Gbeyei Emɔ Je Lɛ

OKPƐLƐM agbo ni akɛtee yɛ kar ko mli fɛ́ yɛ World Trade Center tsu nsɔɔdoi 110 ni yɔɔ New York Maŋtiase lɛ mli lɛ masɛi yɛ February 26, 1993. Nitsulɔi akpei abɔ ka shwiilii ni holeɔ mɛi kɛyaa ŋwɛi tsũi lɛ amli lɛ amli loo ehe bahia ni amɛjo foi kɛkpeleke shi kɛjɛ atrakwei ni lasu eyi nɔ obɔ lɛ anɔ. Amɛnu gbeyeishemɔ ni egbɛ eshwa awuiyeli je nɛɛ mli lɛ he.

Akɛ okpɛlɛmii ewo mɛi ahe gbeyei yɛ shikpɔji pii anɔ, ni efee nɔ ni afɔɔ namɔ daa yɛ maji tamɔ Ireland kɛ Lebanon. Mɛni hewɔ, ejaakɛ 13 fɛlɛ gbi kome pɛ—yɛ March 12, 1993—yɛ Bombay, India, ni gbɔmɛi aaafee 200 gboi! Mɔ ko ni na nɔ ni tee nɔ lɛ kɛɛ: “Tsuifaa yɛ Bombay fɛɛ.” Taakɛ wolo tɛtrɛɛ, Newsweek, tsɔɔ lɛ, “bɔ ni akɛ bɔmb hɔɔ kar mli ni anyɛɔ ashiɔ amaa he fɛɛ he lɛ ji nɔ ni haa asheɔ gbeyei babaoo lɛ.”

Nuklea Gbeyeishemɔ yɛ Lolo

Gbeyeishemɔ yɛ akɛ abaanyɛ atswa bɔmb awo nuklea nitsumɔ hei. Omanye ni aaaye yɛ tutuamɔ ni aaatutua nuklea hewalɛ nitsumɔ he lɛ baanyɛ akpata nibii babaoo hiɛ ni ekɛ piŋmɔi pii baaba. Nɔ ni haa aheɔ gbeyeishemɔ nɛɛ ayeɔ ji mɔdɛŋ ni gbɔmɔ kome ko bɔ koni ewo ekar foi kɛtsɔ agbó ni aŋmɛɛɛ gbɛ ni atsɔ mli lɛ mli yɛ Three Mile Island nuklea hewalɛ nitsumɔ he ni yɔɔ U.S. Amerika lɛ.

Mɛi pii sheɔ gbeyei akɛ awuiyelɔi ni woɔ gbɔmɛi ahe gbeyei kɛ nɔyelɔi ni diɔ hewalɛnamɔ sɛɛ lɛ anine baashɛ nuklea tawuu nii anɔ. Mɛi pii sheɔ gbeyei akɛ tsutsu Soviet Union jeŋ nilelɔi akpei abɔ ni tsu nuklea he nii lɛ baabɔ mɔdɛŋ ni amɛhɔɔ amɛ nilee loo hesaa lɛ. Agbɛnɛ hu, eyɛ mli akɛ START kpaŋmɔ lɛ biɔ ni akpata nuklea okpɛlɛmii ni yɔɔ gbeyei nɛɛ fɛɛ hiɛ moŋ, shi anyɛŋ agbe enɛ he nitsumɔ naa kɛyashi 1999 naagbee, loo yɛ sɛɛ mli. Beni be shwieɔ mli lɛ, nyɛ ni eeenyɛ eba akɛ mɔ ni yɔɔ keketee ni ena hewalɛ hee ko lɛ kɛaatsu nii lɛ efee tamɔ ahum ko ni woɔ mɔ he gbeyei ni tsotsoro adesai ayiteŋ.

Awuiyeli kɛ Gbeyeishemɔ Baa

Awuiyelii ni hiɛdɔɔ yɔɔ mli ni egbɛ eshwa lɛ haa gbɔmɛi sheɔ gbeyei yɛ amɛshiai amli kɛ gbɛjegbɛi anɔ. Abu naa akɛ agbe U.S. Amerikabii 23,200 yɛ 1990. Akɛ nɔkwɛmɔ nɔ lɛ, yɛ maŋtiase ni ji Chicago mli lɛ, tsofa fɔŋ ni ji kokein ni naa wa ni akɛtsuɔ nii lɛ ha agbe mɛi aaafee 700 yɛ afi kome mli. Hei komɛi efee tawuu hei yɛ maŋtiasei komɛi amli, ni agbe mɛi ni hoɔ yɛ jɛmɛ, ni gbekɛbii fata he lɛ yɛ tui ni afai enyɔ lɛ tswiaa amɛhe lɛ mli. Wolo tɛtrɛɛ ko kɛɛ: “Awuiyeli miigbɛ kɛmiishwa oyayaayai yɛ maŋtiasei pɛmpɛbii amli. . . . Mɔ ko mɔ ko bɛ ni yeɔ ehe yɛ enɛ mli yɛ be mli ni tsofai fɔji kɛ gbekɛbii basabasa-feelɔi eyimɔ akutsei ni yɔɔ U.S. Amerika fɛɛ lɛ amli obɔbɔ lɛ. Daa afi lɛ, ayeɔ awui loo ajuɔ yɛ Amerika shiai 4 fɛɛ 4 mli 1 mli.”—U.S.News & World Report, October 7, 1991.

Kabonaatoo he gbeyeishemɔ haa yei haoɔ waa. Yɛ France nɛkɛ lɛ, kabonaatoo ni abɔ he amaniɛ atsɔɔ polisifoi lɛ tee hiɛ oha mlijaa 62 kɛjɛ 1985 kɛbashi 1990. Yɛ afii ekpaa pɛ mli lɛ yei ni atutuaa kɛ bɔlɛnamɔ lɛ ku ebɔ he kɛyashɛ 27,000 yɛ Canada. Germany bɔ yoo tutuamɔ yɛ minitii 7 fɛɛ 7 mli he amaniɛ.

Gbekɛbii hu sheɔ amɛ shweshweeshwe-feemɔ he gbeyei. Newsweek bɔ amaniɛ akɛ, yɛ U.S. Amerika lɛ, “gbekɛbii, ni yɔɔ sɛii ejwɛ loo enumɔ po kɛ tawuu nii miiwula amɛhe, ni tsɔɔlɔi kɛ skul lɛ mli onukpai atsuii miifa.” Bɔ ni hiɛdɔɔ yɔɔ shihilɛ nɛɛ mli ha sɔŋŋ hewɔ lɛ, kpokpaa wuji lɛ amli skul sɔrɔtoi lɛ amlijaa ejwɛ mli ekome kɛ elɛtronik tsɔnei ni haa aleɔ kɛ akɛ dade ko eba tsu mli tsuɔ nii, ni kɛlɛ gbekɛbii ni amɛtswa amɛfai shi lɛ tsɔɔ gbɛi krokomɛi anɔ amɛkɛ tui tsɔɔ samfɛji amli amɛkɛhaa mɛi krokomɛi.

AIDS he Gbeyeishemɔ

Gbɔmɛi babaoo miishe AIDS ni amɛaana lɛ gbeyei babaoo agbɛnɛ. Mɛi fe 230,000 ena eko yɛ U.S. Amerika pɛ. AIDS ebatsɔ helai titrii ni gbeɔ mɛi ni amɛye kɛjɛ afii 15 kɛmiiya 24 lɛ ateŋ nɔ ni ji ekpaa. Newsweek kɛɛ: “Nɔ ni yɔɔ wɔsɛɛ be ji gbɛkpamɔ ni yɔɔ gbeyei akɛ hela nɛɛ baagbɛ ashwa babaoo lolo.”

Gbele ni jɛ AIDS lɛ miifa yɛ mɛi ni kɛ joo, nifeemɔ yɛ shwɛmɔ hei, sinii, lalai, atade heei ni akpɛɔ, tɛlivishin, shwɛmɔi kɛ ekrokomɛi ni tamɔ nakai efee amɛ daa nitsumɔ lɛ ateŋ. Amaniɛbɔɔ ko kɛɛ akɛ, Paris hii ni gboɔ yɛ adafitswaa woji aŋmalamɔ mli, yɛ shwɛmɔ mli, kɛ hiɛtserɛjiemɔ mli ni amɛye kɛjɛ afii 25 kɛyashi 44 lɛ ateŋ oha fɛɛ mli 60 jɛ AIDS. WHO (World Health Organization) bɔɔ amaniɛ akɛ gbɔmɛi ni amɛyifalɛ shɛɔ kɛjɛ akpekpei kpaanyɔ kɛyashi akpekpei nyɔŋma hiɛ HIV muawai ni haa AIDS lɛ eko yɛ jeŋ fɛɛ. Dr. Michael Merson, WHO onukpa ko kɛɔ akɛ: “Efee faŋŋ agbɛnɛ akɛ mɛi ni HIV muawai lɛ eko tsɛŋeɔ amɛ yɛ jeŋ fɛɛ lɛ miiya hiɛ waa, titri lɛ yɛ maji ni kpaako amɛnaa nɔyaa lɛ amli.”

Shi, nibii ni ebɔle wɔhe kɛkpe lɛ kɛ gbeyeishemɔi krokomɛi hu yɛ. Kɛlɛ amaniɛbɔi ni wɔtsɔ hiɛ wɔnu lɛ pɛ haa efeɔ faŋŋ akɛ gbeyei emɔ je lɛ. Ani nɔ ko krɛdɛɛ ko yɛ ni anaa yɛ enɛ he? Ani wɔbaanyɛ wɔkpa gbɛ akɛ wɔbaana heyeli kɛmiijɛ gbeyeishemɔ mli lɛ mli ŋɔɔmɔ gbi ko?

[He ni Mfoniri ni yɔɔ baafa 2 lɛ Jɛ]

Hiɛ mfoniri lɛ: Abɛku: Tom Haley/Sipa Press; Bottom: Malanca/Sipa Press

[He ni Mfoniri ni yɔɔ baafa 3 lɛ Jɛ]

Bob Strong/Sipa Press