Ní Aaanu Biblia Lɛ Shishi Nifeemɔ ni Obaanyɛ Oná He Miishɛɛ
ANƆKWALEI ni jara wa ni jɛ Nyɔŋmɔ ŋɔɔ lɛ yɛ Biblia lɛ mli. Egbaa wɔ yiŋtoo ni yɔɔ shihilɛ sɛɛ, nɔ ni kɛ adesai apiŋmɔ ba, kɛ adesai awɔsɛɛ shihilɛ he sane. Etsɔɔ wɔ bɔ ni wɔɔfee wɔná miishɛɛ, bɔ ni wɔɔfee wɔná nanemɛi, kɛ bɔ ni wɔɔfee wɔtsu naagbai ahe nii yɛ omanyeyeli mli. Nɔ ni fe fɛɛ lɛ, wɔkaseɔ wɔ-Bɔlɔ ni ji ŋwɛi Tsɛ Yehowa lɛ he nii yɛ mli. Nilee ni tamɔ nɛkɛ lɛ haa wɔnáa miishɛɛ ni ehaa shihilɛ he baa sɛɛnamɔ kɛhaa wɔ.
Biblia lɛ kɛ Nyɔŋmɔ he nilee ni wɔɔná lɛ toɔ niyeli he. Yesu kɛɛ akɛ: “Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.” (Mateo 4:4; Hebribii 5:12-14) Taakɛ bɔ ni ehe hiaa ni wɔye niyenii kpakpa daa gbi bɔni afee ni wɔya nɔ wɔhi wala mli lɛ, nakai nɔŋŋ ehe hiaa ni wɔkane Nyɔŋmɔ Wiemɔ lɛ daa bɔni afee ni wɔná naanɔ wala he shiwoo ní Nyɔŋmɔ kɛha lɛ he sɛɛ.
Wɔnáa niyeli he miishɛɛ ejaakɛ niyeli tsuɔ hiamɔ nii titri ko he nii, ni abɔ wɔ koni wɔná niyeli he miishɛɛ hu. Shi kɛlɛ, kɛ́ wɔmiisumɔ ni wɔná miishɛɛ lɛ, no lɛ esa akɛ wɔtsu wɔhiamɔ nii titri kroko hu he nii. Yesu kɛɛ akɛ: “Mɛi ni hiɛ yɔɔ amɛmumɔŋ hiamɔ nii anɔ lɛ yɛ miishɛɛ.” (Mateo 5:3, NW) Akɛni abaanyɛ atsɔ Nyɔŋmɔ Wiemɔ lɛ shishi ní aaanu lɛ nɔ atsu nakai hiamɔ nii lɛ he nii hewɔ lɛ, ebaanyɛ eha aná miishɛɛ.
Yɛ anɔkwale mli lɛ, mɛi komɛi nuɔ he akɛ eji nɔ ni wa akɛ aaanu Biblia lɛ shishi. Ákɛ nɔkwɛmɔnɔ lɛ, ekolɛ ehe baahia ni aye abua bo ni onu ŋmalɛi ni wieɔ kusumii ni oleee lɛ ahe lɛ ashishi, loo ní onu ŋmalɛi ni kɛ mfonirifeemɔŋ wiemɔi tsuɔ nii lɛ ashishi. Agbɛnɛ hu, gbalɛi yɛ ni aŋmala yɛ okadifeemɔŋ wiemɔ mli, ni gbɛ pɛ ni abaanyɛ atsɔ nɔ anu shishi ji ni aaakwɛ Biblia mli ŋmalɛi krokomɛi ni wieɔ nakai saji lɛ nɔŋŋ ahe lɛ mli. (Daniel 7:1-7; Kpojiemɔ 13:1, 2) Ni kɛlɛ, obaanyɛ onu Biblia lɛ shishi diɛŋtsɛ. Shi te ooofee tɛŋŋ oná nɔmimaa yɛ enɛ he?
Nifeemɔ ni Mɛi Fɛɛ Baanyɛ Aná He Miishɛɛ
Biblia lɛ ji Nyɔŋmɔ Wiemɔ. Nyɔŋmɔ tsɔɔ nɔ ehaa wɔleɔ nɔ ni ji esuɔmɔnaa nifeemɔ. Ani Nyɔŋmɔ baaha wɔ wolo ko ni anyɛŋ anu shishi loo ni mɛi ni le woloŋ jogbaŋŋ lɛ pɛ ji mɛi ni baanyɛ anu shishi? Dabi, Yehowa efeŋ yitsoŋwalɛ nii ni tamɔ nɛkɛ. Kristo Yesu kɛɛ akɛ: “[Mɛɛ] tsɛ yɔɔ nyɛteŋ ni kɛji ebi bi lɛ . . . loo lɛ, ni eeeŋɔ onufu efee loo eha lɛ? Aloo kɛji ebi wuɔ wɔlɔ lɛ, ni eeeha lɛ nyɔŋmɔŋkrakro? Belɛ kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.” (Luka 11:11-13) No hewɔ lɛ, obaanyɛ oná nɔmimaa akɛ obaanyɛ onu Biblia lɛ shishi, ni ákɛ kɛji ojɛ anɔkwayeli mli obi Nyɔŋmɔ lɛ, ebaaye ebua bo ní onu e-Wiemɔ lɛ shishi. Yɛ anɔkwale mli lɛ, gbekɛbii po baanyɛ anu Biblia mli shishijee tsɔɔmɔi ashishi!—2 Timoteo 3:15.
Eyɛ mli akɛ ebiɔ mɔdɛŋbɔɔ dani anu Biblia lɛ shishi moŋ, shi kɛ́ wɔfee nakai lɛ, ebaanyɛ ená wɔnɔ hewalɛ ni ewo wɔ hewalɛ. Beni atée Yesu shi lɛ, ejie ehe kpo etsɔɔ ekaselɔi lɛ ateŋ mɛi enyɔ, ni ekɛ amɛ wie Biblia mli gbalɛi ahe. Sane ni Luka ŋma lɛ kɛɔ akɛ: “Ebɔi kɛjɛ Mose kɛ gbalɔi lɛ fɛɛ nɔ, ni etsɔɔ amɛ nibii ni yɔɔ ŋmalɛi lɛ fɛɛ mli yɛ ehewɔ lɛ ashishi.” Mɛni jɛ mli kɛba? Beni kaselɔi lɛ susuɔ nɔ ni amɛkase lɛ he nakai gbɛkɛ lɛ, amɛkɛɛkɛɛ amɛhe akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ ni etsɔɔ wɔ ŋmalɛi lɛ anaa lɛ?” (Luka 24:13-32) Nyɔŋmɔ Wiemɔ lɛ shishi ní amɛnu lɛ ha amɛná miishɛɛ ejaakɛ ewo hemɔkɛyeli ni amɛyɔɔ yɛ Nyɔŋmɔ shiwoi amli lɛ mli hewalɛ, ni eha amɛná wɔsɛɛ be he hiɛnɔkamɔ kpakpa.
Nyɔŋmɔ Wiemɔ lɛ shishi ni aaanu lɛ jeee jatsu, shi moŋ eji nɔ ni haa anáa miishɛɛ kɛ nɔ ni he yɔɔ sɛɛnamɔ, taakɛ bɔ ni niyenii kpakpa ko yeli haa anáa miishɛɛ lɛ. Mɛni esa akɛ ofee ni onu Biblia lɛ shishi yɛ gbɛ ni tamɔ nɛkɛ nɔ? Sane ni nyiɛ sɛɛ lɛ tsɔɔ bɔ ni ooofee oná “Nyɔŋmɔ he nilee” lɛ he miishɛɛ.—Abɛi 2:1-5.
[Mfoniri ni yɔɔ baafa 4]
Taakɛ tsɛ ni yɔɔ suɔmɔ feɔ lɛ, Yehowa kɛ mumɔ krɔŋkrɔŋ lɛ haa wɔ koni eye ebua wɔ ni wɔnu Biblia lɛ shishi