O se Nanuma Tiko?

O taleitaka na ka o wilika ena itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

• O cei a tauyavutaka na lotu e kena ivakavuvuli ni sa lewai oti tu na bula?

Na ivakavuvuli i Calvin e vakabibitaki kina ni sa lewai oti tu na bula. O Jean Cauvin (John Calvin) e dua a vinakata vakalevu me veisau na lotu, na nona ivakavuvuli e takalevu ena so na lotu Tawase me vaka na Reformed, Presbyterian, Congregational, kei na Puritan.​​—1/9, tabana e 18-​21.

• A kunea e vei na watina o Keni?

Na wati Keni a rairai dua ga na kawa i Ivi ni a ‘so tale na luvena tagane kei na luvena yalewa.’ (Vkte. 5:4)​​—1/9, tabana e 25.

• Na agilosi cava a tala na Kalou me liutaki ira na Isireli ni sereki ira mai Ijipita? (Lako 23:​20, 21)

E ka vakayalomatua me vakabauti ni agilosi e ‘tiko vua na yaca i Jiova,’ oya na Luvena ulumatua na Kalou, a qai kilai me o Jisu.​—15/9, tabana e 21.

• Na cava e tukuni kina ena 1 Korinica na lewenimanumanu e cabori ena matakau?

E dau cabori na manumanu ena nodra valenisoro na kai Kirisi kei Roma, ia na lewenimanumanu e sega ni laukana ena gauna ni solevu e rawa ni volitaki ena makete. Era sega ni vakaitavi na lotu vaKarisito ena sokalou butobuto; e sega ni tukuni mera okata me dukadukali na lewenimanumanu e cabori ena valenisoro, ia e sa lai volitaki ena makete. E vola na yapositolo o Paula: “Moni kania na ka kece e volitaki ena makete ni lewe ni manumanu, ni kua tale ni vakataroga e dua na ka ena vuku ni nomuni lewaeloma; ni ‘nei Jiova o vuravura kei na ka kece e tu kina.’ ” (1 Kor. 10:​25, 26)​—1/10, tabana e 12.

• Na cava eso na iulubale me baleta na sokalou dina e sega ni vakadonuya na Kalou?

‘Sa rui dredre. Au sega ni via cakava. Au rui osooso. Sega ni ganiti au. E vakararawataki au e dua.’ Qori e sega ni iulubale vinaka me sega ni vakayacori kina na ivakaro ni Kalou.​—15/10, tabana e 12-​15.

• Na cava o rawa ni cakava me veiuqeti kina vei keda kece na soqoni vaKarisito?

Vakavakarau vinaka. Tiko wasoma ena soqoni. Kua ni dau bera. Me tiko kece na nomu iyaya ni soqoni. Qarauna na ka e veivakawelei. Vakaitavi. Vakamacala ga vakalekaleka. Cakava na itavi e lesi vei iko. Vakavinavinakataki ira na vakaitavi. Veimaliwai ni bera se ni oti na soqoni.​—15/10, tabana e 22.

• Na ivolatukutuku cava ena iVolatabu me baleta e dua na goneyalewa lailai, e cavuti kina na vukavuka e okati kina na kena e kilai tu nikua me mate i Hansen?

E vakamacalataki ena iKarua ni Tui wase e 5 e dua na goneyalewa ni Isireli e veiqaravi ena nona vale na kavetani ni mataivalu ni Siria, o Nemani. A tauvi koya tu na vukavuka, mani tukuna vua o goneyalewa me lai raici Ilaisa na parofita me rawa ni vakabulai.​​—1/11, tabana e 22.

• Na cava eda vulica ena nona vakamalumalumu o Eroni ena idre ni veimurimuri?

Ena gauna a gole tu kina o Mosese, era tukuna vei Eroni na Isireli me cakava e dua na kalou. A vakamalumalumu o Eroni ena ka era vinakata. Qori e vakaraitaka ni sega ni yalani ga vei ira na gone na idre ni veimurimuri. Era rawa ni vakila tale ga qori na uabula era dau via caka vinaka. E bibi meda vorata na idre ni veimurimuri.​—15/11, tabana e 8.

• Dina se Lasu?

E bula tiko o Setani: dina. (2 Kor. 11:14) Ena gauna eda mate kina, eda na lai bula kece i lomalagi: lasu. (Dauv. 9:5) Era kauaitaki keda na agilosi yalodina: dina. (Same 34:7) O Jisu e tautauvata kei na Kalou: lasu. (1 Kor. 11:3)​—1/12, tabana e 8-9.