Sanekpakpa Lɛ Kɛhamɔ Yɛ Kaimɔ Be Iɛ Mli

¹ Kaimɔ be lɛ ebanina wɔ shikome ekoŋŋ. Kɛha wɔ mɛi fɛɛ ni ji Kristofoi ni wɔjɔɔ wɔhe nɔ lɛ, enɛ tsɔɔ sɔɔmɔ nitsumɔ ni fa. Tsuiŋ hiɛsɔɔ ni wɔyɔɔ kɛha nɔ ni Yesu Kristo fee kɛha wɔ lɛ hewɔ lɛ, wɔmiisumɔ ni wɔkɛ ekaa anyiɛ enanemaa hei esɛɛ kpaakpa.​—1 Pet. 2:⁠21.

² Wɔteŋ mɛi akpei abɔ naa hegbɛ yɛ Kaimɔ belɛ mli wɔkɛfeɔ gbɛgbalɔi awalɔi daa afi. Akpei nyɔŋmai abɔ krokomɛi ni nyɛɛɛ afee gbɛgbalɔi awalɔi lɛ hu bɔ mɔdɛŋ ni amɛha amɛ sɔɔmɔ nitsumɔ lɛ abɔ he enyɔ loo etɛ po yɛ be mli ni daa gbɛgbalɔi kɛ gbɛgbalɔi krɛdɛɛ hu kɛ nɔ fɛɛ nɔ woɔ sɔɔmɔ nitsumɔ lɛ mli koni amɛha efee mumɔŋ ŋmaakpamɔ be ni miishɛɛ diɛŋtsɛ yɔɔ mli lɛ.

³ Wɔle akɛ akpei abɔ miisusu gbɛgbalɔi awamɔ sɔɔmɔ lɛ he yɛ Kaimɔ be nɛɛ mli. Ekolɛ osusuɔ akɛ naagba ni yɔɔ enɛ he pɛ ji “naatsii” lɛ ni yɛ be mli ni wɔŋmaa nyɛ nɛɛ, eyɔɔ nɔ lolo lɛ. Shi esaaa akɛ shihilɛ ni tamɔ nɛkɛ feɔ tamɔ gɔŋ ko ni anyɛɛɛ nɔ kunim aye ni yɛ enɛ hewɔ lɛ anyɛɛɛ akɛ he awo gbɛgbalɔi awamɔ sɔɔmɔ lɛ mli yɛ Kaimɔ be nɛɛ mli. Enɛ biɔ gbɛjianɔtoo, kɛ ekaa, kɛ mɔdɛŋbɔɔ kɛ ŋaalee.

⁴ Akɛni Kaimɔ be lɛ kɛ Kristendom Easter gbijurɔyelii lɛ kpeɔ hewɔ lɛ ewaŋ akɛ wɔɔje trukaa odaseyeli ni kɔɔ Yesu Kristo he kɛ enitsumɔ yɛ Nyɔŋmɔ suɔmɔnaa nifeemɔ mli lɛ shishi. (2 Kor. 1:20) Amɛkɛɔ akɛ amɛmiiye Yesu Kristo shitee he gbijurɔ. Esa akɛ enɛ aha ona hegbɛ koni ogbele amɛhiŋmɛi koni amɛyoo anɔkwale ni eji akɛ Yesu Kristo jeee afɔleshaa nɔ ni bɛ hewalɛ ko dɔŋŋ, shi moŋ eji Maŋtsɛ ni etsɛŋ ni emaŋtsɛyeli lɛ kɛ afii akpe toiŋjɔlɛ kɛha adesai baaba. Akɛni wɔkɛ Revelation Climax wolo lɛ miiha yɛ April mli hewɔ lɛ, obaanyɛ ogbele mfonirii babaoo ni anaa yɛ baafa 294 lɛ ni oha otoibolɔ lɛ ayoo shishinumɔ ni mli kwɔ ni yɔɔ gbalɛ ni yɔɔ 1 Mose 3:15 lɛ he lɛ, kɛ bɔ ni ebaa mli yɛ Yesu Kristo nɔ, kɛ bɔ ni nɔ ni baajɛ mli aba lɛ saa ehe ehaa. Wɔye nɔmimaa akɛ enɛ baatee ekɔnɔ shi kɛha babaoo.

⁵ Mɔdɛŋbɔɔ he miihia. Kɛje be mli ni “naatsii” nɛɛ je shishi lɛ, Wɔ Maŋtsɛyeli Sɔɔmɔ lɛ kɛ ŋaawoi sɔrɔtoi babaoo eha yɛ gbɛ ni wɔɔtsɔ nɔ wɔkɛ sanekpakpa lɛ aha yɛ shihilɛi sɔrɔtoi ashishi. Ŋwanejee ko bɛ he akɛ, ŋaawoi nɛɛ ekomɛi amlitii baaye ebua diɛŋtsɛ. Yɛ nɛkɛ be nɛɛ mli hu lɛ, wɔbaanyɛ wɔye omanye diɛŋtsɛ kɛtsɔ mɛi ni tsutsu lɛ wɔkɛ amɛ kaseɔ Biblia lɛ, mɛi ni wɔhaa amɛ woji tɛtrɛbii lɛ daa, mɛi ni tsutsu lɛ amɛsheɔ kɛ mɛi ni wɔyaa amɛŋɔɔ be kɛ bei amli lɛ ni wɔɔya amɛŋɔɔ ekoŋŋ lɛ nɔ. Amɛteŋ mɛi pii miimɛ ni amɛna wɔ. Amɛkɛ hehiamɔ miisumɔ ni amɛbi bɔ ni wɔyaa nɔ wɔhaa kɛ nɔ ni wɔfeɔ koni asusu wɔshihilɛ lɛ he ekoŋŋ. Amɛle akɛ wɔjeee gbɔmɛi gbohii ni akɛ gbɛ ni atsɔ nɔ akɛ wɔ ye ha lɛ ehiii kwraa. Amɛteŋ mɛi komɛi po miisumɔ ni amɛnine ashɛ wɔwoji tɛtrɛbii lɛ anɔ. No hewɔ lɛ mɛni hewɔ ni obɔɔɔ mɔdɛŋ akɛ oooku sɛɛ ni oya nɛkɛ nanemɛi nɛɛ ni tsutsu lɛ oyaa amɛŋɔɔ lɛ fɛɛ aŋɔɔ ekoŋŋ? Nɔ ni baajɛ mli aba yɛ enɛ feemɔ mli ji sɛɛsaramɔi kɛ shia Biblia mli nikasemɔi babaoo ni baahe obe akɛ gbɛgbalɔi awalɔ yɛ April kɛ May mli.

⁶ Yesu Kristo afɔleshaa gbele lɛ he hiɛsɔɔ ni jɛ wɔtsuiŋ tɔɔ lɛ kanyaa wɔ koni wɔfee babaoo. Wɔmiisumɔ ni wɔye wɔbua mɛi babaoo koni amɛ hu amɛna hiɛsɔɔ ni tamɔ nakai amɛha Yehowa suɔmɔ lɛ. Kaimɔ belɛ mli titri wɔsumɔɔ ni wɔjie nakai hiɛsɔɔ lɛ kpo yɛ kɛtsɔ babaoo ni wɔɔfee yɛ Sɔɔmɔ nitsumɔ lɛ mli lɛ nɔ, titri lɛ akɛ gbɛgbalɔi awalɔi, kɛ wɔshihilɛi aaaŋmɛ gbɛ. Okɛ ohe afɔ Yehowa nɔ. Okɛ mɔdɛŋbɔɔ atsu nii. Ebaajɔɔ bo koni onine ashɛ oti lɛ nɔ.