¿Asouteeiche Jehová shiʼipajee tü tachuntakat nümüin?

1, 2. ¿Jamüsü jülüjawaika waaʼin nnojoluin nusoutuin Jehová shiʼipajee tü wachuntakat nümüin?

«TALATA MAʼIN PAAʼIN sünain aaʼinraa tü keeʼireekat naaʼin Jehová otta naapeerü pümüin tü suchuntaakat paaʼin» (Sal. 37:4). Anashaatasü maʼin tia pütchikat. ¿Waʼatapajüinjatche naapamaatüin Jehová süpüshuaʼa tü kasa wachuntakat nümüin? ¿Jamüsü anaka wasakireʼerüle waaʼin sünain tia? Jülüjataa waaʼin tüü: suchuntuin wanee wawala majayüt nümüin Jehová suʼunuinjatüin sünain tü Ekirajawaa napülajatkat na Aküjaliikana Pütchi. Alatüsü kojuya juya sümaa nnojoluin suunejaanüin. Nuchuntuin wanee wawala jimaʼai nümüin Jehová naawalaainjachin suulia tü ayuulii keemasü nünainkat süpüla nukooʼomüinrüin tü niʼyataainkat suluʼu tü outkajaaleekat. Nnojoipejeʼe nia aawalaain. Achuntushii waneinnua wawalayuu nümüin Jehová süpüla ayatüinjanain nanoujain nachonnii. Ooʼulaapejeʼe naya suulia naʼyataain nümüin Jehová.

² Eesüjaʼa puchuntawaire nümüin Jehová wanee kasa sümaa nnojoluin nusoutuin pümüin. Eesüjaʼa süpüla jülüjain paaʼin naapüin Jehová tü nachuntakat waneinnua wayuu nümüin, nnojotpejeʼe naapüin pümüin tü puchuntakat nümüin. Eesüjaʼa jülüjale paaʼin nnojoluin naaʼinrüin Jehová tia püpüleerua saaʼujee wanee kasa mojusü paainjaka. Shia jülüjaka saaʼin tia wanee wawala kanüliasü Janice.b Aʼyataweesü shia nümaa suʼwayuuse suluʼu Weteet. Nachuntuin maʼin tia nümüin Jehová. Alatapejeʼe wainma juya sümaa nnojoliin nounejaanüin. Müsü shia: «Mojusü maʼin taaʼin. Antajaasü suluʼu tekii mojuin takuwaʼipa noʼuluʼu Jehová. Jülüjasü taaʼin jamüin nnojoika nusoutuin shiʼipajee tü tachuntakat nümüin sümaa kojuyatuairüin tachuntuin shia nümüin».

3. ¿Kasa wekirajaainjatka anain sünain ekirajaayakat tüü?

³ «¿Naapajeetche Jehová tü wanüikikat woʼuraajapa nümüin?», eesüjaʼa wasakirüle waaʼin sünain tia. Tia shia tü nasakirakalü anain waneinnua wayuu namaiwajana waneepiakana nümaa Jehová (Job 30:20; Sal. 22:2; Hab. 1:2). ¿Kasa piyaawataka atuma shiimain naapajüin pünüiki Jehová? (Sal. 65:2). Süpüla watüjaain saaʼu tia, wekirajaa süchiki pütchikat tüü: ¿Kasa naaʼinraka Jehová süpüla nusoutuin shiʼipajee tü wachuntakat nümüin? ¿Kasa waaʼinrajatka süpüla nusoutuin wamüin Jehová? ¿Jamüsü anaka weeʼiratüle waneirua kasa wachuntaka nümüin Jehová?

NAAʼINRAKA JEHOVÁ SÜPÜLA NUSOUTUIN WAMÜIN

4. ¿Kasa nüküjaka Jehová wamüin suluʼu Jeremías 29:12?

⁴ Nüküjain Jehová naapajeerüin wanüiki woʼuraajapa nümüin (paashajeʼera Jeremías 29:12). Aishii waya nüpüla chi Wamaleiwasekai süka waʼyataain nümüin. Makalaka naapajüin wanüiki woʼuraajapa nümüin (Sal. 10:17; 37:28). Nnojotpejeʼe aküjünüin sükajee tia naapeerüin süpüshuaʼa tü wachuntakat nümüin. Eesüjaʼa waʼatapajüinjatüle paʼaraiisüin tü Mmakat süpüla naapüin wamüin Maleiwa waneirua kasa wachuntaka nümüin.

5. ¿Kasa jülüjaka naaʼin Jehová wachuntapa wanee kasa nümüin?

⁵ Jülüjasü naaʼin Jehová pansaale tü wachuntakat nümüin sümaa tü nüchekakat (Is. 55:8, 9). Wanee kasa nüchekaka Maleiwa shia jouluinjanain na wayuukana süpaʼapünaa tü mmakat sümaa nacheküinjachin niain aluwataain naaʼu. Nüküjapejeʼe Satanás aneerüin nakuwaʼipa na wayuukana naluwanaajiraale saaʼu nakuwaʼipa namüiwaʼa (Gén. 3:1-5). Nuuʼulaain Jehová naluwanaajiraain na wayuukana saaʼu nakuwaʼipa namüiwaʼa süpüla sütüjaanüin aaʼu alawaain tü nümakat Satanás. Wainma müliaa eeka sutuma naluwataain na wayuukana (Ecl. 8:9). Nnojoishii nükaalinjain Jehová na aluwataakana süpüla nanouteʼerüin tü alatakat maaʼulu. Naaʼinrüle tia, eesü süpüla jülüjain naaʼin waneinnua wayuu anain sukuwaʼipa aluwatawaa natuma na wayuukana.

6. ¿Jamüsü wayaawatüinjatka saaʼu lotuin süpüshuaʼa tü naainjakat Jehová sümaa alin waya nüpüla?

⁶ Eesü wanaawale tü wachuntakat nümüin Jehová sümaa naatawalin tü naaʼinrakat süpüla nusoutuin shiʼipajee wamüin. Jamüshijaʼa Ezequías chi aluwataaikai saaʼu Judá, nuchuntuin maʼin nümüin Jehová naawaleʼerüinjachin nia suulia wanee ayuulii aisü maʼin, anaka nia nutuma Jehová (2 Rey. 20:1-6). Nuchuntuin maʼin Pablo nümüin Jehová nüsünneʼerüinjatüin nuulia «wanee kasa makat aka saaʼin keipüse sünainka» niʼiruku. Eesüjaʼa süpüla shiain wanee ayuulii tia makat. Nnojoipejeʼe naawaleʼerüin nia Jehová (2 Cor. 12:7-9). Jülüjataa waaʼin tü alatakat nümüin Santiago otta Pedro. Oʼutunee aaʼinchii naya nutuma Herodes chi aluwataaikai. Achuntushii na anoujashiikana naaʼu Pedro otta eeshiijaʼa nachuntule naaʼu Santiago. Oʼutunapejeʼe aaʼin Santiago, niaka oʼttaain Pedro nutuma wanee aapiee (Aluw. 12:1-11). ¿Jamüshii nnojoliika nuʼtteʼerüin naya Jehová piamaleʼeya? Nnojotsü süküjain tia tü Bibliakat.c Watüjaapejeʼe saaʼu matüjain Jehová aainjaa kasa mojusü (Deut. 32:4). Otta müsia, watüjaa aaʼu alin Pedro otta Santiago nüpüla Jehová (Apoc. 21:14). Eesüjaʼa nnojorüle nusoutuin Jehová shiʼipajee tü wachuntakat nümüin maʼaka wacheküin shia. Sutuma wayaawatüin saaʼu lotuin süpüshuaʼa tü kasa naainjakat Jehová sümaa alin waya nüpüla, nnojoleerü mojuin wamüin tü naainjakat süpüla nusoutuin shiʼipajee tü wachuntakat nümüin (Job 33:13).

7. ¿Jamüsü nnojoluinjatka wayoujireʼerüin wakuwaʼipa namaa na waneinnua?

⁷ Nnojotsü wayoujireʼerüinjatüin wakuwaʼipa sümaa nakuwaʼipa na waneinnua. Eesüjaʼa pansaale wanüiki nümüin Jehová wachuntapa wanee kasa nümüin sümaa nnojoluin naapüin shia wamüin. Eesüjaʼa waapüle nüchiki wanee wawala nuchuntuin tü wachuntakat nümüin Maleiwa sümaa müin nusoutakai aaʼin Jehová nümüin waaʼinruʼu. Alatüsia tia sümüin wanee wawala kanüliasü Ana. Suchuntuin nümüin Jehová naaʼu Matthew, chi suʼwayuusekai, süpüla naawaleʼerüin nia suulia tü kansetkat. Wanaapünaa sümaa tia, eejatü piamasü wawalayuu laülaayuu kanainkana kanset. Achuntusü maʼin Ana naaʼu Matthew otta naaʼu naya wawalayuukana. Aawalaashii na piamashiikana wawalayuu. Eekajasaʼa Matthew, anaajaashi. «¿Nükaalinjainche Jehová naya wawalayuukana? Naaʼinrülejeʼeya tia, ¿jamaka nnojoika naawaleʼerüin chi taʼwayuusekai?», maa müsü saaʼin Ana. Isasü wachiki waküjain jamüin naawalaaka naya piamashiikana wawalayuu. Tü watüjaakat maʼin aaʼu shia najaʼttirüinjatüin Maleiwa süpüshuaʼa tü müliakalü atuma waaʼin jee nüsoʼireʼereein maʼin naaʼin na naʼaleewainyuu outuinnapakana (Job 14:15).

8. (1) Sünainjee tü sümakat Isaías 43:2, ¿kasa naaʼinraka Jehová süpüla nükaalinjain waya? (2) ¿Jamüsü anaka wakuwaʼipa woʼuraajüle nümüin Jehová soʼunnaa müliaa? (Pünaja tü videokot Nükatsüinrüin waaʼin Maleiwa wachuntule nümüin).

⁸ Nükaalinjeena waya Jehová waneepia. Chi Washikai Jehová, chi aipüraikai waya, nnojotsü nücheküin müliainjanain waya (Is. 63:9). Nuuʼulaain Jehová weʼrüin müliaa, tü makalü aka saaʼin süchi jee siki (paashajeʼera Isaías 43:2). Nüküjapejeʼe wamüin nükaalinjeenain waya süpüla walatüin süchikumüin tia. Jaʼitairü kasain maʼin tü müliaa weʼrakat maaʼulu, ayateena nükaalinjain waya Jehová süpüla aleewain maʼin waya nümaa soʼunnaa tia. Naapüinña wamüin Jehová tü nüpülainkat süpüla wachecherüin waaʼin (Luc. 11:13; Filip. 4:13). Tü wayaawatakat sünainjee tia, shia naapeerüin wamüin Jehová tü kasa choʼujaakat süpüla wachecherüin waaʼin soʼunnaa müliaa otta süpüla waneepiain waya nümaa.d

WAAʼINRAJATKA SÜPÜLA NUSOUTUIN WAMÜIN JEHOVÁ

9. Saashin Santiago 1:6, 7, ¿jamüsü weʼitaainjatka waaʼin sünain nükaalinjeenain waya Jehová?

⁹ Keeʼireesü naaʼin Jehová weʼitaain waaʼin nünain (Heb. 11:6). Eesüjaʼa jülüjale waaʼin nnojoleerüin sajaʼttüin wanee müliaa weʼraka. Eesüjaʼa wainmajüle waaʼin shiimainre nükaalinjeenain waya Jehová. Süküjapejeʼe tü Bibliakat nükaalinjeenain waya Maleiwa sükajee tü nüpülainkat, meerü walatakai saaʼin «süsepü wanee pueulo» (Sal. 18:29). Suulialeʼeya wainmajüin waaʼin sünain nükaalinjeenain waya Jehová, anashii kanoulale waya sünain achuntaa nümüin sümaa waʼatapajüin naapeerüin wamüin tü kasa choʼujaakat wamüin (paashajeʼera Santiago 1:6, 7).

10. Püküja tü eekat süpüla naaʼinrüin wanee wawala süchikijee nuchuntuin wanee kasa nümüin Jehová.

¹⁰ Keeʼireesü naaʼin Jehová wachajaain sukuwaʼipa süpüla naapüin wamüin tü wachuntakat nümüin. Eesüjaʼa nuchuntule wanee wawala kaalinwaa nümüin Jehová süpüla nuchuntuin kaʼi nümüin chi nülaamainkai süpüla nuʼunuin sünain tü outkajawaakat miyoʼu. ¿Jamüshi süpüla nükaalinjain nia Jehová shiʼipajee tü nuchuntakat nümüin? Eesüjaʼa süpüla naapüin Jehová nümüin yalayalaa aaʼin süpüla naashajaain nümaa chi nülaamainkai. Nnojoishi jimatüinjachin neʼe chi wawalakai, oʼunuinjachia nia eemüin chi nülaamainkai. Eeshijaʼa naashajaainjachire kojuyatua nümaa chi nülaamainkai süchiki tia. Eesüjaʼa nuchuntule nümüin anain niiʼiratüle tü kaʼi niʼyataainjatkalü oʼu. Eesüjaʼa nüküjale nümüin chi nülaamainkai nnojoluin choʼujaain nuwalaajüin nümüin tü kaʼi maʼyataainjachikai oʼu nia.

11. ¿Jamüshii woʼuraajüinjanaka kojuyatua süchiki wanee kasa keeʼireeka waaʼin?

¹¹ Anasü nümüin Jehová wachuntawaire süchiirua wanee kasa keeʼireeka waaʼin (1 Tes. 5:17). Sünainjee tü nümakat Jesús, wayaawata aaʼu eein süpüla nnojoluin nusoutamaatüin wamüin Jehová shiʼipajee waneirua kasa wachuntaka nümüin (Luc. 11:9). Nnojo piyüülajaain nnojoire nusoutamaatüin pümüin Jehová. Ayataʼaya puchuntuin tia kojuyatua (Luc. 18:1-7). Paaʼinrüle tia, niʼreerü Jehová keeʼireein maʼin paaʼin tü puchuntakat nümüin otta jaʼyeerü paaʼu kanoulain pia sünain nükaalinjeechin pia.

ANASÜ WEEʼIRATÜLE WANEIRUA KASA WACHUNTAKA NÜMÜIN JEHOVÁ

12. (1) ¿Kasa wasakireʼerüinjatka anain waaʼin süchiki tü kasa wachuntakat nümüin Maleiwa? (2) ¿Jamüsü wasakireʼerüinjatka anain waaʼin tia? (3) ¿Kasa waaʼinrajatka süpüla kojutuin wamüin Jehová sükajee tü kasa wachuntakat nümüin? (Paashajeʼera tü pütchikat «¿Jaʼyasüche taaʼu kojutuin tamüin Jehová sünainjee tü kasa tachuntakat nümüin?»).

¹² Nnojorüle naapüin Jehová wamüin tü wachuntakat nümüin, anasü wasakirüle waaʼin sünain apünüinsü pütchi. Anuu tü palajatkat: «¿Anasüche tü kasa tachuntakat nümüin?». Eesüjaʼa jülüjale waaʼin watüjaain saaʼu tü anainjatkalü atuma wakuwaʼipa, eepejeʼe süpüla nnojoluin anain wakuwaʼipa watta kaʼi sutuma tü kasa jülüjakat waaʼin. Eesüjaʼa süpüla wachuntuin nümüin Jehová wanee kasa süpüla wanoutuin wanee kasa alataka wamüin, eepejeʼe wanee kasa anaka suulia tü wachuntakat nümüin süpüla sunoutuin tü alatakat wamüin. Eesüjaʼa nnojorüle pansaain tü wachuntakat nümüin Jehová sümaa tü nüchekakat (1 Juan 5:14). Jülüjataa waaʼin tü nachuntakat na wawalayuu aashajaanakana achiki suluʼu pütchi waneesia. Nachuntuin nümüin Jehová ayatüinjanain naʼyataain nachonnii nümüin. Müsü anayaakai saaʼin tü nachuntakat, nnojotpejeʼe nüpüleeruain waaʼin Jehová shiiʼiree waʼyataainjanain nümüin. Keeʼireesü naaʼin Jehová waneeküin süka waaʼin wamüiwaʼa waʼwaajüin nia, jaʼitakajeʼe napüleerua na wachonniikana (Deut. 10:12, 13; 30:19, 20). Tü anakat süpüla nachuntuin na wayuukana nümüin Jehová shia natanalüin naaʼin na nachonniikana. Müle shia natuma, eeshii süpüla alin Jehová napüla nachonnii jee aleewain naya nümaa (Prov. 22:6; Éf. 6:4).

13. Saashin Hebreokana 4:16, ¿kasa jülüjaka naaʼin Jehová süpüla nusoutuin shiʼipajee tü wachuntakat nümüin? Püküja süchiki tü nuchuntakat wanee wawala jimaʼai.

¹³ Anuu tü wane kasa wasakireʼerüinjatkalü anain waaʼin: «¿Kettaasüche sükalia süpüla naapüin tamüin Jehová tü tachuntakat nümüin?». Eesüjaʼa jülüjale waaʼin nusoutamaateechin wamüin Jehová shiʼipajee tü wachuntakat nümüin. Niapejeʼe Jehová atüjaaka saaʼu jaralüin tü kaʼi anakalü oʼu süpüla nükaalinjain waya (paashajeʼera Hebreokana 4:16). Eesüjaʼa jülüjale waaʼin nnojoleerüin naapüin wamüin Jehová tü wachuntakat nümüin nnojorüle nusoutamaatüin wamüin. Naapeetpejeʼe shia wamüin soʼu tü kaʼi anakalü oʼu shia nümüin. Jülüjataa waaʼin tü nuchuntakat chi wawala jimaʼai waashajaakai achiki suluʼu pütchi waneesia. Nuchuntuin nümüin Jehová naawaleʼerüinjachin nia suulia tü ayuulii nünainkat. Naaʼinrülejeʼeya Jehová wanee kasa pülasü süpüla anain nia nutuma, nüküjamaatüinje Satanás niʼyataain chia wawalakai nümüin Jehová saaʼujee neʼe anain nia nutuma (Job 1:9-11; 2:4). Watüjaapejeʼe saaʼu niʼitaaitpain Jehová tü kaʼi najaʼttirüinjatkalü oʼu süpüshuaʼa tü ayuuliikat (Is. 33:24; Apoc. 21:3, 4). Müsüjeseʼe nnojoluinjatüin waʼatapajüin naaʼinrüin Jehová wanee kasa pülasü süpüla naawaleʼerüin waya. Anasü nuchuntule chia wawala jimaʼaikai nümüin Jehová katchinwaa aaʼin otta jimataa aaʼin soʼunnaa tü ayuulii nünainkat süpüla ayatüin niʼyataain nümüin (Sal. 29:11).

14. ¿Kasa watüjaka sünainjee tü alatakat sümüin Janice?

¹⁴ Jülüjataa waaʼin tü suchuntakat Janice, tü wawala waashajaakalü achiki suluʼu pütchi piama. Suchuntuin nümüin Jehová shiʼyataainjatüin nümaa chi suʼwayuusekai suluʼu Weteet. Sülatapa jaʼrai juya, shiyaawata aaʼu tü naaʼinrakat Jehová süpüla nusoutuin sümüin. Anuu sünüiki süchiki tia: «Soʼunnaa jaʼrai juya nikirajüin taya Jehová sünain waneirua kasa jee nükaalinjain taya süpüla tanoutuin takuwaʼipa. Soʼunnaa tia, nnojotpuʼusü teʼitaain maʼin taaʼin nünain Jehová otta nnojotpuʼusü tekirajaain maʼin sünain tü Bibliakat. Otta müsia tayaawata aaʼu eein süpüla talatüin taya sünain aʼyatawaa nümüin Jehová eepünaale taya». Mapa, aneekünüshii naya süpüla nalapalaain naaʼu na wawalayuukana. Müsü Janice sotopa saaʼin tü alatakat sümüin paala: «Asoutushi Jehová shiʼipajee tü kasa tachuntakat nümüin, shiajaʼa neʼe waneejatüin sukuwaʼipa nutuma. Tayaawata aaʼu mapa anashaatain maʼin tü naapakat Jehová tamüin. Taapüin analuʼutka nümüin Maleiwa saaʼujee alin taya nüpüla jee kamaneein nia tamüin».

15. ¿Jamüsü anaka wachuntule nümüin Jehová sooʼomüin tü keeʼireekat waaʼin? (Piirakaa sümüin tü ayaakuaakat).

¹⁵ Anuu tü chiiruaajatkat pütchi wasakireʼerüinjatka anain waaʼin: «¿Taküjainjatche nümüin Maleiwa sooʼomüin tü keeʼireekat taaʼin?». Anasü wachuntule nümüin Maleiwa wanee kasa keeʼireeka waaʼin, eejeetpejeʼe kaʼi anaka oʼu waküjale nümüin sooʼomüin tü keeʼireekat waaʼin. Müle shia watuma, eesüjaʼa wayaawatüle saaʼu tü nüchekakat Maleiwa wapüleerua. Jülüjataa waaʼin tü suchuntakat tü wawala majayülü waashajaakalü achiki suluʼu pütchi waneesia. Suchuntuin nümüin Maleiwa suʼuneein sünain tü Ekirajawaa napülajatkat na Aküjaliikana Pütchi. Sümaʼainruʼu suchuntuin tia, eesü süpüla suchuntuin nümüin Maleiwa sükooʼomüinreein tü shiʼyataainkat nümüin (Aluw. 16:9, 10). Süpüla pansaain tü saaʼinrakat sümaa tü suchuntakat nümüin Jehová, eeshi süpüla süsakirüin chi wawala alapalaaikai naaʼu na wawalayuukana süchiirua wanee outkajaalee eere choʼujaain pürekutsoot. Eesü süpüla suluwataain wanee karaloʼuta sümüin Weteet süpüla sütüjaain saaʼu jalain choʼujaain aküjalii pütchi.e

16. ¿Kasa watüjaaka maʼin aaʼu?

¹⁶ Wekirajaaitpa anain nusoutuin Jehová shiʼipajee tü wachuntakat nümüin saaʼujee alin waya nüpüla jee matüjain nia aainjaa kasa mojusü (Sal. 4:3; Is. 30:18). Eesüjaʼa nnojorüle naapüin wamüin Jehová tü wachuntakat nümüin maʼaka wacheküin shia. Watüjaapejeʼe saaʼu naapajeerüin wanüiki Jehová woʼuraajapa nümüin, aishii waya nüpüla jee nnojoleena nüpütüin waya wamüiwaʼa (Sal. 9:10). Ayataʼaya jiʼitaain maʼin jaaʼin nünain Jehová. Jüküja nümüin süpüshuaʼa tü suluʼukat jaaʼin (Sal. 62:8).