona solia mai na Luvena me keda ivoli. (1 Joni 4:9, 10) Na isoro ni veivoli oqo e yavu sara ga ni noda vakabulai na kawatamata mai na ivalavala ca kei na mate. (Roma 3:23, 24) Na kena mai dave na dra i Jisu e mai vakadeitaki kina na veiyalayalati vou, sa rawa kina vei ira na tamata ivalavala ca mera okati mera luve ni Kalou, mera na lai veiliutaki ena Matanitu vakalomalagi. (Jere. 31:31-34; Mari. 14:24) O koya e bibi, na nona mai talairawarawa o Jisu e mai vakacerecerei kina na yaca i Jiova. (Vkru. 32:4; Vkai. 27:11) Ena Sigatabu, 4 Epereli, ni sa dromu na matanisiga, ena Vakananumi ena vuravura raraba na mate i Karisito.
12. Ena vukei ira vakacava na tataleitaki na nodra mai tiko ena iVakayakavi ni Turaga?
12 E vakacerecerei na cakacaka veivakurabuitaki i Jiova ena iVakananumi ni iVakayakavi ni Turaga. Ena veiuqeti na vunau ena ka e cakava o Jiova me vakarautaka mai kina na isoro ni veivoli. Era na mai kila tale ga o ira na tataleitaki era tiko ena soqo oqo e so tale na cakacaka veivakurabuitaki ni Kalou. Era na raica na duavata kei na loloma e vakavulici ira kina na nona tamata o Jiova. (Efeso 4:16, 22-24; Jeme. 3:17, 18) O ira na tiko ena soqo bibi oqo ena cakayaco sara ga ena nodra vakasama, eda vinakata gona kina me levu sara e sureti.—2 Kor. 5:14, 15.
13, 14. O cei soti meda sureta ena iVakananumi, ena sala cava?
13 Veisureti: Vola rawa oqo na yacadra o na sureta. Rawa ni o okata kina na yacadra na wekamu era sega ni vakabauta, o ira na tiko tikivi iko, o ira nomu itokani e cakacaka se koronivuli, o ira o dau vakavulici ira tu e liu ena iVolatabu, vaka tale ga kina o ira na nomu vuli iVolatabu ena gauna oqo, kei ira kece na nomu veisikovi lesu. O ira na ivakatawa ni vulivola mera vola na yacadra na dautukutuku mate.
14 Mo vola vakavinaka se taipataka ena ivola ni veisureti na gauna kei na vanua ena caka tiko kina na iVakananumi. E rawa tale ga ni o vakayagataka na kena e tiko ena tabana sara e muri ni Vale ni Vakatawa, 15 Maji, 2004, se Awake!, 22 Maji, 2004. Ni sa toro voleka tiko mai na 4 Epereli, mo lai vakadreti ira kece tale na sureti, e rawa ni o lako sara ga vei ira se talevoni ga.
15. Sala cava meda vakaraitaka kina noda veikauaitaki ena bogi ni iVakananumi?
15 Ena Siga ni iVakananumi: Tovolea mo yaco totolo yani ena bogi ni iVakananumi. Mo vakaliuliu ena nomu kidavaki ira na ka vou. (Roma 12:13) E bibi na nomu itavi vei ira o sureta. Kidavaki ira vakayalololoma, qai veikilaitaki ira vei ira na mataveitacini ena ivavakoso. Raica mo drau dabe veivolekati. Ke sega na nodra iVolatabu se ivolanisere, wasea na nomu vei ira, se dua tale na mataveitacini. Ni sa oti na iVakananumi, tu vakarau mo sauma na nodra taro. Ke so era se qai lako yani vakadua, tarogi ira se ra via vulica e levu tale na ka me baleta na Vosa ni Kalou kei na nona inaki. Sureta sara mo dou vuli iVolatabu vata.
16. Cava me caka mera vukei kina o ira na tiko ena iVakananumi mera toso vakayalo?
16 Vukei Ira Tiko ga: Na macawa ni oti na iVakananumi, era na gadreva tiko ga na veivuke o ira na tiko ena soqo oqo. Okati e ke o ira na dau tiko wasoma e liu ena soqoni, ia e sa dau vakavudua nodra lako mai. Mera raica na qase mera kua ni calati o ira oqo, ena nodra vaqaqa na vuna era sa sega kina ni toso vakayalo. Mera qai uqeti ena lekaleka ni gauna eda bula tu kina oqo. (1 Pita 4:7) Vukei ira kece mera kila na bibi ni kena muri na ivakasala ni noda dau vakasosoqoni vata kei ira na tamata ni Kalou.—Iper. 10:24, 25.
17. Cava meda tukuna tiko ga kina na cakacaka veivakurabuitaki i Jiova?
17 Na veivakurabuitaki ni cakacaka i Jiova e sega ni rawa nida katuma rawa ena gauna oqo vaka kina ena gauna eda na bula tawamudu kina. (Jope 42:2, 3; Dauv. 3:11) O koya gona ena tu ga na ka meda vakacaucautaki koya tiko ga kina. Ena vula ni iVakananumi oqo meda vakaraitaka mada ga na noda vakavinavinakataka na cakacaka veivakurabuitaki i Jiova, ena noda vakalevutaka na noda cakacaka vakavunau.
[Chart on page 5]
Rawa Beka ni O Painia Veivuke ke O Vakayagataka e Dua na iTuvatuva Oqo?
Maji S M* T* V* L V V Vula
Soqoni
Veisiga 2 1 1 1 1 1 5 51
Rua na Siga 0 5 0 5 0 0 0 50
Muanimacawa Ga 5 0 0 0 0 0 8 52
Muanimacawa kei
na Rua na Siga ena Lomanimacawa 2 0 0 2 0 2 6 50
Epereli S M T V L* V* V Vula
Soqoni
Veisiga 2 1 1 1 1 1 5 50
Rua na Siga 0 0 0 0 5 5 0 50
Muanimacawa Ga 5 0 0 0 0 0 8 52
Muanimacawa kei
na Rua na Siga ena Lomanimacawa 2 0 0 2 0 2 6 50
Me S* M* T V LV V* Vula
Soqoni
Veisiga 2 1 1 1 1 1 4 51
Rua na Siga 0 5 0 0 0 0 5 50
Muanimacawa Ga 3 0 0 0 0 0 7 50
Muanimacawa kei
na Rua na Siga ena Lomanimacawa 2 0 0 2 0 2 5 51
* Lima ena dua na vula