Sanekpakpa Lɛ Kɛhamɔ​—Ni Emɔ Shi Kɛtsɔ Sane Toiboo Nɔ

¹ Kɛji wɔshiɛmɔ nitsumɔ lɛ baamɔ shi lɛ, no lɛ esa akɛ wɔyoo akɛ mɛi enyɔ ko kwraa bɛ ni amɛfeɔ amɛnii pɛpɛɛpɛ. Amɛteŋ mɔ fɛɛ mɔ yɛ shihilɛ mli niiashikpamɔi sɔrɔtoi kɛ nibii ni enyaa he kɛ suɔmɔnaa nii sɔrɔtoi hu. Nitsumɔ ni ka wɔhiɛ ji ni wɔha Maŋtsɛyeli shɛɛ sane lɛ ashɛ amɛŋɔɔ tɛɛ, ni ji akɛ, wɔtsɔɔ mɔ lɛ akɛ wɔmiiwie nɔ ni no tsɔɔ kɛha lɛ akɛ mɔ aŋkro lɛ he. Kɛji wɔɔfee enɛ ni emɔ shi lɛ, no lɛ esa akɛ wɔbo sane toi jogbaŋŋ.

² Shiɛlɔi pii kɛ sanebimɔi tsuɔ nii yɛ ŋaa mli yɛ amɛ hiɛkpamɔ wiemɔi amli, ni enɛ yeɔ ebuaa shiatsɛ lɛ ni ekɛ ehe woɔ sanegbaa lɛ mli. Sanebimɔi ni haa shiatsɛ lɛ tsɔɔ ejwɛŋmɔ. shi ewooo lɛ hiɛgbele lɛ yeɔ ebuaa jogbaŋŋ. Shi kɛ shiatsɛ lɛ miiwie lɛ, ehe miihia waa ni wɔbo nɔ ni ewieɔ lɛ toi jogbaŋŋ. Sane toiboo jieɔ naanyo suɔmɔ kɛ bulɛ ni wɔyɔɔ lɛ kpo, ni kɛ wɔfee nakai lɛ, wɔnaa sanesɛɛkɔmɔ yɛ mɔ lɛ niiashishinumɔ he. Le ni wɔɔle mɔ lɛ shihilɛ lɛ yeɔ ebuaa wɔ ni wɔjieɔ mlihilɛ kpo wɔtsɔɔ lɛ, ni wɔnyɛɔ wɔkɛ wɔhe woɔ eshihilɛ mli. Ni kɛtsɔ enɛ nɔ lɛ wɔnyɛɔ wɔkɛ lɛ jaa Biblia mli miishɛjemɔ kɛ hiɛnɔkamɔ ni wɔyɔɔ lɛ.

Feemɔ Mɔ Ni Nyɛɔ Etsakeɔ Ewiemɔ Mli

³ Bɔfo Paulo wo ŋaa akɛ: “Kasemɔ bɔ ni ooofee okɛ mɔ fɛɛ mɔ ni okɛkpeɔ lɛ awie.” (Kol. 4:⁠6. New English Bible) Eyɛ mli akɛ wɔnyɛɛɛ wɔtsɔ hiɛ wɔle nɔ ni mɔ ko baakɛɛ moŋ, shi wɔle naagbai ni gbɔmɛi babaoo kɛkpeɔ ŋmɛnɛ lɛ jogbaŋŋ. No hewɔ lɛ, wɔbaanyɛ ‘wɔkase’ shihilɛ lɛ ni wɔjwɛŋmɔ afee klalo ni wɔnyɛ wɔtsu shihilɛi sɔrɔtoi lɛ ahe nii.

⁴ Akɛ nɔkwɛmɔ nɔ lɛ, ekolɛ wɔsaa wɔhe akɛ wɔbaawie jeŋ toiŋjɔlɛ namɔ he, shi kɛkɛ lɛ shiatsɛ lɛ etsi ta akɛ enitsumɔ eje edɛŋ. Ani esa akɛ wɔku wɔhiɛ wɔfɔ ewiemɔ nɛɛ nɔ? Ŋwanejee ko bɛ he akɛ, eweku lɛ hiamɔ nii ni eeetao eha amɛ lɛ ka ejwɛŋmɔ kɛ etsui nɔ waa diɛŋtsɛ. Mɛɛ gbɛ nɔ oootsu ehiamɔ nii lɛ ahe nii yɛ? Obaanyɛ otsɔɔ bɔ ni onuɔ he ohaa lɛ, kɛ bɔ ni osusuɔ eshihilɛ lɛ hu he ohaa. No sɛɛ lɛ okɛ mlihilɛ baagbala ejwɛŋmɔ kɛya ŋmalɛi ni tsɔɔ bɔ ni Nyɔŋmɔ nɔyeli lɛ baaha wɔ nitsumɔ ni haa mɔ tsui nyɔɔ emli kɛ wɔhiamɔ nibii fɛɛ hu lɛ nɔ.​—Yes. 65:​17, 21, 22, 24.

⁵ Ekolɛ wɔna wɔle akɛ aye mɔ lɛ diɛŋtsɛ aloo eweku lɛ mlibii lɛ eko awui nyɛsɛɛ nɛɛ aloo ayeee jalɛsane ahaaa lɛ yɛ sane ko mli. Bɔ ni wɔkɛ mlihilɛ nuɔ he wɔhaa kɛ bɔ ni wɔsusuɔ esaji nɛɛ ahe lɛ baanyɛ ajɔɔ mɔ lɛ tsui he, ni eeeha wɔnyɛ wɔtsɔɔ lɛ akɛ Yehowa Nyɔŋmɔ le bɔ ni naagbai nɛɛ haoɔ wɔ waa ehaa lɛ jogbaŋŋ ni akɛ etsɛŋ ni ebaatsu he nii ni ekɛjie efɔŋfeemɔ fɛɛ kɛya kwraa.​—Kwɛmɔ Reasoning From the Scriptures baafai 10, 12, 229-31.

⁶ Bei pii lɛ wekukpaa kpakpa ni bɛ aŋkroaŋkroi ateŋ lɛ baa lɛ nakai ejaakɛ amɛkɛ amɛhe egbaaa sane jogbaŋŋ. Kɛ mɔ kome miiwie lɛ, ekolɛ mɔ kroko lɛ kɛ ejwɛŋmɔ kɛ etsui booo lɛ toi kɛmɔɔɔ shi. Nɛkɛ sane toi ni abooo jogbaŋŋ nɛɛ baanyɛ ekɛ niiashishinumɔ ni anaaa aba aloo hegbɛi ni kulɛ akɛaaye abua mɔ kroko lɛ ni ŋmɛɔ mɔ. Kɛ wɔna su kpakpa ni ji sane toi ni aboɔ jogbaŋŋ kɛ bulɛ lɛ, no lɛ wɔbaanyɛ wɔkɛ sanekpakpa lɛ aha jogbaŋŋ ni emɔ shi, ni wɔjie bɔ ni Yehowa susuɔ mɛi krokomɛi ahe ni pɛsɛmkunya bɛ mli lɛ kpo, ni wɔye wɔbua mɛi krokomɛi ni amɛkɛ wɔ-Bɔlɔ ni yɔɔ suɔmɔ lɛ kɛ ewebii lɛ ana wekukpaa kpakpa.​—Yak. 1:​19; g74 11/22 bf. 21-3.