Wolo ni Akɛbaaha yɛ February lɛ Kɛ Nitsumɔ yɛ Gbɛ ni Mɔɔ Shi Nɔ
1 Weku shihilɛ miifite yɛ wɔbe nɛɛ amli. Gbalashihilɛ mli hefatalɔi ni yeee anɔkwa, shaahii kɛ shaayei ni kɛ amɛhe woɔ mli, gbekɛbii atoigbele, shika helɛtemɔ mli naagbai, gbekɛbii ajeŋba shara kɛ musufitemɔi, tsofai ni akɛtsuɔ nii yɛ gbɛ fɔŋ nɔ ni faa babaoo, kɛ wɔɔ hei ni faaa lɛ ji naagbai ni haa ewaa waa akɛ aaana weku shihilɛ ni miishɛɛ yɔɔ mli lɛ ekomɛi. Weku Shihilɛ wolo lɛ kɛ Nyɔŋmɔ Wiemɔ lɛ mli ŋaawoi ni yeɔ buaa haa koni eye ebua ni akɛye naagbai ni naa wa waa nɛɛ anɔ kunim. Ekolɛ abaana hiɛkpamɔ wiemɔi ni nyiɛ sɛɛ nɛɛ he miishɛɛ.
2 Ekolɛ obaanyɛ oje sanegbaa shishi kɛtsɔ enɛ kɛɛmɔ nɔ:
◼ “Mɛi babaoo biɔ akɛ, ‘Ani eyɛ mlɛo akɛ aaana weku shihilɛ ni yɔɔ miishɛɛ ni ekomefeemɔ yɔɔ mli ŋmɛnɛ?’ Ani osusu enɛ hu he?” Ha ejie enaa, no sɛɛ lɛ kɛɛmɔ akɛ: “Kadimɔ akɛ Efesobii 3:14 kɛ 15 wieɔ Nyɔŋmɔ he akɛ weku shihilɛ lɛ Shishijelɔ. Ele adesai ahiamɔ nii ni eesumɔ ni wɔna miishɛɛ, no hewɔ lɛ ewoɔ wɔ ŋaa yɛ weku shihilɛ he.” Beni okane ŋmalɛ lɛ sɛɛ lɛ, gbalamɔ jwɛŋmɔ kɛya Weku Shihilɛ wolo lɛ baafai 9 kɛ 10 lɛ nɔ ni okane kuku 14 lɛ. Enɛ baanyɛ aha agba kukuji ni baanyiɛ sɛɛ yɛ nakai yitso lɛ mli lɛ he sane kuku. Okɛ wolo lɛ aha ni obi lɛ koni ehala yitso ko kɛha sanegbaa beni oba be kroko lɛ. Kɛ shiatsɛ lɛ heee wolo lɛ, obaanyɛ okɛ Na Weku Shihilɛ mli Ŋɔɔmɔ dɛhiɛmɔ wolo lɛ aha.
3 Akɛni mɛi babaoo miisusu bɔ ni gbekɛbii atoigbele faa babaoo lɛ he hewɔ lɛ, ekolɛ enɛ baatee miishɛɛ ko shi:
◼ “Akɛ fɔlɔ lɛ, ekolɛ okɛ mi baakpa gbee akɛ gbekɛbii ni atsɔseɔ amɛ koni amɛbatsɔmɔ onukpai ni gbɛnaa nii ka amɛnɔ lɛ jeee nitsumɔ ni yɔɔ mlɛo. Mina akɛ Abɛi 22:6 lɛ woɔ mɔ hewalɛ waa.” Kanemɔ ŋmalɛ lɛ ni okɛɛ akɛ: “Shi, sane lɛ diɛŋtsɛ ji, be ni esa akɛ akɛje tsɔsemɔ nɛɛ shishi kɛ bɔ ni abaatsu he nii aha.” Gbelemɔ Weku Shihilɛ wolo lɛ baafai 114 kɛ 115 ni nyɛgba kuku 2 kɛ 4 he sane. Beni owie sane oti ni tsɔɔ akɛ ehe miihia ni atsɔse gbekɛbii kɛjɛ gbekɛbiiashi lɛ, kɛɛmɔ lɛ akɛ obaashi wolo lɛ ni osaa oba koni obatsɔɔ bɔ ni Biblia lɛ yeɔ ebuaa ni wɔkɛtsu tsɔsemɔ nɛɛ fãi sɔrɔtoi lɛ ahe nii.
4 Akɛni oshijafoi ni edara lɛ babaoo miisusu gbalashihilɛ mli hefatalɔ ni hi jogbaŋŋ lɛ he hewɔ lɛ, ekolɛ obaaka enɛ okwɛ:
◼ “Akɛni mligbalamɔ miiba gbalashihilɛi pii amli hewɔ lɛ, oshijafoi babaoo miisusu hefatalɔ ni hi jogbaŋŋ lɛ taomɔ he. Mɛi komɛi susuɔ akɛ ehi akɛ akɛ nuu loo yoo aaahi shi kɛkɛ yɛ be mli amɛboteee gbalashihilɛ mli diɛŋtsɛ. Te onuɔ he ohaa tɛŋŋ? [Ŋmɛɛ gbɛ ni ewie.] Yɛ be mli ni ahiɛ jwɛŋmɔi ni yɔɔ sɔrɔtoi babaoo yɛ enɛ he lɛ, jwɛŋmɔ ni wɔ Bɔlɔ lɛ hiɛ yɛ he lɛ yɛ faŋŋ. [Kanemɔ Hebribii 13:4.] No hewɔ lɛ, be mli ni wɔtaoɔ gbalashihilɛ mli hefatalɔ lɛ, mɛni wɔbaanyɛ wɔkwɛ ni wɔfee koni eba lɛ akɛ wɔɔnyɛ wɔye omanye yɛ gbalashihilɛ mli?” Gbelemɔ baafa 13, ni okane kuku 5. Gbalamɔ jwɛŋmɔ kɛya yitso nɛɛ mli saneyitsei bibii lɛ anɔ kuku, ni okɛ wolo lɛ aha ni oto gbɛjianɔ ni oku osɛɛ oba koni nyɛbagba he sane lolo.
5 Kɛ okɛ mɔ ko ni bɛ deka kpe ni esa akɛ oha owiemɔ lɛ afee kuku lɛ, obaanyɛ okɛɛ enɛ:
◼ “Akɛni obe lɛ faaa kwraa hewɔ lɛ, masumɔ ni mashi dɛhiɛmɔ wolo ni yitso ji Na Weku Shihilɛ mli Ŋɔɔmɔ nɛɛ maha bo. [Gbelemɔ baafa 6 ni okane Kpojiemɔ 21:3, 4, ni okɛtsɔɔ akɛ wɔsɛɛ shihilɛ ni yɔɔ naakpɛɛ ni wekui baanyɛ akpa gbɛ lɛ he hiɛnɔkamɔ yɛ.] Miiwo bo hewalɛ ni okane. Kɛ miba biɛ be kroko lɛ, masumɔ ni male nɔ ni osusuɔ yɛ he.” Abaanyɛ awie wolo tɛtrɛɛ ko mli sane ni sa he kɛ dɛhiɛmɔ wolo lɛ bɛ.
6 Kɛ wɔkɛ Weku Shihilɛ wolo lɛ tsu nii lɛ, wɔbaanyɛ wɔye wɔbua gbɔmɛi sɔrɔtoi fɛɛ koni amɛkɛ Nyɔŋmɔ gbɛjianɔtoo lɛ abɔ ni amɛna gbalashihilɛ mli naagbai anaa tsabaai ni yɔɔ Biblia lɛ mli lɛ he sɛɛ. Eji hegbɛ ni wɔna akɛ wɔɔna shiɛmɔ nitsumɔ lɛ mli gbɛfaŋnɔ yɛ be mli ni wɔkɛ Weku Shihilɛ wolo lɛ haa yɛ February yɛ gbɛ ni mɔɔ shi nɔ lɛ.