“Nyɛtsɔa Amɛ . . . Nii Fiaa Ni Mikɛɛ Nyɛ Lɛ”
1 Nitsɔɔmɔ fata kaselɔ feemɔ nitsumɔ lɛ he. Dani mɔ aŋkro ko baanyɛ atsɔ Kristo kaselɔ lɛ, esa akɛ atsɔɔ lɛ “ni [e]ye nii fiaa” ni Yesu kɛ famɔ eha yɛ he lɛ anɔ. (Mat. 28:19, 20) Gbɛ ni hi fe fɛɛ ni aaatsɔ nɔ atsu enɛ ji kɛtsɔ shia Biblia mli nikasemɔ nɔ.
2 Biblia mli nikasemɔ shishijee bɛ mlɛo be fɛɛ be. Kɛji oona naagba yɛ Biblia mli nikasemɔ namɔ mli lɛ, onijiaŋ akaje wui. Omanyeyeli yɛ Biblia mli nikasemɔ feemɔ mli lɛ biɔ faishitswaa kɛ anɔkwa suɔmɔ ni ayɔɔ akɛ akɛ anɔkwale lɛ baaha mɛi krokomɛi.—Gal. 6:9.
3 Ni Aaatee Miishɛɛ lɛ Shi: Ekolɛ oklɛŋklɛŋ sanegbaa lɛ baatee miishɛɛ bibioo pɛ shi. Obaanyɛ odamɔ shihilɛ ni yɔɔ lɛ nɔ oshi dɛhiɛmɔ wolo, wolo bibioo, loo woji tɛtrɛbii oha shiatsɛ lɛ. Obaanyɛ okɛ enɛɛmɛi ateŋ ekome atsu nii ni okɛje shia Biblia mli nikasemɔ shishi. Aloo obaanyɛ ogbala shiatsɛ lɛ jwɛŋmɔ kɛya wolo kroko ni sa nɔ yɛ saramɔ be kroko mli.
4 Hesaamɔ ji gbɛ titri ni kɛ omanyeyeli baa. Mɛni hewɔ otsɔɔɔ hiɛ ohalaaa Ŋmalɛ ko ni aŋmala emli wiemɔi lɛ yɛ dɛhiɛmɔ wolo, wolo bibioo, loo wolo tɛtrɛɛ ni okpɛ oyiŋ akɛ okɛbaatsu nii yɛ osɛɛsaramɔ lɛ mli lɛ mli? Kɛtsɔ nakai gbɛ nɔ lɛ, obaanyɛ okɛ wolo lɛ mli wiemɔi atsa osanegbaa lɛ nɔ. Obaanyɛ okane kuku kome loo enyɔ kɛjɛ nakai wolo lɛ mli tɛɛ.
5 Obaanyɛ okɛɛ akɛ:
◼ “Wɔkɛ mɛi fɛɛ miisusu gbalɛ ko ni sa kadimɔ waa, ni miina emlibaa bianɛ lɛ he.” Kanemɔ Mateo 24:3, koni no sɛɛ lɛ okɛ mfoniri lɛ kɛ ehe wiemɔi ni yɔɔ “Naa! Miifee Nii Fɛɛ Ehee” wolo bibioo lɛ baafa 24 lɛ atsa nɔ. Abaanyɛ atsɔ nakai gbɛ nɔŋŋ nɔ yɛ be mli ni akɛ Ani Je Nɛɛ Baaya nɔ Ahi Shi? dɛhiɛmɔ wolo lɛ tsuɔ nii lɛ.
6 Kɛ ona akɛ eyɛ he miishɛɛ lɛ, esa akɛ oyadi sɛɛ oya nɔŋŋ. Bɔɔ mɔdɛŋ ni beni aaashɛ otsi mli lɛ osaa otee jɛmɛ ekoŋŋ bɔni afee ni shiatsɛ lɛ anyɛ akai sane ni okɛ lɛ gba nyɛsɛɛ lɛ jogbaŋŋ. Be fɛɛ be ni obaaya eŋɔɔ lɛ, nyɛsusua kukuji fioo ko he yɛ wolo ni okɛha Iɛ lɛ mli. Kɛkɛ lɛ, yɛ be ni sa mli lɛ, obaanyɛ okɛ Obaanyɛ Ohi Shi Kɛya Naanɔ wolo lɛ atsɔɔ lɛ, ni otsa nɔ yɛ nakai gbɛ nɔŋŋ nɔ.
7 Nitsumɔ babaoo yɛ ni sa akɛ atsu ŋmɛnɛ, yɛ nikpamɔ kpeteŋkpele ni Yesu gba efɔ shi lɛ mli. (Mat. 9:37, 38) Beni wɔyaa nɔ wɔtsɔɔ mɛi ni yɔɔ jalɛ tsuii lɛ anii lɛ, wɔyɛ Yesu nɔmimaa wiemɔi ni woɔ mɔ hewalɛ nɛɛ akɛ ‘ekɛ wɔ yɛ daa kɛyashi nibii agbɛjianɔtoo lɛ naagbee tɔŋŋ.’