Namɛi Ji Toiŋjɔlɛ He Bɔfoi Diɛŋtsɛ?
YƐ May 31, 1996, ni adafitswaa woji amli saji jaje nɔ ko ni tamɔ toiŋjɔlɛ shɛɛ sane. Atswa adafi ko ni jɛ nɔyeli lɛ ŋɔɔ gbi ni tsɔ hiɛ lɛ mli ni miima nɔ mi akɛ, Benjamin Netanyahu, ni miihe atsɔ Israel maŋ sɔɔlɔ nukpa lɛ “kɛ ehe eha toiŋjɔlɛ gbɛjianɔtoo lɛ nɔtsamɔ, toiŋjɔlɛ kɛ shweshweeshwe shihilɛ, yɛ Israel maŋ lɛ kɛ maji ni bɛŋkɛ lɛ lɛ fɛɛ teŋ, ni Palestinabii fata he.”
Netanyahu oshikifɔ̃ɔ ni atswa he adafi waa lɛ ha mɛi pii susu akɛ ekolɛ Boka Teŋgbɛ toiŋjɔlɛ lɛ baanyɛ aba mli. Kɛji nakai ni lɛ, ani maji krokomɛi baanyɛ anyiɛ sɛɛ, ni amɛhiɛ akpa béi ni kã amɛteŋ lɛ nɔ?
Shi, ewaaa ákɛ, akɛ toiŋjɔlɛ he shiwoo aaaha fe ni nine aaashɛ nɔ. Akɛni ale enɛ hewɔ lɛ, mɛi pii ayiŋ fee amɛ kɔshikɔshi. Taakɛ adafitswaa woji aŋmalalɔ Hemi Shalev wie he lɛ, “gbɔmɛi ni yɔɔ Israel lɛ ateŋ mɛi ni shɛɔ fã nyiɛ kɛ henumɔ akɛ kpɔmɔ ebɛŋkɛ agbɛnɛ, ni fã ni eshwɛ lɛ heɔ yeɔ akɛ átsɔ̃ Israel tsɔne yɛ shihilɛ ko ni yɔɔ gbeyei kɛ piŋmɔ babaoo ni foijee ko bɛ mli lɛ mli.” Yɛ enaamuu mli lɛ ejaje akɛ: “Mɛi komɛi amli efili amɛ; mɛi krokomɛi miifo.”
Nakai ebaa lɛ yɛ toiŋjɔlɛ he mɔdɛŋ ni gbɔmɔ bɔɔ lɛ mli. Hiɛnyiɛlɔ kome kɛ esɛɛnyiɛlɔi lɛ akunimyeli tsɔɔ mɛi ni teɔ shi woɔ amɛ lɛ anɔ kunim ni aye. Tsui ni enyɔɔɔ mɔ mli kɛ heyeli kɛmiijɛ lakamɔ mli baa, ni bei pii lɛ heyeli kɛmiijɛ lakamɔ mli kɛ mɔ yaa atuatsemɔ mli. Kɛ́ yɛ Boka Teŋgbɛ, Latin Amerika, Europa Bokagbɛ, loo he kroko hu lɛ—mɔdɛŋ ni adesa bɔɔ yɛ toiŋjɔlɛ he lɛ lakaa mɔ waa.
Toiŋjɔlɛ Diɛŋtsɛ Ebɛŋkɛ!
Beni toiŋjɔlɛ yɛ Boka Teŋgbɛ lɛ ji adafitswaa mli sane ni awieɔ he waa lɛ, kɛkɛ ni anu toiŋjɔlɛ he shɛɛ sane kroko he. Enɛ jeee maŋkwramɔŋ wiemɔ ni ahã ni awie he yɛ he fɛɛ he; ni asaŋ ejeee toiŋjɔlɛ kpaŋmɔ ni tee nɔ yɛ maji ateŋ. Shi moŋ, shɛɛ sane nɛɛ jaje toiŋjɔlɛ ni baaba kɛtsɔ Nyɔŋmɔ Maŋtsɛyeli lɛ pɛ nɔ. Nɛgbɛ anu shɛɛ sane nɛɛ yɛ? Yɛ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei fe 1,900 ni Yehowa Odasefoi fee yɛ jeŋ fɛɛ yɛ 1996/97 lɛ ashishi.
Afee lɛ faŋŋ yɛ kpeei nɛɛ ashishi akɛ adesa nɔyeli ko bɛ ni baanyɛ ekɛ anɔkwa toiŋjɔlɛ kɛ shweshweeshwe shihilɛ aba. Mɛni hewɔ? Ejaakɛ enɛ baabi ni akɛ nibii ni haaa wɔna toiŋjɔlɛ daa gbi lɛ aba naagbee. Anɔkwa toiŋjɔlɛ shishi ji ni ate shi daa leebi ni tawuu kɛ awuiyeli he gbeyeishemɔ bɛ. Etsɔɔ efɔŋ feemɔ ni bɛ dɔŋŋ, kladoai kɛ samfei ni wɔkɛlalaa wɔ shinaai asɛɛ ni bɛ dɔŋŋ, gbɛjegbɛi anɔ nyiɛmɔ he gbeyeishemɔ ni bɛ dɔŋŋ, wekui ni mli egbala ni bɛ dɔŋŋ. Mɛɛ shikpɔŋ nɔ nɔyeli baanyɛ atsu enɛɛmɛi fɛɛ? Yɛ anɔkwale mli lɛ, mɛɛ shikpɔŋ nɔ nɔyeli yɔɔ ni baaka po akɛ ekɛ shiwoo ni tamɔ nɛkɛ aaaha?
Shi Nyɔŋmɔ Maŋtsɛyeli lɛ baanyɛ, ni ekɛ nɛkɛ nibii nɛɛ baaba. Biblia lɛ woɔ shi akɛ: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:3, 4) Mɛɛ hejɔlɛ enɛ kɛbaaba abaha adesai ni piŋɔ lɛ nɛkɛ!
Yehowa Nyɔŋmɔ shiwoo efeee efolo. Biblia lɛ maa nɔ mi kɛhaa wɔ akɛ: “Jeee gbɔmɔ ji Mawu ni eeemale, aloo gbɔmɔ bi ni eeeshwa ehe. Aso eeekɛɛ nɔ ko ni efeŋ? Aloo eeewo shi ni eyeŋ nɔ?” (4 Mose 23:19) Hɛɛ, nɔ ni Nyɔŋmɔ ewo shi yɛ he lɛ baaba mli—kɛha mɛi fɛɛ ni damɔɔ emasɛi lɛ ajɔɔmɔ.
Nyɔŋmɔ Toiŋjɔlɛ He Bɔfoi
Ale Yehowa Odasefoi jogbaŋŋ yɛ ekãa ni amɛkɛshiɛɔ Nyɔŋmɔ Maŋtsɛyeli lɛ he sane lɛ hewɔ. Daa afi lɛ, amɛ fɛɛ amɛkɛ ŋmɛlɛtswai fe akpekpei akpe woɔ Biblia mli shɛɛ sane ni haa mɔ tsui nyɔɔ emli ni amɛgbaa mɛi krokomɛi lɛ mli. Enɛ haa Yesu wiemɔi nɛɛ baa mli: “Ni aaashiɛ maŋtsɛyeli lɛ he sanekpakpa lɛ yɛ shikpɔŋ ni ayɔɔ nɔ lɛ nɔ he fɛɛ he ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14, NW) Shɛɛ sane ni Odasefoi lɛ kɛbaa lɛ ji “sanekpakpa” diɛŋtsɛ, ejaakɛ ejajeɔ akɛ Nyɔŋmɔ ŋwɛi Maŋtsɛyeli lɛ ji adesai ahiɛnɔkamɔ kome pɛ. Ni mɛɛ wɔsɛɛ be he hiɛnɔkamɔ ni ma shi shiŋŋ po eji nɛkɛ!
Nyɔŋmɔ Maŋtsɛyeli lɛ miiwo anɔkwa toiŋjɔlɛ kɛ nyɛmimɛi asuɔmɔ ni fimɔɔ amɛ lɛ he yibii yɛ eshishibii lɛ ateŋ amrɔ nɛɛ po. Yesu kɛɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Yehowa Odasefoi bɔɔ mɔdɛŋ ni amɛhi shi yɛ anɔkwa Kristojamɔ shishitoo taomɔ nii nɛɛ naa. Nɔ ni ejɛ mli eba ji akɛ, amɛ nɔ̃ lɛ ji nyɛmifeemɔ ni yɔɔ naakpɛɛ, ni feɔ Yudafoi kɛ Arabiabii, Kroatbii kɛ Serbiabii, Hutubii kɛ Tutsibii ekome. Nɛkɛ toiŋjɔlɛ nɛɛ ni lamɔ pɛ adesai ateŋ mɛi ni fa baanyɛ ala yɛ he nɛɛ efee Yehowa Odasefoi ni yɔɔ jeŋ fɛɛ lɛ agboshinii bianɛ.
Ama hewalɛwoo koni aya nɔ ahi shi yɛ Biblia shishitoo taomɔ nii anaa, ni aya nɔ ashiɛ Nyɔŋmɔ Maŋtsɛyeli lɛ he sanekpakpa lɛ nɔ mi yɛ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpee he wiemɔi ahe gbɛjianɔtoo lɛ mli. Wɔmiifɔ bo nine ni okane gbii etɛ kpee ni kanyãa mɔ ni gbɔmɛi akpekpei abɔ naa mli ŋɔɔmɔ lɛ he amaniɛbɔɔ ni nyiɛ sɛɛ nɛɛ.