XÓTA NǓKPLƆ́NKPLƆ́N TƆN 23
HAN 2 Jexóva wɛ nyǐkɔ towe nɔ nyí
Nɛ̌ do nyǐkɔ Jexóva tɔn ka ɖo tají nú we sɔ?
“[Jexóva] . . . ɖɔ: ‘Midɛɛ lɛ́ wɛ nyí kúnnuɖetɔ́ ce.’”—EZA. 43:10.
XÓNUSƆ́ÐÓTE
Nǔ e mǐ sixú wa dó xlɛ́ ɖɔ Jexóva nyí mɛ mímɛ́ bɔ nǔ e Satáan ɖɔ dó wǔtu tɔn lɛ́ é bǐ nyí adingban é.
1-2. Nɛ̌ mǐ ka wa gbɔn bo tuun ɖɔ nyǐkɔ Jexóva tɔn ɖo tají nú Jezu?
JEXÓVA sín nyǐkɔ ɖo tají nú Jezu hú nǔ ɖěvo ɖěbǔ. Mɛ ɖěbǔ bló bónú è tuun nyǐkɔ Jexóva tɔn sɔ Jezu ǎ. Ðo xóta e wá yi é mɛ ɔ, mǐ kplɔ́n ɖɔ Jezu ɖo gbesisɔmɛ bo kú dó xlɛ́ ɖɔ Jexóva nyí mɛ mímɛ́, bɔ nǔ e É nɔ wa lɛ́ é bǐ nɔ sɔgbe. (Mak. 14:36; Ebl. 10:7-9) Ðo Axɔ́súɖuɖu xwe afatɔ́n tɔn Jezu tɔn gúdo ɔ, é ná ɖo gbesisɔmɛ bo ná lɛ́ zé acɛ lɛ́ bǐ jó nú Tɔ́ tɔn, ɖó é ba ɖɔ susu lɛ́ bǐ ní nyí Jexóva tɔn. (1 Kɔ. 15:26-28) Wǎn e Jezu yí nú nyǐkɔ Mawu tɔn é lɛ́ ɖe nǔ gěgé xlɛ́ dó lěe é kpó Tɔ́ tɔn kpó vɛ́ sɔ é wú. Énɛ́ xlɛ́ nyi wɛn ɖɔ Jezu yí wǎn nú Mɛ e tɔn nyǐkɔ énɛ́ nyí é.
2 Jezu wá ayǐkúngban jí ɖo nyǐkɔ Tɔ́ tɔn tɔn mɛ. (Jaan 5:43; 12:13) É ɖe nyǐkɔ Tɔ́ tɔn tɔn xlɛ́ ahwanvú tɔn lɛ́. (Jaan 17:6, 26) É kplɔ́n nǔ mɛ ɖo nyǐkɔ Jexóva tɔn mɛ, bo lɛ́ bló nǔjíwǔ lɛ́ ɖo nyǐkɔ énɛ́ mɛ. (Jaan 10:25) Nǔgbó ɔ, Jezu byɔ́ Jexóva ɖɔ é ní ‘kpɔ́n dó nyǐkɔ [Tɔn] wú’ bo kpɔ́n ahwanvú émítɔn lɛ́ jí. (Jaan 17:11) É ɖo wɛn ɖɔ, nyǐkɔ Mawu tɔn ɖo tají tawun nú Jezu hú nǔ ɖěvo ɖěbǔ. Énɛ́ wú ɔ, nɛ̌ mɛɖé ka sixú ɖɔ émí nyí ahwanvú Jezu tɔn, bo ka ná dán nyǐkɔ Jexóva tɔn, alǒ gɔn zǐnzán gbɔn?
3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?
3 Ðó mǐ nyí klisánwun nǔgbó lɛ́ wútu ɔ, mǐ nɔ xwedó kpɔ́ndéwú Jezu tɔn bɔ nyǐkɔ Tɔ́ tɔn tɔn nɔ xɔ akwɛ́ nú mǐ. (1 Pi. 2:21) Ðo xóta élɔ́ mɛ ɔ, mǐ ná mɔ lěe nyǐkɔ Jexóva tɔn nɔ dó gesí mɛ ɖěɖěe ɖo “wɛn ɖagbe Axɔ́súɖuto ɔ tɔn” jlá wɛ lɛ́ é gbɔn é. (Mat. 24:14) Mǐ ná lɛ́ ɖɔ xó dó lěe nyǐkɔ Jexóva tɔn ɖó ná ɖo tají nú mǐ mɛ ɖokpó ɖokpó gbɔn é jí.
“TOGUN E ÐÓ NYǏKƆ TƆN TA É”
4. (a) Gbe tɛ́ Jezu ka ɖe nú ahwanvú tɔn lɛ́ cóbó lɛ́ kɔ yi jǐxwé? Nǔkanbyɔ́ tɛ́ gbeɖiɖe énɛ́ ka fɔ́n nyi te?
4 Hwenu kpɛɖé jɛ nukɔn nú jǐxwé yiyi Jezu tɔn ɔ, é ɖɔ xó élɔ́ nú ahwanvú tɔn lɛ́: “Mi ná mɔ hlɔ̌nhlɔ́n yí, hwenu e gbigbɔ mímɛ́ ná wá jǐ mitɔn é, bɔ mi ná nyí kúnnuɖetɔ́ ce ɖo Jeluzalɛ́mu, Judée kpó Samalíi kpó, káká yi fí e lín hú gǎn ɖo ayǐkúngban jí é.” (Mɛ. 1:8) Énɛ́ wú ɔ, è ná jlá wɛn ɖagbe ɔ zɛ dogbó Izlayɛ́li tɔn lɛ́ wú. Wǎgbɔ tɔn ɔ, ali ná hun nú akɔta lɛ́ bǐ bɔ yě ná húzú ahwanvú Jezu tɔn. (Mat. 28:19, 20) Amɔ̌, Jezu ɖɔ: “Mi ná nyí kúnnuɖetɔ́ ce.” Ahwanvú yɔ̌yɔ́ énɛ́ lɛ́ ka ɖó ná tuun nyǐkɔ Jexóva tɔn wɛ a, alǒ yě ná nyí kúnnuɖetɔ́ Jezu tɔn kɛ́ɖɛ́? Nǔ ɖěɖěe jɛ bɔ è ɖɔ xó yětɔn ɖo Mɛsɛ́dó wěmata 15gɔ́ ɔ mɛ lɛ́ é d’alɔ mǐ bɔ mǐ mɔ xósin nǔkanbyɔ́ énɛ́ tɔn.
5. Nɛ̌ mɛsɛ́dó lɛ́ kpó súnnu mɛxó e ɖo Jeluzalɛ́mu lɛ́ é kpó ka xlɛ́ ɖɔ mɛ lɛ́ bǐ ɖó ná tuun nyǐkɔ Jexóva tɔn gbɔn? (Kpɔ́n ɖiɖe ɔ lɔmɔ̌.)
5 Ðo 49 H.M. tɔn ɔ, mɛsɛ́dó lɛ́ kpó súnnu mɛxó e ɖo Jeluzalɛ́mu lɛ́ é kpó kplé bá dó ɖɔ xó dó nǔ e é byɔ́ ɖɔ Kosi e ma gbo ada ǎ lɛ́ é ɖó ná wa bá dó húzú klisánwun é jí. Ðo xóɖɔɖókpɔ́ ɔ sín vivɔnu ɔ, Jaki e nyí nɔví Jezu tɔn é ɖɔ: “[Piyɛ́ɛ] ko ɖɔ lěe Mawu nyi kɔ kpɔ́n mɛ e ɖo akɔta ɖě lɛ́ mɛ lɛ́ é azɔn nukɔntɔn ɔ, bo cyán mɛɖé lɛ́ ɖo yě mɛ, bɔ yě ná nyí togun e ɖó nyǐkɔ tɔn ta é gbɔn é sín xó tɛ́nwín lɛnwín.” É ɖe xó sín nǔ e gbeyíɖɔ Amɔ́si ɖɔ é mɛ bo ɖɔ gɔ́ ná ɖɔ: “Bónú mɛ e kpo lɛ́ é ní dó sixú ba nyɛ Jexóva vɛ́návɛ́ná ɖó kpɔ́ xá mɛ e ɖo akɔta ɖě lɛ́ mɛ lɛ́ é bǐ. Nyǐkɔ ce ɖo ta nú mɛ énɛ́ lɛ́ e ɖo akɔta ɖě lɛ́ mɛ lɛ́ é. Nyɛ Jexóva wɛ ɖɔ mɔ̌.” (Mɛ. 15:14-18) Ahwanvú yɔ̌yɔ́ énɛ́ lɛ́ ná kplɔ́n nǔ dó Jexóva wú kɛ́ɖɛ́ ǎ, loɔ, ‘nyǐkɔ tɔn ná lɛ́ ɖo ta nú yě.’ Énɛ́ xlɛ́ ɖɔ yě ná ɖó nyǐkɔ Mawu tɔn ɖo ta, bɔ nyǐkɔ énɛ́ wɛ ná nɔ lɛ́ dó yě gesí.
Ðo hǎgbɛ́ alixlɛ́mɛtɔ́ xwe kanweko nukɔntɔn ɔ tɔn sín kplé ɖé domɛ ɔ, súnnu gbejínɔtɔ́ énɛ́ lɛ́ mɔ vaan ɖɔ klisánwun lɛ́ ɖó ná nyí togun e wú nyǐkɔ Mawu tɔn ɖe é ɖé (Kpɔ́n akpáxwé 5)
6-7. (a) Aniwú Jezu ka wá ayǐkúngban jí? (b) Hwɛjijɔ tají hú gǎn ɖěvo tɛ́ wú é ka wá ayǐkúngban jí?
6 Nyǐkɔ Jezu tɔn sín tínmɛ wɛ nyí “Jexóva nyí hwlɛngán,” bɔ Jexóva ka ko zán Jezu dó hwlɛ́n mɛ ɖěɖěe ɖi nǔ nú é kpó Vǐ tɔn kpó lɛ́ é bǐ. Jezu wá ayǐkúngban jí bo sɔ́ gbɛ tɔn jó dó gbɛtɔ́ lɛ́ tamɛ. (Mat. 20:28) Gbɔn gbɛxixɔ ɔ gblamɛ ɔ, é hun ali nú gbɛtɔ́ lɛ́ bɔ yě ná mɔ hwlɛngán, bo ná lɛ́ nɔ gbɛ káká sɔ́yi.—Jaan 3:16.
7 Amɔ̌, aniwú gbɛtɔ́ lɛ́ ka ɖó hudó gbɛxixɔ ɔ tɔn? Ðó nǔ e jɛ ɖo jikpá Edɛ́ni tɔn ɔ mɛ é wú wɛ. Lěe xóta e wá yi é xlɛ́ gbɔn é ɔ, mɛjitɔ́ mǐtɔn nukɔntɔn lɛ́, Adámu kpó Ɛvu kpó fɔ́n gú dó Jexóva jí, bɔ énɛ́ zɔ́n bɔ yě sɔ́ sixú nɔ gbɛ káká sɔ́yi ǎ. (Bǐb. 3:6, 24) Amɔ̌, Jezu wá ayǐkúngban jí bo ná wa nǔ e tlɛ lɛ́ ɖo tají tawun hú gbɛ gbɛtɔ́ lɛ́ tɔn hwínhwlɛ́ngán é ɖé. Satáan ɖó adingban baɖabaɖa lɛ́ dó Jexóva kɔ. (Bǐb. 3:4, 5) Énɛ́ wú ɔ, gbɛtɔ́ lɛ́ ɖó ná tuun ɖɔ Jexóva kún wa nǔ nyanya ɖé ó, bo lɛ́ nyí Tɔ́ wǎnyíyínɔ ɖé. Bɔ Jezu wɛ nyí mɛ e jɛxá hú gǎn bá ɖe énɛ́ xlɛ́ é, ɖó é sɔ́ afɔ Jexóva tɔn ɖó te, bo lɛ́ wa nǔ e Jexóva ba ɖɔ é ní wa lɛ́ é bǐ bɔ nǔ bǐ vɔ ɖ’é wú.
Nɛ̌ mɛɖé ka sixú ɖɔ émí nyí ahwanvú Jezu tɔn, bo ka ná dán nyǐkɔ Jexóva tɔn, alǒ gɔn zǐnzán gbɔn?
8. Étɛ́ mɛ e ɖi nǔ nú Jezu lɛ́ é bǐ ka ɖó ná tuun?
8 Klisánwun lɛ́ bǐ ɖó ná yí gbe nú Jɔtɛn hwlɛngán yětɔn tɔn, énɛ́ wɛ nyí Jezu sín Tɔ́, Jexóva Mawu. (Jaan 17:3) Gɔ́ ná ɔ, Jezu ɖɔhun ɔ, nyǐkɔ Jexóva tɔn wɛ ná nɔ dó gesí yě. Yě ɖó ná lɛ́ tuun lě do é ɖo tají sɔ ɖɔ è ní klɔ́ cí sín nyǐkɔ énɛ́ wú é. Hwlɛngán yětɔn ná sín énɛ́ wú. (Mɛ. 2:21, 22) Énɛ́ wú ɔ, ahwanvú gbejínɔtɔ́ Jezu tɔn lɛ́ bǐ ɖó ná kplɔ́n nǔ dó Jexóva kpó Jezu kpó wú. Yǎyá wú wɛ ǎ bɔ Jezu fó ɖɛ tɔn e ɖo Jaan wěmata 17gɔ́ ɔ mɛ é gbɔn lě: “Un bló bɔ yě tuun nyǐkɔ towe, bo ka ná lɛ́ kpo ɖo mɔ̌ wa wɛ, bónú yě ní dó sixú yí wǎn nú mɛ, lěe a yí wǎn nú mì gbɔn é, lobonú má nɔ bǔ xá yě.”—Jaan 17:26.
“MIDƐƐ LƐ́ WƐ NYÍ KÚNNUÐETƆ́ CE”
9. Nɛ̌ mǐ ka sixú xlɛ́ ɖɔ nyǐkɔ Jexóva tɔn ɖo tají nú mǐ gbɔn?
9 Énɛ́ wú ɔ, cí klɔ́klɔ́ sín nyǐkɔ Jexóva tɔn wú ɖó ná nɔ myá nukún nú ahwanvú nǔgbó Jezu tɔn lɛ́ bǐ. (Mat. 6:9, 10) Mǐ ɖó ná sɔ́ nyǐkɔ Jexóva tɔn dó ɖó nyǐkɔ e ɖo tají hú gǎn nú mǐ é. Énɛ́ ɖó ná nɔ tɔ́n ɖo nǔwiwa mǐtɔn lɛ́ mɛ. Énɛ́ wú ɔ, étɛ́ mǐ ka sixú wa bo klɔ́ cí sín nyǐkɔ Jexóva tɔn wú, bo xlɛ́ ɖɔ nǔ e Satáan ɖɔ dó Jexóva wú lɛ́ é ɖě kún nyí nǔgbó ó?
10. Étɛ́ mǐ ka xa ɖo wěma Ezayíi tɔn sín wěmata 42 jɛ 44 mɛ? (Ezayíi 43:9; 44:7-9) (Kpɔ́n ɖiɖe ɔ lɔmɔ̌.)
10 Ðo Ezayíi 42 jɛ 44 mɛ ɔ, mǐ kplɔ́n nǔ e mǐ sixú wa dó klɔ́ cí sín nyǐkɔ Jexóva tɔn wú é. Ðo wěmata énɛ́ lɛ́ mɛ ɔ, Jexóva byɔ́ mɛ e ma nɔ sɛn ɛ ǎ lɛ́ é ɖɔ yě ní xlɛ́ ɖɔ nǔmɛsɛn émítɔn lɛ́ tíin nǔgbó. Lěe é nɔ nyí gbɔn ɖo hwɛɖɔxɔsá ɖé é ɖɔhun ɔ, é kanbyɔ́ ɖɔ kúnnuɖetɔ́ ɖé ka ɖe bo sixú ɖe énɛ́ xlɛ́ a jí. Amɔ̌, mɛɖé kpé wú ǎ.—Xa Ezayíi 43:9; 44:7-9.
Mǐ nɔ xlɛ́ ɖɔ Mawu ɖěvo ɖěbǔ kún sɔ́ ɖe zɛ Jexóva wú ó, ɖo nǔ e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó mɛ (Kpɔ́n akpáxwé 10-11)
11. Étɛ́ Jexóva ka ɖɔ nú togun tɔn ɖo Ezayíi 43:10-12 mɛ?
11 Xa Ezayíi 43:10-12. Jexóva ɖɔ nú togun tɔn ɖɔ: “Midɛɛ lɛ́ wɛ nyí kúnnuɖetɔ́ ce . . . nyɛ wɛ nyí Mawu.” Jexóva ɖo byɔ́byɔ́ yě wɛ ɖɔ yě ní ná xósin nú nǔkanbyɔ́ élɔ́: “Nyɛ mɛvo ɔ, Mawu ɖěvo ɖe wɛ a?” (Eza. 44:8) Mǐ ɖó wǔjɔmɛ ɖaxó ɖé bo ná ná xósin nú nǔkanbyɔ́ énɛ́. Gbɔn nǔ e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó gblamɛ ɔ, mǐ nɔ xlɛ́ ɖɔ Mawu ɖěvo ɖě kún sɔ ɖe zɛ Jexóva wú ó. Nyǐkɔ tɔn yi aga hú nyǐkɔ ɖěvo ɖěbǔ. Mǐ nɔ xlɛ́ gbɔn gbɛ e mǐ nɔ zán é gblamɛ ɖɔ mǐ yí wǎn nú Jexóva nǔgbó nǔgbó, bo ɖo gbejí n’i, ényí Satáan ná bo tlɛ ɖo kɔ ɖěbǔ gbídí nú mǐ wɛ ɔ nɛ́. Mɔ̌ mɛ ɔ, ali nɔ hun nú mǐ bɔ mǐ nɔ ɖ’alɔ ɖo cí klɔ́klɔ́ sín nyǐkɔ Jexóva tɔn wú mɛ.
12. Nɛ̌ nǔɖɔɖayǐ e ɖo Ezayíi 40:3, 5 mɛ é ka jɛnu gbɔn?
12 Ényí mǐ nɔ klɔ́ cí sín nyǐkɔ Jexóva tɔn wú hǔn, kpɔ́ndéwú Jezu Klísu tɔn xwedó wɛ mǐ ɖe mɔ̌ nɛ́. Ezayíi lɛ́ ɖɔ ɖ’ayǐ ɖɔ mɛɖé ná ‘ɖe ali ɖokpó nú Jexóva.’ (Eza. 40:3) Nɛ̌ énɛ́ ka jɛnu gbɔn? Jaan Batɛ́mublónúmɛtɔ́ ɔ ɖe ali nú Jezu, éé wá ɖo Jexóva nyǐkɔ mɛ bo ɖɔ xó ɖo nyǐkɔ Jexóva tɔn mɛ é. (Mat. 3:3; Mak. 1:2-4; Luk. 3:3-6) Nǔɖɔɖayǐ ɖokpó énɛ́ ɔ ɖɔ: ‘Susu Jexóva tɔn ná jɛ wěxo.’ (Eza. 40:5) Ali tɛ́ nu nǔ ka nyí mɔ̌ ɖe? Hwenu e Jezu wá ayǐkúngban jí é ɔ, é sɔ́ afɔ Jexóva tɔn ɖó te bɔ nǔ bǐ vɔ ɖ’é wú, cí nǔ ɖɔ Jexóva ɖésúnɔ wɛ wá ayǐkúngban jí ɖɔhun.—Jaan 12:45.
13. Nɛ̌ mǐ ka sixú xwedó kpɔ́ndéwú Jezu tɔn gbɔn?
13 Jezu ɖɔhun ɔ, kúnnuɖetɔ́ Jexóva tɔn lɛ́ wɛ mǐ nyí. Mǐ ɖó nyǐkɔ Jexóva tɔn ta, bo nɔ ɖɔ nǔ ɖaaɖagbe e é wa lɛ́ é nú mɛ ɖěbǔ e mǐ xo go é. Amɔ̌, bo ná dó nyí kúnnuɖetɔ́ Jexóva tɔn ɖagbe ɖé ɔ, mǐ ɖó ná lɛ́ bló bɔ mɛ lɛ́ ná tuun nǔ e Jezu wa dó klɔ́ cí sín nyǐkɔ Jexóva tɔn wú lɛ́ é bǐ. (Mɛ. 1:8) Jezu wɛ nyí Kúnnuɖetɔ́ Jexóva tɔn ɖaxó ɔ, bɔ mǐ nɔ xwedó kpɔ́ndéwú tɔn. (Nǔɖe. 1:5) Ali ɖěvo tɛ́ nú mǐ ka nɔ xlɛ́ ɖɔ nyǐkɔ Jexóva tɔn ɖo tají nú mǐ ɖe?
ALI ÐĚVO ÐĚÐĚE NU MǏ NƆ XLƐ́ ÐƆ NYǏKƆ JEXÓVA TƆN ÐO TAJÍ NÚ MǏ ÐE LƐ́ É
14. Lěe Ðɛhan 105:3 tɛ ɖɛ̌ jí gbɔn é ɔ, nɛ̌ nǔ ka nɔ cí nú mǐ dó nyǐkɔ Jexóva tɔn wú?
14 Mǐ nɔ gó ɖó nyǐkɔ Jexóva tɔn wú. (Xa Ðɛhan 105:3.) É nɔ víví nú Jexóva tawun ɖɔ mǐ nɔ gó ɖó nyǐkɔ tɔn wú. (Jel. 9:23, 24; 1 Kɔ. 1:31; 2 Kɔ. 10:17) Mǐ ní “gó ɖo Jexóva mɛ” sín tínmɛ wɛ nyí ɖɔ mǐ ní xɔ susu ɖo Jexóva Mawu mǐtɔn mɛ. Wǔjɔmɛ wɛ é nyí nú mǐ ɖɔ mǐ ní wlí yɛ̌yi nú nyǐkɔ tɔn, bo lɛ́ jɛ hun d’é jí. Winnyá ɖó ná hu mǐ bɔ mǐ ná gɔn ɖiɖɔ nú azɔ̌gbɛ́ mǐtɔn lɛ́, wěmaxɔmɛvígbɛ́ mǐtɔn lɛ́, mɛ e ɖo xá mǐtɔn mɛ lɛ́ é kpó mɛ ɖěvo lɛ́ kpó ɖɔ mǐ nyí Kúnnuɖetɔ́ Jexóva tɔn gbeɖé ǎ! Awǒvi ba ɖɔ mǐ ní ɖó xó ɖiɖɔ nú mɛ ɖěvo lɛ́ dó nyǐkɔ Jexóva tɔn wú te. (Jel. 11:21; Nǔɖe. 12:17) Nǔgbó ɔ, Satáan kpó gbeyíɖɔ-nyíjɛtɔ́ tɔn lɛ́ kpó nɔ ba ná bló bɔ mɛ lɛ́ ná wɔn nyǐkɔ Jexóva tɔn. (Jel. 23:26, 27) Amɔ̌, wǎn e mǐ yí nú nyǐkɔ Jexóva tɔn é nɔ zɔ́n bɔ mǐ nɔ kpo ɖo awǎjijɛ ɖó wɛ “tɛgbɛ.”—Ðɛh. 5:12; 89:17.
15. Étɛ́ è ní ylɔ́ nyǐkɔ Jexóva tɔn sín tínmɛ ka nyí?
15 Mǐ nɔ kpo ɖo nyǐkɔ Jexóva tɔn ylɔ́ wɛ. (Jowɛ́. 3:5; Hlɔ̌. 10:13, 14) È ní ylɔ́ nyǐkɔ Jexóva tɔn nɔ byɔ́ nǔ hú nyǐkɔ Mawu tɔn ɖésúnɔ tuuntuun bo lɛ́ zán kpowun. Mǐ kplɔ́n bo tuun ɖɔ Mawu tíin, nɔ ɖeji dó wǔ tɔn, bo nɔ ba alɔdó tɔn kpó wěɖexámɛ tɔn kpó. (Ðɛh. 20:8; 99:6; 116:4; 145:18) È ní ylɔ́ nyǐkɔ Jexóva tɔn sín tínmɛ wɛ lɛ́ nyí ɖɔ è ní ɖɔ nyǐkɔ tɔn nú mɛ ɖěvo lɛ́, bo lɛ́ ɖɔ jijɔ tɔn ɖaaɖagbe lɛ́ sín xó nú yě. Gɔ́ ná ɔ, mǐ nɔ d’alɔ yě bónú yě ná húzú gbɛzán yětɔn nú nǔ yětɔn ná sixú nyɔ́ nukún tɔn mɛ lobonú è ná hwlɛ́n yě.—Eza. 12:4; Mɛ. 2:21, 38.
16. Nɛ̌ mǐ ka sixú xlɛ́ ɖɔ Satáan nyí adingbannɔ gbɔn?
16 Mǐ nɔ ɖo gbesisɔmɛ bo ná se wǔvɛ́ dó nyǐkɔ Jexóva tɔn tamɛ. (Ja. 5:10, 11) Ényí mǐ kpo ɖo gbejí nɔ nú Jexóva wɛ ɖo wǔvɛ́ lɛ́ mɛ ɔ, mǐ nɔ xlɛ́ ɖɔ Satáan nyí adingbannɔ. Ðo Jɔbu hwenu ɔ, Satáan ɖɔ xó élɔ́ dó mɛ e ɖo Jexóva sɛn wɛ lɛ́ é wú: “Gbɛtɔ́ [ná] jó nǔ e é ɖó ɔ bǐ bo [ná] dó hwlɛ́n gbɛ éɖée tɔn gán.” (Jɔb. 2:4) Satáan ɖɔ ɖɔ hwenu e nǔ ɖo nyǐnyɔ́ nú gbɛtɔ́ lɛ́ wɛ é kɛ́ɖɛ́ jɛ́n yě ná sɛn Jexóva, lé, ényí yě mɔ wǔvɛ́ lɛ́ ɔ, yě ná jó Jexóva dó. Gbejínɔtɔ́ Jɔbu xlɛ́ ɖɔ adingban wɛ nyí hwɛdómɛ énɛ́. Mǐ lɔmɔ̌ ɖó wǔjɔmɛ ɔ bo ná xlɛ́ ɖɔ nú Satáan ná bo sɔ́ nǔ ɖěbǔ kpan nukɔn mǐ ɔ, mǐ kún ná dó gǔdo Jexóva gbeɖé ó. Mǐ sixú kú d’é jí bǐ mlɛ́mlɛ́ ɖɔ Jexóva ná kpo ɖo xɛ nya ɖo mǐ jí wɛ ɖó nyǐkɔ tɔn wú.—Jaan 17:11.
17. Sɔgbe xá 1 Piyɛ́ɛ 2:12 ɔ, ali ɖěvo tɛ́ nú mǐ ka sixú sɔ́ nyǐkɔ Jexóva tɔn su ɖe?
17 Mǐ nɔ ɖó sísí nú nyǐkɔ Jexóva tɔn. (Nǔx. 30:9; Jel. 7:8-11) Ðó mǐ nyí afɔsɔ́ɖótetɔ́ Jexóva tɔn, bo lɛ́ ɖó nyǐkɔ tɔn ta wútu ɔ, nǔ e mǐ nɔ wa lɛ́ é sixú kpa susu nú nyǐkɔ tɔn alǒ kɔn cí d’é wú. (Xa 1 Piyɛ́ɛ 2:12.) Énɛ́ wú ɔ, mǐ ba ná wa nǔ e wú mǐ kpé é bǐ bá kpa susu nú Jexóva ɖo xó kpó nǔwiwa kpó mɛ. Mǐ nyí mɛ maɖóblɔ̌ ǎ có, ényí mǐ wa mɔ̌ ɔ, mǐ ná kpo ɖo yɛ̌yi wlí nú nyǐkɔ Jexóva tɔn wɛ.
18. Ali ɖěvo tɛ́ nu mǐ ka sixú xlɛ́ ɖɔ nyǐkɔ Jexóva tɔn ɖo tají nú mǐ ɖe? (Kpɔ́n tínmɛ e ɖo do é lɔmɔ̌.)
18 Nyǐkɔ Jexóva tɔn nɔ ɖu ayi mɛ nú mǐ hú gǎn nyǐkɔ mǐɖésúnɔ tɔn. (Ðɛh. 138:2) Aniwú énɛ́ ka ɖo tají sɔmɔ̌? Ðó mǐ yí wǎn nú nyǐkɔ Jexóva tɔn wútu ɔ, mɛ e lɛ́ lɛ̌ dó mǐ lɛ́ é sixú hɛn nyǐkɔ mǐtɔn gblé.a Jezu ɖo gbesisɔmɛ bo kú winnyá kú nǔnyanyawatɔ́ ɖɔhun bá dó wlí yɛ̌yi nú nyǐkɔ Jexóva tɔn. É ‘kpɔ́n winnyá’ e ɖ’é mɛ é bónú ado hu i zɛ xwé wú dó nǔ e mɛ ɖěvo lɛ́ nɔ lin dó wǔ tɔn é wú ǎ. (Ebl. 12:2-4) Jlǒ Mawu tɔn wiwa jí wɛ é sɔ́ ayi ɖó.—Mat. 26:39.
19. Nɛ̌ nǔ ka nɔ cí nú we dó nyǐkɔ Jexóva tɔn wú? Aniwú?
19 Mǐ nɔ gó ɖó nyǐkɔ Jexóva tɔn wú, bo nɔ mɔ ɖɔ yɛ̌yi wɛ è wlí nú mǐ bo nɔ ylɔ́ mǐ ɖɔ Kúnnuɖetɔ́ Jexóva tɔn lɛ́. Ðó nyǐkɔ Jexóva tɔn ɖo tají tawun nú mǐ wútu ɔ, mǐ ná kpo ɖo susu kpa n’i wɛ, ényí mɛ ɖěvo lɛ́ ná bo tlɛ nɔ sɔ́ nukún kpɛví dó kpɔ́n mǐ ɔ nɛ́. Nyǐkɔ Jexóva tɔn tlɛ ɖo tají tawun nú mǐ hú nyǐkɔ mǐɖésúnɔ tɔn. Énɛ́ wú ɔ, ényí Satáan ná bo tlɛ tɛ́n kpɔ́n bá dó awakanmɛ kú nú mǐ hǔn, mi nú mǐ ní kán ɖ’é jí bá kpo ɖo susu kpa nú nyǐkɔ Jexóva tɔn wɛ. Énɛ́ ɔ, mǐ ná xlɛ́ ɖɔ nyǐkɔ Jexóva tɔn ɖo tají tawun nú mǐ, lěe é ɖe nú Jezu Klísu é ɖɔhun.
HAN 10 Kpa Jexóva Mawu mǐtɔn!
a Jɔbu e tlɛ nyí gbejínɔtɔ́ é jɛ tamɛ lin dó linlin e mɛ ɖěvo lɛ́ nɔ ɖó dó wǔ tɔn é wú jí zɛ xwé wú, hwenu e súnnu atɔn lɛ́ ɖɔ ɖɔ nǔ nyanya ɖé wɛ é ná ko wa é. Ðo bǐbɛ́mɛ, hwenu e Jɔbu sín vǐ lɛ́ bǐ kú bɔ é lɛ́ ba nǔɖókan tɔn lɛ́ bǐ kpo é ɔ, “é . . . hu hwɛ ɖěbǔ ǎ, é ɖɔ nǔ ɖěbǔ nyi do nú Mawu ǎ.” (Jɔb. 1:22; 2:10) É ɖo mɔ̌ có, hwenu e è dó hwɛ Jɔbu ɖɔ é wa nǔ nyanya é ɔ, é jɛ “nǔ wlá ɖɔ” jí. Nyǐkɔ éɖésúnɔ tɔn ɖo tají n’i hú susu xixɔ nú Jexóva.—Jɔb. 6:3; 13:4, 5; 32:2; 34:5.