Feemɔ Ekpakpa Koni Ajie Oyi!
1 “Amɛhe jɔ ni minako nakai pɛŋ yɛ mɛi krokomɛi kwraa ahe.” “Eyɛ miishɛɛ akɛ okɛ nɛkɛ gbɔmɛi akuu nɛɛ aaahi he kome.” Enɛɛmɛi ji saji kpakpai babaoo ni wɔnine shɛ nɔ kɛjɛ mɛi ni naa wɔ lɛ aŋɔɔ lɛ mli nɔ ni sa kadimɔ waa yɛ nyɛsɛɛ afi lɛ kpokpaa wulu nɔ kpeei lɛ sɛɛ, beni amɛwie kɛma bulɛ kpakpa ni yɔɔ wɔhe ákɛ mɛi ni ato amɛhe gbɛjianɔ lɛ nɔ mi lɛ. (Abɛi 27:2; 1 Kor. 4:9) Yɛ naagbee lɛ, wiemɔi ni tamɔ nɛkɛ kɛ yijiemɔ bahaa Yehowa. (Mat. 5:16) Hegbɛ kroko hu ni sa jogbaŋŋ ni wɔɔtsɔ nɔ wɔjie Nyɔŋmɔ yi lɛ kã wɔhiɛ amrɔ nɛɛ yɛ afi nɛɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ shishi.
2 Wɔnine shɛɔ kaimɔ wiemɔi ni mlihilɛ yɔɔ mli lɛ anɔ daa afi yɛ bɔ ni sa akɛ wɔba wɔjeŋ jogbaŋŋ yɛ kpokpaa wulu nɔ kpee lɛ shishi lɛ he. Mɛni hewɔ? Ejaakɛ yɛ be mli ni je lɛ nifeemɔ sú, atadewoo, kɛ jeŋba yaa nɔ efiteɔ lɛ, wɔsumɔɔɔ ni wɔfeɔ tamɔ amɛ. Wɔsumɔɔɔ ni bulɛ kpakpa ni wɔyɔɔ lɛ fiteɔ. (Efe. 2:2; 4:17) Nyɛhaa saji ni nyiɛ sɛɛ ni sa akɛ akwɛ jogbaŋŋ yɛ he nɛɛ ahia wɔjwɛŋmɔ mli.
3 Feemɔ Ekpakpa—Yɛ Wɔ Wɔɔhei Lɛ: Ale wɔ akɛ gbɔmɛi anɔkwafoi. (Heb. 13:18) No hewɔ lɛ esa akɛ wɔye anɔkwa yɛ mɛi abɔ ni hiɔ wɔ gbɔiatoohe tsũ mli lɛ he. Esaaa akɛ wɔhooɔ niyenii yɛ tsũ lɛ mli kɛ́ aŋmɛɛɛ nakai feemɔ gbɛ. Wɔɔhe nɔkwɛlɔ ko wie akɛ enyɛɔ ehaa jara ni awoɔ kɛhaa tsũi ni awɔɔ mli lɛ baa shi kɛhaa Yehowa Odasefoi ejaakɛ ehe ebahiako pɛŋ akɛ ekɛ papam srɔtoi aaaye ekomɛi ni elaaje najiaŋ. Ele akɛ abaakwɛ tsũ lɛ jogbaŋŋ. Eka shi faŋŋ akɛ wɔkɔlɔŋ “nibii yɛ jɛmɛ” kɛjɛŋ gbɔiatoohe loo wɔɔhei krokomɛi lɛ. Shi moŋ, shĩ nikeenii ko ni sa koni okɛtsɔɔ hiɛsɔɔ ni oyɔɔ kɛha nii ni afee aha bo lɛ yɛ he ni amɛkpooŋ nikeenii yɛ lɛ. Ni okɛ bulɛ kɛ tsuishitoo atsu nii be fɛɛ be yɛ bɔ ni okɛ gbɔiatoohe kɛ skul nitsulɔi yeɔ haa lɛ mli.
4 Kɛ mɛi ni kwɛɔ wɔ lɛ na akɛ wɔbii lɛ miiba amɛjeŋ yɛ bulɛ kɛ heshibaa mli lɛ, amɛnáa he miishɛɛ. (Efe. 6:1, 2) Fɔlɔi, nyɛkwɛa nyɛbii lɛ anɔ bɔni afee ni amɛkɛ naagba akaha mɛi krokomɛi, kɛ agbɛnɛ yɛ be mli ni amɛjieɔ amɛ hiɛtserɛ yɛ hiɛtserɛjiemɔhei lɛ. Mɔ ko mɔ ko akaŋa shinaai bɔ ni baaha egbɛɛ waa loo ni aaabolɔ waa, titri lɛ beni je ena kwraa kɛ leebi maŋkpa.
5 Wɔbaanyɛ wɔfee ejurɔ kɛtsɔ mɛi ni jeee Odasefoi ni amɛji gbɔi yɛ gbɔiatoohe lɛ ni kɛ wɔ fɛɛ hu wɔɔ jɛmɛ lɛ ni wɔɔsusu amɛhe lɛ nɔ. Ejeee nɔ ni sa akɛ aaakɔlɔ niyenii ni akɛhaa ni aheee nɔ ko yɛ he lɛ koni aye yɛ sɛɛ mli loo ni akɛ kɔfe aaawo nibii amli koni anu yɛ sɛɛ mli. Esaaa ni wɔsusuɔ kɔkɔɔkɔ akɛ wɔjeee mɛi ni akpaa amɛ gbɛ akɛ amɛkɛ gbɔiatoohe mlai aaatsu nii.
6 Feemɔ Ekpakpa—Yɛ He ni Afeɔ Kpee lɛ Yɛ Lɛ: Nɔ ni ayɔse ji akɛ mɛi ni baa kpee lɛ ateŋ mɛi komɛi kɛ mɛi ni kwɛɔ shitaramɔ nɔ lɛ efeee ekome, ni amɛkɛ amɛ wieɔ yɛ gbɛ ni esaaa Kristofonyo po nɔ. Akɛni kpeeiyalɔi lɛ ateŋ mɛi komɛi kɛ nyɛmimɛi hii lɛ agbɛtsɔɔmɔi lɛ tsuuu nii ni amɛkɛ tsɔnei mamɔɔ hei ni amɛsumɔɔ hewɔ lɛ, amɛkɛ naagbai baa. Eka shi faŋŋ akɛ, mi klɛŋklɛŋ sú haaa ayɔse mɔ akɛ ekpakpafeelɔ, ni asaŋ ekɛ yijiemɔ bahaaa Yehowa Nyɔŋmɔ. No hewɔ lɛ, nyɛhaa wɔkɛ suɔmɔ, tsuishitoo, kɛ ekomefeemɔ atsua nii.—Gal. 5:22, 23, 25.
7 Anyɛɔ anaa nyɛmimɛi hii kɛ yei komɛi Hɔgbaa leebi maŋkpa ni amɛmiijo foi, amɛmiitsirɛ mɛi, amɛkɛ amɛhe miishilɛ mɛi koni amɛná sɛii ni “amɛsumɔɔ fe fɛɛ” yɛ drama ni abaajie lɛ hewɔ. Apila mɛi yɛ jeŋba ni tamɔ nɛkɛ hewɔ. Agbɛnɛ hu wɔsumɔŋ ni wɔkɛ tɛi kɛ nibii krokomɛi amɔmɔ sɛii kɛyashi jetsɛremɔ. Yɛ be mli ni akɛ ŋaawoo eha akɛ wɔkɛ shwane niyenii ni mli etsiii aba koni wɔye shwane lɛ, ejeee nɔ ni sa akɛ aaato okpɔlɔi yɛ hei ni tsɔnei mamɔɔ lɛ koni aye nii gbɛɛ. Enɛ baafee tamɔ nɔ ni afa gbɛ kɛtee he ko ni okpɔlɔŋmɛɛ he nifeemɔ ko miiya nɔ yɛ jɛmɛ taakɛ afɔɔ feemɔ beni atee kpɔiaŋgbɔlemɔ hiɛtserɛjiemɔhei lɛ.
8 Feemɔ Ekpakpa—Kɛtsɔ Wɔtadewoo kɛ Hesaamɔ Nɔ: Beni agbe nyɛsɛɛ afi lɛ kpokpaa wulu nɔ kpeei lɛ eko naa yɛ U.S. lɛ, maŋtiase wulu ko adafitswaa wolo niŋmalɔ ko ŋma akɛ: “Nɔ ni sa kadimɔ waa fe nɔ fɛɛ nɔ ji bɔ ni Odasefoi lɛ baa amɛjeŋ amɛhaa lɛ. Kwɛ bɔ ni ehaa mɔ tsui nyɔɔ emli akɛ aaana mɛi babaoo ni akɛ woo kɛ bulɛ he adafitswaa ni tamɔ nɛkɛ miiyɔse amɛ. Wekui ohai abɔ ni jɛ hewolonɔ sui kɛ wiemɔ kui srɔtoi ni wo atadei ni amɛsumɔɔ fe fɛɛ Hɔgbaa lɛ kɛ dioofeemɔ ke yuu kɛtee shwɛmɔhe lɛ. Amɛnifeemɔ lɛ yɛ srɔto kwraa yɛ gbɔmɛi asafoku babaoo ni toɔ sɛrɛnɛɛ kɛboteɔ shwɛmɔhe lɛ ahe. Yɛ anɔkwale mli lɛ, Odasefoi lɛ yɛ srɔto kwraa diɛŋtsɛ yɛ gbɔmɛi asafokui lɛ ateŋ mɛi babaoo ahe. Ebafee nɔ ni efɔɔɔ kaa kwraa akɛ ooona ni akɛ he miiwo jeŋba gbonyo mli yɛ maŋ. . . . Lɛɛlɛŋ, Odasefoi ni fa lɛ haa tsui nyɔɔ mɔ mli.” Eba akɛ wɔhaŋ wɔtadewoo kɛ hesaamɔ loo wɔjeŋba agbala mɛi ajwɛŋmɔ yɛ gbɛ ko gbɛ ko kwraa nɔ kɛjɛ mumɔŋ shihilɛ ni yaa nɔ yɛ kpee lɛ shishi lɛ nɔ.—Fil. 1:10; 1 Tim. 2:9, 10.
9 Feemɔ Ekpakpa—Yɛ Baptisimɔ Mli: Mɛi ni abaabaptisi amɛ lɛ baasumɔ ni amɛkɛ woo ni mli kwɔ atsu nɛkɛ be nɛɛ he nii. Atade ni sa ni akɛboteɔ nu mli lɛ baatsɔɔ hiɛsɔɔ ni ayɔɔ kɛha krɔŋkrɔŋ ni nɛkɛ be nɛɛ ji lɛ. Ebaafee nɔ ni sɛɛnamɔ yɔɔ he fe fɛɛ akɛ Biblia nikasemɔ nɔkwɛlɔi kɛ amɛ nikaselɔi lɛ aaatĩ “Sanebimɔi ni Jɛ Kanelɔi” adɛŋ lɛ ni yɔɔ April, 1 1995 Buu-Mɔɔ lɛ mli dani aya kpee lɛ.
10 Wɔjeŋba kpakpa kɛ wɔ Nyɔŋmɔ gbeyeishemɔ jeŋba lɛ yeɔ Kristofoi ahemɔkɛyelii ni wɔyɔɔ lɛ he odase ni ehaa efeɔ mlɛo kɛhaa mɛi ni hiɛ tsui ni ja lɛ koni amɛyɔse anɔkwale lɛ. No hewɔ lɛ, nyɛhaa ‘wɔfea ekpakpa’ koni ajie wɔ yi yɛ be mli ni wɔyaa “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ.—Rom. 13:3.