Sɛɛfimɔ Ni Wɔkɛaaha Gbɛgbalɔi Lɛ

¹ Ale Nyɔŋmɔ Webii yɛ ekaa ni amɛkɛtsuɔ sɔɔmɔ nitsumɔ lɛ hewɔ. Eyɛ mli akɛ jeee mɛi fɛɛ ashihilɛ ŋmɛɔ amɛ gbɛ ni amɛfee gbɛgbalɔi moŋ, shi esa akɛ wɔbɔ mɔdɛŋ ni wɔna gbɛgbamɔ mumɔ lɛ, ni wɔkɛ wɔsusuma fɛɛ atsu nii. Wɔkɛ mɛi babaoo ni nyɛɔ amɛkɛ amɛhe woɔ gbɛgbamɔ sɔɔmɔ lɛ mli lɛ naa miishɛɛ, ni wɔmiiwo amɛ hewalɛ hu.

² Gbɛgbalɔ ni mɔ ko aaafee ni ehi mli hu lɛ ji nitsumɔ wulu. Gbɛgbalɔi tsuɔ shiɛmɔ kɛ nitsɔɔmɔ nitsumɔ lɛ mli ni nɔ fa babaoo. Ni amɛnyɛɔ amɛtsuɔ enɛ kɛtsɔɔ mɔdɛŋbɔɔ kpele kɛ afɔleshaa nɔ. Mɛɛ gbɛ nɔ mɛi krokomɛi aaatsɔ amɛfi nɛkɛ be-fɛɛ sɔɔlɔi ni yɔɔ ekaa nɛɛ asɛɛ ni amɛwo amɛ hewalɛ hu?

³ Nɔ ni Abaanyɛ Afee: Onukpai lɛ asɛɛfimɔ he hiaa gbɛgbalɔi lɛ. Kɛji onukpai lɛ kɛ gbɛgbalɔi lɛ tsu nii lɛ, ewoɔ amɛ hewalɛ waa. Onukpai pii bɔɔ mɔdɛŋ ni amɛkɛ gbɛgbalɔi ni yɔɔ asafo lɛ mli lɛ ateŋ mɔ fɛɛ mɔ atsu nii, kɛ hoo lɛ shikome yɛ afi mli. Yɛ nɛkɛ gbɛ nɔ lɛ, onukpai lɛ nyɛɔ amɛjieɔ gbɛgbalɔi lɛ ayi yɛ nɔ ni amɛtsuɔ lɛ beni amɛyeɔ amɛbuaa amɛ ni amɛyaa amɛhiɛ. Ekolɛ ehe baahia ni gbɛgbalɔi lɛ atsake amɛgbɛjianɔtoo mli ni amɛya shiɛmɔ be mli ni onukpai lɛ baanyɛ amɛkɛ amɛ aya. Agbɛnɛ hu, esa akɛ onukpai lɛ akwɛ akɛ shikpɔŋkuku ni da bɔ ni sa yɛ kɛha kui lɛ fɛɛ. Abaanyɛ ato kpeei krokomɛi kɛha shiɛmɔyaa he gbɛjianɔ yɛ shwane loo gbɛkɛnaashi mli bɔ ni ekɛ gbɛgbalɔi lɛ agbɛjianɔtoo baanyiɛ pɛpɛɛpɛ. Enɛ baafee anɔkwale, titri lɛ yɛ nyɔji ni mɛi pii feɔ gbɛgbalɔi awalɔi lɛ amli.​—Yes 40:⁠11.

⁴ Asafoŋ sɔɔlɔi hu yɛ hegbɛ fɛfɛo ni amɛkɛaaye amɛbua gbɛgbalɔi lɛ kɛtsɔ sɛɛfimɔ ni amɛkɛaaha amɛ yɛ sɔɔmɔ nitsumɔ lɛ mli kɛ mɔdɛŋbɔɔ ni amɛkɛaatsu asafoŋ gbɛjianɔtoi ahe nii lɛ nɔ. Nyɛmimɛi yei gbɛgbalɔi lɛ ahiɛ sɔɔ waa kɛji nyɛmimɛi hii nyiɛ hiɛ kɛto shiɛmɔyaa he gbɛjianɔ yɛ kui lɛ amli. Mɛi ni kwɛɔ woji wuji kɛ woji tɛtrɛbii anɔ lɛ baanyɛ akwɛ akɛ amɛyɛ woji ni fa bɔni sa be fɛɛ be. Kɛji atsu nibii nɛɛ ahe nii lɛ, eyeɔ ebuaa gbɛgbalɔi lɛ ni amɛjwɛŋmɔ hiɔ amɛsɔɔmɔ nitsumɔ lɛ nɔ.

⁵ Mɔ Fɛɛ Mɔ Baanyɛ Aye Abua: Shiɛlɔi baanyɛ amɛkɛ amɛhe aha yɛ be kɛ bei amli ni amɛkɛ gbɛgbalɔi lɛ atsu nii ni amɛkɛye amɛbua amɛ. Gbɛgbalɔi lɛ naa shiɛlɔi krokomɛi lɛ kɛ nitsumɔ kɛ amɛsɛɛfimɔ he miishɛɛ. Ekolɛ obaanyɛ oto gbɛjianɔ ni okɛ gbɛgbalɔi lɛ atsu nii shikome yɛ otsi mli loo shii enyɔ yɛ nyɔŋ kome mli. Abaanyɛ akɛ gbɛgbalɔi lɛ hu aja heloonaa nibii, ni gbɛgbalɔi lɛ ahiɛ sɔɔ nɛkɛ nikee nɛɛ waa diɛŋtsɛ.​—Filip. 4:​14-19.

⁶ Wekui baanyɛ afee babaoo ni amɛkɛfi amɛmlibii ni ji gbɛgbalɔi lɛ asɛɛ. Bei pii lɛ, abaanyɛ ato shia nitsumɔi ahe gbɛjianɔ bɔ ni ebaaha weku lɛ mli mɔ kome loo mɛi pii afee gbɛgbalɔi. Nyɛmiyoo ko ni hiɛ bii etɛ tsuɔ nii gbii enyɔ yɛ otsi mli. Ebihii lɛ yaa jara nɔ ni amɛtsuɔ shia nitsumɔi ni amɛkɛyeɔ amɛbuaa. Ni ebiyoo lɛ yeɔ buaa kɛ shia saamɔ kɛ nihoomɔ. Kɛjɛ be mli ni biyoo lɛ gbe skul naa nɛɛ, lɛ hu eje gbɛgbamɔ shishi, ni ekɛ enyɛ eja gbii ni akɛtsuɔ shia nitsumɔ lɛ. Ekomefeemɔ ni tamɔ nɛkɛ ni hiɔ weku lɛ mli lɛ haa mɛi pii nyɛɔ amɛfeɔ gbɛgbalɔi ni ekɛ jɔɔmɔi baa weku lɛ nɔ.

⁷ Gbɛgbalɔi ni kɛ mɔdɛŋbɔɔ tsuɔ nii lɛ bafeɔ jɔɔmɔ kɛhaa asafo lɛ yɛ gbɛi babaoo nɔ. Amɛ ekaa kɛ nɔkwɛmɔ nɔ lɛ woɔ mɛi pii ahewalɛ ni amɛtsu babaoo yɛ sɔɔmɔ nitsumɔ lɛ mli. Eka shi faŋŋ akɛ, wɔbaasumɔ ni wɔfee bɔ ni wɔɔnyɛ ni wɔkɛfi amɛsɛɛ. Nɛkɛ mɔdɛŋbɔɔ yɛ ekomefeemɔ mli nɛɛ haa mɔ fɛɛ mɔ naa miishɛɛ ni ebafeɔ yijiemɔ kɛhaa Yehowa.