Juiyé

Lèwvwè Jézi té ka di on biten oben lèwvwè i té ka fè on biten, i té ka imité Pap’a-y on mannyè ki pawfè. Pa ègzanp, nou ka vwè sa byen adan sé mirak-la i fè la. I té ni menm mantalité ki Pap’a-y é sa i té ka rèsanti, sé sa Pap’a-y té ka rèsanti osi (Jan 14:9). Ka sé mirak-lasa ka aprann-nou ? Jézi é Pap’a-y enmé-nou onlo toubònman. Jéova ba Jézi pouvwa pou fè mirak. É lèwvwè Jézi vin si latè, i sèvi èvè pouvwa-lasa pou soulajé moun ki té ka soufè. Konsa i montré lézimen jan i té enmé-yo. On jou, 2 moun-avèg vin sipliyé Jézi pou i té édé-yo (Mat. 20:30-34). Si nou ka byen gadé, yo ka di-nou adan Bib-la kè Jézi « pran penn a yo » lèwvwè i vwè-yo, é aprésa i géri-yo. An grèk, yo ka sèvi èvè mo-la yo tradui la é ki bay « pran penn a » pou montré jan on moun ni konpasyon pou ondòt moun é jan sa i ka rèsanti la ka sòti an zantray a-y. Konm Jézi té enmé sé moun-la, sa pousé-y aji épi konpasyon èvè yo. Kifè i ba-yo manjé pou yo manjé é i géri on moun ki té ni lalèp (Mat. 15:32 ; Mawk 1:41). Nou pé sèten osi kè Jéova, on Bondyé ki ni on ‘konpasyon ki plen tandrès’, é Gason a-y enmé-nou onlo toubònman é sa ka fè-yo lapenn lèwvwè yo ka vwè-nou ka soufè (Lik 1:78 ; 1 Pyè 5:7). Mésyé, a pa ti présé yo dwèt présé pou woté tousa ki ka fè-nou soufè ! w23.04 3 § 4-5.

Nou ké fè atansyon a sa nou ka li é a sa nou ka kouté pou nou pa lésé mové lidé ki lanmòd adan mond a Satan rantré adan lèspri an nou. Vométan nou li oben nou étidyé Labib pou nou mèt dé biten ki pwòp adan lèspri an nou. Fò-nou ay an réinyon osi é fò-nou préché pas sé dé biten ki ka pwotéjé lèspri an nou. Li Jéova aprézan ka pwomèt-nou kè i pé’é jen lésé on tantasyon nou ka sibi ay pli lwen ki sa nou pé sipòté (1 Kor. 10:12, 13). Si nou vlé rété fidèl pannan sé dènyé jou-la ki difisil toubònman, fò-nou mèt jounou atè é sé alè pou nou pran labitid fè sa. I vé ou ‘wouvè tchè a-w ba-y’ (Sòm 62:8). Ba-y louwanj é di-y mèsi pou tousa i ka fè. Mandé-y ba-w kouraj pou ou pé sa préché. Lè ou anba on éprèv oben lè ou douvan on tantasyon, sipliyé Jéova pou i pé sa édé-w kenbé. Pran labitid priyé é pa jen lésé on biten oben on moun anpéché-w fè sa. w23.05 7 § 17-18.

Poukwa nou ka vin réinyon ? Dabò pou yonn, sé pou nou pé sa ba Jéova louwanj (Sòm 26:12 ; 111:1). Anplisdisa, nou ka vin réinyon pou yonn pé sa ankourajé lòt pannan épòk difisil la nou ka viv la (1 Tés. 5:11). Lèwvwè nou ka bay dé ti komantè pannan sé réinyon-la, nou ka fè sé 2 biten-lasa. Men délè, pou bay on ti komantè, a pa on ti afè. Lè nou ka sonjé kè fò nou ké lévé men an nou é kè fò nou ké palé douvan toutmoun, pétèt sa ja ka istrésé-nou. Ondòt biten ankò, sé kè nou pé byen anvi pawtisipé men yo pa oblijé ban-nou réponn. Kijan nou pé rivé about a sé difikilté-lasa ? Lapòt Pòl di kè sa enpòwtan kè « yonn ankourajé lòt. » Lèwvwè nou ka bay on komantè é kè komantè-lasa toukout, sa ka ankourajé lézòt é sa ka montré jan nou ni fwa adan Jéova. Si nou ka sonjé sa, sa ké trankilizé-nou é menmsi yo pa’a fè-nou réponn kon nou té’é vé, nou ké kontan kanmenm pas frè é sè an nou ka pawtisipé adan réinyon-la (1 Pyè 3:8). w23.04 20 § 1-3.

Sa té ja ka fè 70 an apépré kè yo té chayé sé Juif-la Babilòn pa fòs, é mi wa-la té sòti anonsé kè yo té pé viré an Israèl aprézan (Èsdr. 1:2-4). Sé yenki grasa Jéova on biten konsa té pé rivé. Pas sé Babilonyen-la pa té ni labitid lagé prizonyé a yo (Iz. 14:4, 17). Yo pran Babilòn, é moun-la ki té an tèt a péyi-la konnyéla lésé sé Juif-la pati. Alò tout sé Juif-la, é siwtou sé chèf a fanmi la, té ni on désizyon a pran : swa yo té’é sòti Babilòn oswa yo té’é rété an péyi-la. Men désizyon-lasa, a pa on désizyon ki té fasil a pran. Vwayaj-la pou ay an Israèl té long, é ni onlo Israélit ki té ja ni on bèl laj. Alò yo té ja two vyé pou fè vwayaj-lasa. Anplisdisa, lamajorité a sé Israélit-la té fèt Babilòn, é yo poto’o jen viv pondòt koté. Pou yo, Israèl sé té péyi a zansèt a yo. Ondòt biten ankò, sé kè i ka sanm sa ni sèwten Israélit ki té vin rich a Babilòn, é yo té ka viv alèz a yo adan kaz a yo. Pawmi yo, ni sa osi ki té monté afè a yo, alò pétèt kè yo té ka réfléchi onlo pou vwè si yo té ka kité tousa yo té ni pou yo té ay adan on péyi yo pa té menm konnèt. w23.05 14 § 1-2.

Pawòl a Bondyé ka ankourajé-nou a toujou ni andirans, konpasyon é lanmou. Lik 21:19 ka di : « Si zò andiré, zò ké sové vi a zòt. » 1 Pyè 3:8 ka di : « Fò-zò ni […] on konpasyon ki plen tandrès. » É 1 Tésalonisyen 4:9, 10 ka di : « Bondyé anségné-zòt pou yonn pé sa enmé lòt […]. Men nou ka ankourajé-zòt, léfrè, pou zò kontinyé fè sa plis ankò. » Yo maké tout sé vèwsé-lasa pou sé disip-la men yotout té ja montré kè yo té ni andirans, konpasyon é lanmou. Alò poukwa yo té ka mandé-yo fè sa ? Sé té pou yo té kontinyé travay sé kalité-lasa. É nou osi sé sa pou nou fè. Pou édé-w, gadé kijan sé 1^é krétyen-la montré kè yo té ni sé kalité-lasa. Aprésa chèché a vwè kijan ou pé imité-yo é kijan sa ké édé-w préparé-w pou gwo tribilasyon-la. Kifè, lèwvwè gwo tribilasyon-la ké koumansé, ou ké ja aprann kijan pou ou andiré é ou ké byen désidé a kontinyé andiré. w23.07 3 § 4, 8.

Ki nou ka fè pawti a sé krétyen wen la, ki nou ka fè pawti a ‘sélézòt mouton-la’, fò-nou rété asi « Chimen-la ki sakré la » (Jan 10:16). Sa ké édé-nou kontinyé adoré Jéova jòdijou é sa ké édé-nou fè sa dèmen osi, lèwvwè Wayòm-la ké menné onlo bénédisyon asi latè. Dépi 1919, ni milyon é milyon moun, ki sé madanm, misyé oben timoun, ki lagé Gran Babilòn-la, kivédi tout sé fo rèlijyon-la, é yo koumansé maché asi chimen-lasa. Jéova fè ansòt pou ayen pa anpéché sé Juif-la ki té sòti Babilòn pran chimen-la i té prévwa pou yo la (Iz. 57:14). É jòdijou, ka nou pé di asi « Chimen-la ki sakré la » ? Plizyè santenn lanné avan 1919, Jéova koumansé sèvi èvè déotwa moun ki té ni onlo rèspé pou-y é i fè-yo fè sa ki fo pou pèwmèt moun sòti anba jouk a Gran Babilòn-la (gadé Izayi 40:3). Lè yo fè sa, yo préparé chimen-la. Travay-la yo fè la sé té on travay ki té nésésè toubònman pou sa ki té’é fèt apré. Grasa sa, sé moun-la ki té sensè la té’é pé lagé Gran Babilòn-la pou adoré Jéova èvè pèp a-y. w23.05 15-16 § 8-9.

Jéova vé nou sèvi-y dè-tou-kè é i vé kè nou fè-y èvè tchè-kontan osi (2 Kor. 9:7). Alò, si nou chwazi on òbjèktif èspirityèl men kè an réyalité nou pa tèlman anvi atenn òbjèktif-lasa, ès fò-nou fè éfò pou atenn-li kanmenm ? An-nou palé dè ègzanp a lapòt Pòl. Mi sa i di : « Kò an mwen, an ka ba-y bon kou é an ka menné-y kon on èsklav » (1 Kor. 9:25-27). Menm lèwvwè Pòl pa té anvi fè sa Jéova té ka mandé-y, i té ka fè-y kanmenm. Ès Jéova té kontan lè i té ka vwè sa Pòl té ka fè pou-y ? Wi ! É dayè Jéova rékonpansé-y pou tout sé éfò-la i fè la (2 Tim. 4:7, 8). Menmjan-la, Jéova ka kontan lè i ka vwè kè nou ka fè éfò pou atenn sé òbjèktif-la nou ni la alòskè nou pa ni pon balan pou atenn-yo. I ni tchè-kontan pas i sav kè menmsi nou pa enmé sa nou ka fè, nou enmé-y. Menmjan i béni éfò a Pòl, sé menmjan-la osi i ké béni éfò an nou (Sòm 126:5). É lè nou ka vwè jan Jéova ka béni-nou, sa pé ban-nou balan pou nou fè dé biten pou-y. w23.05 29 § 9-10.

Lapòt Pòl konparé moun ki pé’é rété vivan lèwvwè jou a Jéova ké vin èvè moun ki ka dòmi. Poukwa i fè sa ? Pas yo pa’a rann-yo kont dè sa ki ka pasé alantou a yo é yo pa’a vwè kè lè-la ka touné. Kifè, lèwvwè on biten enpòwtan ka pasé adan mond-la, yo pa annéta konprann é yo pa’a pòté pon mannèv nonplis. Lamajorité a sé moun-la ki adan mond-lasa kon dé moun ki ka dòmi (Wom. 11:8). Pétèt yo ka vwè an 2 zyé a yo kè nou adan « sé dènyé jou-la » é kè gwo tribilasyon-la toupré rivé. Men sa pa’a fè yo ayen (2 Pyè 3:3, 4). Men pi tan ka pasé é pi nou ka vwè jan sa enpòwtan dè suiv konsèy-la Pòl ban-nou la, kivédi kè nou rété véyatif (1 Tés. 5:6). Fò-nou rété kalm é fò-nou aji èvè sajès. Poukwa fò-nou fè sa ? Sé pou nou pa mélanjé-nou adan pon biten ki anrapò èvè lapolitik oben ki anrapò èvè pwoblèm a mond-lasa. Pli jou a Jéova ké toupré rivé, pli yo ké mèt présyon asi nou pou nou pran pawti adan sé domenn-lasa. Men fò pa nou tèwbolizé lèspri an nou pou sa. Lèspri a Jéova ké édé-nou rété kalm, i ké édé-nou rété fò é i ké édé-nou pran bon désizyon (Lik 12:11, 12). w23.06 10 § 6-7.

Lèwvwè ou ka tann « Sanson », ka ki ka vin an lèspri a-w ? Pétèt ou ka sonjé on moun ki té ni onlo onlo fòs. É sé vré, yo té konnèt Sanson pas i té ni onlo fòs. Men ès ou sav kè i pran on mové désizyon adan vi a-y é sa fè-y soufè toubònman ? Magrésa, sa Jéova té ka gadé, sé tout sé bon biten-la Sanson fè la pou sèvi-y. É pou Jéova, Sanson sé té on moun ki té fidèl. I jous palé dè-y adan Labib pou ègzanp a-y sèvi-nou. Jéova sèvi èvè Sanson pou i té fè onlo biten ki té èstraòwdinè toubònman pou pèp a-y Israèl. Plizyè santenn lanné apré Sanson mò, Jéova voyé lèspri sen a-y anlè lapòt Pòl pou i té maké non a Sanson adan on lis a misyé é madanm ki té ni onlo fwa (Ébr. 11:32-34). Ègzanp a Sanson pé itil ban nou toubònman pas i fè Jéova konfyans, menm lèwvwè i jwenn dé sitiyasyon ki té rèd menm. Ègzanp a-y pé ankourajé-nou é ka nou pé aprann dè sa i viv. w23.09 2 § 1-2.

Nou pé fè ansòt pou nou andiré pibyen si nou ka priyé souvan é siwvwè nou ka pran labitid palé Jéova dè tousa ki ka trakasé-nou (1 Tés. 5:17). Pétèt kè alèla ou pa’a jwenn on gwo difikilté. Men chakfwa on biten ka pran tèt a-w oben ka chouboulé-w, oben kè ou pa sav ka pou ou fè adan on sitiyasyon, ès ou ka priyé Jéova é ès ou ka mandé-y édé-w ? Si lèwvwè ou ka jwenn on ti pwoblèm ou ka pran labitid fè sa, ében lèwvwè ou ké anba gwo difikilté ou ké palé ba Jéova tou natirèlman. Anplisdisa, ou ké sèten kè Jéova sav ègzaktèman a ki moman pou i édé-w é kè i sav ka pou i fè ba-w (Sòm 27:1, 3). Siwvwè alèla nou ka andiré difikilté nou ka jwenn, lèwvwè gwo tribilasyon-la ké rivé, nou ké rivé andiré pi fasilman (Wom. 5:3). Poukwa nou ka di sa ? Ni onlo frè é sè ki konstaté kè chakfwa yo té ka andiré on éprèv, sa té ka ba-yo fòs pou yo té pé sa andiré éprèv-la ki té ka vin dèyè do a-y la. Lè yo té ka vwè kè Jéova té ka édé-yo andiré on difikilté, sa té ka ba-yo plis fwa é lèwvwè yo té ka jwenn ondòt difikilté, yo té sèten kè Jéova té vé édé-yo (Jak 1:2-4). w23.07 3 § 7-8.

Jéova ni onlo imilité é i ni onlo konpasyon. Sé pousa, i ka aji on mannyè ki rézonab. Pa ègzanp, Jéova montré kè i té ni onlo imilité lèwvwè i té kay détwi moun-Sodòm. Sé té dé moun ki té méchan toubònman. Konm Lòt sé té on boug ki té jis, Jéova voyé déotwa zanj di-y konsa kè fò i té chapé kò a-y pou ay adan sé montangn-la. Men Lòt té pè ay la, kifè, i sipliyé Jéova pou i lésé-y ay adan on ti vil yo té ka kriyé Zoaw èvè fanmi a-y. Alò, Jéova pèwmèt Lòt ay Zoaw é i pa détwi vil-lasa kon i té ni lentansyon fè-y odépa (Jén. 19:18-22). Kèlkè syèk apré, i aji èvè konpasyon épi moun-Niniv. I voyé pwofèt Jonas di-yo kè konm sé méchan yo méchan, i ké détwi ki yo ki vil a yo. Men anfinaldikont, sé Ninivit-la rèpanti-yo é Jéova touvé-y ni pityé pou yo. Kifè, i pa détwi vil-la ankò (Jonas 3:1, 10 ; 4:10, 11). w23.07 21 § 5.

Ka istwa a Joas pé aprann-nou ? Joas té ka sanm sé pyébwa-la, ki bizwen yo mèt on biten pou koré-yo pou yo rété dwèt, pas rasin a yo pa k’ay fon an tè-la. Lèwvwè moun-la ki té ka édé Joas maché dwèt vin mò, kivédi Joad, é lèwvwè Joas mété-y ka kouté sé apòsta-la, i koumansé maché kochi é i pa rété fidèl a Jéova. Ègzanp-lasa ka montré-nou byen kè fò pa nou ka krenn Bondyé yenki pas nou ni dé moun ki ka ban-nou on bon ègzanp adan fanmi an nou oben adan lasanblé-la. Pou nou rété bon bon zanmi èvè Jéova, fò-nou fè ansòt pou nou enmé-y é rèspèkté-y plis ankò. Nou ka fè sa lè nou ka pran labitid étidyé, médité é priyé (Jérémi 17:7, 8 ; Kol. 2:6, 7). Jéova pa’a mandé-nou fè onlo biten. An déotwa mo, mi sa i ka mandé-nou fè dapré Éklézyas 12:13 : « Krenn vré Dyé-la é suiv komandman a-y, pas sé tousa on nonm dwèt fè. » Siwvwè nou ka krenn Bondyé, nou ké ni fòs pou nou fasadé èvè éprèv ki ka vin é nou ké rété solid. É ayen pé’é pé anpéché-nou rété bon bon zanmi èvè Jéova. w23.06 19 § 17-19.

Mi sa nou ka li jis avan garanti-la Jéova ka ban-nou la : « Sila ki sizé anlè twòn-la di konsa » (Rév. 21:5a). Sé pawòl-lasa vréman èspésyal, pas adan vèwsé-lasa sé Jéova limenm ki ka palé é i ka fè sa enki 3 fwa adan liv a Larévélasyon. A pa on zanj ki bay garanti-lasa ni Jézi, men sé Jéova limenm a-y ! Sa ka montré jan nou pé fè sé pawòl-la i di la apré konfyans. Poukwa nou ka di sa ? Paskè Jéova « pé pa manti » (Tit 1:2). Alò, nou pé kwè sé pawòl-la nou ka touvé adan Révélasyon 21:5, 6 a san pou san. Gadé sa Jéova di : « Gadé ! » Sé on mo grèk ki bay èksprésyon-lasa é nou ka touvé-y onlo fwa adan liv a Larévélasyon. Men ka Bondyé ka di apré ? Mi sa i ka di : « An ka fè tout biten vin nèf. » Jéova ké fè sé chanjman-lasa talè. Men konm i sèten i ké réyalizé pwomès a-y, i ka montré sa adan jan-la i ka palé la. I ka palé konsi i té ja ka fè sé chanjman-lasa (Iz. 46:10). w23.11 3-4 § 7-8.

Fò lapòt Pyè té goumé èvè défo a-y. An-nou vwè déotwa ègzanp. Lèwvwè Jézi di kè i té kay soufè é kè i té kay mò kon sé pwofési-la té ka di, Pyè woupran-y (Mawk 8:31-33). A plizyè rèpriz, li é sélézòt apòt-la fè kòlè pas yo té vé sav kilès adan yo ki té pi gran (Mawk 9:33, 34). Dènyé lannuit a Jézi asi latè, Pyè aji san réfléchi é i koupé zorèy a on boug (Jan 18:10). Menm jou-la, i lésé lapè pran lanmen asi-y é i rènyé Jézi, zanmi a-y, a 3 rèpriz (Mawk 14:66-72). Kifè, aprésa i pléré gwodlo. Lapòt Pyè té dékourajé men Jézi pa lagé-y. Apré Bondyé résisité Jézi, Jézi mandé-y pran swen a ti mouton a-y èvè onlo imilité. Lèwvwè Jézi fè sa, i ba lapòt Pyè lokazyon montré-y kè i té enmé-y (Jan 21:15-17). Ès Pyè aksèpté misyon-lasa ? Asiré pa pétèt ! Dayè jou a Lapannkòt, i té a Jérizalèm é lèwvwè Jéova voyé lèspri sen a-y asi sèwten moun pou yo vin wen, i té pawmi sé prèmyé moun-la. w23.09 22 § 6-7.

« Pran swen a twoupo a Bondyé ». Sé sé Pawòl-lasa lapòt Pyè maké pou sé ansyen-la ki té ka viv a épòk a-y la (1 Pyè 5:1-4). Si ou sé on ansyen, nou sav kè ou enmé frè é sè a-w é kè ou vé pran swen a yo. Men, pétèt délè ou ni tèlman biten a fè oben ou ka santi-w tèlman fatigé kè ou pa’a vwè kijan ou ké fè sa. Alò, ka ou pé fè ? Wouvè tchè a-w ba Jéova é di-y tousa ou ka rèsanti. Mi sa Pyè maké : « Si on moun ka sèvi lézòt, fò i konté asi fòs-la Bondyé ka bay la » (1 Pyè 4:11). Pétèt frè é sè a-w ka jwenn sèwten pwoblèm kè ponmoun pé’é pé réglé adan mond-lasa. Men sonjé kè Jézikris sé « chèf a sé bèwjé-la » é kè i pé édé-yo pibyen ki pondòt moun. I pé fè sa dépi jòdila é i ké pé fè sa adan nouvo mond-la osi. Sa Jéova vé, sé kè sé ansyen-la enmé frè é sè a yo, kè yo pran swen a yo é kè yo « vin dé ègzanp pou twoupo-la. » w23.09 29-30 § 13-14.

Fò-nou fè atansyon pou nou pa suiv dé lidé ki pa annakò èvè sa Jéova ka di. Si nou ka lésé moun ki ka méprizé lwa a Jéova détenn asi nou, nou pé rivé a mèt prensip a Jéova dèyè do an nou (1 Kor. 3:19). Pli souvan ki rarman « sajès a mond-lasa » ka pousé moun a pa kouté Bondyé. O 1^é syèk, moun ki té ka rété Pèwgam é Tiyati té ka adoré idòl é té ka fè péché sèksyèl. Ni sèwten krétyen ki koumansé suiv-yo. Alò Jézi palé ba sé lasanblé-la ki té adan sé 2 vil-lasa franchman pas ni sèwten adan yo ki té ka wousoulé moun ki té ka fè péché sèksyèl (Rév. 2:14, 20). Jòdijou osi, sé moun-la ki adan mond-lasa vé kè nou aksèpté mantalité a yo. Moun ki an fanmi an nou oben moun ki alantou an nou pé éséyé fè-nou konprann kè nou two radikal é kè nou pa bizwen suiv lwa a Jéova. Pa ègzanp, lè on moun ka fè on péché sèksyèl, yo pé di-nou kè yo pa’a vwè ka i ni dè mal adan sa é yo pé di-nou osi kè prensip a Labib pasé dimòd. Pétèt kè délè nou ni lenprésyon kè lè Jéova ka mandé-nou fè on biten, i pa’a ban-nou asé èsplikasyon. É dépawfwa, pétèt kè nou anvi « ay pli lwen ki sa ki maké » (1 Kor. 4:6). w23.07 16 § 10-11.

Mari, manman Jézi, té bizwen fòs. Imajiné sa i rèsanti lèwvwè zanj Gabriyèl vin owa a-y é i di-y ki rèsponsabilité i té’é ni. A pa té on ti afè ! I pa té mayé men i té kay ni on timoun. Anplisdisa, i poto’o jen lévé on timoun é i té kay lévé timoun-la ki té kay vin Mési-la. Ondòt biten ankò, sé kè i té fiyansé èvè Jozèf. Alò kijan i té kay èspliké Jozèf kè i té ansent alòskè i poto’o jen ni pon rèlasyon sèksyèl ? (Lik 1:26-33). Ola Mari pran fòs pou i té rivé about a travay-lasa ? I chèché èd owa dòt moun. Pa ègzanp, i mandé Gabriyèl ba-y plis détay asi travay-la i té ni a fè la (Lik 1:34). Tibwen plita, i ay jous adan réjyon a sé montangn-la ki adan téritwa a Jida pou ay vwè Élizabèt, on fanmi a-y. Élizabèt félisité Mari é anplisdisa Jéova voyé lèspri sen a-y asi Élizabèt pou i té anonsé on pwofési ki té ankourajan toubònman. Pwofési-lasa té ka konsèwné timoun-la Mari té kay ni la (Lik 1:39-45). Aprésa, Mari di konsa kè Jéova té aji èvè bra a-y ki puisan toubònman (Lik 1:46-51). É sé vré, Jéova té sèvi èvè Gabriyèl é èvè Élizabèt pou ba-y bon fòs. w23.10 14-15 § 10-12.

A pa tout disip a Kris Jéova chwazi èvè lèspri sen a-y pou yo vin wen. Sé moun-la Jéova chwazi la ka vin gason a-y. Yo a 144 000 é yo ké prèt an syèl-la èvè Jézi (Rév. 14:1). Koté-la ki Sen la adan tabèwnak-la ka rèprézanté lèfètkè Jéova adòpté-yo pou yo vin gason a-y toupannan yo asi latè (Wom. 8:15-17). Koté-la ki Pli Sen la adan tabèwnak-la ka rèprézanté syèl-la, kivédi koté-la Jéova ka rété la. « Rido-la » ki té ka séparé Koté-la ki Sen la èvè Koté-la ki Pli Sen la, ka rèprézanté kò-la Jézi té ni lè i té si latè. Jézi sé pi Gran Prèt ki tini adan tanp èspirityèl la men toutotan i té ni kò-lasa i pa té’é pé monté an syèl-la. Lèwvwè Jézi ofè kò a-y an sakrifis pou moun asi latè, i ba sé krétyen wen la laposibilité dè ay viv an syèl-la. Yo osi, pou yo pé sa ni rékonpans a yo an syèl-la, fò-yo ké lésé kò-la yo ni la (Ébr. 10:19, 20 ; 1 Kor. 15:50). w23.10 28 § 13.

Lè sé boug Éfrayim la kritiké Jédéon, i réponn-yo èvè dousè (Jij 8:1-3). I pa fè kòlè. I montré i té ni imilité lè i kouté-yo palé dè sa ki té ka enkyété-yo, é i palé ba-yo jantiman, kifè sa kalmé-yo. On ansyen ki ni sajès ka imité ègzanp a Jédéon lè i ka pran tan kouté é lè i ka réponn èvè dousè lè yo ka kritiké-y (Jak 3:13). Grasa sa, i ka travay pou lapé adan lasanblé-la. Lè yo félisité Jédéon pas i té gangné sé Madyanit-la, i ba Jéova tout glwa-la (Jij 8:22, 23). Kijan sé ansyen-la pé imité Jédéon ? Yo pé ba Jéova louwanj pou sa i ka pèwmèt-yo fè (1 Kor. 4:6, 7). Pa ègzanp, si yo ka félisité on ansyen pas kò a-y bon pou anségné lézòt, i pé di moun-la kè sé Pawòl a Bondyé ki ka anségné-nou oben kè sé òwganizasyon a Jéova ki ka fòwmé-nou. Fò sé ansyen-la mandé-yo dè tanzantan si yo ka anségné on mannyè ki ka onoré Jéova, oben si yo ka chèché a fè moun vwè-yo. w23.06 4 § 7-8.

Si Jéova pò’ò ban-nou sa nou ka mandé-y, fò-nou mandé-nou : « Ès an ka priyé pou bon biten-la ? » Souvantfwa, nou ka kwè kè nou sav sa ki pibon pou nou. Men pétèt biten-la nou ka mandé la ké fè-nou dibyen pannan déotwa jou é aprésa i ké fòsé-nou. Pétèt nou ni on pwoblèm é nou ka di Jéova sé konsa nou té’é vé i réglé pwoblèm-la pou nou. Men ka ki ka di kè pa ni on méyè solisyon ki tala nou ka mandé adan priyè an nou ? É pétèt sèwten biten nou ka mandé adan priyè an nou pa annakò èvè volonté a-y (1 Jan 5:14). An-nou pran ègzanp a sé paran-la ki ka mandé Jéova fè ansòt pou timoun a yo rété adan lavérité. I ka sanm sa sé on bon biten pou mandé Bondyé. Men Jéova pa ka fòsé ponmoun sèvi-y. I vé nou adoré-y paskè sé sa nou chwazi fè, é sé sa i ka atann dè timoun an nou osi (Dét. 10:12, 13 ; 30:19, 20). Alò, pétèt kè sa té’é myé si sé paran-la té ka mandé Jéova édé-yo touché tchè a timoun a yo plito, pou i aprann enmé Jéova é pou i vin bon bon zanmi èvè-y (Pwov. 22:6 ; Éféz. 6:4). w23.11 21 § 5 ; 23 § 12.

Nou sòti vwè diféran mannyè nou pé montré lézòt kè nou enmé-yo. Aprézan an-nou arété-nou asi yonn adan yo. Pòl di : « Fò yonn kontinyé konsolé lòt. » Poukwa nou pé di kè lè nou ka konsolé lézòt sé on bon mwayen pou montré-yo kè nou enmé-yo ? Dapré on liv ki ka palé dè Labib, mo-la Pòl itilizé la é ki bay « konsolé » vé di « rété owa on moun pou ankourajé-y toupannan i anba on éprèv ki rèd ». Sa vé di kè lè nou ka konsolé on frè oben on sè ki ka jwenn on bout rèd, sé konsi nou ka lévé-y atè-la é nou ka édé-y pou i kontinyé maché asi chimen a lavi. É chakfwa nou ka konsolé-y, nou ka montré-y kè nou enmé-y (2 Kor. 7:6, 7, 13). Lè nou ka konsolé on moun é lè nou ni konpasyon an tchè an nou, sa lyanné. Poukwa nou ka di sa ? Pas lè on moun ni konpasyon, i ka anvi konsolé lézòt é i ka anvi fè on biten pou soulajé-yo. Donk pou nou pé sa konsolé on moun, prèmyé biten pou nou ni pou-y sé konpasyon. Lapòt Pòl ka montré ki lyannaj ki ni ant konpasyon a Jéova é konsolasyon-la i ka bay la. Mi sa i ka di asi Jéova : « Papa-la ki ka pran penn an nou èvè tandrès é Dyé a tout konsolasyon la » (2 Kor. 1:3). w23.11 9-10 § 8-10.

Fò tout disip a Kris mèt an tèt a yo kè yo ké jwenn éprèv. Sonjé ègzanp a lapòt Pòl. Mi sa i di sé krétyen-la ki té ka rété Tésalonik la : « Sé vré, lè nou té owa a zòt, nou té ka avèti-zòt kè nou té’é jwenn éprèv, é […] sé sa ki rivé » (1 Tés. 3:4). É mi sa i maké ba sé Korentyen-la : « Frè an nou, nou pa anvi kaché-zòt sé éprèv-la nou jwenn la […] Nou jous konpranndèdi nou té’é mò » (2 Kor. 1:8 ; 11:23-27). Jòdijou osi, sé krétyen-la ké jwenn éprèv. Fò-yo atann-yo a sa (2 Tim. 3:12). Ou ni fwa an Jézi é ou koumansé suiv-li. Pétèt kè akòz dè sa, fanmi a-w é zanmi a-w ka fè-w bon méchansté. Oben pétèt kè kolèg-travay a-w oben kanmarad-lékòl a-w pèwsékité-w pas ou pa’a fè ayen ki malonèt (Ébr. 13:18). Oben pétèt kè koté-la ou ka rété la gouvènman-la ka mèt baton an wou a-w pou anpéché-w préché é palé dè èspérans a-w ? Men Pòl èspliké kè kèlkèswa éprèv-la nou ka jwenn la, fò-nou ni tchè-kontan. w23.12 10-11 § 9-10.

Jakòb jwenn onlo difikilté é fò i té andiré sé difikilté-lasa. Pwòp tigason a-y, Siméon é Lévi, sali non a fanmi-la é non a Jéova. Anplisdisa, Jakòb té enmé Rachèl onlo onlo men Rachèl mò lèwvwè i fè dézyèm gason a yo. É konm onlè pa té ni manjé an péyi-la, fò Jakòb té ay viv an Éjipt alòskè i té ja ni on bèl laj (Jén. 35:16-19 ; 37:28 ; 45:9-11, 28). Magré tout sé malè-la ki rivé Jakòb la, i toujou fè Jéova konfyans é i pa jen arété kwè adan pwomès a-y. Jéova, li kanta-y, montré Jakòb kè i té kontan-y é i montré-y sa on mannyè ki klè. Pa ègzanp, Jéova béni-y pas i pèwmèt-li ni onlo byen. É sonjé osi jan Jakòb dwèt té ni onlo rèkonésans pou Jéova lèwvwè i rètouvé gason a-y Jozèf, alòskè i té ka konprann kè tigason a-y té mò dépi onpakèt lanné. Konm Jakòb té bon bon zanmi èvè Bondyé, sa édé-y andiré tout sé éprèv-la i jwenn la (Jén. 30:43 ; 32:9, 10 ; 46:28-30). Menmjan-la osi, siwvwè nou bon bon zanmi èvè Jéova, nou ké pé andiré kèlkèswa difikilté-la nou ké jwenn la é nou ké fè sa menmsi nou pa té ka atann-nou a sé difikilté-lasa. w23.04 15 § 6-7.

Sòm 23 la sé on ti chanté David fè pou di kè i sèten kè Jéova enmé-y é kè i ké toujou pran swen a-y. I ka di jan li é Jéova bon bon zanmi. I jous kriyé Jéova Bèwjé a-y. David té ka lésé Jéova gidonné-y. Kifè, i té ka santi-y ansékirité é i té ka fèfon asi Jéova a san pou san. David té sav kè Jéova té’é kontinyé montré-y kè i enmé-y touléjou a vi a-y. Poukwa i té sèten dè sa ? « Pé’é manké-mwen ayen. » David té ka santi kè Jéova té ka pran swen a-y byen menm pas Jéova toujou té ka ba-y sa i té bizwen. I té sav osi kè Jéova sé té zanmi a-y é kè i té kontan-y. Sé pousa, i té sèten kè kèlkèswa sa ki té’é pasé plita, Jéova té’é kontinyé pran swen a-y adan tout domenn a vi a-y. Konm David té sèten kè Jéova té enmé-y é kè i té ka pran swen a-y, sa té ka édé-y trankilizé lèspri a-y lèwvwè i té enkyèt. Okontrè, i té ni lakontantman é i té byen kontan sa i té ni (Sòm 16:11). w24.01 29 § 12-13.

Dépi 2^èm gè mondyal la, sèwvitè à Jéova ka préché alèz a yo adan onlo péyi. Kifè onlo moun aprann konnèt Jéova. Jòdijou ankò, sé frè-la ka fè fon asi Jézikris pou ba-yo on dirèksyon. Yo vlé kè sé enstriksyon-la yo ka ba sé frè é sè-la korèsponn ègzaktèman a sa Jéova é Jézi vé. Aprésa sé rèsponsab a siwkonskripsyon la é sé ansyen-la ka ba lasanblé-la dirèksyon-lasa. Sé ansyen-la ‘adan men dwat’ a Kris (li Rév. 2:1). Sé vré kè sé ansyen-la enpawfè é kè yo ka fè érè. Men a pa yo tousèl. Moyiz é Joziyé é jous sé apòt-la ni lokazyon fè érè yo osi (Nonb 20:12 ; Joz. 9:14, 15 ; Wom. 3:23). Nou ka vwè byen kijan Jézi ka gidonné èsklav fidèl é prévwayan la é sé ansyen-la, é kijan i ké kontinyé fè sa. Alò lèwvwè sé frè-la ki rèsponsab la ka ban-nou on dirèksyon, nou pé fè-yo konfyans a 100 % pas sé Jézi ki ka ban-nou dirèksyon-lasa. w24.02 23-24 § 13-14.

Jòdijou, lèwvwè nou ka palé dè Jéova é kè sé moun-la ka santi jan nou ni rèkonésans pou-y é jan nou enmé-y, sa ka fè Jéova plézi. Lè nou ka préché, òbjèktif an nou sé ba sé moun-la anvi vin zanmi a Jéova é édé-yo enmé Jéova kon nou (Jak 4:8). Nou kontan montré sé moun-la adan Bib-la jan Jéova ni lanmou, jan i sé on moun ki jis, jan i ni sajès, jan i ni puisans é dòt kalité ankò ki ka atiré-nou. Anplisdisa lèwvwè nou ka fè tousa nou pé pou nou aji kon Jéova, sa ka ba-y louwanj é sa ka fè-y plézi. Lèwvwè nou ka aji konsa, nou pa ka aji kon sé moun-la ki adan mond méchan lasa. Alò ni sèwten moun ki ka vwè sa é yo ka anvi sav poukwa nou pa ka aji kon yo (Mat. 5:14-16). Adan alé é vini an nou, délè nou pé touvé on lokazyon pou nou èspliké moun poukwa nou ka aji kon nou ka aji la. Lè nou ka fè sa, sa ka ba sé moun-la ki sensè la gou pou yo vin owa Jéova. Lè nou ka ba Jéova louwanj konsa, a pa ti kontan i ka kontan ! (1 Tim. 2:3, 4). w24.02 10 § 7.

On frè ki byen doubout adan lavérité ka fè biten ki itil pou lasanblé-la, i ka antann-li byen èvè lézòt, i ka gangné sou a pen a-y é i ka ba fanmi a-y sa yo bizwen. Sé pousa ni sèwten biten fò i sav fè. Pa ègzanp, fò i aprann li é ékri plibyen. Pou on moun ni tchè-kontan é pou i réyisi vi a-y, sa enpòwtan toubònman kè i pran tan li Labib é médité asi-y touléjou (Sòm 1:1-3). Si ou ka li Labib chakjou, ou ké konprann jan Jéova ka pansé pli fasilman é sa ké édé-w apliké konsèy a-y adan vi a-w (Pwov. 1:3, 4). Adan lasanblé-la, sé frè é sè la bizwen frè ki kapab anségné é ki pé bay konsèy ki bazé asi Labib. Si ou ka li byen, sa ké édé-w bay diskou é fè komantè ki ka konsolidé fwa a lézòt. Fè éfò pou ékri plibyen osi. Sa ké pèwmèt-vou pran nòt ki entérésan. Konsa fwa a-w ké vin pli fò, é pétèt kè sé lidé-la ou maké la ké itil pou lézòt osi. w23.12 26-27 § 9-11.

Lèwvwè ou ka santi kè lapè ka pran lanmen asi-w, pran tan réfléchi asi sa Jéova ké fè dèmen lè Satan pé ké la ankò. Pannan lasanblé réjyonal a 2014, adan on sijé, on fanmi té ka fè on ti kozé asi èstrad-la pou montré kijan nou pé médité asi èspérans an nou. Papa-la té ka palé dè 2 Timoté 3:1-5 èvè fanmi a-y é yo imajiné ka sé vèwsé-lasa té’é di si yo té ka palé dè paradi-la. Mi sa vèwsé-lasa té’é di : « Adan nouvo mond-la nou ké adoumanman. Pas sé moun-la ké chèché entéré a lézòt, yo ké enmé trézò èspirityèl, yo ké sav rèkonnèt limit a yo, yo ké ni imilité, yo ké ba Bondyé onlo valè, yo ké kouté fanmi a yo, yo ké ni rèkonésans, yo ké fidèl, yo ké ni onlo lanmou pou lézòt, yo ké paré a viv byen èvè toutmoun, yo ké toujou paré a di vérité si lézòt, yo ké métrizé-yo, yo ké aji èvè dousè, yo ké enmé sa ki byen, yo ké mérité ou fè-yo konfyans, yo ké plen bonté, yo pé’é ni pon òwgèy, yo ké pi enmé Bondyé ki yo enmé plézi é yo ké enmé Bondyé poudèbon. Sé èvè sé moun-lasa pou ou maché. » Ès délè ou ka palé dè jan lavi ké yé adan nouvo mond-la èvè fanmi a-w é èvè zanmi a-w ? w24.01 6 § 13-14.

A sèlman, sa ka rasiré-nou dè sav kè Jéova kontan toutmoun adan pèp a-y ! Bib-la ka di : « Jéova enmé pèp a-y » (Sòm 149:4). Kanmenmsa, désèwten adan nou tèlman dékourajé, kifè yo ka mandé-yo : « Men é mwen, ès Jéova enmé-mwen ? » An tan lontan, onlo sèwvitè a Jéova ki té fidèl té ni dimal a kwè kè Jéova té kontan-yo (1 Sam. 1:6-10 ; Jòb 29:2, 4 ; Sòm 51:11). Labib ka montré on mannyè ki klè kè menmsi nou enpawfè, nou pé ni favè a Bondyé. Kijan sa posib ? Fò nou montré nou ni fwa an Jézi é fò nou pran lèbatèm (Jan 3:16). Lè nou ka pran lèbatèm, nou ka montré toutmoun kè nou rèpanti-nou é kè nou pwomèt Bondyé kè nou ké fè volonté a-y (Akt 2:38 ; 3:19). Jéova kontan toubònman lè i ka vwè tout sé éfò-la nou ka fè la pou vin bon bon zanmi èvè-y. Toutotan nou ka kontinyé ba-y sa nou ni dè méyè pou tchenbé pwomès an-nou, nou ka rété bon bon zanmi èvè Jéova é nou ka fè-y plézi (Sòm 25:14). w24.03 26 § 1-2.

Nou pé imité sé disip-la ki té ka viv o 1^é syèk lè nou ka kontinyé préché menmsi adan péyi-la nou ka rété la gouvènman-la ka entèwdi-nou préché. Nou pé sèten kè Jéova ké édé-nou fè travay a prédikasyon-la i ban-nou fè la. Alò mandé Jéova kouraj-la é sajès-la ou bizwen la. Mandé Jéova édé-w pou ou pé sa andiré sé difikilté-la ou ka jwenn la. Ni onlo adan nou ki pa ni on bon santé, ki ka soufè pas tchè a yo an bobo, ki pèd on moun yo té enmé, ki ka jwenn pwoblèm an fanmi a yo, ki ka jwenn pèwsékisyon oben ki ka jwenn dòt difikilté ankò. É lèwvwè yo ka jwenn sé difikilté-lasa alòskè ni lagè oben on épidémi pa ègzanp, sa pli rèd ankò. Ka ou pé fè adan on sitiyasyon konsa ? Di Jéova tousa ou ni an fon a tchè a-w. Palé-y dè sitiyasyon a-w é fè sa konsi sé ba on zanmi a-w ou ka palé. Ou pé sèten kè « i ké pòté mannèv ba-w » (Sòm 37:3, 5). Si nou ka kontinyé priyé, sa ké édé-nou « andiré anba sé éprèv-la » (Wom. 12:12). Jéova konnèt sa sèwvitè a-y ka viv. « I ka tann lè yo ka kriyé-y o sèkou » (Sòm 145:18, 19). w23.05 5-6 § 12-15.

Lè nou ni on désizyon enpòwtan a pran, fò nou chèché a konprann « sa Jéova vlé » é aprésa, fò-nou tchenn kont dè sa (Éféz. 5:17). Lè nou ka chèché ki prensip a Labib ka korèsponn èvè sitiyasyon an nou, an réyalité, sé chèché nou ka chèché a sav ka Bondyé ka pansé. Aprésa, si nou ka mèt sé prensip-lasa an pratik, nou ké pran bon désizyon pi fasilman. Sa « méchan-la », kivédi lènmi an nou Satan té’é vlé, sé kè nou tèlman okipé ka kouri dèyè sa mond-la ka pwopozé, kè nou pa ni tan ankò pou sèvi Bondyé (1 Jan 5:19). On krétyen pé enn touvé-y ka koumansé kouri dèyè lajan, dèyè gran étid oben dèyè on gwo travay olyé i chèché a vwè ka i pé fè pou sèvi Jéova plis. Asirésèten sé biten-lasa pa mové, men fò pa yo jen pran prèmyé plas-la adan vi an nou. Si on krétyen té ka touvé-y adan sitiyasyon-lasa, sa té’é montré i ka lésé létadèspri a mond-lasa détenn asi-y. w24.03 24 § 16-17.