Yehowa Odasefoi ni Yɔɔ Jeŋ Fɛɛ—India
INDIA! Gbɔmɛi ni yɔɔ shibɔlemɔ ŋulami nɛɛ nɔ lɛ mli mɛi 6 fɛɛ mli 1 yɔɔ shikpɔŋ wulu nɛɛ nɔ. Kɛ abu fɛɛ he akɔntaa lɛ, awieɔ wiemɔi kɛ maŋ nɔ wiemɔi sɔrɔtoi fe 1,000 yɛ shikpɔŋ ni enɔ bii jɛ shihilɛi sɔrɔtoi amli nɛɛ nɔ. Gbɔmɛi lɛ ateŋ mɛi ni fa ji Hindubii, oha mli 83 ji nakai, ni oha fɛɛ mli 11 ji Moslembii, ni Sikhbii, Buddhafoi, Jainbii, ni mɛi ni kɛɛ amɛji Kristofoi feɔ yifalɛ ni eshwɛ lɛ.
Yehowa Odasefoi miiná omanyeyeli mli ŋɔɔmɔ babaoo yɛ India yɛ nyɛsɛɛ afii nɛɛ amli. Amɛna gbɔmɛi ni tamɔ gwantɛŋi ni miisumɔ ni amɛdamɔ shi shiŋŋ amɛha Yehowa Maŋtsɛyeli lɛ, yɛ nɔnyɛɛi kɛ shitee-kɛ-woo fɛɛ sɛɛ.
Akɛ nɔkwɛmɔ nɔ lɛ, gbekɛ yoo ko ni yɔɔ shishijee Hindu weku ko mli ekumɔ yɛ kuumɔ hela hewɔ kɛjɛ egbekɛbiiashi. Piŋmɔ ni etsɔ mli lɛ ha esusu Nyɔŋmɔ kɛ yiŋtoo ni yɔɔ shihilɛ mli lɛ he. Etao jamɔi pii amli koni ena hetoo, shi enaaa miishɛjemɔ ko. Nɔ ni jɛ mli ba ji akɛ, elaaje hemɔkɛyeli ni eyɔɔ yɛ jamɔ mli lɛ, shi jeee yɛ Nyɔŋmɔ mli.
Aaafee nɛkɛ be nɛɛ mli ni Odasefoi enyɔ kɛ gbekɛ yoo nɛɛ kpe yɛ amɛ shia kɛ shia sɔɔmɔ lɛ mli. Ekaiɔ ni ekɛɛ: “Yaafonui yimɔ mihiŋmɛiiaŋ obɔ beni minu ni amɛmiikane Kpojiemɔ 21:4 lɛ.” Ehe Buu Mɔɔ Asafo lɛ woji sɔrɔtoi pii, ni ekpɛlɛ shia Biblia mli nikasemɔ nɔ yɛ shitee-kɛ-woo ni enyɛ kɛba lɛ fɛɛ sɛɛ. Gbekɛ yoo lɛ fee tsakemɔi pii yɛ eshihilɛ mli, ekɛ ekãa kpee shitee-kɛ-woo ni jɛ ewekumɛi aŋɔɔ lɛ naa, ni ebatsɔ Odasefonyo ni abaptisi lɛ. Ekɛɛ: “Mitee hiɛ babaoo, ni efee gbɛ ni wa waa. Shi, Yehowa Nyɔŋmɔ kɛ mi ehi shi be fɛɛ be, ni eha mi toiŋjɔlɛ kɛ miishɛɛ babaoo.”
Shiŋŋ Kɛha Jamɔ Krɔŋŋ yɛ Skul
Nyɛmi yoo fioo ko tsɔɔlɔ kɛɛ lɛ akɛ ekɛ eklas bii krokomɛi lɛ aya Katolik sɔlemɔ. Nyɛmi yoo lɛ kɛ bulɛ kpoo, ni ekɛɛ akɛ eji Yehowa Odasefoi lɛ ateŋ mɔ kome, ni akɛ ejaŋ mɔ ko mɔ ko loo nɔ ko, ja Yehowa. Tsɔɔlɔ lɛ kɛɛ akɛni mɛi krokomɛi lɛ fɛɛ yaa sɔlemɔ hewɔ lɛ, esa akɛ lɛ hu eya. Nyɛmi yoo lɛ damɔ shi shiŋŋ ni ekɛɛ akɛ, akɛni mɛi krokomɛi ni yaa sɔlemɔ lɛ sɔleŋ amɛhaŋ Yehowa hewɔ lɛ, enaaa nɔ hewɔ ni esa akɛ ekɛ amɛ ahi jɛmɛ.
Akɛni gbekɛ yoo lɛ fee shiŋŋ hewɔ lɛ, etsɔɔlɔ lɛ miisumɔ ni ele babaoo. No hewɔ lɛ, nyɛmi yoo lɛ kɛ Buu-Mɔɔ lɛ mli sane ko ni kɔɔ Yehowa jamɔ he ha lɛ enɔ jetsɛremɔ. Akɛni tsɔɔlɔ lɛ hiɛ sɔ nɔ ni ekane lɛ hewɔ lɛ, ejie lɛ kɛjɛ jamɔ nifeemɔi fɛɛ ni yaa nɔ yɛ skul lɛ ni ekɛ ehe aaawo mli lɛ mli. Nyɛmi yoo lɛ nyɛ ekɛ woji tɛtrɛbii nyɔŋma ha lɛ kɛ tsɔɔlɔi krokomɛi lɛ.
Awo Toiboo Kɛha Nyɔŋmɔ Mla yɛ La he lɛ He Nyɔmɔ
Nyɛsɛɛ nɛɛ atridii ko ni tsɛŋeɔ mɔ gbɛ shwã Kerala kpokpaa wulu lɛ fai komɛi. Hela nɛɛ fiteɔ sabai waa, ni nɔ ni ehe hiaa ni afee ji la ni ajieɔ nui komɛi kɛjɛɔ mli. Afɔɔ la hamɔ yɛ enɛ mli. Akɛ mɛi 14 tee helatsamɔ he ko yɛ maŋ ko mli yɛ hela nɛɛ hewɔ. Helatsɛmɛi lɛ ateŋ mɔ kome ji Odasefonyo, onukpa yɛ amɛ asafo lɛ mli. Akɛɛ lɛ akɛ la ni akɛaaha lɛ pɛ ji tsofafeemɔ gbɛ ni yɔɔ. Onukpa nɛɛ tsɔɔ e-Ŋmalɛ mli hemɔkɛyelii lɛ amli ni ekɛ shiŋŋ-feemɔ kpoo la. (Bɔfoi lɛ Asaji 15:28, 29) Yɛ be mli ni aje ŋwane babaoo lɛ, datrɛfoi lɛ kɛɛ lɛ akɛ ebaagbo yɛ la ni ekpoo lɛ hewɔ.
Akɛ la ha helatsɛmɛi krokomɛi 13 lɛ. Nɔ ni yɔɔ gbeyei ji akɛ, amɛ fɛɛ amɛgboi yɛ gbii fioo ko sɛɛ. Nyɛmi nuu lɛ pɛ ji mɔ ni je mli! Helatsamɔ he lɛ mli onukpai lɛ anaa kpɛ amɛhe waa. Tsofa-feemɔ nitsulɔi lɛ ahiɛ sɔ bɔ ni asafo lɛ mli bii lɛ saraa lɛ daa lɛ waa. Beni ajie lɛ kɛjɛ helatsamɔ he lɛ sɛɛ lɛ, nyɛmi nuu lɛ tee eyada datrɛfoi lɛ ashi, shi amɛkɛɛ: “Mɛni hewɔ odaa wɔ shi? Daa Yehowa, o-Nyɔŋmɔ lɛ shi. Lɛ ji Mɔ ni here oyiwala. Ofainɛ sɔlemɔ oha Yehowa, o-Nyɔŋmɔ lɛ oha wɔ hu.”
[Akrabatsa ni yɔɔ baafa 24]
MAŊ LƐ HE SANE
1994 Sɔɔmɔ Afi
YIFALƐ NI FE FƐƐ NI YAA SHIƐMƆ: 14,271
EMLIJAA: Odasefonyo 1 kɛha mɛi 65,266
MƐI NI BA KAIMƆ LƐ: 38,192
GBƐGBALƆI AMLIJAA: 1,780
BIBLIA KASEMƆI AMLIJAA: 12,453
MƐI NI ABAPTISI: 1,312
ASAFOI SƆRƆTOI AYIBƆ: 410
NITSUMƆ HE NINE: LONAVLA
[Mfoniri ni yɔɔ baafa 25]
Nitsumɔ he nine, Lonavla
[Mfoniri ni yɔɔ baafa 25]
Odaseyeli yɛ “Naanɔ Sanekpakpa” kpee yɛ 1963 lɛ shishi
[Mfoniri ni yɔɔ baafa 25]
Aashiɛ aatsɔɔ nihɔɔlɔ yɛ Red Fort ni yɔɔ Delhi lɛ masɛi