Wala He Eba Oshara!
1 Biblia lɛ haa efeɔ faŋŋ akɛ, Yehowa suɔmɔnaa nii ji ‘koni ahere gbɔmɛi fɛɛ yiwala.’ Shi kɛlɛ, eji anɔkwale hu akɛ shikpɔŋ nɔ bii akpekpei toi akpekpei abɔ lɛ awala he gbɛkpamɔ lɛ damɔ bɔ ni amɛfeɔ amɛnii amɛhaa yɛ Yehowa Nyɔŋmɔ kɛ e-Maŋtsɛyeli ni Yesu Kristo yeɔ nɔ lɛ he lɛ nɔ. “Anɔkwale lɛ lee” ji nɔ̃ pɛ ni nifeemɔ kpakpa baanyɛ adamɔ nɔ. (1 Tim. 2:3, 4) Yɛ be mli ni ahaa wɔleɔ akɛ etsɛŋ ni abaajie efɔŋfeemɔ fɛɛ kɛjɛ shikpɔŋ lɛ nɔ bɔni afee ni egbele gbɛ kɛha Nyɔŋmɔ jalɛ jeŋ hee lɛ, akɛ famɔ hu eha wɔ koni wɔya nɔ wɔtsu yiwalaheremɔ nitsumɔ ni he hiaa lɛ he nii.—Mat. 24:14; 28:19, 20; Rom. 10:13-15.
2 Mɛni Hewɔ Ehe Ebahia Waa Nɛkɛ? Yesu kɛ “amanehulu babaoo [ni] aaaba, ní anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ” lɛ he kɔkɔbɔɔ ha. (Mat. 24:21) Nakai amanehulu lɛ baashɛ enaagbee kwraa yɛ Harmagedon. (Kpoj. 16:16) Wɔ wekumɛi ni heee yeee, akutsoŋbii, nanemɛi nitsulɔi, nanemɛi skulbii, kɛ mɛi ni wɔle amɛ lɛ fata gbɔmɛi ni kɛ́ amɛhereee sanekpakpa lɛ nɔ ní amɛhiɛ baakpata lɛ ahe. Shi nɔ ni wɔsusuɔ he waa ji ni wɔnine ashɛ “gbɔmɛi fɛɛ” nɔ yɛ be mli ni wɔkaseɔ Nyɔŋmɔ ni jie esuɔmɔ kpo etsɔɔ adesai aje lɛ fɛɛ kɛtsɔ e-Bi Yesu Kristo ni ekɛ lɛ ha mɛi fɛɛ akɛ kpɔmɔnɔ lɛ nɔ. (Yoh. 3:16) Esa akɛ wɔbɔ mɔdɛŋ waa diɛŋtsɛ koni wɔfɔ̃ nine wɔtsɛ́ mɛi fɛɛ koni amɛsha foi kɛbaba abo yɛ Nyɔŋmɔ ŋɔɔ. Kɛ wɔtsu shiɛmɔ nitsumɔ lɛ jogbaŋŋ kɛmɔ shi lɛ, wɔbaanyɛ wɔtsi wɔhe kɛjɛ layisɔ̃yeli he.—Ezek. 33:1-7; 1 Kor. 9:16.
3 Mɛni Ji Wɔyiŋtoo? Áma bɔ ni shiɛmɔ nitsumɔ lɛ he hiaa ha lɛ nɔ mi yɛ Nyɔŋmɔ Wiemɔ lɛ mli fɛɛ. Taakɛ bɔfo Paulo tsɔɔ mli lɛ, “Kristo suɔmɔ lɛ nyɛɔ wɔnɔ” koni wɔhi shi yɛ Nyɔŋmɔ gbɛ̀i lɛ kɛ gbeekpamɔ naa. (2 Kor. 5:14) Kɛfata he lɛ, bei pii lɛ, Buu-Mɔɔ lɛ maa gbɛnaa nii ni kã wɔnɔ akɛ wɔshiɛ lɛ nɔ mi. Wɔ Maŋtsɛyeli Sɔɔmɔ lɛ yaa nɔ ekɛ gbɛtsɔɔmɔ haa ni tsɔɔ bɔ ni aaafee atsu shiɛmɔ nitsumɔ lɛ. Onukpai lɛ toɔ nitsumɔ lɛ he gbɛjianɔ ni amɛwoɔ wɔ hewalɛ koni wɔkɛ wɔhe awo mli. Nanemɛi shiɛlɔi fɔ̃ɔ nine amɛtsɛɔ wɔ koni wɔfata amɛhe kɛtsu shiɛmɔ nitsumɔ lɛ. Wɔnuɔ saji babaoo ni tsɔɔ bɔ ni wɔɔfee wɔ shiɛmɔ wiemɔi, woji tɛtrɛbii kɛ woji krokomɛi ni wɔkɛaaha, sɛɛsaramɔ feemɔi, Biblia mli nikasemɔi afeemɔ, kɛ hegbɛ fɛɛ hegbɛ ni wɔkɛaatsu nii kɛye odase. Enɛɛmɛi fɛɛ yeɔ ebuaa wɔ koni wɔtsu yiŋtoo ni ji mɛi ayiwala ni aaahere lɛ he nii.—1 Kor. 9:22, 23; Efe. 1:13.