NIKASEMƆ 14

Hã Otii Lɛ Aje Kpo Faŋŋ

Hebribii 8:1

NƆ NI ESA AKƐ OFEE: Wa otoibolɔi lɛ ni amɛnyiɛ owiemɔ lɛ sɛɛ, ní ohã amɛna bɔ ni oti fɛɛ oti kɔɔ oti ni okɛma ohiɛ lɛ kɛ saneyitso lɛ he.

Okɛ oti ko ama ohiɛ. Kwɛmɔ akɛ wiemɔ ni oyaahã lɛ miibi ni ohã otoibolɔi lɛ ale sane ko, ohã amɛyiŋ atsɔ, loo okanya amɛ, koni ohã eya lɛ nakai pɛpɛɛpɛ. Esa akɛ otii fɛɛ ni obaawie he lɛ ahã oshɛ oti ni okɛma ohiɛ lɛ he.

Bi ohe akɛ: ‘Mɛɛ saji mitoibolɔi lɛ baanyɛ abi, loo mɛɛ nibii ekolɛ amɛkɛ mi kpãŋ gbee yɛ he yɛ sane nɛɛ mli? Te sanebimɔi nɛɛ ateŋ nɔ ni amɛbaabi klɛŋklɛŋ, ni te nɔ ni baanyiɛ sɛɛ lɛ?’ No sɛɛ lɛ, too otii ni obaawie he lɛ anaa yɛ nakai gbɛ nɔ, koni amɛnyɛ amɛnyiɛ owiemɔ lɛ sɛɛ, amɛnu shishi, ni amɛkpɛlɛ nɔ.
Gbalamɔ jwɛŋmɔ kɛya osaneyitso lɛ nɔ. Owiemɔ lɛ mli fɛɛ lɛ, okɛ saneyitso lɛ mli wiemɔi titrii lɛ, loo wiemɔi ni kɛ wiemɔi titrii nɛɛ hiɛ shishinumɔ kome lɛ atsu nii kɛgbala otoibolɔi lɛ ajwɛŋmɔ kɛya saneyitso lɛ nɔ.
Hã otii lɛ amli akã shi faŋŋ, ni amɛshishinumɔ afee mlɛo. Wiemɔ otii ni kɔɔ osaneyitso lɛ he ní obaanyɛ ogbála mli jogbaŋŋ yɛ be ni ahã bo lɛ mli lɛ pɛ ahe. Kaawie otii pii ahe, hã oti fɛɛ oti mli akã shi faŋŋ, kɛ́ ojɛ ekome nɔ kɛmiiya ekroko nɔ lɛ, mɛɛ fioo, ni hã ana tsakpaa ni yɔɔ no kɛ nɔ ni nyiɛ sɛɛ lɛ teŋ.

Obaanyɛ owie otii lɛ ahe yɛ ohiɛkpamɔ lɛ mli, koni ewa otoibolɔi lɛ ni amɛnyiɛ wiemɔ lɛ sɛɛ, loo obaanyɛ otĩ fɛɛ mli kɛji oomu naa, koni amɛnyɛ amɛkai.