Wɔmiikpee Bo Atuu Kɛmiiba “Nyɔŋmɔ Gbeyeishemɔ” Kpokpaa Wulu nɔ Kpee lɛ Shishi!

HƐƐ, be lɛ miibɛŋkɛ oyayaayai kɛha 1994 kpokpai wuji anɔ kpee ni Yehowa Odasefoi baafee lɛ. Kɛjɛ June 1994 kɛyashi January 1995 lɛ, abaabo nɛkɛ gbii etɛ kpee nɛɛ shishi wiemɔi atoi yɛ maŋtiasei ohai abɔ mli yɛ je lɛŋ fɛɛ—klɛŋklɛŋ lɛ yɛ Amerika Kooyigbɛ, no sɛɛ lɛ, yɛ Europa Bokagbɛ kɛ Anaigbɛ, Asia, Amerika Teŋgbɛ kɛ Wuoyigbɛ, Afrika, Australia, kɛ ŋshɔkpɔi lɛ anɔ hu.

Mɛɛ saneyitso ni kanyaa niiahesusumɔ nɛ—“Nyɔŋmɔ Gbeyeishemɔ”! Enɛ jeee gbeyeishemɔ gbonyo tamɔ nɔ ni mɔ ko ni wala eyaje oshara mli lɛ aaana lɛ, shi moŋ Nyɔŋmɔ gbeyeishemɔ, gbeyeishemɔ ni haa mɔ naa jwɛŋmɔŋ toiŋjɔlɛ kɛ miishɛɛ. Biblia mli abɛbua lɛ kɛɔ akɛ: “Heshibaa kɛ Yehowa gbeyeishemɔ nyɔmɔwoo ji nii kɛ hiɛnyam kɛ wala.” (Abɛi 22:4) Mɛɛ gbɛ nɔ Nyɔŋmɔ gbeyeishemɔ aaatsɔ ekɛ “nii kɛ hiɛnyam kɛ wala” aba? Enɛ baaje kpo faŋŋ beni agbalaa kpee lɛ yitso lɛ mli yɛ gbii etɛ ni eyi obɔ kɛ wiemɔi ni abaaha, sanegbaai, nɔkwɛmɔ nii, kɛ drama hu lɛ mli lɛ.

Bɔfo Paulo ŋma akɛ esaaa akɛ ‘wɔkwaa wɔhe naabuamɔ kutuu.’ (Hebribii 10:25) Yehowa Odasefoi susuɔ enɛ he akɛ ehe miihia, ni amɛkpeɔ shii etɛ yɛ otsi mli kɛha asafoŋ nikasemɔ kɛ jamɔ. Shi, daa afi kpokpaa wulu nɔ kpee lɛ ji kpee krɛdɛɛ ko. Amɛkɛ miishɛɛ babaoo kpaa nakai kpee lɛ gbɛ, ni yɛ kpee lɛ sɛɛ hu lɛ, amɛkɛ nyɔji babaoo wieɔ he. Wɔkɛ miishɛɛ miifɔ bo nine, ni jamɔ fɛɛ jamɔ mli ni oyɔɔ lɛ kɔɔɔ he eko, ni ofata amɛhe yɛ amɛkpee lɛ shishi ni ona amɛ Kristofoi anaanyobɔɔ kɛ mumɔŋ nibii ni he hiaa waa lɛ ahe sɛɛ. Yehowa Odasefoi asafo ni yɔɔ maŋ ni oyɔɔ mli lɛ mlinyo baana he miishɛɛ akɛ etsɔɔ he ni abaafee kpee ni bɛŋkɛ bo fe fɛɛ lɛ yɛ kɛ be mli ni abaafee hu.