Shiɛmɔ Wiemɔi Ni Aboɔ Toi
1 Shiɛmɔ wiemɔi ni aboɔ toi ji nɔ ni tsɔɔ faŋŋ bɔ ni sane lɛ kɔɔ shiatsɛ lɛ he ehaa, akɛ eji nɔ ko ni he hiaa lɛ loo nɔni ebaanyɛ ekɛtsu nii. Ye obua shiatsɛ lɛ ni eyoo yɛ osanegbaa lɛ mli fɛɛ akɛ, “Enɛ kɔɔ mihe.” Kɛ wɔmiito shiɛmɔ wiemɔ he gbɛjianɔ lɛ, esa akɛ wɔbi wɔhe akɛ: Mɛɛ saji gbɔmɛi ni yɔɔ mishikpɔŋkuku lɛ mli lɛ wieɔ he waa? Mɛni ji amɛhiamɔ nii? Mɛɛ gbɛ nɔ matsɔ ni mikɛ sane lɛ aha koni mikɛtsɔɔ akɛ Yehowa susuɔ amɛhiamɔ nii ahe? Nɔ ni ato naa yɛ shishi gbɛ nɛɛ ji nibii ni gbɔmɛi wieɔ he waa ŋmɛnɛ lɛ amli fioo ko. Ani obaanyɛ okɛ enɛɛmɛi ateŋ ekome loo nɔ ko ni tamɔ nakai atsu nii yɛ oshiɛmɔ mli? Agbɛnɛ hu kadimɔ bɔ ni obaanyɛ okɛ Kpojiemɔ wolo lɛ mli otii komɛi atsa enɛ nɔ lɛ hu.
2 Bɔ ni Mɛi Susuɔ Miishɛɛ ni Bɛ He: “Wɔkɛ gbɔmɛi ni susuɔ bɔ ni shihilɛ ji yɛ akutso ni wɔyɔɔ mli lɛ he diɛŋtsɛ lɛ miigba sane. Eyɛ mli akɛ gbɔmɛi baanyɛ afee mɛi ni yɔɔ amɛheloo mli hiamɔ nii moŋ, shi amɛteŋ mɛi pii bɛ miishɛɛ yɛ shihilɛ mli ni amɛyɔɔ lɛ he. Ani osusuɔ akɛ abaanyɛ ana shihilɛ ni miishɛɛ diɛŋtsɛ yɔɔ mli? [Ŋmɛɛ gbɛ ni eha hetoo.] Anaa nibii titrii ni haa mɔ naa miishɛɛ lɛ ateŋ ekome yɛ Biblia lɛ mli yɛ Kpojiemɔ 1:3. [Kanemɔ.] Nɔ ni Kpojiemɔ kɛɔ yɛ wɔsɛɛ be he lɛ shishinumɔ baanyɛ eha ona miishɛɛ. Kadimɔ egbalɛi lɛ ateŋ ekome pɛ nɛɛ.” Kanemɔ Kpojiemɔ 21:3, 4 ni otsɔɔ lɛ mfoniri ni yɔɔ Kpojiemɔ wolo lɛ mli yɛ ebaafa 302 lɛ.
3 Bɔ ni Mɛi Susuɔ Wɔsɛɛ Be He Amɛhaa: “Wɔmiibɔ mɔdɛŋ ni wɔkɛ wɔ akutseiaŋbii agba wɔsɛɛ be he nibii kpakpai ni yɔɔ lɛ ahe sane. Ani nakai ji gbɛ nɔ ni obɔɔ mɔdɛŋ ni okwɛ shihilɛ lɛ yɛ? [Ŋmɛɛ hetoo gbɛ.] Taakɛ Biblia lɛ tsɔɔ lɛ, wɔyɛ nɔ ni wɔɔdamɔ nɔ wɔkpa nibii kpakpai agbɛ kɛ wɔfee nɔ ni ekɛɔ yɛ Kpojiemɔ 1:3 lɛ.
4 Bɔ ni Asusuɔ Gbɔmɔtsoŋ Hewalɛnamɔ Kpakpai He Ahaa: “Mɛi ni yɔɔ wɔ akutso nɛɛ mli lɛ ateŋ mɛi pii ahiɛ yɛ hewalɛnamɔ kpakpa ni amɛaana nɔ. Shi, yɛ wɔ henɔkwɛmɔ jogbaŋŋ lɛ fɛɛ sɛɛ lɛ, wɔhe yeɔ lolo. Ani obaasumɔ ni ohi shi yɛ jeŋ ko ni mɔ fɛɛ mɔ baana gbɔmɔtsoŋ hewalɛ ni yeɔ emuu lɛ mli? Yɛ bɔni enɛ baatamɔ nɔ ko ni aheŋ ayeŋ lɛ fɛɛ sɛɛ lɛ, Biblia mli wolo ni ji Kpojiemɔ lɛ wieɔ beni tamɔ nɛkɛ he, ni ekɛɔ wɔ akɛ eyɛ wɔsɛɛ be ni ebɛŋkɛ kpaakpa lɛ mli.” Kanemɔ Kpojiemɔ 21:3, 4. Kɛkɛ lɛ obaanyɛ okɛ mfoniri ni yɔɔ baafai 308-9 yɛ Kpojiemɔ wolo lɛ mli, ni tsɔɔ bɔ ni gbɔmɛi baana gbɛjianɔ ni ato kɛha wala yɛ kristo Afii Akpe nɔyeli be lɛ mli gbɛfaŋnɔ lɛ atsɔɔ lɛ.
5 Bɔ Ni Asusuɔ Mujiwoo kɛ Nibii ni Ebɔle Wɔhe lɛ Ahe Ahaa: “Wɔ akutseiaŋ bii ni wɔkɛ amɛgbaa sane lɛ ha wɔna akɛ amɛteŋ mɛi pii susuɔ bɔ ni awoɔ wɔ kɔɔyɔɔ, nui kɛ niyenii amli muji ahaa lɛ he. Ani osusuɔ akɛ nɔyelii lɛ baanyɛ aha enɛ aba naagbee beko? (Ŋmɛɛ gbɛ ni ewie.] Ewoɔ wɔ hewalɛ akɛ wɔɔle nɔ ni Biblia lɛ kɛɔ akɛ ebaaba mɛi ni fiteɔ shikpɔŋ lɛ anɔ lɛ.” Kanemɔ Kpojiemɔ 11:18b. Tsɔɔmɔ mli akɛ yɛ mɛi ni fiteɔ shikpɔŋ lɛ ni aaajie amɛ kɛya lɛ sɛɛ lɛ, eji Nyɔŋmɔ yiŋtoo hu akɛ eeeha heshibalɔi lɛ afee shikpɔŋ lɛ paradeiso taakɛ atsɔɔ yɛ Lala 37:10, 11 loo Yesaia 65:21, 22 lɛ.
6 Kɛha Mɛi ni Sumɔɔ Nyɔŋmɔ Jamɔ Lɛ: “Wɔkɛ sanebimɔ ko miifɔ wɔ akutseiaŋbii lɛ ahiɛ: Ani osusuɔ akɛ ato akɛ anu Kpojiemɔ wolo lɛ shishi, aloo ebaahi shi akɛ teemɔŋ sane be fɛɛ be? [Ŋmɛɛ gbɛ ni ewie.] Mɛi pii kɛo kpaa gbee. Kwɛmɔ nɔ ni Biblia lɛ diɛŋtsɛ kɛɔ yɛ Kpojiemɔ 1:3.”
7 Yɛ be mli ni okɛ anɔkwayeli bɔɔ mɔdɛŋ ni onine ashɛ otoibolɔi lɛ atsui nɔ lɛ, mɛi ni anɔkwale kɛ jalɛ he hɔmɔ yeɔ amɛ lɛ baahere nɔ.—Mat. 5:3, 6.