Nyɛhiɛa Jeŋba Kpakpa ni Woɔ Nyɔŋmɔ Hiɛ Nyam lɛ Mli
1 He fɛɛ he ni wɔyɔɔ lɛ, wɔjeŋba, atadewoo, kɛ hesaamɔ yeɔ wɔ kɛ Nyɔŋmɔ ni wɔjáa lɛ lɛ he odase. Enɛ bafeɔ faŋŋ jogbaŋŋ titri yɛ Nyɔŋmɔ webii ahenaabuamɔi wuji ashishi, he ni mɛi babaoo naa wɔ yɛ lɛ. Kɛ wɔfee nɔkwɛmɔnɔ kpakpa lɛ, ewoɔ Yehowa hiɛ nyam. (1 Pet. 2:12) Shi kɛlɛ, jeŋba ni esaaa loo nifeemɔi ni asusuuu he ni mɛi fioo ko pɛ kɛ amɛhe woɔ mli lɛ baanyɛ egbe Nyɔŋmɔ gbɛi lɛ kɛ ewebii lɛ ahe guɔ. (Jaj. 9:18b) Ní wɔɔha ehi wɔjwɛŋmɔ mli akɛ mɛi ni yɔɔ sɛɛ lɛ kwɛɔ wɔjeŋba ni amɛkɛkojoɔ wɔ gbɛjianɔtoo lɛ kɛ Nyɔŋmɔ ni wɔjáa lɛ lɛ atsirɛ wɔ koni wɔkwɛ jogbaŋŋ yɛ bɔ ni wɔfeɔ ‘nii fɛɛ wɔkɛwoɔ Nyɔŋmɔ hiɛnyam’ lɛ he.—1 Kor. 10:31.
2 Jeŋba Kpakpa ni Akɛaatsu Nii yɛ Gbɔiatoohei Lɛ: Yɛ shihilɛi babaoo mli lɛ, shiatsɛmɛi lɛ náa gbɛjianɔtoo kpakpa, subaŋi kpakpai, kɛ falefalefeemɔ ni Yehowa Odasefoi kɛtsuɔ nii lɛ he miishɛɛ waa diɛŋtsɛ. Beni gbɔiatoohe nɔkwɛlɔ ko wieɔ Odasefoi awekui ni bahi egbɔiatoohe lɛ ahe lɛ, ekɛɛ akɛ: “Yehowa Odasefoi abii lɛ ji gbekɛbii ni hi fe fɛɛ eko ni mina pɛŋ! Amɛsaa amɛhe tamɔ awulai kɛ owulai; amɛbɛ basabasa, amɛbuɔ mɔ, ni amɛbaa amɛjeŋ jogbaŋŋ; ni amɛhako mi naagba ko kwraa. Eka shi faŋŋ akɛ esa akɛ akɛ woo aha nyɛ yɛ nyɛbii lɛ ahewɔ. Eŋɔɔ wɔnaa waa diɛŋtsɛ akɛ nyɛbii lɛ ba biɛ.” Wɔnyɛɔ wɔnuɔ saji ni tamɔ enɛɛmɛi ejaakɛ mɛi ni kɛ wɔ yeɔ lɛ baanyɛ ana suɔmɔ kɛ bulɛ ni yɔɔ Yehowa webii ateŋ lɛ.
3 Yɛ gbɛ kroko nɔ lɛ, wiemɔi ni shiatsɛmɛi krokomɛi ewie lɛ tsɔɔ akɛ naagba yɛ mɛi komɛi ahe lolo yɛ bɔ ni amɛfeɔ anyagba yɛ amɛjeŋba mli loo amɛkɛ wɔɔhei lɛ tsuuu nii yɛ gbɛ kpakpa nɔ lɛ hewɔ. Enɛ kɛ naagbai baa ni ehaa awieɔ ashiɔ wɔ yɛ be mli ni kulɛ esaaa ni ebaa lɛ nakai lɛ. Shiatsɛmɛi komɛi yeɔ ŋkɔmɔ akɛ gbekɛbii kɛ mɛi ni yeko afii nyɔŋmai enyɔ lɛ feɔ hoo ni amɛfeɔ nɔ ni esaaa, ni amɛfɔlɔi kwɛɛɛ amɛnɔ beni amɛshwɛɔ yɛ wɔɔhei lɛ.
4 Gbɔiatoohei kɛ skul srɔtoi babaoo yɛ mlai ni aakpa gbɛ akɛ gbɔi kɛbaatsu nii. Nyɛmimɛi lɛ ekomɛi eku mlai ni kɔɔ hoofeemɔ loo niyenii ní ahooo yɛ tsũi amli lɛ amli. Gbɔiatoohe nɔkwɛlɔi kɛɔ wɔ akɛ, nihoomɔ ni yaa nɔ yɛ he ni aŋmɛɛɛ gbɛ yɛ lɛ ji nii ni afɔɔ feemɔ ni haa akɛ amɛnibii tsuɔ nii yɛ gbɛ fɔŋ nɔ. Jeee akɛ áje gbɛ afite tsũi lɛ amligbɛ hei komɛi pɛ kɛkɛ shi tsũ ni mli jeɔ sã waa lɛ hu hiɔ shi gbii loo otsii abɔ ni anyɛɛɛ akɛhai mɔ ko. Esaaa akɛ ahoɔ nii, ja aje gbɛ akɛ nakai feemɔ hegbɛ ha yɛ tsũ lɛ mli.
5 Esa akɛ abɔ mɔdɛŋ jogbaŋŋ diɛŋtsɛ ni akɛ shiatsɛmɛi afee ekome. Eka shi faŋŋ akɛ, wɔsumɔŋ ni wɔha mɛi aná jwɛŋmɔ ni ejaaa yɛ Yehowa webii ahe. Ákɛ Kristofoi lɛ, esa akɛ wɔye anɔkwa yɛ bei fɛɛ mli. Esaaa akɛ wɔkɔlɔɔ klala loo “nibii ni akɛsáa hei” kɛjɛɔ gbɔiatoohei, ejaakɛ juu ni; asaŋ esaaa akɛ wɔfeɔ mɛi ni maleɔ yɛ be mli ni wɔtsɔɔ mɛi abɔ ni wɔtoɔ gbɛjianɔ akɛ wɔkɛ amɛ baahi tsũ lɛ mli beni wɔtaoɔ tsũi loo akwɛɔ wɔnibii amli lɛ.
6 Jeŋba Kpakpa ni Ajieɔ lɛ Kpo yɛ Kpee lɛ Shishi: Yɛ be mli ni he ni afeɔ kpee lɛ yɛ lɛ kɔɔɔ he eko lɛ, esa akɛ abu jɛmɛ akɛ Maŋtsɛyeli Asa wulu ko yɛ be mli ni kpee lɛ yaa nɔ lɛ. Esa akɛ bɔ ni atadewoo kɛ hesaamɔ lɛ hi jogbaŋŋ ha lɛ afee faŋŋ taakɛ eji beni wɔyaa kpeei yɛ wɔ asafoŋ kpeei ashishi lɛ. Yɛ be mli ni kpee lɛ yaa nɔ kɛ beni akpa fɛɛ sɛɛ lɛ, esaaa akɛ nyɛmimɛi hii kɛ yei woɔ atadei ni esaaa loo atadei ni eba nɔ, ni jieɔ je lɛŋ mumɔ lɛ kpo ni haa efeɔ nɔ ni wa akɛ aaayɔse wɔ akɛ wɔyɛ srɔto kwraa yɛ jeŋba gbɛfaŋ lɛ. Esa akɛ nyɛmimɛi yei akwɛ jogbaŋŋ koni bɔ ni akpɛ nibii ni amɛwoɔ yɛ shishi kɛ amɛtadei lɛ aha kɛ amɛkɛlɛmɔ lɛ afee nɔ ni sa jogbaŋŋ. (1 Tim. 2:9, 10) Kɛ wɔmiiya kpee lɛ jio, wɔmiihi shi yɛ gbɔiatoohe loo skul jio, wɔmiiye nii yɛ niyelihe, loo wɔyaahe nii yɛ shwapo ko mli jio, esa akɛ wɔjie lɛ kpo be fɛɛ be akɛ wɔji Nyɔŋmɔ sɔɔlɔi, ní wɔkafee nɔ ko kwraa ni baato mɔ ko pampi.—2 Kor. 6:3.
7 Abaabaptisi mɛi Hɔɔ leebi yɛ kpee lɛ shishi. April 1, 1995 Buu-Mɔɔ lɛ baafa 30 lɛ tsɔɔ subaŋ ni esa akɛ wɔjie lɛ kpo yɛ nakai nifeemɔ lɛ shishi. Ekɛɛ akɛ esa akɛ “abu baptisimɔ akɛ eji hiɛdɔɔ sane. Ejeee be ni akɛaajie henumɔi akpo kɛ bolɔmɔ, kɛ okpɔlɔŋmɛɛ, aloo kɛ hoofeemɔ. Shi nakai nɔŋŋ hu ejeee be ni akɛaafee hiɛ mɔbɔmɔbɔ loo akɛaatũ hiɛ kɛ hiɛdɔɔ.” Ebaafee nɔ ni esaaa kwraa akɛ mɛi ni abaptisiɔ amɛ lɛ aaawo hejuu atade ni miaa mɔ waa loo etɛŋɔ gbɔmɔtso lɛ, hii jio, yei jio. No hewɔ lɛ, esa akɛ mɔ fɛɛ mɔ ajie hiɛdɔɔ kɛ miishɛɛ kpo yɛ Kristofoi abaptisimɔ he.
8 Petro kaiɔ wɔ yɛ ‘nɔ̃ gbɔmɛi ni sa akɛ wɔtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli’ lɛ he. (2 Pet. 3:11) Eba akɛ wɔwiemɔi kɛ nifeemɔi yɛ “Nyɔŋmɔ Wiemɔ lɛ Nɔyelɔi” Kpokpaa Wulu nɔ kpee lɛ shishi lɛ baaye abua mɛi ni yɔɔ tsui ni ja ni amɛkwɛɔ enɛ lɛ koni amɛle wɔ Nyɔŋmɔ kpeteŋkpele ni sa woo kɛ anunyam fɛɛ lɛ ní amɛjá lɛ.—1 Kor. 14:24, 25.