Sanekpakpa Lɛ Kɛhamɔ Kɛ Dɛhiɛmɔ Woji
1 Nuu ko ŋma Asafo lɛ akɛ: “Minyiɛ kɛho yoo ko ni ha mi Biblia mli dɛhiɛmɔ wolo ko he. Ekaneɔ akɛ. ‘Shihilɛ yɛ Toiŋjɔlɛ Jeŋ Hee Ko Mli.’ Beni mikaneko lɛ, no mli lɛ mihao, shi no sɛɛ pɛ ni mina miishɛɛ kɛ toiŋjɔlɛ.” Nuu nɛɛ miitao ni ele nibii babaoo yɛ enɛ he, no hewɔ lɛ eŋma ebi enɛ, ni etsɔɔ mli akɛ: “Mikɛ miishɛɛ miikpa wolo, ‘Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ’ lɛ gbɛ waa.”
2 Yɛ anɔkwale mli lɛ, atee mɛi ni jieɔ Yehowa yi bianɛ lɛ ateŋ mɛi pii amumɔŋ tsinebaa shi kɛtsɔ Biblia mli saji kukuji ni yɔɔ dɛhiɛmɔ woji ni akala nɛɛ amli lɛ nɔ. Ani okɛ dɛhiɛmɔ woji miitsu nii yɛ osɔɔmɔ lɛ mli? Mɛi pii miifee nakai. Akala Toiŋjɔlɛ Jeŋ Hee dɛhiɛmɔ woji nɛɛ fe akpekpei 122 yɛ Brooklyn pɛ, kɛ agbɛnɛ dɛhiɛmɔ woji krokomɛi etɛ. Nɔ Hewɔ ni Obaanyɛ Okɛ Ohe Afɔ Biblia lɛ Nɔ, Mɛni Yehowa Odasefoi Heɔ Yeɔ? kɛ Mɛɛ Hiɛnɔkamɔ Yɔɔ Kɛha Suɔlɔi ni Amɛgboi? lɛ fe ekomekomei akpei 250. Akɛ enɛɛmɛi ateŋ nɔ ni fe 300,000 maje asafoi ni yɔɔ Ghana lɛ yɛ nyɛsɛɛ sɔɔmɔ afi lɛ mli.
3 Esaaa akɛ wɔbuɔ hewalɛ ni Nyɔŋmɔ Wiemɔ ni atsɔɔ mli kuku yɛ shɛɛ saji nɛɛ amli lɛ yɔɔ lɛ akɛ nɔ ko bibioo. (Heb. 4:12; ekɛto Zakaria 4:10; Yakobo 3:4, 5 he.) Odasefonyo ko ni jɛ Arizona ŋma akɛ: “Mikane dɛhiɛmɔ woji babaoo ni Buu Mɔɔ Asafo lɛ ŋma, ni yɛ naagbee lɛ mikase anɔkwale lɛ.” Etsɔɔ mli akɛ: “Gbɔmɛi sumɔɔɔ ni amɛkɛ be babaoo kaneɔ nii yɛ jeŋ ni bɛ deka nɛɛ mli, shi dɛhiɛmɔ woji lɛ kɛlɛ bɔ ni sa ni amɛaahiɛ saji ni he hiaa, shi jeee kakadaŋŋ tsɔ bɔ ni eeeshwie gbɔmɛi dani amɛkwɛ po.”
4 Yɛ yiŋtoi sɔrɔtoi komɛi ahewɔ lɛ, gbɔmɛi shashaoɔ shi akɛ amɛaahe woji kɛjɛ wɔdɛŋ. Shi mɛi pii naa miishɛɛ akɛ amɛaahe dɛhiɛmɔ woji. Kpokpaa nɔkwɛlɔ ko tsɔɔ mli akɛ eyɛ plastik kotoku bibioo ko ni ekɛ dɛhiɛmɔ woji lɛ ehɔlɔ mli ni ekɛtsɔɔ, ni shiatsɛ lɛ halaa emli nɔ ni esumɔɔ. Eŋma akɛ: “Dɛhiɛmɔ wolo kome ni ahalaa ji, Mɛni Yehowa Odasefoi Heɔ Yeɔ?”
Beni Okɛ Mɔ lɛ Ekpe Klɛŋklɛŋ Kwraa
5 Shiɛlɔi komɛi naa akɛ dɛhiɛmɔ wolo ni akɛhaa lɛ ji gbɛ ni mɔɔ shi ni atsɔɔ nɔ ajeɔ sanegbaai ashishi. Kɛ okɛ ekome ha lɛ, shiatsɛ ni shashaoɔ shi akɛ eeebo toi lɛ baabo toi. Dɛhiɛmɔ wolo lɛ yitso kɛ wiemɔi fioo ni kɔɔ he lɛ baagbele gbɛ kɛha wɔ nitsumɔ lɛ kɛ eyiŋtoo he susumɔ.
6 Kɛji akɛ shiatsɛ ko bɛ deka aloo ehao lɛlɛŋ lɛ, ekolɛ dɛhiɛmɔ wolo baafee nɔ ni he hiaa lɛ. Dɛhiɛmɔ wolo ni kɔɔ hiɛnɔkamɔ kɛha gbohii lɛ he lɛ shɛje yoo ko mii aahu akɛ eŋma Asafo lɛ koni atsɔɔ lɛ sane lɛ mli babaoo. Kɛ mɔ ko bɛ shia lɛ, abaanyɛ ashi dɛhiɛmɔ wolo ko aha shiatsɛ lɛ yɛ he ni mɛi krokomɛi ni yaa baa lɛ enaŋ.
Yɛ Sɛɛsaramɔi Anɔ
7 Yɛ be mli ni okuɔ sɛɛ kɛyaa he ni ajie miishɛɛ ko kpo yɛ lɛ, obaanyɛ okɛɛ akɛ: “Hɛlo, [tsɛ egbɛi]. Eŋɔɔ minaa diɛŋtsɛ akɛ mina bo yɛ shia. Beni wɔkpe klɛŋklɛŋ lɛ, mihiɛ sɔ bɔ ni ona be ni okɛwie Biblia lɛ he lɛ. Miyɛ saji krokomɛi ni miheɔ miyeɔ akɛ ooona he miishɛɛ. Anaa yɛ dɛhiɛmɔ wolo nɛɛ mli, Shihilɛ yɛ Toiŋjɔlɛ Jeŋ Hee Ko Mli. Kɛ oookai lɛ, wɔwie Biblia lɛ shiwoo ni kɔɔ anɔkwa toiŋjɔlɛ kɛha adesai ni sɛɛ tsɛɔ lɛ he. Shi, akɛni mɛi pii susuɔ ŋwɛi he kɛ amɛkane nɛkɛ shiwooi nɛɛ hewɔ lɛ, kadimɔ akɛ Lala 37:29 tsɔɔ akɛ nɛkɛ jɔɔmɔi ni baa nɛɛ baaba mli yɛ shikpɔŋ nɛɛ nɔ. [Kanemɔ ŋmalɛ lɛ, ni otsɔɔ shiatsɛ lɛ he ni eyɔɔ yɛ dɛhiɛmɔ wolo lɛ mli.] Ani jeee miishɛɛ sane nɛ? [Okɛ lɛ asusu kukuji pii ahe.] Ŋmalɛi ni woɔ mɔ hewalɛ babaoo yɛ dɛhiɛmɔ wolo nɛɛ mli, ni obaanya amɛkanemɔ he nakai nɔŋŋ. Kɛ miku misɛɛ miba ekoŋŋ lɛ, ekolɛ mikɛo fɛɛ baakane ekomɛi taakɛ wɔfee ŋmɛnɛ lɛ.”
8 Eji anɔkwale akɛ, wɔ dɛhiɛmɔ woji lɛ ji nikeenii ni jɛ Yehowa ŋɔɔ. Eba akɛ wɔkɛ hesaa aaatsu yelikɛbuamɔ nibii ni sɛɛnamɔ yɔɔ he nɛɛ ahe nii yɛ be mli ni wɔtsuɔ sɔɔmɔ ni mɔɔ shi kɛhaa eyijiemɔ kɛ wɔnaanɔ jɔɔmɔ he nii lɛ.—Abɛi 22:29.