Esa akɛ Ashwie Dumɔwui Anɔ Nu Koni Amɛdara
1. Mɛni esa akɛ ashwie nɔ nu koni amɛdara?
1 Kɛ́ adu dumɔwui lɛ, esa akɛ ashwie nɔ nu koni amɛdara. Nakai nɔŋŋ esa akɛ wɔshwie anɔkwale dumɔwui ni wɔduɔ yɛ mɛi ni yɔɔ wɔshikpɔŋkuku lɛ mli lɛ atsui mli lɛ anɔ nu. (1 Kor. 3:6) Kɛ́ wɔmiisumɔ ni mfonirifeemɔŋ dumɔwui nɛɛ akwɛ̃, amɛdara, ni amɛwo yibii lɛ, esa akɛ wɔku wɔsɛɛ wɔyasara amɛ shii abɔ, ni wɔkɛ Nyɔŋmɔ Wiemɔ lɛ atsu nii kɛshwie amɛnɔ nu.
2. Te wɔɔfee tɛŋŋ wɔsaa shiatsɛ lɛ jwɛŋmɔ kɛha sɛɛkuu-kɛsaramɔ?
2 Bi Sane: Kɛ́ oosaa ohe kɛ shiɛmɔ wiemɔ ni okɛbaatsu nii lɛ, taomɔ sanebimɔ ko hu ni baanyɛ atee mɔ miishɛɛ shi ní obaanyɛ oha hetoo kɛ́ oofee sɛɛkuu-kɛsaramɔ. Kɛ́ okɛ mɔ ko gba sane klɛŋklɛŋ kwraa ni oomu naa lɛ, bi lɛ sane lɛ ni okɛ lɛ ato gbɛjianɔ ni sa kɛha sɛɛkuu-kɛsaramɔ. Mɛi pii ena akɛ ehi jogbaŋŋ akɛ amɛaahala sanebimɔ lɛ kɛjɛ Biblia lɛ Tsɔɔ wolo lɛ mli koni no aha amɛná hegbɛ kɛtsɔɔ mɔ lɛ bɔ ni wɔkɛ mɛi kaseɔ Biblia lɛ.
3. Mɛɛ saji nɛkɛ obaanyɛ oŋmala oshwie shi kɛ́ mɔ ko jie miishɛɛ kpo?
3 Ŋmalamɔ Nibii Oshwie Shi: Kɛ́ oshi mɔ ni okɛ lɛ gba sane klɛŋklɛŋ kwraa lɛ ŋɔɔ nɔŋŋ lɛ, ŋɔɔ be ni okɛŋmala nibii oshwie shi. Ŋmaa mɔ lɛ gbɛ́i kɛ edrɛs. Ehi hu akɛ oŋma gbi kɛ be ni okɛ lɛ wie lɛ, kɛ sane ni nyɛgba lɛ, ni kɛ́ oha lɛ wolo ko lɛ, ŋmaa no hu. Ani etsɔɔ akɛ eyɛ jamɔ ko mli? Ani eyɛ ŋa kɛ bii? Ani etsĩ nibii ni esumɔɔ kɛ nibii ni gbaa enaa lɛ atã? Saji ni tamɔ enɛɛmɛi lɛ baaye abua bo ni ole saji ni okɛ lɛ baagba kɛ́ oku osɛɛ otee eŋɔɔ. Agbɛnɛ hu ŋmaa be ni otsɔɔ akɛ obaaku osɛɛ oya lɛ, kɛ sanebimɔ ni obaayaha hetoo lɛ.
4. Mɛni hewɔ esa akɛ wɔkã he wɔya mɛi ni yɔɔ wiemɔ lɛ he miishɛɛ lɛ aŋɔɔ lɛ?
4 Kã He: Satan etswa efai shi akɛ ebaaya nɔ ‘eshara wiemɔ lɛ’ ni aduɔ yɛ mɛi atsuiiaŋ lɛ. (Mar. 4:14, 15) No hewɔ lɛ, kɛ́ oku osɛɛ otee mɔ ko ni jie miishɛɛ kpo lɛ ŋɔɔ ni oyanaaa lɛ ekoŋŋ lɛ, onijiaŋ akaje wui. Ani obaanyɛ oŋma lɛ wolo loo oŋma nɔ ko fioo ni oshi yɛ eshinaa lɛ naa? Gbɛgbalɔ ko kɛ yoo ko je nikasemɔ shishi yɛ eshinaa naa, shi no sɛɛ kɛ́ etee yoo lɛ ŋɔɔ lɛ enaaa lɛ, no hewɔ lɛ eŋma lɛ wolo. Sɛɛ mli beni eyana yoo lɛ yɛ shĩa agbɛnɛ lɛ, yoo lɛ tsɔɔ akɛ ehiɛ esɔ suɔmɔ kpo ni gbɛgbalɔ lɛ jie etsɔɔ lɛ lɛ waa. Kɛ́ wɔtee nɔ wɔshwie anɔkwale dumɔwui lɛ anɔ nu, ni wɔna akɛ amɛkwɛ̃, amɛdara, ni ‘amɛmiiwo yibii, eko nyɔŋmai etɛ, eko nyɔŋmai ekpaa, kɛ eko oha’ lɛ, wɔbaaná miishɛɛ naakpa.—Mar. 4:20.