Ani Gbɛgbamɔ Shinaa lɛ Egbele Eha Bo Agbɛnɛ?
1 Wɔ afi 1999 afi ŋmalɛ lɛ kaiɔ wɔ akɛ wɔyɛ Yehowa “yiwalaheremɔ gbi” lɛ mli lolo. (2 Kor. 6:2) Shi etsɛŋ ni eyiwalaheremɔ gbi lɛ baaba enaagbee. No sɛɛ lɛ, ‘ekojomɔ gbi’ lɛ baaje shishi. (2 Pet. 2:9) Yɛ be mli ni Yehowa kɛ hegbɛ haa lolo kɛha yiwalaheremɔ lɛ, kwɛ miishɛɛ ni eji akɛ wɔnaa akɛ mɛi babaoo miihere nɔ!
2 Yehowa webii miibɔ mɔdɛŋ koni amɛkpee kaa ni amɛkɛkpeɔ bɔni afee ni amɛnine ashɛ mɛi ni baakpɛlɛ nɔ lɛ nɔ dani efee nɔ ni ekpe sɛɛ tsɔ̃. Kɛha Maŋtsɛyeli shiɛlɔi pii lɛ, enɛ tsɔɔ akɛ esa akɛ amɛkɛ amɛhe awo gbɛgbamɔ sɔɔmɔ nitsumɔ lɛ mli. Ani gbɛgbamɔ shinaa lɛ egbele eha bo agbɛnɛ? Mɛni hewɔ wɔbiɔ nɛkɛ sane?
3 Hiɛsɔɔ Kpo ni Mɛi Ejie Etsɔɔ: Taakɛ atswa he adafi yɛ January 1999 Wɔ Maŋtsɛyeli Sɔɔmɔ lɛ mli lɛ, átse ŋmɛlɛtswaa ni ataoɔ kɛjɛɔ daa gbɛgbalɔi kɛ gbɛgbalɔi awalɔi adɛŋ lɛ nɔ. Bɔni afee ni nine ashɛ taomɔ nii hee lɛ nɔ lɛ, ehe miihia ni daa gbɛgbalɔi kɛ ŋmɛlɛtswai 70 atsu nii yɛ amɛsɔɔmɔ nitsumɔ lɛ mli daa nyɔŋ nɔ, ni kɛ abua fɛɛ naa lɛ, daa afi lɛ ebaafee ŋmɛlɛtswai 840. Gbɛgbalɔi awalɔi kɛ ŋmɛlɛtswai 50 baatsu nii yɛ sɔɔmɔ nitsumɔ lɛ mli daa nyɔŋ nɔ. Naa hiɛsɔɔ ni mɛi komɛi ejie kpo amɛtsɔɔ yɛ tsakemɔ lɛ hewɔ ni wɔnine eshɛ nɔ:
“Mɛɛ jɔɔmɔ nikeenii ni jɛ wɔŋwɛi Tsɛ lɛ ŋɔɔ po nɛ!”
“Wiemɔ nyɛŋ atsɔɔ miishɛɛ, suɔmɔ, kɛ shidaa henumɔ ni miná yɛ nii ni akɛha nɛɛ hewɔ!”
“Ebaaha wɔnine ashɛ wɔ be he gbɛjianɔtoo lɛ nɔ yɛ gbɛ ni waaa kwraa nɔ!”
“Wɔsɔlemɔ ji akɛ, mɛi babaoo baaba agbɛnɛ ni amɛkɛ amɛhe awo be-fɛɛ sɔɔmɔ nitsumɔ lɛ mli, ni amɛná jɔɔmɔi ni jɛɔ Yehowa sɔɔmɔ mli baa yɛ gbɛ ni mli lɛɛ nɔ lɛ mli ŋɔɔmɔ.”
4 Yɛ be mli ni wɔbɛŋkɛɔ Nyɔŋmɔ yiwalaheremɔ gbi lɛ naagbee nɛɛ, eka shi faŋŋ akɛ Yehowa miisumɔ ni ewebii lɛ kɛ naagbee yijiemɔ oshebɔɔ aha. Shɛɛ sane lɛ anunyam kɛ emliwalɛ lɛ yaa hiɛ (1) kɛtsɔ Maŋtsɛyeli jajelɔi lɛ ayifalɛ ni yaa hiɛ lɛ nɔ kɛ (2) kɛtsɔ bɔ ni mɔ fɛɛ mɔ akɛ aŋkroaŋkro bɔɔ mɔdɛŋ koni etsu bɔ ni eeenyɛ yɛ Maŋtsɛyeli shiɛmɔ nitsumɔ lɛ mli lɛ nɔ. Yehowa, “mɔ ni haa eshwereɔ” lɛ eha aye omanye yɛ gbɛ̀i srɔtoi enyɔ lɛ fɛɛ mli kɛtsɔ mɛi fɛɛ ni jieɔ mumɔ kpakpa kpo ni amɛkpɛlɛɔ yiwalaheremɔ lɛ nɔ lɛ nɔ.—1 Kor. 3:6, 7; Lala 110:3.
5 Kaaha Duromɔ lɛ Fee Yaka: Yehowa yiwalaheremɔ gbi lɛ hewɔ Paulo wo nanemɛi Kristofoi lɛ ŋaa akɛ: “Shi akɛ nɔ ni [Yehowa] hefatalɔi nitsulɔi ji wɔ hewɔ lɛ, wɔwieɔ wɔtsɔɔ nyɛ hu, ni nyɛkahe Nyɔŋmɔ duromɔ lɛ yakatswaa.” Wɔhaŋ “duromɔ lɛ afee yaka” kɛji akɛ wɔna akɛ “be ni sa” ni wɔkɛaatsu mɛi krokomɛi ayiwalaheremɔ he nii lɛ nɛ. (2 Kor. 6:1, 2) Ŋmɛnɛ, Paulo wiemɔi lɛ he miihia waa diɛŋtsɛ. Kristofoi ni jieɔ tsuiŋ suɔmɔ kpo amɛtsɔɔ Yehowa lɛ naa akɛ eji hegbɛ ni amɛná akɛ amɛkɛ amɛhe aaawo sɔɔmɔ nitsumɔ ni akɛwo amɛdɛŋ lɛ mli kɛmɔ shi. Ani oonyɛ okɛ ohe miiwo sɔɔmɔ nitsumɔ lɛ mli amrɔ nɛɛ kɛmiimɔ shi ákɛ gbɛgbalɔ?
6 Eji Oti ni Abaanyɛ Atsu He Nii: Oti ni ma wɔhiɛ yɛ Ghana ji ni wɔná gbɛgbalɔi 5,000 yɛ September 1 mli. Wɔheɔ wɔyeɔ akɛ enɛ ji oti ni abaanyɛ atsu he nii. Mɛni hewɔ wɔyɔɔ nɔmimaa waa nakai? Yɛ March 1997 mli lɛ, nyɛmimɛi hii kɛ yei 5,759 kɛ amɛhe wo gbɛgbalɔi awalɔ nitsumɔ lɛ mli, ni yɛ April 1998 mli lɛ mɛi aaashɛ 4,800 fee nakai. Amɛteŋ mɛi pii bu ŋmɛlɛtswai 60 he akɔntaa—nɔ ni shwɛ ŋmɛlɛtswai 10 pɛ ni eshɛ daa gbɛgbamɔ ŋmɛlɛtswaa hee ni ataoɔ lɛ he! No hewɔ lɛ, kɛji akɛ mɛi 750 pɛ ni kɛ amɛhe wo gbɛgbalɔi awalɔ nitsumɔ lɛ mli lɛ kɛ amɛhe wo daa gbɛgbamɔ nitsumɔ lɛ mli lɛ, no lɛ, dani sɔɔmɔ afi nɛɛ aaaba enaagbee lɛ, wɔbaanyɛ wɔná mɛi 5,000 aloo be-fɛɛ gbɛgbalɔi ni fa fe nakai kɛje September shishi!
7 Be He Gbɛjianɔtoo He Miihia: Ani etamɔ nɔ ni ŋmɛlɛtswai 70 lɛ ji nɔ ko ni onine nyɛŋ ashɛ nɔ lolo? Ekolɛ kɛ osusu he yɛ nɛkɛ gbɛ nɔ akɛ obaaná ŋmɛlɛtswai 17 daa otsi lɛ, ebaanyɛ eye ebua bo. Okɛ be he gbɛjianɔtoo he nɔkwɛmɔnɔ ni afee yɛ baafa ni nyiɛ sɛɛ lɛ atsu nii ni obɔ mɔdɛŋ ni oto daa gbɛgbamɔ be ni baahi aha bo diɛŋtsɛ oshihilɛ he gbɛjianɔ. Yɛ be mli ni otsuɔ he nii lɛ, okɛ gbɛgbalɔi ni yɔɔ niiashikpamɔ awie he koni amɛtsɔɔ bo amɛjwɛŋmɔ yɛ gbɛ ni amɛtsɔ nɔ amɛŋmɛ pɛpɛɛpɛ yɛ amɛgbɛgbamɔ sɔɔmɔ nitsumɔ lɛ mli yɛ amɛ diɛŋtsɛ kɛ amɛ weku gbɛnaa nii ahe nitsumɔ lɛ fɛɛ sɛɛ. Bi nyɛ kpokpaa nɔkwɛlɔ lɛ koni etsɔɔ bo bɔ ni gbɛgbalɔi ni yɔɔ kpokpaa lɛ nɔ lɛ toɔ amɛ sɔɔmɔ nitsumɔ lɛ he gbɛjianɔ daa otsi amɛhaa. Koni agbɛnɛ, okɛ ohiɛ afɔ̃ Yehowa nɔ koni ejɔɔ gbɛjianɔ ni oto koni osɔmɔ akɛ gbɛgbalɔ lɛ nɔ.—Abɛi 16:3.
8 Ha Efee Oweku lɛ Nifeemɔ: Ani osusu he pɛŋ akɛ oooha gbɛgbamɔ nitsumɔ lɛ afee oweku lɛ nifeemɔ? Nyɛbaanyɛ nyɛta shi akɛ weku koni nyɛsusu gbɛ nɔ ni nyɛaatsɔ nyɛtsu he nii—ni nyɛto he gbɛjianɔ jogbaŋŋ ni nyɛkɛ ekomefeemɔ kpakpa atsu nii—ekolɛ weku lɛ mli bii ateŋ mɔ kome aloo mɛi enyɔ baanyɛ amɛkɛ amɛhe awo gbɛgbamɔ nitsumɔ lɛ mli. Eka shi faŋŋ akɛ, yɛ anɔkwale mli lɛ, mɛi komɛi ashihilɛ eŋmɛŋ amɛ gbɛ koni amɛkɛ amɛhe awo daa gbɛgbamɔ nitsumɔ lɛ mli bianɛ. Kɛ́ nakai ji sane lɛ, no lɛ nyɛhaa gbɛgbamɔ nitsumɔ lɛ afea oti ni ma nyɛhiɛ akɛ nɔ ko ni nyɛbaatsu he nii wɔsɛɛ. Shi jee shishi oto gbɛjianɔ kɛha gbi pɔtɛɛ ni nyɛbaaje gbɛgbamɔ nitsumɔ lɛ shishi. Ekolɛ nyɛbaanyɛ nyɛkɛ nyɛhe awo gbɛgbalɔi awalɔ nitsumɔ lɛ mli shii abɔ yɛ afi lɛ mli koni nyɛkɛtsu daa gbɛgbamɔ sɔɔmɔ nitsumɔ lɛ he nii.
9 Gbɛgbalɔi ni fa fe 4,200 ni yɔɔ Ghana amrɔ nɛɛ lɛ yɛ shihilɛi srɔtoisrɔtoi amli. Jeee amɛ fɛɛ amɛyɔɔ gbɔmɔtsɔŋ hewalɛ kpakpa, ni amɛteŋ mɛi pii yɛ weku kɛ shika he gbɛnaa nii. Gbɛgbalɔi lɛ ekomɛi eye fe afii 50, ni amɛteŋ mɛi fioo komɛi hu eye fe afii 65. Amɛteŋ mɛi pii ji oshijafoi, ni amɛteŋ mɛi saŋŋ ji mɛi ni eye afii 20 aloo nɔ ni shɛɛɛ nakai. Aaafee gbɛgbalɔi lɛ ejwɛ mlijaa ekome ji nyɛmimɛi hii, ni amɛteŋ mɛi pii yɛ weku kɛ asafoŋ gbɛnaa nii. Mɛnɛɛmɛi fɛɛ ‘miitsu amɛdekã he nii,’ yɛ gbɛgbamɔ nitsumɔ lɛ mli, ni bei pii lɛ nɔ ni etsɔɔ ji akɛ, amɛbaahi shi yɛ gbɛ ni yɔɔ mlɛo nɔ.—Kol. 4:5.
10 Ani Ehe Miihia ni Ohi Shi yɛ Gbɛ ni Yɔɔ Mlɛo Nɔ? Shi ni ooohi yɛ gbɛ ni yɔɔ mlɛo nɔ lɛ ji nɔ̃ titri ni baagbele gbɛ kɛha bo koni okɛ ohe awo gbɛgbamɔ nitsumɔ lɛ mli. Ani oshihilɛ tamɔ shia agbo ko ni tsũi kɛ tsũ mli saamɔ nibii ní he ehiaaa yɔɔ mli, ní biɔ be, shika kɛ nitsumɔ babaoo bɔni afee ni otsu amɛhe nii? Kɛ nakai ji sane lɛ, no lɛ oshihilɛ ní ooofee lɛ mlɛo lɛ baanyɛ aha oná hegbɛ koni okɛ ohe awo gbɛgbamɔ nitsumɔ lɛ mli. Ani obaanyɛ otse be ni oyeɔ yɛ heloonaa nitsumɔ mli lɛ nɔ? Ani obaanyɛ oná be kɛjɛ nibii ni he ehiaaa lɛ mli, aloo ni oŋmɛ pɛpɛɛpɛ jogbaŋŋ yɛ be ni ofiteɔ yɛ hiɛtserɛjiemɔ mli?
11 Biblia lɛ woɔ wɔ ŋaa yɛ 1 Timoteo 6:8 akɛ: “Kɛ wɔyɛ ŋmãa kɛ hehaanii kɛkɛ lɛ, esa akɛ wɔmii ashɛ he.” Ní wɔmii aaashɛ nii fioo ni wɔyɔɔ lɛ he lɛ ji gbɛ ni he hiaa ni wɔɔtsɔ nɔ wɔfee babaoo ni wɔɔnyɛ yɛ Yehowa sɔɔmɔ lɛ mli, ni ehaa mumɔŋ nibii ni wɔkɛaaye klɛŋklɛŋ gbɛhe lɛ feɔ mlɛo. (Mat. 6:22, 33) Yɛ amaniɛbɔɔ ni akɛha yɛ 1998 Yearbook lɛ baafa 104 lɛ mli ni kɔɔ Japan he lɛ mli lɛ, akɛ ŋaawoo babaoo ni tsɔɔ nɔ hewɔ ni mɛi pii yɔɔ gbɛgbamɔ mumɔ yɛ nakai shikpɔŋ lɛ nɔ lɛ ha. Susumɔ ekome he okwɛ: “Eji anɔkwale akɛ Japanbii ashiai bɛ haŋtsii, ni ehaa amɛkɛ be fioo pɛ tsuɔ he nii, ni amɛteŋ mɛi pii feɔ amɛshihilɛ mlɛo.” Ani jeee no ji shishinumɔ ni yɔɔ 1 Timoteo 6:8 lɛ sɛɛ?
12 Nyɔŋmɔ tsuji ni yɔɔ jeŋ fɛɛ lɛ miishiɛ sanekpakpa lɛ kɛ ekãa babaoo dani Yehowa yiwalaheremɔ gbi lɛ ashɛ enaagbee. Esa yijiemɔ waa akɛ, daa nyɔŋ nɔ yɛ nyɛsɛɛ afi lɛ mli lɛ, kɛ́ aja mli lɛ aaafee mɛi 700,000 kɛ amɛhe wo gbɛgbamɔ sɔɔmɔ nitsumɔ lɛ fã ko mli. Ani obaanyɛ otsake oshihilɛ mli koni ofata amɛhe? Wɔmiifɔ̃ bo nine koni okɛ sɔlemɔ asusu oshihilɛ he jogbaŋŋ yɛ be mli ni ohaa sanebimɔ akɛ: “Ani Gbɛgbamɔ Shinaa lɛ Egbele Eha Bo Agbɛnɛ?” lɛ hetoo lɛ.
[Sane ni yɔɔ baafa 3]
OTI NI MA WƆHIƐ: DAA GBƐGBALƆI 5,000!