Nvèè Ka Ló Nèà Deè Eo Íè Kilma Ló Ge Tã̀àgã Ló Bàrì

1. Ge kọọ̀ Jìhóvà néi deè kọ é tãagã̀èé ló tọ́a ní ló naa vàẹ?

NEN ea beè naa káála nè kunukẽ̀ néi ene kà dõ̀ònù e ka palàge di ló​—⁠ea dú gè bã̀é ló mm̀ tã̀àgã ló. Bugi togó níí: Èé láá kọ́ kọ̀láá kà nu ea dìí bùlà nèe kọ̀láá tṍó mm̀ kọ̀láá kà dém bel. Èé láá tã̀àgã ló bẹẹ Tẹ̀ ea vulèi gbẹá boo váí tọọ̀ biè àbèè tọọ̀ kpọ́gọ́lọ́, vaá dẹlẹ nyíé boo kọọ̀ àé pãanéi tṍ ló. Nyíéi palàge ẹẹ ló nakà dõ̀ònùí.

2. Mósĩ́ deè ní e Méné Dévìd beè zogè kọọ̀ à nveenìè ka ló nèà deè ge tã̀àgã ló Bàrì e?

² Méné Dévìd beè nvèè ka ló nèà deè ge tã̀àgã ló Bàrì. A beè ọlí sọ́l nè Jìhóvà kọọ̀: “Naa kọọ̀ nà tã̀àgã ló á belí ínseǹs e bà náa gbẹá ní kèsĩ́.” (Ps. 141:​1, 2) Mm̀ deè Dévìda, ba beè olòó tú ọ̀ẹ̀ dẽe naamá ínseǹs e gbò vààla gyọ́ọ é fãamà Bàrì. (Ẹ́xọ. 30:​34, 35) Ge kọọ̀ Dévìd ló bel kilma ló ínseǹsa zógè kọọ̀ a beè gbĩ́ gè tú ọ̀ẹ̀ bùgmà togó boo nú ea é kọ́ nè a Tẹ̀ ea di káála. À tan nagé beele gè naa vó. È gbĩ́ì kọọ̀ bẹẹ tã̀àgã ló á leemá Jìhóvà.

3. À bọ́ló kọ é labví láb naa vàẹ tṍó e gé bã́ ló Jìhóvà mm̀ tã̀àgã ló é, vaá ló éé?

³ Náa bọ́ló kọ é tẹlẹ̀ gbẹ́gẹ̀lẹ̀ tṍó e gé tãàgã ló Bàrì. Tãa vó, à bọ́ló kọ é zogè kọ è íè fã̀ dẽe. Bugi togó boo bé e mòà nù dẽè Àìzáíà, Èzíkiẹ̀l, Dániẹ̀l, nè Jọ́ọ̀n beè dú dũ̀ùnè naa. Gbò mòànù dẽeá beè dú kele ló ene, sõò à íe bèlà ea beè di zẹ̀ẹ̀. Dénè ọ̀và ló bel kilma ló Jìhóvà belí Méné e ka di ló. Àìzáíà “beè mòn Jìhóvà ea di ĩ́ìtẽ́ boo kpòté méné ea bọọ́ gã boo vaá dààa boo.” (Àìz. 6:​1-3) Èzíkiẹ̀l beè mòn Jìhóvà ea di ĩ́ìtẽ́ boo faà bé e “dũ̀ùnè beè beeá teníé ló . . . belí gùnùgũ̀.” (Ezek. 1:228) Dániẹ̀l beè mòn “Neǹ Nómá Deeá” ea nveà ẹ́ẹ́ kọ̀là ló, e sã́ gé bẹ́ aa ló a kpòté méné. (Dán. 7:​9, 10) Vaá Jọ́ọ̀n beè mòn Jìhóvà ea di ĩ́ìtẽ́ boo kpòté méné e gùnùgù, ea sẹlẹ dẽè enè íb dem ea ólò dú bṹú bṹú, ea kọ̀là ẹ́màràld, beè pììà tení ló. (Kùùà 4:​2-4) Tṍó e bugì togó boo íb ka ea di ló Jìhóvà e tọ́ọ̀ nú eé láá doolé ló á gé, à kẽeí nyíe bé ea dú bíi kọ é nvèè ka ló nèà deè e íè ge bã̀é ló mm̀ tã̀àgã ló naa. Sõò mósĩ́ dee ní ea bọ́ló kọọ̀ é tã̀àgã ló Bàrì e?

“NEENII BÉ EO É TÃAGAI LÓ BÀRÌ NAANIIÍ”

4. Éé ní e nóò lọl ló gbò bel e Jíízọ̀s beè kọ́ mm̀ tã̀àgã ló bẹẹ tẹ̀ íe ea di mm̀ kpá Máátìù 6:​9, 10 e?

⁴ Bugi Máátìù 6:​9, 10. Mm̀ Lòbèl Jíízọ̀s Gbẹá Boo Gùa, a beè nóòmà pá a gbò nyòòne nvée bé e bàé láá tã̀àgã ló Bàrì mm̀ sĩ́deè ea é léémáe naa. Tṍó e Jíízọ̀s ni kọ́ọ̀ “Neenii bé eo é tãagãi ló Bàrì naaniií” lọ̀l, a beè gbóó ló bel boo gbò nú ea palàge dú bíi ea kil ló tóm̀ bùlà Jìhóvà: ea dú gè naa kọọ̀ a bée á di káí; ge naa kọọ̀ a Boṅ Méné ea é kyọsĩ́ pá a gbò ọ́b á dù; nè gbò lé nu ea é náa nè gbò e bàé dí boo kunukẽ̀í mm̀ dì deèsĩ́. È zógè kọọ̀ ge naa nú ea dú bùlà Bàrì palàge bọọ́í ló tṍó e túù gbò nú ea dú bíií nvee mm̀ bẹẹ tã̀àgã ló.

5. É kọ à lelà kọ é tã̀àgã ló Bàrì kilma ló gbò nú ea biíi?

⁵ Mm̀ gã́bel ea bẽene, Jíízọ̀s beè zogè kọ à dú nágé bíi ge kọ́ nú ea biíi mm̀ tã̀àgã. Èé láá bàn Jìhóvà kọ á nèi gyã́á eé dé nieí, ia ló bẹẹ pọ́lọ́ nèi, kpènài lọl bá ẹ̀bmà, vaá dùùlài lọl bá pọ́lọ́ nená. (Máát. 6:​11-13) Tṍó e banì gbò núi lọl bá Jìhóvà, è zógè kọ è íè bíi ló a nvèè bá vaá è gbĩ́ì ge naa nú ea léémáe.

6. É kọọ̀ áá gbò nú ea di mm̀ tã̀àgã ló bẹẹ tẹ̀ íe ní ea bọ́ló kọ é tã̀àgã ló Bàrì kilma ló é? Baatẽ́.

⁶ Jíízọ̀s náa beè kọọ̀ pá a gbò nyòòne nvéè á olòó tení boo buù kà bel ea beè kọ́ mm̀ tã̀àgã ló bẹẹ tẹ̀ íeá. Mm̀ dõòna kà gbò tã̀àgã ló Bàrì e Jíízọ̀s beè tã̀àgã̀, a beè ló bel boo kele-kele nú ea dúe bíi ló tṍóá. (Máát. 26:​39, 42; Jọ́ọ̀n 17:​1-26) Mm̀ tẽ̀ènè sĩ́deèá, èé láá tã̀àgã ló Bàrì kilma ló kọ̀láá kà nu ea dúi bíi ló. Tṍó e gbĩ́ gè nè béèlàfùl, èé láá tã̀àgã ló Bàrì kọ á nèi nyìmànù nè dã̀ból ló nu. (Ps. 119:​33, 34) Tṍó e bà néi tóm ea tàvàlà ge sì, èé láá tã̀àgã ló Bàrì kọ á nèi nyìmànù nè tàvẹ̀nù. (Pró. 2:⁠6) Gbò tẹ̀ nè kà é láá tã̀àgã ló Bàrì má ba gbò nvín, gbò pá nvín é láá tã̀àgã ló Bàrì má ba gbò tẹ̀ nè kà, vaá à bọ́ló kọọ̀ dénè bẹ̀ì é tã̀àgã ló Bàrì má gbò e ólò noòmà Kpá Káí nè gbò eé kọ́ kpẹ̀a nè. Mm̀ kà kà, tṍó eé tã̀àgã ló Bàrì, níì áá nú ea biíi ní eé kọ́ nè Jìhóvàẹ nì.

7. Éé ní ea náa vaá à bọ́ló kọ é lèèlà Jìhóvà mm̀ bẹẹ tã̀àgã ló é?

⁷ À bọ́ló kọ é kẽ̀èa boo gè lèèlà Jìhóvà mm̀ bẹẹ tã̀àgã. Náa bọ́ló kọọ̀ é lèèlà tọ́ọ̀ nen èlmà bẹẹ Bàrì. Jìhóvà dú “lé vaá di kpènà ló gè ia ló pọ́lọ́.” À ólò ié nágé “sàn nyíe nè tóè sàn, [à] ólò ọọ mm̀ ge bã̀ súng vaá bọọ mm̀ ge ié vulè ea kyãa mm̀ bọ́ọ̀ló dẹ̀lẹ̀ nyíé boo nè ge bọ́ló dẹ̀lẹ̀ nyíé boo.” (Ps. 86:​5, 15) Mm̀ kà kà, à bọ́ló kọ é lèèlà Jìhóvà ló íb nen ea dú nè nú ea gé náa.

8. Sìgà gbò éé ní eé láá õá Jìhóvà zaa kilma ló é? (Psalm 104:​12-15, 24)

⁸ Gbáló gè lèèlà Jìhóvà mm̀ bẹẹ tã̀àgã ló, è ólò õáe zaa ló gbò dũ̀ùnè nu ea ni náa nèi. Dì belí nu dòòmà bá, èé láá õáe zaa ló gbò lé-lé kọ́lọ̀ e fàlávà íe, gã́bug lé gã́ gyã́á ea dì, nè gbò lé kọ́ọ̀ e íè. Bẹẹ Tẹ̀ ea vulèi néi gbò nuí kọbéè nyíéi ẹ́ẹ. (Bugi Psalm 104:​12-15, 24.) Bọọ èlmà tõ̀ò, è palàge õá Jìhóvà zaa ló gbò dùùlà bá deè tṍ ea aa mm̀ Kpá Káí, nè ge naa kọ é ié ból dẽesĩ́ ea dú dũ̀ùnè kilma ló dì deèsĩ́.

9. Éé ní ea é láá nvèè bá nèi kọ é kẽ̀èà boo gè õá Jìhóvà zaa ẹ́? (1 Tẹ̀sàlónaikà 5:​17, 18)

⁹ Àé láá vàlẹ̀bá táí nyíe gè õá Jìhóvà zaa ló dénè nu ea gé náa nèi. Éé ní ea é láá nvèè bá nè ni kọ ó kẽ̀èa boo é? Òó láá emí gbò nú eo beè tã̀àgã ló Bàrì kilma ló vaá olòó ẹ̀b bé e Jìhóvà ni áálá naa. Tṍóá, ò gbóó õáe zaa ló bé ea nveè bá nè ni naa. (Bugi 1 Tẹ̀sàlónaikà 5:​17, 18.) Bugi togó boo níí: Nyíéi ólò ẹẹ tṍó e dõòna gbò ṍái zaa. Mm̀ tẽ̀ènè sĩ́deèá, nyíè Jìhóvà ólò ẹẹ tṍó e kẽèa boo gè õáe zaa ló gè aalá bẹẹ tã̀àgã ló. (Kọ́l. 3:15) Éé ní ea dú dõòna kà pọ̀bkà nú ea náa vaá à bọ́ló kọ é õá Bàrì zaa ẹ́?

ÕÁ JÌHÓVÀ ZAA BOO BÉÈ A SÃ́ÁNÁ EA VULÈ

10. Dẹ̀ẹ̀a boo nú ea di mm̀ 1 Pítà 2:​21, éé ní ea náa vaá à bọ́ló kọ é õá Jìhóvà zaa ló gè lẹ̀ẹ̀là Jíízọ̀s domá boo kunukẽ̀í ẽ́?

¹⁰ Bugi 1 Pítà 2:21. À bọ́ló kọ é õá Jìhóvà zaa ló gè lẹ̀ẹ̀là a Sã́áná ea vulè kọ á dù gé noòmài nu. È nóò gã́bug nú ea kil ló Jìhóvà nè bé eé láá naa nú ea léémáe naa tení dú ló gè nó nú ea kil ló dùm Jíízọ̀s. Be è íe zìgà mm̀ ú vààà gyọ́ọ̀ Jíízọ̀s, èé láá ié kà lé gbaa ló kilma Jìhóvà Bàrì vaá zọ̀ẹ tõoa mm̀ fẹ́ẹ́-fẹẹ̀ ló.​—⁠Róm̀ 5:⁠1.

11. Éé ní ea náa vaá è ólò tã̀àgã ló Bàrì boo béè Jíízọ̀s e?

¹¹ È ṍà Jìhóvà zaa kọ è láà tã̀àgã̀é ló tení dú ló a Sã́áná. Jíízọ̀s ní e Jìhóvà ólò tení dú ló vaá aalá bẹẹ tã̀àgã ló é. Jìhóvà ólò pãane tṍ vaá aalá tã̀àgã ló e tãàgã̀ boo béè Jíízọ̀s. Jíízọ̀s beè baatẽ́ kọọ̀: “M̀ é náa kọ̀láá nu eo bĩ́ìnài boo nà bée nèi, kọbé dũ̀ùnè nà Tẹ̀ dọ́ bàlà kẽ mm̀ a Sã́áná.”​—⁠Jọ́ọ̀n 14:​13, 14.

12. Dõòna kà éé ní ea náa vaá à bọ́ló kọ é õá Jìhóvà zaa boo béè a Sã́áná ẽ́?

¹² Jìhóvà ólò ia ló bẹẹ náàkyọ̀ nèi boo béè ú vààa gyọ́ọ̀ Jíízọ̀s. Kpá Káí kọ́ọ̀ Jíízòs dú bẹẹ “Pọ̀b Nen Vààla Gyọ́ọ . . . ea di ĩ́ìtẽ́ boo bá lè kpò té méné Gbele Bàrì ea di káála.” (Híb. 8:⁠1) Jíízọ̀s dú “nen ea ólò lói bel boo nè Tẹ̀.” (1 Jọ́ọ̀n 2:⁠1) Nyíéi palàge ẹẹ kọọ̀ Jìhóvà néi Pọ̀b Neǹ Vààla Gyọ́ọ ea íe sàn nyíe, dã́tẽ́ ló bẹẹ ọ́ọ́-ọọ, “ea ólò bàn Bàrì boói.” (Róm̀ 8:34; Híb. 4:15) Boo béè kọ née gbõomà, née gáẹ̀ beè láá tã̀àgã̀ ló Jìhóvà be Jíízọ̀s náa beè vaaái gyọ́ọ́ boo. Mm̀ kà kà, née é láá õá Jìhóvà zaa mm̀ sĩ́dee ea gbõoma ló gè nèi a Sã́áná ea vulè!

TÃAGÃ LÓ BÀRÌ MÁ PÁ VÍGÀ

13. Mósĩ́ deè ní e Jíízọ̀s beè zogè kọ à vulèè pá a gbò nyòòne nvée kà lèlà bílá dee ea náa vaá bà fẹ́ẹá ẹ́?

¹³ Kà lèlà bílá dee ea náa vaá bà fẹ́ Jíízọ̀sa, a beè tú gã́bug tṍó tãàma ló Bàrì má pá a gbò nyòòne nvée, vaá bàn a Tẹ̀ kọ á “kùmàva lọl bá Pọ́lọ́ Nená.” (Jọ́ọ̀n 17:15) Níá zógè bé e Jíízọ̀s beè palàge vùlè va naa! Bã̀àna tṍó ea nyímá kọ àé gé monìè agẹbá tã̀àgã̀, a beè bùlà nú ea kil ló pá a gbò tóm.

14. Mósĩ́ dee ní eé láá zogè kọọ̀ è vulè pá vígà ẹ?

¹⁴ Dì belí Jíízọ̀s, née ólò bùlà nú ea kil ló áá bẹẹ bíi. Tãa vó, è ólò tã̀àgã ló Bàrì má pá vígà. Tṍó e náà vó, è gé gban tṍ ló lẹ̀ẹ̀là e Jíízọ̀s beè nè kọ é vùlè ene nè ge naa kọọ̀ Jìhóvà á mòn bé e vulè pá vígà naa. (Jọ́ọ̀n 13:34) Ge tã̀àgã ló Bàrì má pá vígà níì pèè tṍó nì. Moǹ Bel Bàrì kọ́ nèi kọọ̀ “tã̀àgã ló neǹ lé lab dògò íe kpóó.”​—⁠Jém̀z 5:⁠16.

15. Éé ní ea náa vaá pá vígà à ié bíi ló bẹẹ tã̀àgã ló Bàrì e?

¹⁵ Pá vígà íe bíi ló bẹẹ tã̀àgã ló boo béè kọọ̀ bà gé téní bá gã́bug tã̀àgã̀. Èé láá bàn Jìhóvà kọ á nvèè bá nèva kọ bàá emá zọ̀ló, búùló kyọ̀à sĩ́ nu, bé gím, bíígá ló, àbèè dõònà kà gbò tàvàlà dìtõ̀ò. Èé láá tã̀àgã̀ nàgé ló Bàrì má gbò e bà ólò sí tóm ge nvèè bá nè gbò e nu kyọa ló. Òó láá nyimá ló sìgà gbò e bà di bá íb gbò dìtõ̀òá. Òó láá kolí va bée mm̀ o tã̀àgã ló. É zógè kọọ̀ è palàge vùlè va tení dú ló gè bàn Jìhóvà kọ á nvèè bá nèva.

16. Éé ní ea náa vaá à bọ́ló kọ é tã̀àgã ló Bàrì má gbò e bà gé túlè bõ̀ònatõ̀ò ẽ?

¹⁶ Bẹẹ tã̀àgã ló Bàrì ólò palàge ẹẹlẹ̀ nyíè gbò e bà gé túlè bõ̀ònatõ̀ò vaá dọ̀ bélè nèva. Níà nú ea beè naaá ló neǹ tóm Pọ́ọ̀l ẹ. A beè emí kọọ̀: “Tãaganai gé ló Bàrì boo nda, kọ Bàrì á nèm nu gè kọ́ boo tṍó em gbĩ́ gè ló bel, kọ ḿ láá lọ̀à pọ̀ ló vaá naa kọ gbò nen á nyimá kà kà bel ea beè gũavá ló ea di mm̀ a lé kpẹ̀a.” (Ẹ́fẹ. 6:19) Deè nieí, è íè nàgé gã́bug pá vígà e bà gé piigà ge tulè bõ̀ònatõ̀ò. È zógè kọ è vulè va tení dú ló gè bàn Jìhóvà kọ á tãànè dee bá ba tóm.

TṌÓ E BÀ KỌ́ É TÃ̀ÀGÃ LÓ BÀRÌ

17-18. Mó tṍó ní e bàé láá kọ é tã̀àgã ló Bàrì boo dõòna gbò e, vaá éé ní ea bọ́ló kọ é kẽ̀èa boo é?

¹⁷ Sìgà tṍó, bà ólò kọ é tã̀àgã ló Bàrì boo dõòna gbò. Dì belí nu dòòmà bá, vígà pábia ea gé noòmà Kpá Káí nen é láá kọ́ nè dõòna kà vígà pábia ea beè zọ̀ẹ gbá tọ kọ á tã̀àgã ló Bàrì. Àé láá dú kọọ̀ vígà pábia ea beè zọ̀ẹ gbá tọá náa palàge nyimá ló nen ea gé nó Kpá Káíá, vóà naa, àé dú lé kọọ̀ á tã̀àgã ló Bàrì ge nvèèmà kùbmà ló. Vó é náa kọọ̀ á palàge nyimá nu ea é kọ́ tṍó ea gé tãàgã ló Bàrì.

¹⁸ Bàé láá kọọ̀ vígà págbálà á tã̀àgã ló Bàrì gbẹá kè bila ló bel gè àà gé kọ́ kpẹ̀a àbèè gbẹá nònù. À bọ́ló kọọ̀ pá vígà e bà íe nakà nèà deèí á kẽ̀èa boo nú ea náa vaá bà bõoná. Náa bọ́ló gè tú tã̀àgã ló Bàrì nèèmà nègã́ àbèè ge dùùmà bá deè tṍ nen gbẹá nònù. Gbẹá sìgà bẹẹ gbò nònù, áá vòò kà mínìt ní e bà ólò ne ló gè ọlí sọ́l nè ge tã̀àgã ló Bàrì e, vóà naa, náa dú bíi kọọ̀ nen ea é tãàgã ló Bàrì á ló ‘gã́bug bel,’ bọọ èlmà tõ̀ò tṍó e nònù é gé dààà togó.​—⁠Máát. 6:⁠7.

TÚ TÃ̀ÀGÃ LÓ BÀRÌ GYÀÀMA SĨ́ MM̀ O DÙM

19. Éé ní ea é nveè bá nèi kọ é di kpènà ló nyòòmà deè bèèla bel Jìhóvà ẹ?

¹⁹ À palàge dú bíi kọ é tú tã̀àgã ló Bàrì gyaama sĩ́ mm̀ bẹẹ dùm boo béè kọọ̀ deè bèèla bel Jìhóvà a íná kuló. Níà nú ea náa vaá Jíízọ̀s beè kọọ̀: “Kuai dẽe ló vaá ò tãagaí ló Bàrì kọ̀láá tṍó kọbé ò íei kói eo é ténmaí bá dénè gbò nu ea é nááá.” (Lúùk 21:36) Mm̀ kà kà, ge olòó tãagã ló Bàrì é nveè bá nèi kọ é ié agẹ zìgà naa ní e deè bèèla bel Bàrì náa é búi ló.

20. Mósĩ́ dee ní e bẹẹ tã̀àgã ló Bàrì é láá belí kpéè nù ló ínseǹs e?

²⁰ Éé ní e ni ló bel boo é? È palàge nvèè ka ló nèà deè e íè ge tã̀àgã ló Bàrì. Nú ea palàge dú bíi kọ é tã̀àgã ló Bàrì kilma ló dú tóm̀ bùlà Jìhóvà. È ólò õá nágé Bàrì zaa boo béè a Sã́áná nè a Boǹ Méné vaá tã̀àgã ló Bàrì má pá vígà. Jìhóvà gbĩ́ nágé kọ é tã̀àgã ló Bàrì kilma ló nu ea dúi bíi ló nè ge naa kọọ̀ bẹẹ zìgà á aga ló. È zógè kọọ̀ è nveè ka ló bé e tã̀àgã ló Bàrì dú dũ̀ùnè naa tṍó e túù ọ̀ẹ̀ dẽe bùgmà togó boo nú e kọ́ọ̀ mm̀ bẹẹ tã̀àgã ló. Bẹẹ bel é ‘léémà’ Jìhóvà belí kpéè nù ló ínseǹs.​—⁠Pró. 15:⁠8.