Kaimɔ Be Lɛ—Be ni Akɛtsuɔ Nii Babaoo
1. Mɛɛ hewalɛ “gbii juji” ná yɛ Israelbii ni sheɔ Nyɔŋmɔ gbeyei lɛ anɔ?
1 Blema Israelbii lɛ yeɔ “Yehowa gbii juji” yɛ be ni ato yɛ afi lɛ mli. (3 Mose 23:2) Be ní amɛheɔ kɛsusuɔ nibii kpakpai ni amɛ-Nyɔŋmɔ lɛ efee eha amɛ lɛ ahe lɛ haa amɛnáa miishɛɛ babaoo ni ekanyaa amɛ koni amɛfee ekãa kɛha jamɔ krɔŋŋ.—2 Kron. 30:21–31:2.
2, 3. Mɛni hewɔ esa akɛ wɔkɛ wɔhe awo mumɔŋ nitsumɔi amli babaoo yɛ Kaimɔ be lɛ mli lɛ, ni mɛɛ be wɔbaaye Kaimɔ lɛ?
2 Yɛ ŋmɛnɛŋmɛnɛ beaŋ lɛ, wɔ teokrase nitsumɔ ni yɔɔ miishɛɛ lɛ yaa hiɛ daa afi yɛ Kaimɔ be lɛ mli. Eji be ní wɔkɛsusuɔ nikeenii ni jara wa waa ni Yehowa kɛha yɛ wɔ hewɔ lɛ he—ni ji e-Bi koome lɛ. (Yoh. 3:16; 1 Pet. 1:18, 19) Be ni wɔsusuɔ suɔmɔ ni Nyɔŋmɔ kɛ e-Bi lɛ jie lɛ kpo lɛ he lɛ, etsirɛɔ wɔ ní wɔkɛ yijiemɔ aha Yehowa koni wɔkɛ hewalɛ atsu nii kɛfee Yehowa suɔmɔnaa nii.—2 Kor. 5:14, 15.
3 Afi nɛɛ, abaaye Nuŋtsɔ lɛ Gbɛkɛnaashi Niyenii lɛ Soo, March 24, be ni hulu enyɔ shi sɛɛ. Mɛɛ gbɛ nɔ wɔɔtsɔ wɔtsu babaoo yɛ sɔɔmɔ nitsumɔ lɛ mli yɛ March, April, kɛ May nyɔji lɛ amli?
4, 5. (a) Mɛni eye ebua mɛi komɛi ni amɛnyɛ amɛye mɛi babaoo odase? (b) Mɛɛ gbɛ ni mɔɔ shi jogbaŋŋ ona akɛ abaanyɛ atsɔ nɔ akɛye odase yɛ okutso lɛ mli?
4 Ní Wɔɔye Mɛi Babaoo Odase: Taomɔ gbɛ̀i ni obaatsɔ nɔ oye mɛi babaoo odase bɔ ni ooonyɛ be ni okɛ ohe woɔ shiɛmɔ nitsumɔ lɛ mli lɛ. Ani obaanyɛ oto gbɛjianɔ koni okɛ ohe awo shia-kɛ-shia shiɛmɔ nitsumɔ lɛ mli be ni mɛi pii yɔɔ shia lɛ, tamɔ be ni hulu miihe anyɔ shi loo yɛ gbɛkɛ mli? Kɛji akɛ mɛi komɛi yɛ nyɛ asafo woloŋ nikasemɔ kuu lɛ mli ní baasumɔ ni amɛkɛ amɛhe awo shiɛmɔ nitsumɔ lɛ mli dani aje nikasemɔ lɛ shishi lɛ, nikasemɔ nɔkwɛlɔ lɛ baanyɛ ato gbɛjianɔ koni afee kpee kɛha shiɛmɔyaa kuku, ní anyɛ atsu nii yɛ shikpɔŋkuku ko ni bɛŋkɛ mli.
5 Gbɛ kroko hu ni atsɔɔ nɔ ayeɔ mɛi babaoo odase ji ni aye odase yɛ hei ni anaa mɛi babaoo yɛ. Nyɛmiyoo ko ni yɔɔ Japan ni kɛ be-fɛɛ tsuɔ nii lɛ miisumɔ akɛ efee gbɛgbalɔi awalɔ. Onukpa ko wo lɛ ŋaa akɛ ebaanyɛ ekɛ ehe awo gbɛjegbɛ he odaseyeli mli yɛ oketekei adaamɔhe lɛ daa gbi dani eya nitsumɔ. Be ni eye gbeyeishemɔ henumɔi kɛ fɛoyeli ni baa kɛjɛɔ mɛi ni ekɛkwɔɔ oketeke lɛ aŋɔɔ lɛ nɔ kunim sɛɛ lɛ, ená mɛi aaafee 40 ni ehaa amɛ woji tɛtrɛbii lɛ daa, ni mɛi ni fata he ji nitsulɔi ni ekɛkwɔɔ oketeke lɛ, mɛi ni tsuɔ nii yɛ oketekei adaamɔhe lɛ, kɛ mɛi ni hɔɔ nii yɛ shwapoi ni bɛŋkɛ jɛmɛ lɛ amli. Kɛ́ aja mli lɛ, eja woji tɛtrɛbii 235 yɛ nyɔŋ kome mli. Enyɛ ekɛ mɛi ekpaa je Biblia mli nikasemɔ shishi kɛtsɔ Ŋmalɛ mli saji ni ekɛ amɛ susu he yɛ be kukuoo ko mli daa gbi lɛ nɔ.
6. Mɛɛ gbɛ nɔ oblahii kɛ oblayei bibii baanyɛ aha mumɔŋ nibii ni amɛtsuɔ lɛ aya hiɛ?
6 Hegbɛi ni Akɛyeɔ Odase: Shiɛlɔi ni yaa skul lɛ ateŋ mɛi babaoo yɛ bei ni amɛkɛbaa hejɔɔmɔ yɛ afi lɛ mli. Enɛ baanyɛ afee be ni sa ákɛ akɛ he awo gbɛgbalɔi awamɔ nitsumɔ lɛ mli. Kɛfata he lɛ, Kristofoi oblahii kɛ oblayei bibii baanyɛ atsu nii babaoo kɛtsɔ odase ni amɛaaye yɛ skul lɛ nɔ. Ekolɛ onaa baakpɛ ohe yɛ bɔ ni oskulbii lɛ baasumɔ akɛ amɛle ohemɔkɛyelii lɛ ahe saji babaoo lɛ he. Mɛni hewɔ okɛ hegbɛ lɛ tsuuu nii koni okɛye odase be ni asusuɔ saji ahe yɛ skultsu lɛ mli loo be ni abiɔ ni klasbii lɛ aŋmala saji yɛ skul lɛ? Mɛi komɛi enyɛ eye odase kɛtsɔ wɔ vidio srɔtoi lɛ ni amɛkɛtsu nii lɛ nɔ. Mɛi komɛi kɛ amɛ skulbii eje Biblia mli nikasemɔ shishi, ni amɛye amɛbua amɛ kɛyashɛ henɔjɔɔmɔ kɛ baptisimɔ he. Enɛɛmɛi ji gbɛ̀i kpakpai ni atsɔɔ nɔ ‘ajieɔ Yehowa gbɛi lɛ yi.’—Lala 148:12, 13.
7. (a) Mɛɛ gbɛ nɔ nyɛminuu ko tsɔ ekɛ hegbɛ lɛ tsu nii kɛye mɛi krokomɛi odase? (b) Ani oná niiashikpamɔ ni tamɔ nɛkɛ?
7 Yɛ odaa gbi shihilɛ mli nifeemɔi amli lɛ, taomɔ gbɛ̀i srɔtoi ni obaanyɛ otsɔ nɔ okɛ mɛi agba wɔ-Nyɔŋmɔ ni he yɔɔ naakpɛɛ lɛ kɛ eshiwoi ni yɔɔ miishɛɛ lɛ ahe sane. Nyɛminuu ko ni kɛ oketeke kometoo lɛ nɔŋŋ faa gbɛ daa gbi lɛ yeɔ enanemɛi nitsulɔi lɛ odase yɛ be ni sa mli. Ákɛ nɔkwɛmɔnɔ lɛ, kɛ́ eemɛ yɛ oketekei adaamɔhe lɛ, ekɛ minitii aaafee enumɔ yeɔ oblanyo ko odase daa gbi. Nɔ ni jɛ mli kɛba ji akɛ oblanyo lɛ kɛ enitsulɔ hefatalɔ ko kpɛlɛ nɔ ákɛ akɛ amɛ afee Biblia mli nikasemɔ. Amɛfeɔ Biblia mli nikasemɔ lɛ yɛ oketeke lɛ mli be ni amɛfaa gbɛ lɛ. Yɛ be ko sɛɛ lɛ, yoo ko ni eda yɛ afii amli ni boɔ amɛ sanegbaai lɛ atoi lɛ tsi ebɛŋkɛ nyɛminuu lɛ ni ebi koni ekɛ lɛ afee Biblia mli nikasemɔ. Lɛ hu eená enikasemɔ lɛ he miishɛɛ yɛ gbii ni ekɛtáa oketeke lɛ mli lɛ amli. Nyɛminuu lɛ etsɔ nɛkɛ gbɛ nɔ ekɛ mɛi nyɔŋma ekase nii yɛ oketeke lɛ mli.
8. Mɛɛ nifeemɔ gbɛ ekolɛ ebaaye ebua mɛi ni nyɛɛɛ babaoo atsu yɛ gbɔlɛ loo gbɔmɔtsoŋ hewalɛ mli naagbai ahewɔ lɛ koni amɛtsu babaoo yɛ sɔɔmɔ nitsumɔ lɛ mli?
8 Ni kɛ gbɔlɛ loo gbɔmɔtsoŋ hewalɛ ni anáaa lɛ haaa onyɛ otsu babaoo hu? Ekolɛ gbɛ̀i babaoo yɛ ni obaanyɛ otsɔ nɔ oha yijiemɔ ni okɛhaa Yehowa lɛ aya hiɛ. Ani oka tɛlifoŋ nɔ odaseyeli okwɛ pɛŋ? Kɛ obɛ nɔmimaa yɛ bɔ ni obaatsu enɛ he nii oha lɛ, tsĩi tã otsɔɔ osafo woloŋ nikasemɔ nɔkwɛlɔ lɛ. Ekolɛ ebaanyɛ eto gbɛjianɔ koni shiɛlɔi ni kɛ gbɛ nɛɛ tsuɔ nii lɛ kɛ bo atsu nii. Ekome ni nyɛfeɔ kɛtsuɔ nii lɛ baaha nyɛkase nyɛhe, ni nyɛye nyɛbua nyɛhe kɛye odase ni mɔɔ shi jogbaŋŋ. Abaanyɛ ana ŋaawoi ni mɔɔ shi ni akɛtsuɔ nii kɛyeɔ odase yɛ tɛlifoŋ nɔ lɛ yɛ February 2001, Wɔ Maŋtsɛyeli Sɔɔmɔ lɛ baafa 5-6 lɛ mli.
9. Mɛɛ gbɛ nɔ wɔbaanyɛ wɔtsɔ wɔye wɔbua Biblia kaselɔ ko, koni ehe asa ni efata asafo lɛ he kɛya shiɛmɔ?
9 Kaimɔ lɛ ni wɔɔya lɛ baawo mɛi heei ni taoɔ akɛ amɛjie Yehowa yi babaoo lɛ hewalɛ. Obaanyɛ oye obua amɛ koni amɛye gbeyei ni amɛsheɔ yɛ amɛhe ni amɛkɛaawo shiɛmɔ nitsumɔ lɛ mli lɛ nɔ, kɛtsɔ shiɛmɔ nitsumɔ lɛ mli niiashikpamɔi ni woɔ mɔ hewalɛ ni ooogba amɛ, koni otsɔse amɛ ni amɛgbála tsɔɔmɔi ni yɔɔ Biblia lɛ mli lɛ amli ní amɛfã amɛhemɔkɛyeli lɛ he lɛ nɔ. (1 Pet. 3:15) Kɛ́ Biblia kaselɔ ko tsɔɔ akɛ eesumɔ ni ebɔi sanekpakpa lɛ shiɛmɔ lɛ, okɛ onukpai asɛinɔtalɔ lɛ awie he. Ebaato gbɛjianɔ koni akɛ nikaselɔ lɛ akpe ni akwɛ akɛ ehe esa akɛ efataa asafo lɛ he yɛ shiɛmɔ nitsumɔ lɛ mli lo. Kwɛ bɔ ni Yehowa tsui baanya akɛ eeena akɛ mɛi heei lɛ miifĩ ejeŋ muu fɛɛ nɔyeli lɛ sɛɛ!—Abɛi 27:11.
10. (a) Mɛɛ gbɛ nɔ gbɛjianɔtoo kpakpa baanyɛ aye abua wɔ koni wɔkɛ wɔhe awo gbɛgbalɔi awamɔ nitsumɔ lɛ mli? (b) Ani onyɛ́ oto gbɛjianɔ ni okɛ ohe wo gbɛgbalɔi awamɔ nitsumɔ lɛ mli yɛ nyɛsɛɛ afi lɛ Kaimɔ be lɛ mli? Yɛ mɛɛ gbɛ nɔ?
10 Ani Obaanyɛ Ofee Gbɛgbalɔi Awalɔ? Esa ákɛ akɛ hiɛdɔɔ asusu ŋmɛlɛtswai 50 ni ataoɔ yɛ gbɛgbalɔi awamɔ nitsumɔ lɛ mli lɛ he. (Mat. 5:37) Enɛ tsɔɔ akɛ ehe baahia ni oto gbɛjianɔ koni okɛ ŋmɛlɛtswai 12 atsu nii yɛ shiɛmɔ nitsumɔ lɛ mli daa otsi. Ani be he gbɛjianɔtoo kɛha gbɛgbalɔi awamɔ nitsumɔ lɛ he nɔkwɛmɔnɔ ni yɔɔ baafa 5 lɛ ateŋ ekome baahi kɛha bo? Kɛ́ jeee nakai lɛ, ani obaanyɛ oto gbɛjianɔ ko ni baanyɛ aha okɛ ohe awo gbɛgbalɔi awamɔ nitsumɔ lɛ mli yɛ March, April, loo May? Bi Yehowa koni ejɔɔ mɔdɛŋ ni obɔɔ koni onyɛ otsu babaoo yɛ sɔɔmɔ nitsumɔ lɛ mli lɛ nɔ.—Abɛi 16:3.
11. Mɛɛ gbɛ nɔ onukpai kɛ asafoŋ sɔɔlɔi baanyɛ afĩ mɛi ni kɛ amɛhe baawo gbɛgbalɔi awamɔ nitsumɔ lɛ mli lɛ asɛɛ?
11 Onukpai kɛ asafoŋ sɔɔlɔi lɛ baafĩ mɔdɛŋ ni obɔɔ koni oha Kaimɔ be nɛɛ afee yijiemɔ krɛdɛɛ kɛha Yehowa lɛ sɛɛ waa. Ekolɛ amɛteŋ mɛi pii kɛ amɛhe baawo gbɛgbalɔi awamɔ nitsumɔ lɛ mli. Onukpai lɛ baato kpeei ahe gbɛjianɔ krokomɛi kɛha shiɛmɔyaa, tamɔ gbɛkɛnaashi, yɛ otsii lɛ amli gbɛkɛgbɛkɛ, kɛ otsii lɛ anaagbee, yɛ bɔ ni hiamɔ lɛ baaji lɛ naa. Ekolɛ onukpai lɛ kɛ mɛi ni eto gbɛjianɔ pɔtɛɛ akɛ amɛkɛ amɛhe baawo gbɛgbamɔ lɛ mli, loo mɛi ni miisusu he akɛ amɛaafee nakai lɛ awie, koni amɛna be kɛ hei ni abaafee kpeei kɛha shiɛmɔyaa lɛ yɛ kɛ mɔ ni baanyiɛ hiɛ. Onukpai lɛ baabɔ mɔdɛŋ koni amɛto gbɛjianɔ, bɔni afee ni oná shiɛlɔi ni kɛ bo baatsu nii yɛ gbii kɛ bei ni oto gbɛjianɔ akɛ okɛbaaya shiɛmɔ lɛ amli. Yɛ nɛkɛ gbɛ nɔ lɛ, gbɛjianɔ ni oto lɛ baamɔ shi jogbaŋŋ ni nibii kpakpai babaoo baanyɛ ajɛ mli kɛba.—Abɛi 20:18.
12. Mɛni tsirɛɔ wɔ koni wɔjie Yehowa yi be fɛɛ be?
12 Bɔɔ Mɔdɛŋ Fɛɛ ni Ooonyɛ: Kɛ́ oshihilɛ eŋmɛɛɛ bo gbɛ koni okɛ ohe awo gbɛgbalɔi awamɔ nitsumɔ lɛ mli lɛ, kaimɔ akɛ Yehowa kpɛlɛɔ wɔ mɔdɛŋbɔɔ kɛ afɔleshaa lɛ nɔ ‘bɔ ni wɔyɔɔ, jeee bɔ ni wɔbɛ.’ (2 Kor. 8:12) Wɔyɛ nibii babaoo ni wɔɔda Yehowa shi yɛ he. David hiɛ yiŋtoo kpakpa be ni eŋma akɛ: “Majie Yehowa yi daa nɛɛ, eyijiemɔ aaakã midaaŋ be fɛɛ be.” (Lala 34:2) Eba akɛ enɛ aaafee wɔfaishitswaa yɛ Kaimɔ be nɛɛ mli.
[Akrabatsa ni yɔɔ baafa 3]
Te Obaafee Tɛŋŋ Otsu Babaoo?
◼ Okɛ ohe awo shiɛmɔ lɛ mli be ni mɛi yɔɔ shia
◼ Ye odase yɛ hei ni anaa mɛi yɛ
◼ Ye odase yɛ nitsumɔhe loo skul
◼ Ye odase yɛ tɛlifoŋ nɔ
◼ Okɛ ohe awo gbɛgbalɔi awamɔ nitsumɔ lɛ mli
[Akrabatsa ni yɔɔ baafa 5]
Be He Gbɛjianɔtoo He Nɔkwɛmɔnii Kɛha Gbɛgbalɔi Awamɔ Nitsumɔ Lɛ Gbɛ̀i ni Aaatsɔ nɔ Ato Gbɛjianɔ Koni Akɛ Ŋmɛlɛtswai 12 Ashiɛ Daa Otsi
Leebi—Ju Kɛyashi Hɔɔ
Abaanyɛ akɛ Hɔgbaa aye gbii lɛ fɛɛ ni ato he gbɛjianɔ yɛ shishigbɛ lɛ eko najiaŋ.
Gbi Be Ŋmɛlɛtswai
Ju Leebi 2
Jufɔ Leebi 2
Shɔ Leebi 2
Soo Leebi 2
Sohaa Leebi 2
Hɔɔ Leebi 2
Fɛɛ Feɔ Ŋmɛlɛtswai: 12
Gbii Muu Enyɔ
Abaanyɛ ahala otsi lɛ mli gbii enyɔ ni asumɔɔ. (Gbɛjianɔtoo nɛɛ baanyɛ aha aná ŋmɛlɛtswai 48 yɛ nyɔŋ lɛ mli yɛ gbii ni ahalaa lɛ hewɔ.)
Gbi Be Ŋmɛlɛtswai
Shɔ Gbi Muu Fɛɛ 6
Hɔɔ Gbi Muu Fɛɛ 6
Fɛɛ Feɔ Ŋmɛlɛtswai: 12
Gbɛkɛnaashi Enyɔ kɛ Otsi lɛ Naagbee
Abaanyɛ ahala otsi lɛ mli gbɛkɛnaashi enyɔ.
Gbi Be Ŋmɛlɛtswai
Ju Gbɛkɛ 1 1⁄2
Shɔ Gbɛkɛ 1 1⁄2
Hɔɔ Gbi Muu 6
Hɔgbaa Gbi Fã 3
Fɛɛ Feɔ Ŋmɛlɛtswai: 12
Shwanei Etɛ kɛ Hɔɔ
Abaanyɛ akɛ Hɔgbaa aye gbi kroko najiaŋ.
Gbi Be Ŋmɛlɛtswai
Ju Shwane 2
Shɔ Shwane 2
Sohaa Shwane 2
Hɔɔ Gbi Muu 6
Fɛɛ Feɔ Ŋmɛlɛtswai: 12
Mi Diɛŋtsɛ Mibe He Gbɛjianɔtoo Kɛha Shiɛmɔyaa
Tsɔɔmɔ ŋmɛlɛtswai abɔ ni okɛbaatsu nii yɛ be lɛ eko fɛɛ eko mli.
Gbi Be Ŋmɛlɛtswai
Ju
Jufɔ
Shɔ
Soo
Sohaa
Hɔɔ
Hɔgbaa
Fɛɛ Feɔ Ŋmɛlɛtswai: 12