Wɔ Woji Tɛtrɛbii Lɛ kɛ Nitsumɔ yɛ Shia kɛ Shia
1 Atsɔɔ Awake! lɛ yiŋtoo faŋŋ yɛ eko fɛɛ eko ni jeɔ kpo lɛ baafa 4 akɛ: “Wolo tɛtrɛɛ nɛɛ haa anaa Bɔlɔ lɛ toiŋjɔlɛ kɛ shweshweeshwe shihilɛ he shiwoo ni kɔɔ jeŋ hee ni baaba dani yinɔ ni na nibii ni ba yɛ 1914 lɛ aho aya lɛ mli hekɛnɔfɔɔ.” Eka shi faŋŋ akɛ esa akɛ wɔja wolo tɛtrɛɛ ni tamɔ nɛkɛ lɛ babaoo bɔ ni wɔɔnyɛ yɛ wɔ shia-kɛ-shia nitsumɔ lɛ mli!
2 Awake! lɛ ji gbɛ ni hi jogbaŋŋ ni atsɔɔ nɔ ateeɔ gbɔmɛi ni amɛjwɛŋmɔ bɛ mumɔŋ nibii anɔ titri lɛ amiishɛɛ shi. Kɛ ookane eko fɛɛ eko ni baa lɛ, taomɔ otii ni sa ni obaanyɛ okɛ mɛi krokomɛi awie he. Shiɛlɔi komɛi ŋmalaa otii yɛ amɛ diɛŋtsɛ amɛnɔ lɛ mli, ni dani amɛkɛ nakai wolo pɔtɛɛ lɛ aaaya shiɛmɔ lɛ, amɛtiɔ nibii ni amɛŋmala lɛ amli koni amɛna otii komɛi yɛ amɛjwɛŋmɔ mli ni amɛkɛ shiatsɛmɛi lɛ awie he.
3 Ekolɛ wɔbaasumɔ ni wɔwie oti pɔtɛɛ ko he yɛ sane ni yɔɔ Awake! ni wɔkɛtsuɔ nii lɛ mli lɛ mli, ni wɔkɛje wɔ wiemɔ lɛ shishi.
Kɛ otee jɛmɛ klɛŋklɛŋ po lɛ, obaanyɛ otee miishɛɛ shi yɛ wolo lɛ shɛɛ he, yɛ osanegbaa lɛ sɛɛ, ni ekolɛ owie akɛ:
◼ “Awake! lɛ mli sane nɛɛ wieɔ nakai sane lɛ he babaoo.” No sɛɛ lɛ kanemɔ wiemɔ muu kome loo enyɔ ni otsɔ hiɛ ohala momo, ni otsa nɔ akɛ: “Taakɛ onaa lɛ, sane nɛɛ sa hesusumɔ waa. Miheɔ miyeɔ akɛ obaasumɔ ni okane sane nɛɛ kɛ saji krokomɛi ni eba yɛ ebe naa yɛ nɛkɛ Awake! nɛɛ mli lɛ hu. Kɛ nakai lɛ, ebaaŋɔɔ minaa akɛ maye mabua bo ni oshɛ eko, kɛ ehefatalɔ wolo tɛtrɛɛ, ni ji Buu-Mɔɔ lɛ hu” Kɛ shiatsɛ lɛ ekpɛlɛɛɛ akɛ eeeshɛ lɛ, obaanyɛ okɛ woji tɛtrɛbii lɛ ekomekomei lɛ aha lɛ ni oto gbɛjianɔ kɛha sɛɛsaramɔ. Kaimɔ ni oyasara lɛ taakɛ okɛ lɛ eto gbɛjianɔ lɛ.
4 Kɛ shiatsɛ lɛ tsɔɔ faŋŋ akɛ enaa mumɔŋ nii ahe miishɛɛ waa lɛ, no lɛ wɔbaanyɛ wɔwie ŋmalɛ ko he, tamɔ 2 Timoteo 3:1-5 ni kɔɔ naagbee gbii lɛ ahe lɛ. No sɛɛ lɛ, bɔni afee ni wɔtee emiishɛɛ shi yɛ wɔ woji tɛtrɛbii lɛ ahe lɛ, wɔbaanyɛ wɔkane nii tɛɛ kɛjɛ Buu-Mɔɔ hee ni wɔhiɛ lɛ baafa 2 kɛjɛ fa ni jeɔ shishi akɛ: “Buu-Mɔɔ lɛ yiŋtoo ji . . .” Yɛ no sɛɛ lɛ, okɛ Buu-Mɔɔ kɛ Awake! lɛ ehee ni eba lɛ eko aha lɛ.
5 Yɛ shikpɔŋkukuji komɛi amli, he ni etamɔ nɔ ni gbɔmɛi yɔɔ jamɔi pɔtɛɛ komɛi ahe miishɛɛ waa lɛ, yɛ nɔ najiaŋ ni okɛ woji tɛtrɛbii lɛ aaaha lɛ, obaanyɛ okɛɛ akɛ:
◼ “Gbɔmɛi ni wɔkɛkpeɔ yɛ akutso nɛɛ mli lɛ yɛ jamɔi sɔrɔtoi amli, ni esoro kwraa yɛ wɔnɔ lɛ he. Nyɔŋmɔ sɛɛgbɛ ni adesai taoɔ lɛ etsɔ gbɛi sɔrɔtoi babaoo nɔ. [Kanemɔ Bɔfɔi 17:26, 27] Ani okɛ wɔ kpaa gbee akɛ bei pii lɛ gbɔmɛi boteɔ amɛfɔlɔi ajamɔ mli, moŋ fe ni amɛ diɛŋtsɛ amɛaatao Nyɔŋmɔ sɛɛgbɛ? [ŋmɛɛ gbɛ ni ewie.] No ji oti ni atsɔɔ yɛ wolo, Mankind’s Search for God nɛɛ klɛŋklɛŋ yitso lɛ mli lɛ. [Maa sane ni yɔɔ kuku 12 yɛ baafa 8 lɛ nɔ mi.] Jamɔi krokomɛi ahe saji ni wɔɔle lɛ haa wɔnaa sɛɛyoomɔ ni wɔkaseɔ nii yɛ mli hu. Wolo nɛɛ gbalaa je lɛŋ jamɔ wuji lɛ ashishijee, amɛnifeemɔi, kɛ amɛtsɔɔmɔi amli” Kɛ be baaŋmɛ gbɛ lɛ, tsɔɔmɔ shiatsɛ lɛ yitsei ni yɔɔ mli, kɛ wolo lɛ mli mfonirii lɛ ekome loo enyɔ ko hu.
6 Beni wɔyaa shia kɛ shia lɛ, nyɛhaa wɔkaia akɛ wɔhiɛ dɛŋdadei kpakpai enyɔ ni fe fɛɛ yɛ je lɛŋ ni wɔkɛaaye wɔbua gbɔmɛi ni amɛya hiɛ yɛ mumɔŋ, nomɛi ji Buu-Mɔɔ kɛ Awake! lɛ. Eba akɛ wɔɔtsu nii ni wɔkɛtee shiatsɛmɛi lɛ amiishɛɛ shi yɛ woji tɛtrɛbii nɛɛ ahe ni wɔkɛha yɛ hegbɛ fɛɛ hegbɛ mli.