Ná Odase ni Oooye Jogbaŋŋ Kɛmɔ Shi lɛ He Miishɛɛ
1 Wɔ fɛɛ wɔnyaa nibii ni wɔfeɔ lɛ jogbaŋŋ lɛ he. Marko 7:37 kɛɛ akɛ asafoi babaoo lɛ jaje yɛ Yesu he akɛ: “Éfee nii fɛɛ jogbaŋŋ!” Ebɛ naakpɛɛ akɛ Yesu ná Yehowa suɔmɔnaa nifeemɔ he miishɛɛ! (Okɛto Lala 40:9Ga Bible he.) Kɛ wɔsusu gbɛtsɔɔmɔi ni nyiɛ sɛɛ nɛɛ ahe lɛ, wɔ hu wɔbaaná miishɛɛ yɛ be mli ni wɔboɔ Yesu famɔ ni ekɛha akɛ “wɔshiɛ wɔtsɔɔ gbɔmɛi lɛ ni wɔye odase jogbaŋŋ kɛmɔ shi” lɛ toi lɛ. (Bɔf. 10:42, NW) Wɔkɛ woji fɛɛ ni hiɛ baafai 192 ni akala dani afi 1985 shɛ, ni ekolɛ asafo lɛ yɔɔ eko loo Hii Shi Daa wolo lɛ baaha yɛ January mli. Mɛɛ gbɛ nɔ wɔɔtsɔ wɔkɛ woji nɛɛ atsu nii koni wɔkɛye odase jogbaŋŋ kɛmɔ shi?
2 Akɛni bei pii lɛ gbɔmɛi susuɔ hewalɛnamɔ he saji ahe waa hewɔ lɛ, obaanyɛ okɛɛ enɛ:
◼ “Yɛ nibii ni sa kadimɔ ni anyɛ atsu yɛ tsofafeemɔ mli nikasemɔ mli lɛ fɛɛ sɛɛ lɛ, yɛ hela hewɔ lɛ, piŋmɔi babaoo yɛ. Yɛ ojwɛŋmɔ naa lɛ, mɛni hewɔ ebaa lɛ nakai? [Ŋmɛɛ gbɛ ni ewie.] Yesu Kristo kɛɛ akɛ tsɛŋemɔ hela baafee naagbee gbii lɛ he okadii lɛ eko. (Luka 21:11) Ni kɛlɛ, Biblia lɛ hu wieɔ be ni hela ehiŋ shi dɔŋŋ lɛ he sane. [Kanemɔ Yesaia 33:24.] Kadimɔ bɔ ni wolo pɛmpɛoo nɛɛ haa anáa hiɛnɔkamɔ yɛ nakai Biblia mli shishijee tsɔɔmɔ lɛ mli.” Maa wolo lɛ mli saji ni sa ni owieɔ he lɛ anɔ mi ni okɛha. Tsɔɔmɔ mli akɛ wɔbaaku sɛɛ wɔba kɛha sanegbaa lolo.
3 Kɛ ooye odase trukaa yɛ hei ni shwapoi yɔɔ lɛ, obaanyɛ oŋa mɔ lɛ koni obi akɛ:
◼ “Ani onaa akɛ nibii ajara miiwa waa be fɛɛ be yɛ bei nɛɛ amli, ni yɛ no hewɔ lɛ ewa akɛ aaaná shika ni fa ni akɛaahe nii? [Ŋmɛɛ gbɛ ni ewie.] Ani osusuɔ akɛ gbi ko baaba kɛ̃ ni mɛi ahe baajɔ amɛ lɛɛlɛŋ yɛ shika gbɛfaŋ?” Ŋmɛɛ gbɛ ni ewie. No sɛɛ lɛ wiemɔ Ŋmalɛ mli wiemɔ ko ni sa ni jɛ wolo ni okɛhaa lɛ mli lɛ he. Yaa nɔ okɛɛ akɛ: “Nɛkɛ wolo nɛɛ tsɔɔ bɔ ni Nyɔŋmɔ baatsɔ e-Maŋtsɛyeli lɛ nɔ ekɛ naagbai ni haa shihilɛ mli waa waa ŋmɛnɛ lɛ naa tsabaa aba.” Okɛ wolo lɛ aha kɛ miishɛɛ. Obaanyɛ otsɔɔ bɔ ni oná sanegbaa lɛ he miishɛɛ waa oha, ni obi akɛ: “Ani gbɛ ko yɛ ni wɔbaanyɛ wɔtsɔ nɔ wɔtsa sanegbaa nɛɛ nɔ be kroko?” Yɛ nɛkɛ gbɛ nɔ lɛ, obaanyɛ ohe mɔ lɛ tɛlifoŋ nɔmba loo shia adrɛs, ni etsɔɔ he ni abaanyɛ ana eshia yɛ.
4 Ekolɛ obaaná hegbɛ ni oka shiɛmɔ wiemɔ ni kɔɔ jeŋ toiŋjɔlɛ he lɛ okwɛ, yɛ be mli ni okɛ “Hii Shi Daa” wolo lɛ tsuɔ nii:
◼ “Yɛ ojwɛŋmɔ naa lɛ, mɛni hewɔ ewa waa akɛ aaaná jeŋ toiŋjɔlɛ lɛ? [Ŋmɛɛ gbɛ ni ewie, no sɛɛ lɛ tsɔɔmɔ lɛ mfoniri ni atɛŋ yɛ baafai 20-1 lɛ.] Enɛ ji mfoniri ni tsɔɔ Biblia mli sane ko ni ba ni atsɔɔ mli yɛ Kpojiemɔ lɛ. [Kanemɔ Kpojiemɔ 12:7-9, 12 tɛ̃ɛ kɛjɛ kuku 17 lɛ mli. No sɛɛ lɛ kanemɔ niŋmaa ni wieɔ mfoniri lɛ he lɛ.] Toiŋjɔlɛ ni bɛ je lɛŋ lɛ ji nibii ni jɛ Abonsam ni ashɛ lɛ afɔ shikpɔŋ nɔ lɛ mli kɛba lɛ ateŋ ekome. Nɛkɛ wolo nɛɛ haa sanebimɔi babaoo ni he hiaa lɛ ahetoo, ni miyɛ he miishɛɛ akɛ mikɛaaha bo.”—Bɔni afee ni oná gbɛi krokomɛi ni mɔɔ shi ni oootsɔ nɔ okɛ Hii Shi Daa wolo lɛ aha lɛ, kwɛmɔ September 1995, February 1995, September 1994, kɛ September 1992 Wɔ Maŋtsɛyeli Sɔɔmɔ sɔrɔtoi lɛ asɛɛgbɛ baafa lɛ.
5 Kɛ ooku osɛɛ koni oyana mɛi ni jie miishɛɛ kpo lɛ, obaanyɛ obɔ mɔdɛŋ oje Biblia mli nikasemɔ shishi kɛtsɔ gbɛtsɔɔmɔ nɛɛ kɛ nitsumɔ nɔ:
◼ “Beni wɔgba sane nyɛsɛɛ ko lɛ, owie sane ko ni he hiaa waa. [Tsɔɔmɔ nɔ ni mɔ lɛ wie.] Miisusu he, ni masumɔ ni magba bo nɔ ni jɛ saji amlitaomɔ ko ni mifee yɛ sane lɛ he lɛ mli lɛ he sane. [Gbaa lɛ ŋmalɛ ko ni sa he sane.] Wɔmiibi ni wɔkɛ bo afee nikasemɔ ni aheee nɔ ko ni eye ebua gbɔmɛi akpekpei abɔ koni amɛkɛ be fioo atao Biblia mli shishijee tsɔɔmɔi amli fitsofitso lɛ. Niiamlitaomɔ ni tamɔ nɛkɛ lɛ baanyɛ atswa hekɛnɔfɔɔ ni oyɔɔ yɛ Nyɔŋmɔ shiwoi ni baaba mli kɛ̃ lɛ mli.” Maa sanebimɔi komɛi ni abaaha hetoo lɛ anɔ mi. Kɛ mɔ lɛ ekpɛlɛɛɛ Biblia mli nikasemɔ nɔ lɛ, tsɔɔmɔ mli akɛ wɔ hu wɔyɛ nikasemɔ ni akɛ be fioo pɛ feɔ lɛ he gbɛjianɔtoo krɛdɛɛ ni heɔ minitii 15 pɛ daa otsi kɛha otsii 16. Okɛ Taoɔ wolo bibioo lɛ atsɔɔ, gbelemɔ nikasemɔ 1, ni obi kɛji obaanyɛ ofee klɛŋklɛŋ nikasemɔ lɛ he nɔkwɛmɔnɔ.
6 Kaimɔ Koni Ogbala Nikaselɔi Ajwɛŋmɔ Kɛya Yehowa Gbɛjianɔtoo lɛ Nɔ: Eji gbɛnaa nii ni kã wɔnɔ akɛ wɔtee mɛi amiishɛɛ shi kɛya Yehowa gbɛjianɔtoo lɛ mli, kɛtsɔ saji ni jɛ wolo bibioo ni ji Yehowa Odasefoi—Miifee Nyɔŋmɔ Suɔmɔnaa Nii yɛ Ekomefeemɔ Mli yɛ Jeŋ Fɛɛ lɛ kɛ nitsumɔ nɔ. Nikaselɔ lɛ baaya ehiɛ waa oyayaayai, kɛ eyɔse gbɛjianɔtoo lɛ, ni ehiɛ sɔ ni ele bɔ ni ehe hiaa akɛ aaafee emlinyo lɛ. Kɛ aje nikasemɔ lɛ shishi nɔŋŋ pɛ lɛ, yaa nɔ ofɔ nikaselɔ lɛ nine kɛya kpeei. Tsɔɔmɔ bɔ ni afeɔ lɛ ahaa. Tsɔɔmɔ bɔ ni bo diɛŋtsɛ onuɔ he waa ohaa yɛ hiɛsɔɔ ni onáa ohaa Yehowa gbɛjianɔtoo lɛ hewɔ. (Mat. 24:45-47) Wiemɔ nyɛ asafo lɛ kɛ nɔ ni okaseɔ yɛ kpeei ashishi lɛ he ekpakpa.
7 Ha ohe asa jogbaŋŋ yɛ onitsumɔ lɛ mli, ni omli baafili bo yɛ mli. Ha ohiɛ ahi odase ni oooye jogbaŋŋ kɛmɔ shi lɛ nɔ be fɛɛ be, ni oná shiɛmɔ nitsumɔ lɛ mli fãi sɔrɔtoi fɛɛ ni otsuɔ he nii jogbaŋŋ lɛ he miishɛɛ.—1 Tim. 4:16.