Sanekpakpa Lɛ Kɛhamɔ—Biblia Kasemɔ Ni Ajeɔ Shishi Amrɔ Nɔŋŋ
1 Yesu fa wɔ ni ‘wɔfee kaselɔi.’ (Mat. 28:19) Dani aaanyɛ afee enɛ lɛ, ebiɔ mɛi ni yɔɔ wiemɔ lɛ he miishɛɛ lɛ ni akɛ amɛ aaaje Biblia kasemɔ shishi. Amrɔ nɛɛ ni nibii ahe miijɔ fioo lɛ, wɔna hegbɛ akɛ wɔɔje Biblia lɛ kasemɔ shishi amrɔ nɔŋŋ loo tɛ̃ɛ. Nakai feemɔ yɛ shia kɛ shia sɔɔmɔ lɛ mli lɛ baaye abua wɔ ni wɔfee nakai oya. Ehaa ayɔseɔ yiŋtoo titri hewɔ ni ayaa mɔ lɛ ŋɔɔ lɛ hu.
2 Mɛni wɔbaanyɛ wɔkɛɛ beni wɔkɛ Biblia kasemɔ shishijee amrɔ nɔŋŋ lɛ tsuɔ nii lɛ? Gbɛ ni yɔɔ mlɛo lɛ ji nɔ ni hi fe fɛɛ. Wɔbaanya wɔkɛɛ akɛ: “Nɔ ni mimii shɛɔ he ji ni maye mabua mɛi ni amɛnu Biblia lɛ shishi, ni masumɔ ni mikɛo kɛ oweku lɛ akase enɛ yɛ oshia ni nyɔmɔwoo ko bɛ mli. Wɔkɛ o-Biblia lɛ baatsu nii. Kɛ obɛ eko lɛ, manyɛ maha ona eko.”
3 Gbɛ kroko baanyɛ afee: “Yiŋtoo hewɔ ni mibaa biɛ ŋmɛnɛ ji ni mawo Biblia lɛ kasemɔ ni baaye abuao ni onu he ni je nɛɛ yaa kɛ nɔ ni Nyɔŋmɔ esaa eto wɔ lɛ shishi lɛ he hewalɛ. Ebaaŋɔɔ minaa akɛ matsɔɔ bo bɔ ni ooofee ole nibii babaoo kɛjɛ o-Bibiia lɛ mli. Owoŋ enɛ he nyɔmɔ ko.” Kɛ shiatsɛ lɛ kpɛlɛ lɛ, obaanyɛ okɛ dɛhiɛmɔ wolo, Shihilɛ yɛ Toiŋjɔlɛ Jeŋ Hee Ko Mli loo Creation wolo lɛ atsu nii, ekolɛ ni nyɛje shishi kɛjɛ baafa 234, kuku 6 lɛ. Yitso nɛɛ shishijee baafai lɛ maa Yehowa shiwoo akɛ ekɛ Paradeiso baaba ekoŋŋ lɛ nɔ mi.
4 Okɛ Biblia He Dɛhiɛmɔ Woji Atsu Nii: Mɛi pii ena akɛ dɛhiɛmɔ woji yeɔ buaa kɛ akɛ gbɛ ni atsɔɔ nɔ ajeɔ Biblia kasemɔ shishi amrɔ nɔŋŋ lɛ miitsu nii lɛ. Kɛ shiatsɛ lɛ ba shinaa lɛ naa loo ehereɔ nɔ lɛ, okɛ dɛhiɛmɔ wolo Shihilɛ yɛ Toiŋjɔlɛ Jeŋ Hee ko Mli lɛ aha lɛ ni ogbele mli koni enyɛ ena mfonirii fɛfɛji lɛ. Hiɛmɔ ekome yɛ odɛŋ ni okane loo ofo sanebimɔi ni yɔɔ klɛŋklɛŋ kukuji enyɔ lɛ mli lɛ kuku. Okɛ lɛ asusu hetooi lɛ ahe, ni okane ŋmalɛ kome loo enyɔ ni fiɔ sɛɛ. Agbɛnɛ tsii ta akɛ onya sanegbaa lɛ he, koni oto gbɛjianɔ ni oku osɛɛ oba. Tsɔɔmɔ wɔ Biblia kasemɔ he gbɛjianɔtoo ni afeɔ lɛ yaka lɛ mli kuku, ni kɛ esa lɛ, oto gbɛjianɔ ni oku osɛɛ ni nyɛyasusu oti kroko he yɛ dɛhiɛmɔ wolo lɛ mli.
5 Kɛ ooto gbɛjianɔ ni oku osɛɛ lɛ, ebaahi akɛ oootsi nɔ ko ni shiatsɛ lɛ baanya he lɛ ta. Obaanyɛ ni okɛfee sanebimɔ. Ebaaha shiatsɛ lɛ akpa osɛɛsaramɔ ni emli ni Obaaha sanebimɔ lɛ hetoo yɛ lɛ gbɛ.
6 Creation wolo lɛ ekaaa yɛ gbɛi pii anɔ. Ekɛ odaseyelii ni ma shi shiŋŋ ni tsɔɔ akɛ Nyɔŋmɔ yɛ lɛ haa. Etsɔɔ nɔ hewɔ ni sutsakemɔ nyɛŋ afee anɔkwale lɛ mli. Etsɔɔ nɔ hewɔ ni wɔbaanyɛ wɔkɛ wɔhe afɔ Biblia lɛ nɔ akɛ Nyɔŋmɔ Wiemɔ. Mfonirii ni yɔɔ yitsei 18 kɛ 19 lɛ baagbala gbɔmɛi ni tsui Ja lɛ ajwɛŋmɔ, ni ebaaha amɛna Biblia lɛ kɛ Yehowa yiŋtoi ahe miishɛɛ No hewɔ lɛ nyɛhaa wɔ fɛɛ wɔŋɔa hegbɛ fɛɛ hegbɛ ni aaaba lɛ ni wɔkɛje nikasemɔi ashishi ni wɔna nitsumɔ, ‘nyɛfea kaselɔi’ lɛ mli gbɛfaŋnɔ m-Mat. 24:14; 28:19, 20; Mar. 13:10.